| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
១០. ទុតិយរាគសុត្តំ
10. Dutiyarāgasuttaṃ
៦៩. វុត្តញ្ហេតំ ភគវតា, វុត្តមរហតាតិ មេ សុតំ –
69. Vuttañhetaṃ bhagavatā, vuttamarahatāti me sutaṃ –
‘‘យស្ស កស្សចិ, ភិក្ខវេ, ភិក្ខុស្ស វា ភិក្ខុនិយា វា រាគោ អប្បហីនោ, ទោសោ អប្បហីនោ, មោហោ អប្បហីនោ – អយំ វុច្ចតិ, ភិក្ខវេ, ន ‘អតរិ 1 សមុទ្ទំ សឩមិំ សវីចិំ សាវដ្ដំ សគហំ សរក្ខសំ’។ យស្ស កស្សចិ, ភិក្ខវេ, ភិក្ខុស្ស វា ភិក្ខុនិយា វា រាគោ បហីនោ, ទោសោ បហីនោ, មោហោ បហីនោ – អយំ វុច្ចតិ, ភិក្ខវេ, ‘អតរិ សមុទ្ទំ សឩមិំ សវីចិំ សាវដ្ដំ សគហំ សរក្ខសំ, តិណ្ណោ បារង្គតោ 2 ថលេ តិដ្ឋតិ ព្រាហ្មណោ’’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Yassa kassaci, bhikkhave, bhikkhussa vā bhikkhuniyā vā rāgo appahīno, doso appahīno, moho appahīno – ayaṃ vuccati, bhikkhave, na ‘atari 3 samuddaṃ saūmiṃ savīciṃ sāvaṭṭaṃ sagahaṃ sarakkhasaṃ’. Yassa kassaci, bhikkhave, bhikkhussa vā bhikkhuniyā vā rāgo pahīno, doso pahīno, moho pahīno – ayaṃ vuccati, bhikkhave, ‘atari samuddaṃ saūmiṃ savīciṃ sāvaṭṭaṃ sagahaṃ sarakkhasaṃ, tiṇṇo pāraṅgato 4 thale tiṭṭhati brāhmaṇo’’’ti. Etamatthaṃ bhagavā avoca. Tatthetaṃ iti vuccati –
‘‘យស្ស រាគោ ច ទោសោ ច, អវិជ្ជា ច វិរាជិតា;
‘‘Yassa rāgo ca doso ca, avijjā ca virājitā;
សោមំ សមុទ្ទំ សគហំ សរក្ខសំ, សឩមិភយំ ទុត្តរំ អច្ចតារិ។
Somaṃ samuddaṃ sagahaṃ sarakkhasaṃ, saūmibhayaṃ duttaraṃ accatāri.
‘‘សង្គាតិគោ មច្ចុជហោ និរូបធិ, បហាសិ ទុក្ខំ អបុនព្ភវាយ;
‘‘Saṅgātigo maccujaho nirūpadhi, pahāsi dukkhaṃ apunabbhavāya;
អត្ថង្គតោ សោ ន បមាណមេតិ, អមោហយិ មច្ចុរាជន្តិ ព្រូមី’’តិ។
Atthaṅgato so na pamāṇameti, amohayi maccurājanti brūmī’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ទសមំ។
Ayampi attho vutto bhagavatā, iti me sutanti. Dasamaṃ.
ទុតិយោ វគ្គោ និដ្ឋិតោ។
Dutiyo vaggo niṭṭhito.
តស្សុទ្ទានំ –
Tassuddānaṃ –
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ១០. ទុតិយរាគសុត្តវណ្ណនា • 10. Dutiyarāgasuttavaṇṇanā
