| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
১০. দুতিযরাগসুত্তৰণ্ণনা
10. Dutiyarāgasuttavaṇṇanā
৬৯. দসমে অতরীতি তিণ্ণো, ন তিণ্ণো অতিণ্ণো। সমুদ্দন্তি সংসারসমুদ্দং, চক্খাযতনাদিসমুদ্দং ৰা। তদুভযম্পি দুপ্পূরণট্ঠেন সমুদ্দো ৰিযাতি সমুদ্দং। অথ ৰা সমুদ্দনট্ঠেন সমুদ্দং, কিলেসৰস্সনেন সত্তসন্তানস্স কিলেসসদনতোতি অত্থো। সৰীচিন্তি কোধূপাযাসৰীচীহি সৰীচিং। ৰুত্তঞ্হেতং ‘‘ৰীচিভযন্তি খো, ভিক্খু, কোধূপাযাসস্সেতং অধিৰচন’’ন্তি (ইতিৰু॰ ১০৯; ম॰ নি॰ ২.১৬২)। সাৰট্টন্তি পঞ্চকামগুণাৰট্টেহি সহ আৰট্টং। ৰুত্তম্পি চেতং ‘‘আৰট্টভযন্তি খো, ভিক্খু, পঞ্চন্নেতং কামগুণানং অধিৰচন’’ন্তি (ইতিৰু॰ ১০৯; ম॰ নি॰ ২.১৬৪; অ॰ নি॰ ৪.১২২)। সগহং সরক্খসন্তি অত্তনো গোচরগতানং অনত্থজননতো চণ্ডমকরমচ্ছকচ্ছপরক্খসসদিসেহি ৰিসভাগপুগ্গলেহি সহিতং। তথা চাহ ‘‘সগহং সরক্খসন্তি খো, ভিক্খু, মাতুগামস্সেতং অধিৰচন’’ন্তি (ইতিৰু॰ ১০৯)। অতরীতি মগ্গপঞ্ঞানাৰায যথাৰুত্তং সমুদ্দং উত্তরি। তিণ্ণোতি নিত্তিণ্ণো। পারঙ্গতোতি তস্স সমুদ্দস্স পারং পরতীরং নিরোধং উপগতো। থলে তিট্ঠতীতি ততো এৰ সংসারমহোঘং কামাদিমহোঘঞ্চ অতিক্কমিত্ৰা থলে পরতীরে নিব্বানে বাহিতপাপব্রাহ্মণো তিট্ঠতীতি ৰুচ্চতি।
69. Dasame atarīti tiṇṇo, na tiṇṇo atiṇṇo. Samuddanti saṃsārasamuddaṃ, cakkhāyatanādisamuddaṃ vā. Tadubhayampi duppūraṇaṭṭhena samuddo viyāti samuddaṃ. Atha vā samuddanaṭṭhena samuddaṃ, kilesavassanena sattasantānassa kilesasadanatoti attho. Savīcinti kodhūpāyāsavīcīhi savīciṃ. Vuttañhetaṃ ‘‘vīcibhayanti kho, bhikkhu, kodhūpāyāsassetaṃ adhivacana’’nti (itivu. 109; ma. ni. 2.162). Sāvaṭṭanti pañcakāmaguṇāvaṭṭehi saha āvaṭṭaṃ. Vuttampi cetaṃ ‘‘āvaṭṭabhayanti kho, bhikkhu, pañcannetaṃ kāmaguṇānaṃ adhivacana’’nti (itivu. 109; ma. ni. 2.164; a. ni. 4.122). Sagahaṃ sarakkhasanti attano gocaragatānaṃ anatthajananato caṇḍamakaramacchakacchaparakkhasasadisehi visabhāgapuggalehi sahitaṃ. Tathā cāha ‘‘sagahaṃ sarakkhasanti kho, bhikkhu, mātugāmassetaṃ adhivacana’’nti (itivu. 109). Atarīti maggapaññānāvāya yathāvuttaṃ samuddaṃ uttari. Tiṇṇoti nittiṇṇo. Pāraṅgatoti tassa samuddassa pāraṃ paratīraṃ nirodhaṃ upagato. Thale tiṭṭhatīti tato eva saṃsāramahoghaṃ kāmādimahoghañca atikkamitvā thale paratīre nibbāne bāhitapāpabrāhmaṇo tiṭṭhatīti vuccati.
ইধাপি গাথা সুক্কপক্খৰসেনেৰ আগতা। তত্থ ঊমিভযন্তি যথাৰুত্তঊমিভযং, ভাযিতব্বং এতস্মাতি তং ঊমি ভযং। দুত্তরন্তি দুরতিক্কমং। অচ্চতারীতি অতিক্কমি।
Idhāpi gāthā sukkapakkhavaseneva āgatā. Tattha ūmibhayanti yathāvuttaūmibhayaṃ, bhāyitabbaṃ etasmāti taṃ ūmi bhayaṃ. Duttaranti duratikkamaṃ. Accatārīti atikkami.
সঙ্গাতিগোতি রাগাদীনং পঞ্চন্নং সঙ্গানং অতিক্কন্তত্তা পহীনত্তা সঙ্গাতিগো। অত্থঙ্গতো সো ন পমাণমেতীতি সো এৰংভূতো অরহা রাগাদীনং পমাণকরধম্মানং অচ্চন্তমেৰ অত্থং গতত্তা অত্থঙ্গতো, ততো এৰ সীলাদিধম্মক্খন্ধপারিপূরিযা চ ‘‘এদিসো সীলেন সমাধিনা পঞ্ঞাযা’’তি কেনচি পমিণিতুং অসক্কুণেয্যো পমাণং ন এতি, অথ ৰা অনুপাদিসেসনিব্বানসঙ্খাতং অত্থং গতো সো অরহা ‘‘ইমায নাম গতিযা ঠিতো, এদিসো চ নামগোত্তেনা’’তি পমিণিতুং অসক্কুণেয্যতায পমাণং ন এতি ন উপগচ্ছতি। ততো এৰ অমোহযি মচ্চুরাজং, তেন অনুবন্ধিতুং অসক্কুণেয্যোতি ৰদামীতি অনুপাদিসেসনিব্বানধাতুযাৰ দেসনং নিট্ঠাপেসি। ইতি ইমস্মিং ৰগ্গে পঠমপঞ্চমছট্ঠেসু ৰট্টং কথিতং, দুতিযসত্তমঅট্ঠমেসু ৰিৰট্টং, সেসেসু ৰট্টৰিৰট্টং কথিতন্তি ৰেদিতব্বং।
Saṅgātigoti rāgādīnaṃ pañcannaṃ saṅgānaṃ atikkantattā pahīnattā saṅgātigo. Atthaṅgato so na pamāṇametīti so evaṃbhūto arahā rāgādīnaṃ pamāṇakaradhammānaṃ accantameva atthaṃ gatattā atthaṅgato, tato eva sīlādidhammakkhandhapāripūriyā ca ‘‘ediso sīlena samādhinā paññāyā’’ti kenaci pamiṇituṃ asakkuṇeyyo pamāṇaṃ na eti, atha vā anupādisesanibbānasaṅkhātaṃ atthaṃ gato so arahā ‘‘imāya nāma gatiyā ṭhito, ediso ca nāmagottenā’’ti pamiṇituṃ asakkuṇeyyatāya pamāṇaṃ na eti na upagacchati. Tato eva amohayi maccurājaṃ, tena anubandhituṃ asakkuṇeyyoti vadāmīti anupādisesanibbānadhātuyāva desanaṃ niṭṭhāpesi. Iti imasmiṃ vagge paṭhamapañcamachaṭṭhesu vaṭṭaṃ kathitaṃ, dutiyasattamaaṭṭhamesu vivaṭṭaṃ, sesesu vaṭṭavivaṭṭaṃ kathitanti veditabbaṃ.
দসমসুত্তৰণ্ণনা নিট্ঠিতা।
Dasamasuttavaṇṇanā niṭṭhitā.
দুতিযৰগ্গৰণ্ণনা নিট্ঠিতা।
Dutiyavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ১০. দুতিযরাগসুত্তং • 10. Dutiyarāgasuttaṃ
