| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. දුතියරහොගතසුත්‌තං
2. Dutiyarahogatasuttaṃ
900. සාවත්‌ථිනිදානං. අථ ඛො ආයස්‌මතො අනුරුද්‌ධස්‌ස රහොගතස්‌ස පටිසල්‌ලීනස්‌ස එවං චෙතසො පරිවිතක්‌කො උදපාදි – ‘‘යෙසං කෙසඤ්‌චි චත්‌තාරො සතිපට්‌ඨානා විරද්‌ධා, විරද්‌ධො තෙසං අරියො මග්‌ගො සම්‌මා දුක්‌ඛක්‌ඛයගාමී; යෙසං කෙසඤ්‌චි චත්‌තාරො සතිපට්‌ඨානා ආරද්‌ධා, ආරද්‌ධො තෙසං අරියො මග්‌ගො සම්‌මා දුක්‌ඛක්‌ඛයගාමී’’ති.
900. Sāvatthinidānaṃ. Atha kho āyasmato anuruddhassa rahogatassa paṭisallīnassa evaṃ cetaso parivitakko udapādi – ‘‘yesaṃ kesañci cattāro satipaṭṭhānā viraddhā, viraddho tesaṃ ariyo maggo sammā dukkhakkhayagāmī; yesaṃ kesañci cattāro satipaṭṭhānā āraddhā, āraddho tesaṃ ariyo maggo sammā dukkhakkhayagāmī’’ti.
අථ ඛො ආයස්‌මා මහාමොග්‌ගල්‌ලානො ආයස්‌මතො අනුරුද්‌ධස්‌ස චෙතසා චෙතොපරිවිතක්‌කමඤ්‌ඤාය – සෙය්‍යථාපි නාම බලවා පුරිසො සමිඤ්‌ජිතං වා බාහං පසාරෙය්‍ය , පසාරිතං වා බාහං සමිඤ්‌ජෙය්‍ය, එවමෙව – ආයස්‌මතො අනුරුද්‌ධස්‌ස සම්‌මුඛෙ පාතුරහොසි.
Atha kho āyasmā mahāmoggallāno āyasmato anuruddhassa cetasā cetoparivitakkamaññāya – seyyathāpi nāma balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya, evameva – āyasmato anuruddhassa sammukhe pāturahosi.
අථ ඛො ආයස්‌මා මහාමොග්‌ගල්‌ලානො ආයස්‌මන්‌තං අනුරුද්‌ධං එතදවොච – ‘‘කිත්‌තාවතා නු ඛො, ආවුසො අනුරුද්‌ධ, භික්‌ඛුනො චත්‌තාරො සතිපට්‌ඨානා ආරද්‌ධා හොන්‌තී’’ති?
Atha kho āyasmā mahāmoggallāno āyasmantaṃ anuruddhaṃ etadavoca – ‘‘kittāvatā nu kho, āvuso anuruddha, bhikkhuno cattāro satipaṭṭhānā āraddhā hontī’’ti?
‘‘ඉධාවුසො , භික්‌ඛු අජ්‌ඣත්‌තං කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. බහිද්‌ධා කායෙ කායානුපස්‌සී විහරති…පෙ.… අජ්‌ඣත්‌තබහිද්‌ධා කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං.
‘‘Idhāvuso , bhikkhu ajjhattaṃ kāye kāyānupassī viharati ātāpī sampajāno satimā, vineyya loke abhijjhādomanassaṃ. Bahiddhā kāye kāyānupassī viharati…pe… ajjhattabahiddhā kāye kāyānupassī viharati ātāpī sampajāno satimā, vineyya loke abhijjhādomanassaṃ.
‘‘අජ්‌ඣත්‌තං වෙදනාසු වෙදනානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. බහිද්‌ධා වෙදනාසු වෙදනානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. අජ්‌ඣත්‌තබහිද්‌ධා වෙදනාසු වෙදනානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං.
‘‘Ajjhattaṃ vedanāsu vedanānupassī viharati ātāpī sampajāno satimā, vineyya loke abhijjhādomanassaṃ. Bahiddhā vedanāsu vedanānupassī viharati ātāpī sampajāno satimā, vineyya loke abhijjhādomanassaṃ. Ajjhattabahiddhā vedanāsu vedanānupassī viharati ātāpī sampajāno satimā, vineyya loke abhijjhādomanassaṃ.
‘‘අජ්‌ඣත්‌තං චිත්‌තෙ…පෙ.… බහිද්‌ධා චිත්‌තෙ…පෙ.… අජ්‌ඣත්‌තබහිද්‌ධා චිත්‌තෙ චිත්‌තානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං.
‘‘Ajjhattaṃ citte…pe… bahiddhā citte…pe… ajjhattabahiddhā citte cittānupassī viharati ātāpī sampajāno satimā, vineyya loke abhijjhādomanassaṃ.
‘‘අජ්‌ඣත්‌තං ධම්‌මෙසු…පෙ.… බහිද්‌ධා ධම්‌මෙසු…පෙ.… අජ්‌ඣත්‌තබහිද්‌ධා ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. එත්‌තාවතා ඛො, ආවුසො, භික්‌ඛුනො චත්‌තාරො සතිපට්‌ඨානා ආරද්‌ධා හොන්‌තී’’ති. දුතියං.
‘‘Ajjhattaṃ dhammesu…pe… bahiddhā dhammesu…pe… ajjhattabahiddhā dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Ettāvatā kho, āvuso, bhikkhuno cattāro satipaṭṭhānā āraddhā hontī’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-2. පඨමරහොගතසුත්‌තාදිවණ්‌ණනා • 1-2. Paṭhamarahogatasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-2. පඨමරහොගතසුත්‌තාදිවණ්‌ණනා • 1-2. Paṭhamarahogatasuttādivaṇṇanā
