| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. து³தியராஹுலஸுத்தங்
10. Dutiyarāhulasuttaṃ
92. ஸாவத்தி²னிதா³னங். ஏகமந்தங் நிஸின்னோ கோ² ஆயஸ்மா ராஹுலோ ப⁴க³வந்தங் ஏதத³வோச – ‘‘கத²ங் நு கோ², ப⁴ந்தே, ஜானதோ கத²ங் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானாபக³தங் மானஸங் ஹோதி விதா⁴ஸமதிக்கந்தங் ஸந்தங் ஸுவிமுத்த’’ந்தி? ‘‘யங் கிஞ்சி, ராஹுல, ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா…பே॰… யங் தூ³ரே ஸந்திகே வா, ஸப்³ப³ங் ரூபங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா அனுபாதா³ விமுத்தோ ஹோதி. யா காசி வேத³னா… யா காசி ஸஞ்ஞா… யே கேசி ஸங்கா²ரா… யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, ஸப்³ப³ங் விஞ்ஞாணங் ‘நேதங் மம, நேஸோஹமஸ்மி, ந மேஸோ அத்தா’தி ஏவமேதங் யதா²பூ⁴தங் ஸம்மப்பஞ்ஞாய தி³ஸ்வா அனுபாதா³ விமுத்தோ ஹோதி. ஏவங் கோ², ராஹுல , ஜானதோ ஏவங் பஸ்ஸதோ இமஸ்மிஞ்ச ஸவிஞ்ஞாணகே காயே ப³ஹித்³தா⁴ ச ஸப்³ப³னிமித்தேஸு அஹங்காரமமங்காரமானாபக³தங் மானஸங் ஹோதி விதா⁴ ஸமதிக்கந்தங் ஸந்தங் ஸுவிமுத்த’’ந்தி. த³ஸமங்.
92. Sāvatthinidānaṃ. Ekamantaṃ nisinno kho āyasmā rāhulo bhagavantaṃ etadavoca – ‘‘kathaṃ nu kho, bhante, jānato kathaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṃ mānasaṃ hoti vidhāsamatikkantaṃ santaṃ suvimutta’’nti? ‘‘Yaṃ kiñci, rāhula, rūpaṃ atītānāgatapaccuppannaṃ ajjhattaṃ vā bahiddhā vā…pe… yaṃ dūre santike vā, sabbaṃ rūpaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya disvā anupādā vimutto hoti. Yā kāci vedanā… yā kāci saññā… ye keci saṅkhārā… yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, sabbaṃ viññāṇaṃ ‘netaṃ mama, nesohamasmi, na meso attā’ti evametaṃ yathābhūtaṃ sammappaññāya disvā anupādā vimutto hoti. Evaṃ kho, rāhula , jānato evaṃ passato imasmiñca saviññāṇake kāye bahiddhā ca sabbanimittesu ahaṅkāramamaṅkāramānāpagataṃ mānasaṃ hoti vidhā samatikkantaṃ santaṃ suvimutta’’nti. Dasamaṃ.
தே²ரவக்³கோ³ நவமோ.
Theravaggo navamo.
தஸ்ஸுத்³தா³னங் –
Tassuddānaṃ –
ஆனந்தோ³ திஸ்ஸோ யமகோ, அனுராதோ⁴ ச வக்கலி;
Ānando tisso yamako, anurādho ca vakkali;
அஸ்ஸஜி கே²மகோ ச²ன்னோ, ராஹுலா அபரே து³வே.
Assaji khemako channo, rāhulā apare duve.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9-10. ராஹுலஸுத்தாதி³வண்ணனா • 9-10. Rāhulasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9-10. ராஹுலஸுத்தாதி³வண்ணனா • 9-10. Rāhulasuttādivaṇṇanā
