| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
6. දුතියරංසිසඤ්‌ඤකත්‌ථෙරඅපදානවණ්‌ණනා
6. Dutiyaraṃsisaññakattheraapadānavaṇṇanā
පබ්‌බතෙ හිමවන්‌තම්‌හීතිආදිකං ආයස්‌මතො දුතියරංසිසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතකුසලො උප්‌පන්‌නුප්‌පන්‌නභවෙ විවට්‌ටූපනිස්‌සයානි පුඤ්‌ඤානි උපචිනන්‌තො ඵුස්‌සස්‌ස භගවතො කාලෙ කුලගෙහෙ නිබ්‌බත්‌තො වුද්‌ධිප්‌පත්‌තො ඝරාවාසං සණ්‌ඨපෙත්‌වා තත්‌ථ දොසං දිස්‌වා තං පහාය තාපසපබ්‌බජ්‌ජං පබ්‌බජිත්‌වා හිමවන්‌තපබ්‌බතෙ වසන්‌තො වාකචීරනිවසනො විවෙකසුඛෙන විහරති. තස්‌මිං සමයෙ සො ඵුස්‌සං භගවන්‌තං තං පදෙසං සම්‌පත්‌තං දිස්‌වා තස්‌ස සරීරතො නික්‌ඛන්‌තඡබ්‌බණ්‌ණබුද්‌ධරංසියො ඉතො චිතො විධාවන්‌තියො දණ්‌ඩදීපිකානික්‌ඛන්‌තවිප්‌ඵුරන්‌තමිව දිස්‌වා තස්‌මිං පසන්‌නො අඤ්‌ජලිං පග්‌ගහෙත්‌වා වන්‌දිත්‌වා චිත්‌තං පසාදෙත්‌වා තෙනෙව පීතිසොමනස්‌සෙන කාලං කත්‌වා තුසිතාදීසු නිබ්‌බත්‌තො තත්‌ථ ඡ කාමාවචරසම්‌පත්‌තියො ච අනුභවිත්‌වා අපරභාගෙ මනුස්‌සසම්‌පත්‌තියො ච අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො වුද්‌ධිප්‌පත්‌තො පුබ්‌බවාසනාවසෙන පබ්‌බජිත්‌වා නචිරස්‌සෙව අරහා අහොසි.
Pabbatehimavantamhītiādikaṃ āyasmato dutiyaraṃsisaññakattherassa apadānaṃ. Ayampi purimabuddhesu katakusalo uppannuppannabhave vivaṭṭūpanissayāni puññāni upacinanto phussassa bhagavato kāle kulagehe nibbatto vuddhippatto gharāvāsaṃ saṇṭhapetvā tattha dosaṃ disvā taṃ pahāya tāpasapabbajjaṃ pabbajitvā himavantapabbate vasanto vākacīranivasano vivekasukhena viharati. Tasmiṃ samaye so phussaṃ bhagavantaṃ taṃ padesaṃ sampattaṃ disvā tassa sarīrato nikkhantachabbaṇṇabuddharaṃsiyo ito cito vidhāvantiyo daṇḍadīpikānikkhantavipphurantamiva disvā tasmiṃ pasanno añjaliṃ paggahetvā vanditvā cittaṃ pasādetvā teneva pītisomanassena kālaṃ katvā tusitādīsu nibbatto tattha cha kāmāvacarasampattiyo ca anubhavitvā aparabhāge manussasampattiyo ca anubhavitvā imasmiṃ buddhuppāde kulagehe nibbatto vuddhippatto pubbavāsanāvasena pabbajitvā nacirasseva arahā ahosi.
35. සො අපරභාගෙ පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පබ්‌බතෙ හිමවන්‌තම්‌හීතිආදිමාහ. තං සබ්‌බං උත්‌තානත්‌ථමෙවාති.
35. So aparabhāge pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Taṃ sabbaṃ uttānatthamevāti.
දුතියරංසිසඤ්‌ඤකත්‌ථෙරඅපදානවණ්‌ණනා සමත්‌තා.
Dutiyaraṃsisaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 6. දුතියරංසිසඤ්‌ඤකත්‌ථෙරඅපදානං • 6. Dutiyaraṃsisaññakattheraapadānaṃ
