| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൬. ദുതിയരംസിസഞ്ഞകത്ഥേരഅപദാനവണ്ണനാ
6. Dutiyaraṃsisaññakattheraapadānavaṇṇanā
പബ്ബതേ ഹിമവന്തമ്ഹീതിആദികം ആയസ്മതോ ദുതിയരംസിസഞ്ഞകത്ഥേരസ്സ അപദാനം. അയമ്പി പുരിമബുദ്ധേസു കതകുസലോ ഉപ്പന്നുപ്പന്നഭവേ വിവട്ടൂപനിസ്സയാനി പുഞ്ഞാനി ഉപചിനന്തോ ഫുസ്സസ്സ ഭഗവതോ കാലേ കുലഗേഹേ നിബ്ബത്തോ വുദ്ധിപ്പത്തോ ഘരാവാസം സണ്ഠപേത്വാ തത്ഥ ദോസം ദിസ്വാ തം പഹായ താപസപബ്ബജ്ജം പബ്ബജിത്വാ ഹിമവന്തപബ്ബതേ വസന്തോ വാകചീരനിവസനോ വിവേകസുഖേന വിഹരതി. തസ്മിം സമയേ സോ ഫുസ്സം ഭഗവന്തം തം പദേസം സമ്പത്തം ദിസ്വാ തസ്സ സരീരതോ നിക്ഖന്തഛബ്ബണ്ണബുദ്ധരംസിയോ ഇതോ ചിതോ വിധാവന്തിയോ ദണ്ഡദീപികാനിക്ഖന്തവിപ്ഫുരന്തമിവ ദിസ്വാ തസ്മിം പസന്നോ അഞ്ജലിം പഗ്ഗഹേത്വാ വന്ദിത്വാ ചിത്തം പസാദേത്വാ തേനേവ പീതിസോമനസ്സേന കാലം കത്വാ തുസിതാദീസു നിബ്ബത്തോ തത്ഥ ഛ കാമാവചരസമ്പത്തിയോ ച അനുഭവിത്വാ അപരഭാഗേ മനുസ്സസമ്പത്തിയോ ച അനുഭവിത്വാ ഇമസ്മിം ബുദ്ധുപ്പാദേ കുലഗേഹേ നിബ്ബത്തോ വുദ്ധിപ്പത്തോ പുബ്ബവാസനാവസേന പബ്ബജിത്വാ നചിരസ്സേവ അരഹാ അഹോസി.
Pabbatehimavantamhītiādikaṃ āyasmato dutiyaraṃsisaññakattherassa apadānaṃ. Ayampi purimabuddhesu katakusalo uppannuppannabhave vivaṭṭūpanissayāni puññāni upacinanto phussassa bhagavato kāle kulagehe nibbatto vuddhippatto gharāvāsaṃ saṇṭhapetvā tattha dosaṃ disvā taṃ pahāya tāpasapabbajjaṃ pabbajitvā himavantapabbate vasanto vākacīranivasano vivekasukhena viharati. Tasmiṃ samaye so phussaṃ bhagavantaṃ taṃ padesaṃ sampattaṃ disvā tassa sarīrato nikkhantachabbaṇṇabuddharaṃsiyo ito cito vidhāvantiyo daṇḍadīpikānikkhantavipphurantamiva disvā tasmiṃ pasanno añjaliṃ paggahetvā vanditvā cittaṃ pasādetvā teneva pītisomanassena kālaṃ katvā tusitādīsu nibbatto tattha cha kāmāvacarasampattiyo ca anubhavitvā aparabhāge manussasampattiyo ca anubhavitvā imasmiṃ buddhuppāde kulagehe nibbatto vuddhippatto pubbavāsanāvasena pabbajitvā nacirasseva arahā ahosi.
൩൫. സോ അപരഭാഗേ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ പബ്ബതേ ഹിമവന്തമ്ഹീതിആദിമാഹ. തം സബ്ബം ഉത്താനത്ഥമേവാതി.
35. So aparabhāge pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Taṃ sabbaṃ uttānatthamevāti.
ദുതിയരംസിസഞ്ഞകത്ഥേരഅപദാനവണ്ണനാ സമത്താ.
Dutiyaraṃsisaññakattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൬. ദുതിയരംസിസഞ്ഞകത്ഥേരഅപദാനം • 6. Dutiyaraṃsisaññakattheraapadānaṃ
