| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൪. ദുതിയരൂപാരാമസുത്തം
4. Dutiyarūpārāmasuttaṃ
൧൩൭. ‘‘രൂപാരാമാ, ഭിക്ഖവേ, ദേവമനുസ്സാ രൂപരതാ രൂപസമ്മുദിതാ. രൂപവിപരിണാമവിരാഗനിരോധാ ദുക്ഖാ, ഭിക്ഖവേ, ദേവമനുസ്സാ വിഹരന്തി. സദ്ദാരാമാ… ഗന്ധാരാമാ… രസാരാമാ … ഫോട്ഠബ്ബാരാമാ… ധമ്മാരാമാ, ഭിക്ഖവേ, ദേവമനുസ്സാ ധമ്മരതാ ധമ്മസമ്മുദിതാ. ധമ്മവിപരിണാമവിരാഗനിരോധാ ദുക്ഖാ, ഭിക്ഖവേ, ദേവമനുസ്സാ വിഹരന്തി. തഥാഗതോ ച, ഭിക്ഖവേ, അരഹം സമ്മാസമ്ബുദ്ധോ രൂപാനം സമുദയഞ്ച അത്ഥങ്ഗമഞ്ച അസ്സാദഞ്ച ആദീനവഞ്ച നിസ്സരണഞ്ച യഥാഭൂതം വിദിത്വാ ന രൂപാരാമോ ന രൂപരതോ ന രൂപസമ്മുദിതോ. രൂപവിപരിണാമവിരാഗനിരോധാ സുഖോ, ഭിക്ഖവേ, തഥാഗതോ വിഹരതി. സദ്ദാനം… ഗന്ധാനം… രസാനം… ഫോട്ഠബ്ബാനം… ധമ്മാനം സമുദയഞ്ച അത്ഥങ്ഗമഞ്ച അസ്സാദഞ്ച ആദീനവഞ്ച നിസ്സരണഞ്ച യഥാഭൂതം വിദിത്വാ ന ധമ്മാരാമോ ന ധമ്മരതോ ന ധമ്മസമ്മുദിതോ. ധമ്മവിപരിണാമവിരാഗനിരോധാ സുഖോ, ഭിക്ഖവേ, തഥാഗതോ വിഹരതീ’’തി. ചതുത്ഥം.
137. ‘‘Rūpārāmā, bhikkhave, devamanussā rūparatā rūpasammuditā. Rūpavipariṇāmavirāganirodhā dukkhā, bhikkhave, devamanussā viharanti. Saddārāmā… gandhārāmā… rasārāmā … phoṭṭhabbārāmā… dhammārāmā, bhikkhave, devamanussā dhammaratā dhammasammuditā. Dhammavipariṇāmavirāganirodhā dukkhā, bhikkhave, devamanussā viharanti. Tathāgato ca, bhikkhave, arahaṃ sammāsambuddho rūpānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā na rūpārāmo na rūparato na rūpasammudito. Rūpavipariṇāmavirāganirodhā sukho, bhikkhave, tathāgato viharati. Saddānaṃ… gandhānaṃ… rasānaṃ… phoṭṭhabbānaṃ… dhammānaṃ samudayañca atthaṅgamañca assādañca ādīnavañca nissaraṇañca yathābhūtaṃ viditvā na dhammārāmo na dhammarato na dhammasammudito. Dhammavipariṇāmavirāganirodhā sukho, bhikkhave, tathāgato viharatī’’ti. Catutthaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൪-൧൨. ദുതിയരൂപാരാമസുത്താദിവണ്ണനാ • 4-12. Dutiyarūpārāmasuttādivaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൪-൧൨. ദുതിയരൂപാരാമസുത്താദിവണ്ണനാ • 4-12. Dutiyarūpārāmasuttādivaṇṇanā
