| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. දුතියසද්‌ධාසුත්‌තං
2. Dutiyasaddhāsuttaṃ
72. ‘‘සද්‌ධො ච, භික්‌ඛවෙ, භික්‌ඛු හොති, නො ච සීලවා. එවං සො තෙනඞ්‌ගෙන අපරිපූරො හොති. තෙන තං අඞ්‌ගං පරිපූරෙතබ්‌බං – ‘කින්‌තාහං සද්‌ධො ච අස්‌සං සීලවා චා’ති. යතො ච ඛො, භික්‌ඛවෙ, භික්‌ඛු සද්‌ධො ච හොති සීලවා ච, එවං සො තෙනඞ්‌ගෙන පරිපූරො හොති.
72. ‘‘Saddho ca, bhikkhave, bhikkhu hoti, no ca sīlavā. Evaṃ so tenaṅgena aparipūro hoti. Tena taṃ aṅgaṃ paripūretabbaṃ – ‘kintāhaṃ saddho ca assaṃ sīlavā cā’ti. Yato ca kho, bhikkhave, bhikkhu saddho ca hoti sīlavā ca, evaṃ so tenaṅgena paripūro hoti.
‘‘සද්‌ධො ච, භික්‌ඛවෙ, භික්‌ඛු හොති සීලවා ච, නො ච බහුස්‌සුතො…පෙ.… බහුස්‌සුතො ච, නො ච ධම්‌මකථිකො…පෙ.… ධම්‌මකථිකො ච, නො ච පරිසාවචරො…පෙ.… පරිසාවචරො ච, නො ච විසාරදො පරිසාය ධම්‌මං දෙසෙති …පෙ.… විසාරදො ච පරිසාය ධම්‌මං දෙසෙති, නො ච යෙ තෙ සන්‌තා විමොක්‌ඛා අතික්‌කම්‌ම රූපෙ ආරුප්‌පා තෙ කායෙන ඵුසිත්‌වා විහරති…පෙ.… යෙ තෙ සන්‌තා විමොක්‌ඛා අතික්‌කම්‌ම රූපෙ ආරුප්‌පා තෙ කායෙන ඵුසිත්‌වා විහරති, නො ච ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරති; එවං සො තෙනඞ්‌ගෙන අපරිපූරො හොති. තෙන තං අඞ්‌ගං පරිපූරෙතබ්‌බං – ‘කින්‌තාහං සද්‌ධො ච අස්‌සං, සීලවා ච, බහුස්‌සුතො ච, ධම්‌මකථිකො ච, පරිසාවචරො ච, විසාරදො ච පරිසාය ධම්‌මං දෙසෙය්‍යං, යෙ තෙ සන්‌තා විමොක්‌ඛා අතික්‌කම්‌ම රූපෙ ආරුප්‌පා තෙ කායෙන ඵුසිත්‌වා විහරෙය්‍යං, ආසවානඤ්‌ච ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරෙය්‍ය’’’න්‌ති.
‘‘Saddho ca, bhikkhave, bhikkhu hoti sīlavā ca, no ca bahussuto…pe… bahussuto ca, no ca dhammakathiko…pe… dhammakathiko ca, no ca parisāvacaro…pe… parisāvacaro ca, no ca visārado parisāya dhammaṃ deseti …pe… visārado ca parisāya dhammaṃ deseti, no ca ye te santā vimokkhā atikkamma rūpe āruppā te kāyena phusitvā viharati…pe… ye te santā vimokkhā atikkamma rūpe āruppā te kāyena phusitvā viharati, no ca āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati; evaṃ so tenaṅgena aparipūro hoti. Tena taṃ aṅgaṃ paripūretabbaṃ – ‘kintāhaṃ saddho ca assaṃ, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṃ deseyyaṃ, ye te santā vimokkhā atikkamma rūpe āruppā te kāyena phusitvā vihareyyaṃ, āsavānañca khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja vihareyya’’’nti.
‘‘යතො ච ඛො, භික්‌ඛවෙ, භික්‌ඛු සද්‌ධො ච හොති, සීලවා ච, බහුස්‌සුතො ච, ධම්‌මකථිකො ච, පරිසාවචරො ච, විසාරදො ච පරිසාය ධම්‌මං දෙසෙති. යෙ තෙ සන්‌තා විමොක්‌ඛා අතික්‌කම්‌ම රූපෙ ආරුප්‌පා තෙ ච කායෙන ඵුසිත්‌වා විහරති, ආසවානඤ්‌ච ඛයා…පෙ.… සච්‌ඡිකත්‌වා උපසම්‌පජ්‌ජ විහරති; එවං සො තෙනඞ්‌ගෙන පරිපූරො හොති. ඉමෙහි ඛො, භික්‌ඛවෙ, අට්‌ඨහි ධම්‌මෙහි සමන්‌නාගතො භික්‌ඛු සමන්‌තපාසාදිකො ච හොති සබ්‌බාකාරපරිපූරො චා’’ති. දුතියං.
‘‘Yato ca kho, bhikkhave, bhikkhu saddho ca hoti, sīlavā ca, bahussuto ca, dhammakathiko ca, parisāvacaro ca, visārado ca parisāya dhammaṃ deseti. Ye te santā vimokkhā atikkamma rūpe āruppā te ca kāyena phusitvā viharati, āsavānañca khayā…pe… sacchikatvā upasampajja viharati; evaṃ so tenaṅgena paripūro hoti. Imehi kho, bhikkhave, aṭṭhahi dhammehi samannāgato bhikkhu samantapāsādiko ca hoti sabbākāraparipūro cā’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-2. සද්‌ධාසුත්‌තද්‌වයවණ්‌ණනා • 1-2. Saddhāsuttadvayavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. සද්‌ධාසුත්‌තාදිවණ්‌ණනා • 1-10. Saddhāsuttādivaṇṇanā
