| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
6. து³தியஸஹஸெய்யஸிக்கா²பத³வண்ணனா
6. Dutiyasahaseyyasikkhāpadavaṇṇanā
55. ச²ட்டே² ‘‘பட²மஸிக்கா²பதே³ ‘பி⁴க்கு²ங் ட²பெத்வா அவஸேஸோ அனுபஸம்பன்னோ நாமா’தி வுத்தத்தா ‘மாதுகா³மோபி அனுபஸம்பன்னக்³க³ஹணேன க³ஹிதோயேவா’தி சதுத்த²தி³வஸே மாதுகா³மேன ஸத்³தி⁴ங் ஸயந்தஸ்ஸ த்³வீஹி ஸிக்கா²பதே³ஹி த்³வே பாசித்தியானி ஹொந்தீ’’தி வத³ந்தி. க³ண்டி²பதே³ஸு பன தீஸுபி ‘‘இமஸ்மிங் ஸிக்கா²பதே³ மாதுகா³மஸ்ஸ விஸுங் வுச்சமானத்தா பட²மஸிக்கா²பதே³ ‘பி⁴க்கு²ங் ட²பெத்வா அவஸேஸோ அனுபஸம்பன்னோ நாமா’தி புரிஸஸ்ஸேவ க³ஹணங் அனுச்ச²விக’’ந்தி வுத்தங், ததே³வ ச யுத்ததரங்.
55. Chaṭṭhe ‘‘paṭhamasikkhāpade ‘bhikkhuṃ ṭhapetvā avaseso anupasampanno nāmā’ti vuttattā ‘mātugāmopi anupasampannaggahaṇena gahitoyevā’ti catutthadivase mātugāmena saddhiṃ sayantassa dvīhi sikkhāpadehi dve pācittiyāni hontī’’ti vadanti. Gaṇṭhipadesu pana tīsupi ‘‘imasmiṃ sikkhāpade mātugāmassa visuṃ vuccamānattā paṭhamasikkhāpade ‘bhikkhuṃ ṭhapetvā avaseso anupasampanno nāmā’ti purisasseva gahaṇaṃ anucchavika’’nti vuttaṃ, tadeva ca yuttataraṃ.
யஞ்ச இத⁴ ‘‘பட²மதி³வஸேபீதி பி-ஸத்³தே³ன சதுத்த²தி³வஸேபீதி வுத்தங் ஹோதீ’’தி காரணங் வத³ந்தி, தம்பி அகாரணங் பி-ஸத்³தோ³ ஸம்பிண்ட³னத்தோ²யேவாதி நியமாபா⁴வதோ அவதா⁴ரணத்த²ஸ்ஸ ச ஸம்ப⁴வதோ. ஸம்பா⁴வனே வா பி-ஸத்³தோ³ த³ட்ட²ப்³போ³. தேன இத⁴ பட²மதி³வஸேபி தாவ ஆபத்தி, து³தியாதி³தி³வஸே கிமேவ வத்தப்³ப³ந்தி இமமத்த²ங் தீ³பேதி. ஸம்பிண்ட³னத்தே²பி பி-ஸத்³தே³ க³ய்ஹமானே இமினாவ ஸிக்கா²பதே³ன ஆபஜ்ஜிதப்³பா³பத்தியா அஞ்ஞஸ்மிம்பி தி³வஸே ஆபஜ்ஜனங் தீ³பேதி, ந பட²மஸிக்கா²பதே³ன ஆபஜ்ஜிதப்³பா³பத்தியாதி அகாரணமேவ தந்தி த³ட்ட²ப்³ப³ங். ‘‘மதித்தீ² பாராஜிகவத்து²பூ⁴தாபி அனுபாதி³ன்னபக்கே² டி²தத்தா ஸஹஸெய்யாபத்திங் ந ஜனேதீ’’தி வத³ந்தி. ‘‘அத்த²ங்க³தே ஸூரியே மாதுகா³மே நிபன்னே பி⁴க்கு² நிபஜ்ஜதீ’’தி வசனதோ தி³வா ஸயந்தஸ்ஸ ஸஹஸெய்யாபத்தி ந ஹோதியேவாதி த³ட்ட²ப்³ப³ங். பாசித்தியவத்து²கஸேனாஸனங், தத்த² மாதுகா³மேன ஸஹ நிபஜ்ஜனங், ஸூரியத்த²ங்க³மனந்தி இமானெத்த² தீணி அங்கா³னி.
Yañca idha ‘‘paṭhamadivasepīti pi-saddena catutthadivasepīti vuttaṃ hotī’’ti kāraṇaṃ vadanti, tampi akāraṇaṃ pi-saddo sampiṇḍanatthoyevāti niyamābhāvato avadhāraṇatthassa ca sambhavato. Sambhāvane vā pi-saddo daṭṭhabbo. Tena idha paṭhamadivasepi tāva āpatti, dutiyādidivase kimeva vattabbanti imamatthaṃ dīpeti. Sampiṇḍanatthepi pi-sadde gayhamāne imināva sikkhāpadena āpajjitabbāpattiyā aññasmimpi divase āpajjanaṃ dīpeti, na paṭhamasikkhāpadena āpajjitabbāpattiyāti akāraṇameva tanti daṭṭhabbaṃ. ‘‘Matitthī pārājikavatthubhūtāpi anupādinnapakkhe ṭhitattā sahaseyyāpattiṃ na janetī’’ti vadanti. ‘‘Atthaṅgate sūriye mātugāme nipanne bhikkhu nipajjatī’’ti vacanato divā sayantassa sahaseyyāpatti na hotiyevāti daṭṭhabbaṃ. Pācittiyavatthukasenāsanaṃ, tattha mātugāmena saha nipajjanaṃ, sūriyatthaṅgamananti imānettha tīṇi aṅgāni.
து³தியஸஹஸெய்யஸிக்கா²பத³வண்ணனா நிட்டி²தா.
Dutiyasahaseyyasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. து³தியஸஹஸெய்யஸிக்கா²பத³வண்ணனா • 6. Dutiyasahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. து³தியஸஹஸெய்யஸிக்கா²பத³வண்ணனா • 6. Dutiyasahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. து³தியஸஹஸெய்யஸிக்கா²பத³வண்ணனா • 6. Dutiyasahaseyyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 6. து³தியஸஹஸெய்யஸிக்கா²பத³ங் • 6. Dutiyasahaseyyasikkhāpadaṃ
