| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৬. দুতিযসহসেয্যসিক্খাপদৰণ্ণনা
6. Dutiyasahaseyyasikkhāpadavaṇṇanā
৫৫. ছট্ঠে ‘‘পঠমসিক্খাপদে ‘ভিক্খুং ঠপেত্ৰা অৰসেসো অনুপসম্পন্নো নামা’তি ৰুত্তত্তা ‘মাতুগামোপি অনুপসম্পন্নগ্গহণেন গহিতোযেৰা’তি চতুত্থদিৰসে মাতুগামেন সদ্ধিং সযন্তস্স দ্ৰীহি সিক্খাপদেহি দ্ৰে পাচিত্তিযানি হোন্তী’’তি ৰদন্তি। গণ্ঠিপদেসু পন তীসুপি ‘‘ইমস্মিং সিক্খাপদে মাতুগামস্স ৰিসুং ৰুচ্চমানত্তা পঠমসিক্খাপদে ‘ভিক্খুং ঠপেত্ৰা অৰসেসো অনুপসম্পন্নো নামা’তি পুরিসস্সেৰ গহণং অনুচ্ছৰিক’’ন্তি ৰুত্তং, তদেৰ চ যুত্ততরং।
55. Chaṭṭhe ‘‘paṭhamasikkhāpade ‘bhikkhuṃ ṭhapetvā avaseso anupasampanno nāmā’ti vuttattā ‘mātugāmopi anupasampannaggahaṇena gahitoyevā’ti catutthadivase mātugāmena saddhiṃ sayantassa dvīhi sikkhāpadehi dve pācittiyāni hontī’’ti vadanti. Gaṇṭhipadesu pana tīsupi ‘‘imasmiṃ sikkhāpade mātugāmassa visuṃ vuccamānattā paṭhamasikkhāpade ‘bhikkhuṃ ṭhapetvā avaseso anupasampanno nāmā’ti purisasseva gahaṇaṃ anucchavika’’nti vuttaṃ, tadeva ca yuttataraṃ.
যঞ্চ ইধ ‘‘পঠমদিৰসেপীতি পি-সদ্দেন চতুত্থদিৰসেপীতি ৰুত্তং হোতী’’তি কারণং ৰদন্তি, তম্পি অকারণং পি-সদ্দো সম্পিণ্ডনত্থোযেৰাতি নিযমাভাৰতো অৰধারণত্থস্স চ সম্ভৰতো। সম্ভাৰনে ৰা পি-সদ্দো দট্ঠব্বো। তেন ইধ পঠমদিৰসেপি তাৰ আপত্তি, দুতিযাদিদিৰসে কিমেৰ ৰত্তব্বন্তি ইমমত্থং দীপেতি। সম্পিণ্ডনত্থেপি পি-সদ্দে গয্হমানে ইমিনাৰ সিক্খাপদেন আপজ্জিতব্বাপত্তিযা অঞ্ঞস্মিম্পি দিৰসে আপজ্জনং দীপেতি, ন পঠমসিক্খাপদেন আপজ্জিতব্বাপত্তিযাতি অকারণমেৰ তন্তি দট্ঠব্বং। ‘‘মতিত্থী পারাজিকৰত্থুভূতাপি অনুপাদিন্নপক্খে ঠিতত্তা সহসেয্যাপত্তিং ন জনেতী’’তি ৰদন্তি। ‘‘অত্থঙ্গতে সূরিযে মাতুগামে নিপন্নে ভিক্খু নিপজ্জতী’’তি ৰচনতো দিৰা সযন্তস্স সহসেয্যাপত্তি ন হোতিযেৰাতি দট্ঠব্বং। পাচিত্তিযৰত্থুকসেনাসনং, তত্থ মাতুগামেন সহ নিপজ্জনং, সূরিযত্থঙ্গমনন্তি ইমানেত্থ তীণি অঙ্গানি।
Yañca idha ‘‘paṭhamadivasepīti pi-saddena catutthadivasepīti vuttaṃ hotī’’ti kāraṇaṃ vadanti, tampi akāraṇaṃ pi-saddo sampiṇḍanatthoyevāti niyamābhāvato avadhāraṇatthassa ca sambhavato. Sambhāvane vā pi-saddo daṭṭhabbo. Tena idha paṭhamadivasepi tāva āpatti, dutiyādidivase kimeva vattabbanti imamatthaṃ dīpeti. Sampiṇḍanatthepi pi-sadde gayhamāne imināva sikkhāpadena āpajjitabbāpattiyā aññasmimpi divase āpajjanaṃ dīpeti, na paṭhamasikkhāpadena āpajjitabbāpattiyāti akāraṇameva tanti daṭṭhabbaṃ. ‘‘Matitthī pārājikavatthubhūtāpi anupādinnapakkhe ṭhitattā sahaseyyāpattiṃ na janetī’’ti vadanti. ‘‘Atthaṅgate sūriye mātugāme nipanne bhikkhu nipajjatī’’ti vacanato divā sayantassa sahaseyyāpatti na hotiyevāti daṭṭhabbaṃ. Pācittiyavatthukasenāsanaṃ, tattha mātugāmena saha nipajjanaṃ, sūriyatthaṅgamananti imānettha tīṇi aṅgāni.
দুতিযসহসেয্যসিক্খাপদৰণ্ণনা নিট্ঠিতা।
Dutiyasahaseyyasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. মুসাৰাদৰগ্গো • 1. Musāvādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৬. দুতিযসহসেয্যসিক্খাপদৰণ্ণনা • 6. Dutiyasahaseyyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৬. দুতিযসহসেয্যসিক্খাপদৰণ্ণনা • 6. Dutiyasahaseyyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৬. দুতিযসহসেয্যসিক্খাপদৰণ্ণনা • 6. Dutiyasahaseyyasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৬. দুতিযসহসেয্যসিক্খাপদং • 6. Dutiyasahaseyyasikkhāpadaṃ
