| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༦. དུཏིཡསཧསེཡྻསིཀྑཱཔདཝཎྞནཱ
6. Dutiyasahaseyyasikkhāpadavaṇṇanā
༥༥. ཚཊྛེ ‘‘པཋམསིཀྑཱཔདེ ‘བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོ ནཱམཱ’ཏི ཝུཏྟཏྟཱ ‘མཱཏུགཱམོཔི ཨནུཔསམྤནྣགྒཧཎེན གཧིཏོཡེཝཱ’ཏི ཙཏུཏྠདིཝསེ མཱཏུགཱམེན སདྡྷིཾ སཡནྟསྶ དྭཱིཧི སིཀྑཱཔདེཧི དྭེ པཱཙིཏྟིཡཱནི ཧོནྟཱི’’ཏི ཝདནྟི། གཎྛིཔདེསུ པན ཏཱིསུཔི ‘‘ཨིམསྨིཾ སིཀྑཱཔདེ མཱཏུགཱམསྶ ཝིསུཾ ཝུཙྩམཱནཏྟཱ པཋམསིཀྑཱཔདེ ‘བྷིཀྑུཾ ཋཔེཏྭཱ ཨཝསེསོ ཨནུཔསམྤནྣོ ནཱམཱ’ཏི པུརིསསྶེཝ གཧཎཾ ཨནུཙྪཝིཀ’’ནྟི ཝུཏྟཾ, ཏདེཝ ཙ ཡུཏྟཏརཾ།
55. Chaṭṭhe ‘‘paṭhamasikkhāpade ‘bhikkhuṃ ṭhapetvā avaseso anupasampanno nāmā’ti vuttattā ‘mātugāmopi anupasampannaggahaṇena gahitoyevā’ti catutthadivase mātugāmena saddhiṃ sayantassa dvīhi sikkhāpadehi dve pācittiyāni hontī’’ti vadanti. Gaṇṭhipadesu pana tīsupi ‘‘imasmiṃ sikkhāpade mātugāmassa visuṃ vuccamānattā paṭhamasikkhāpade ‘bhikkhuṃ ṭhapetvā avaseso anupasampanno nāmā’ti purisasseva gahaṇaṃ anucchavika’’nti vuttaṃ, tadeva ca yuttataraṃ.
ཡཉྩ ཨིདྷ ‘‘པཋམདིཝསེཔཱིཏི པི-སདྡེན ཙཏུཏྠདིཝསེཔཱིཏི ཝུཏྟཾ ཧོཏཱི’’ཏི ཀཱརཎཾ ཝདནྟི, ཏམྤི ཨཀཱརཎཾ པི-སདྡོ སམྤིཎྜནཏྠོཡེཝཱཏི ནིཡམཱབྷཱཝཏོ ཨཝདྷཱརཎཏྠསྶ ཙ སམྦྷཝཏོ། སམྦྷཱཝནེ ཝཱ པི-སདྡོ དཊྛབྦོ། ཏེན ཨིདྷ པཋམདིཝསེཔི ཏཱཝ ཨཱཔཏྟི, དུཏིཡཱདིདིཝསེ ཀིམེཝ ཝཏྟབྦནྟི ཨིམམཏྠཾ དཱིཔེཏི། སམྤིཎྜནཏྠེཔི པི-སདྡེ གཡ྄ཧམཱནེ ཨིམིནཱཝ སིཀྑཱཔདེན ཨཱཔཛྫིཏབྦཱཔཏྟིཡཱ ཨཉྙསྨིམྤི དིཝསེ ཨཱཔཛྫནཾ དཱིཔེཏི, ན པཋམསིཀྑཱཔདེན ཨཱཔཛྫིཏབྦཱཔཏྟིཡཱཏི ཨཀཱརཎམེཝ ཏནྟི དཊྛབྦཾ། ‘‘མཏིཏྠཱི པཱརཱཛིཀཝཏྠུབྷཱུཏཱཔི ཨནུཔཱདིནྣཔཀྑེ ཋིཏཏྟཱ སཧསེཡྻཱཔཏྟིཾ ན ཛནེཏཱི’’ཏི ཝདནྟི། ‘‘ཨཏྠངྒཏེ སཱུརིཡེ མཱཏུགཱམེ ནིཔནྣེ བྷིཀྑུ ནིཔཛྫཏཱི’’ཏི ཝཙནཏོ དིཝཱ སཡནྟསྶ སཧསེཡྻཱཔཏྟི ན ཧོཏིཡེཝཱཏི དཊྛབྦཾ། པཱཙིཏྟིཡཝཏྠུཀསེནཱསནཾ, ཏཏྠ མཱཏུགཱམེན སཧ ནིཔཛྫནཾ, སཱུརིཡཏྠངྒམནནྟི ཨིམཱནེཏྠ ཏཱིཎི ཨངྒཱནི།
Yañca idha ‘‘paṭhamadivasepīti pi-saddena catutthadivasepīti vuttaṃ hotī’’ti kāraṇaṃ vadanti, tampi akāraṇaṃ pi-saddo sampiṇḍanatthoyevāti niyamābhāvato avadhāraṇatthassa ca sambhavato. Sambhāvane vā pi-saddo daṭṭhabbo. Tena idha paṭhamadivasepi tāva āpatti, dutiyādidivase kimeva vattabbanti imamatthaṃ dīpeti. Sampiṇḍanatthepi pi-sadde gayhamāne imināva sikkhāpadena āpajjitabbāpattiyā aññasmimpi divase āpajjanaṃ dīpeti, na paṭhamasikkhāpadena āpajjitabbāpattiyāti akāraṇameva tanti daṭṭhabbaṃ. ‘‘Matitthī pārājikavatthubhūtāpi anupādinnapakkhe ṭhitattā sahaseyyāpattiṃ na janetī’’ti vadanti. ‘‘Atthaṅgate sūriye mātugāme nipanne bhikkhu nipajjatī’’ti vacanato divā sayantassa sahaseyyāpatti na hotiyevāti daṭṭhabbaṃ. Pācittiyavatthukasenāsanaṃ, tattha mātugāmena saha nipajjanaṃ, sūriyatthaṅgamananti imānettha tīṇi aṅgāni.
དུཏིཡསཧསེཡྻསིཀྑཱཔདཝཎྞནཱ ནིཊྛིཏཱ།
Dutiyasahaseyyasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༡. མུསཱཝཱདཝགྒོ • 1. Musāvādavaggo
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༦. དུཏིཡསཧསེཡྻསིཀྑཱཔདཝཎྞནཱ • 6. Dutiyasahaseyyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༦. དུཏིཡསཧསེཡྻསིཀྑཱཔདཝཎྞནཱ • 6. Dutiyasahaseyyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. དུཏིཡསཧསེཡྻསིཀྑཱཔདཝཎྞནཱ • 6. Dutiyasahaseyyasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༦. དུཏིཡསཧསེཡྻསིཀྑཱཔདཾ • 6. Dutiyasahaseyyasikkhāpadaṃ
