អង្គុត្តរ និកាយ ៤។៥៦

៦។ បុញ្ញាភិសន្ទវគ្គ

ទុតិយសមជីវីសុត្ត

“អាកង្ខេយ្យុញ្ចេ, ភិក្ខវេ, ឧភោ ជានិបតយោ ទិដ្ឋេ ចេវ ធម្មេ អញ្ញមញ្ញំ បស្សិតុំ អភិសម្បរាយញ្ច អញ្ញមញ្ញំ បស្សិតុំ ឧភោវ អស្សុ សមសទ្ធា សមសីលា សមចាគា សមបញ្ញា, តេ ទិដ្ឋេ ចេវ ធម្មេ អញ្ញមញ្ញំ បស្សន្តិ អភិសម្បរាយញ្ច អញ្ញមញ្ញំ បស្សន្តីតិ។

ឧភោ សទ្ធា វទញ្ញូ ច, សញ្ញតា ធម្មជីវិនោ; តេ ហោន្តិ ជានិបតយោ, អញ្ញមញ្ញំ បិយំវទា។

អត្ថាសំ បចុរា ហោន្តិ, ផាសុកំ ឧបជាយតិ; អមិត្តា ទុម្មនា ហោន្តិ, ឧភិន្នំ សមសីលិនំ។

ឥធ ធម្មំ ចរិត្វាន, សមសីលព្ពតា ឧភោ; នន្ទិនោ ទេវលោកស្មិំ, មោទន្តិ កាមកាមិនោ”តិ។

ឆដ្ឋំ។