| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
6. දුතියසමජීවීසුත්‌තං
6. Dutiyasamajīvīsuttaṃ
56. ‘‘ආකඞ්‌ඛෙය්‍යුං චෙ, භික්‌ඛවෙ, උභො ජානිපතයො දිට්‌ඨෙ චෙව ධම්‌මෙ අඤ්‌ඤමඤ්‌ඤං පස්‌සිතුං අභිසම්‌පරායඤ්‌ච අඤ්‌ඤමඤ්‌ඤං පස්‌සිතුං උභොව අස්‌සු සමසද්‌ධා සමසීලා සමචාගා සමපඤ්‌ඤා, තෙ දිට්‌ඨෙ චෙව ධම්‌මෙ අඤ්‌ඤමඤ්‌ඤං පස්‌සන්‌ති අභිසම්‌පරායඤ්‌ච අඤ්‌ඤමඤ්‌ඤං පස්‌සන්‌තී’’ති.
56. ‘‘Ākaṅkheyyuṃ ce, bhikkhave, ubho jānipatayo diṭṭhe ceva dhamme aññamaññaṃ passituṃ abhisamparāyañca aññamaññaṃ passituṃ ubhova assu samasaddhā samasīlā samacāgā samapaññā, te diṭṭhe ceva dhamme aññamaññaṃ passanti abhisamparāyañca aññamaññaṃ passantī’’ti.
‘‘උභො සද්‌ධා වදඤ්‌ඤූ ච, සඤ්‌ඤතා ධම්‌මජීවිනො;
‘‘Ubho saddhā vadaññū ca, saññatā dhammajīvino;
තෙ හොන්‌ති ජානිපතයො, අඤ්‌ඤමඤ්‌ඤං පියංවදා.
Te honti jānipatayo, aññamaññaṃ piyaṃvadā.
‘‘අත්‌ථාසං පචුරා හොන්‌ති, ඵාසුකං උපජායති;
‘‘Atthāsaṃ pacurā honti, phāsukaṃ upajāyati;
අමිත්‌තා දුම්‌මනා හොන්‌ති, උභින්‌නං සමසීලිනං.
Amittā dummanā honti, ubhinnaṃ samasīlinaṃ.
‘‘ඉධ ධම්‌මං චරිත්‌වාන, සමසීලබ්‌බතා උභො;
‘‘Idha dhammaṃ caritvāna, samasīlabbatā ubho;
නන්‌දිනො දෙවලොකස්‌මිං, මොදන්‌ති කාමකාමිනො’’ති. ඡට්‌ඨං;
Nandino devalokasmiṃ, modanti kāmakāmino’’ti. chaṭṭhaṃ;
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5-6. සමජීවීසුත්‌තද්‌වයවණ්‌ණනා • 5-6. Samajīvīsuttadvayavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5-6. සමජීවීසුත්‌තාදිවණ්‌ණනා • 5-6. Samajīvīsuttādivaṇṇanā
