| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
4. து³தியஸமணப்³ராஹ்மணஸுத்தங்
4. Dutiyasamaṇabrāhmaṇasuttaṃ
14. ஸாவத்தி²யங் விஹரதி…பே॰… ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா இமே த⁴ம்மே நப்பஜானந்தி, இமேஸங் த⁴ம்மானங் ஸமுத³யங் நப்பஜானந்தி, இமேஸங் த⁴ம்மானங் நிரோத⁴ங் நப்பஜானந்தி, இமேஸங் த⁴ம்மானங் நிரோத⁴கா³மினிங் படிபத³ங் நப்பஜானந்தி, கதமே த⁴ம்மே நப்பஜானந்தி, கதமேஸங் த⁴ம்மானங் ஸமுத³யங் நப்பஜானந்தி, கதமேஸங் த⁴ம்மானங் நிரோத⁴ங் நப்பஜானந்தி, கதமேஸங் த⁴ம்மானங் நிரோத⁴கா³மினிங் படிபத³ங் நப்பஜானந்தி’’?
14. Sāvatthiyaṃ viharati…pe… ‘‘ye hi keci, bhikkhave, samaṇā vā brāhmaṇā vā ime dhamme nappajānanti, imesaṃ dhammānaṃ samudayaṃ nappajānanti, imesaṃ dhammānaṃ nirodhaṃ nappajānanti, imesaṃ dhammānaṃ nirodhagāminiṃ paṭipadaṃ nappajānanti, katame dhamme nappajānanti, katamesaṃ dhammānaṃ samudayaṃ nappajānanti, katamesaṃ dhammānaṃ nirodhaṃ nappajānanti, katamesaṃ dhammānaṃ nirodhagāminiṃ paṭipadaṃ nappajānanti’’?
‘‘ஜராமரணங் நப்பஜானந்தி, ஜராமரணஸமுத³யங் நப்பஜானந்தி, ஜராமரணனிரோத⁴ங் நப்பஜானந்தி, ஜராமரணனிரோத⁴கா³மினிங் படிபத³ங் நப்பஜானந்தி; ஜாதிங்…பே॰… ப⁴வங்… உபாதா³னங்… தண்ஹங்… வேத³னங்… ப²ஸ்ஸங்… ஸளாயதனங்… நாமரூபங்… விஞ்ஞாணங்… ஸங்கா²ரே நப்பஜானந்தி, ஸங்கா²ரஸமுத³யங் நப்பஜானந்தி, ஸங்கா²ரனிரோத⁴ங் நப்பஜானந்தி, ஸங்கா²ரனிரோத⁴கா³மினிங் படிபத³ங் நப்பஜானந்தி. இமே த⁴ம்மே நப்பஜானந்தி, இமேஸங் த⁴ம்மானங் ஸமுத³யங் நப்பஜானந்தி, இமேஸங் த⁴ம்மானங் நிரோத⁴ங் நப்பஜானந்தி, இமேஸங் த⁴ம்மானங் நிரோத⁴கா³மினிங் படிபத³ங் நப்பஜானந்தி. ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பன தே ஆயஸ்மந்தோ ஸாமஞ்ஞத்த²ங் வா ப்³ரஹ்மஞ்ஞத்த²ங் வா தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி.
‘‘Jarāmaraṇaṃ nappajānanti, jarāmaraṇasamudayaṃ nappajānanti, jarāmaraṇanirodhaṃ nappajānanti, jarāmaraṇanirodhagāminiṃ paṭipadaṃ nappajānanti; jātiṃ…pe… bhavaṃ… upādānaṃ… taṇhaṃ… vedanaṃ… phassaṃ… saḷāyatanaṃ… nāmarūpaṃ… viññāṇaṃ… saṅkhāre nappajānanti, saṅkhārasamudayaṃ nappajānanti, saṅkhāranirodhaṃ nappajānanti, saṅkhāranirodhagāminiṃ paṭipadaṃ nappajānanti. Ime dhamme nappajānanti, imesaṃ dhammānaṃ samudayaṃ nappajānanti, imesaṃ dhammānaṃ nirodhaṃ nappajānanti, imesaṃ dhammānaṃ nirodhagāminiṃ paṭipadaṃ nappajānanti. Na me te, bhikkhave, samaṇā vā brāhmaṇā vā samaṇesu vā samaṇasammatā brāhmaṇesu vā brāhmaṇasammatā, na ca pana te āyasmanto sāmaññatthaṃ vā brahmaññatthaṃ vā diṭṭheva dhamme sayaṃ abhiññā sacchikatvā upasampajja viharanti.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா இமே த⁴ம்மே பஜானந்தி, இமேஸங் த⁴ம்மானங் ஸமுத³யங் பஜானந்தி, இமேஸங் த⁴ம்மானங் நிரோத⁴ங் பஜானந்தி, இமேஸங் த⁴ம்மானங் நிரோத⁴கா³மினிங் படிபத³ங் பஜானந்தி, கதமே த⁴ம்மே பஜானந்தி, கதமேஸங் த⁴ம்மானங் ஸமுத³யங் பஜானந்தி, கதமேஸங் த⁴ம்மானங் நிரோத⁴ங் பஜானந்தி, கதமேஸங் த⁴ம்மானங் நிரோத⁴கா³மினிங் படிபத³ங் பஜானந்தி?
‘‘Ye ca kho keci, bhikkhave, samaṇā vā brāhmaṇā vā ime dhamme pajānanti, imesaṃ dhammānaṃ samudayaṃ pajānanti, imesaṃ dhammānaṃ nirodhaṃ pajānanti, imesaṃ dhammānaṃ nirodhagāminiṃ paṭipadaṃ pajānanti, katame dhamme pajānanti, katamesaṃ dhammānaṃ samudayaṃ pajānanti, katamesaṃ dhammānaṃ nirodhaṃ pajānanti, katamesaṃ dhammānaṃ nirodhagāminiṃ paṭipadaṃ pajānanti?
‘‘ஜராமரணங் பஜானந்தி, ஜராமரணஸமுத³யங் பஜானந்தி, ஜராமரணனிரோத⁴ங் பஜானந்தி, ஜராமரணனிரோத⁴கா³மினிங் படிபத³ங் பஜானந்தி; ஜாதிங்…பே॰… ப⁴வங்… உபாதா³னங்… தண்ஹங்… வேத³னங்… ப²ஸ்ஸங்… ஸளாயதனங்… நாமரூபங்… விஞ்ஞாணங்… ஸங்கா²ரே பஜானந்தி, ஸங்கா²ரஸமுத³யங் பஜானந்தி, ஸங்கா²ரனிரோத⁴ங் பஜானந்தி, ஸங்கா²ரனிரோத⁴கா³மினிங் படிபத³ங் பஜானந்தி. இமே த⁴ம்மே பஜானந்தி , இமேஸங் த⁴ம்மானங் ஸமுத³யங் பஜானந்தி, இமேஸங் த⁴ம்மானங் நிரோத⁴ங் பஜானந்தி, இமேஸங் த⁴ம்மானங் நிரோத⁴கா³மினிங் படிபத³ங் பஜானந்தி. தே கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா, ப்³ராஹ்மணேஸு ச ப்³ராஹ்மணஸம்மதா. தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. சதுத்த²ங்.
‘‘Jarāmaraṇaṃ pajānanti, jarāmaraṇasamudayaṃ pajānanti, jarāmaraṇanirodhaṃ pajānanti, jarāmaraṇanirodhagāminiṃ paṭipadaṃ pajānanti; jātiṃ…pe… bhavaṃ… upādānaṃ… taṇhaṃ… vedanaṃ… phassaṃ… saḷāyatanaṃ… nāmarūpaṃ… viññāṇaṃ… saṅkhāre pajānanti, saṅkhārasamudayaṃ pajānanti, saṅkhāranirodhaṃ pajānanti, saṅkhāranirodhagāminiṃ paṭipadaṃ pajānanti. Ime dhamme pajānanti , imesaṃ dhammānaṃ samudayaṃ pajānanti, imesaṃ dhammānaṃ nirodhaṃ pajānanti, imesaṃ dhammānaṃ nirodhagāminiṃ paṭipadaṃ pajānanti. Te kho me, bhikkhave, samaṇā vā brāhmaṇā vā samaṇesu ceva samaṇasammatā, brāhmaṇesu ca brāhmaṇasammatā. Te ca panāyasmanto sāmaññatthañca brahmaññatthañca diṭṭheva dhamme sayaṃ abhiññā sacchikatvā upasampajja viharantī’’ti. Catutthaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4. து³தியஸமணப்³ராஹ்மணஸுத்தவண்ணனா • 4. Dutiyasamaṇabrāhmaṇasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. து³தியஸமணப்³ராஹ்மணஸுத்தவண்ணனா • 4. Dutiyasamaṇabrāhmaṇasuttavaṇṇanā
