| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
ဒုတိယသမဏဗ္ရာဟ္မဏသုတ္တဝဏ္ဏနာ
7. Dutiyasamaṇabrāhmaṇasuttavaṇṇanā
၄၇၇. ဒုက္ခသစ္စဝသေနာတိ ဒုက္ခသစ္စဘာဝေန န ပဇာနန္တိ။ တဉ္ဟိ ပရိညေယ္ယတာယ ဒုက္ခသစ္စသင္ဂဟံ။ သမုဒယသစ္စဝသေနာတိ တဏ္ဟာဝိဇ္ဇာဒိံ သဒ္ဓိန္ဒ္ရိယသ္သ သမုဒယသစ္စဘာဝေန န ပဇာနန္တိ။ နိရောဓန္တိ သဒ္ဓိန္ဒ္ရိယသ္သ အနုပာဒာယ နိရောဓနိမိတ္တံ နိဗ္ဗာနံ။ ပဋိပဒန္တိ သဒ္ဓိန္ဒ္ရိယနိရောဓဂာမိနိံ ပဋိပဒံ အရိယမဂ္ဂံ။ သေသေသူတိ ဝီရိယိန္ဒ္ရိယာဒီသု။
477.Dukkhasaccavasenāti dukkhasaccabhāvena na pajānanti. Tañhi pariññeyyatāya dukkhasaccasaṅgahaṃ. Samudayasaccavasenāti taṇhāvijjādiṃ saddhindriyassa samudayasaccabhāvena na pajānanti. Nirodhanti saddhindriyassa anupādāya nirodhanimittaṃ nibbānaṃ. Paṭipadanti saddhindriyanirodhagāminiṃ paṭipadaṃ ariyamaggaṃ. Sesesūti vīriyindriyādīsu.
သုက္ကပက္ခေတိ ‘‘သဒ္ဓိန္ဒ္ရိယံ ပဇာနန္တီ’’တိအာဒိနယပ္ပဝတ္တေ အနဝဇ္ဇပက္ခေ။ အဓိမောက္ခဝသေန အာဝဇ္ဇနသမုဒယာတိ ‘‘အတ္ထိ ဒိန္န’’န္တိအာဒိနယပ္ပဝတ္တပုဗ္ဗဘာဂဘူတသဒ္ဓာဓိမောက္ခဝသေန အာဝဇ္ဇနုပ္ပတ္တိယာ။ တသ္မာ ပဌမုပ္ပန္နာ သဒ္ဓာ ဧဝ ဟေတ္ထ ‘‘အာဝဇ္ဇန’’န္တိ ဝုတ္တာ, န မနောဒ္ဝာရာဝဇ္ဇနံ။ ဧသ နယော သေသေသုပိ။ တသ္မာ ပဌမုပ္ပန္နာ အာဝဇ္ဇနာ ပဂ္ဂဟုပ္ပတ္တိဋ္ဌာနာနံ တိက္ခာနံ ဝီရိယိန္ဒ္ရိယာဒီနံ ပဌမုပ္ပတ္တိယာ အာဝဇ္ဇနပရိယာယေန ဝုတ္တာတိ ဒဋ္ဌဗ္ဗံ။ ဒုဗ္ဗလာ ဟိ ပဌမုပ္ပန္နာ ပဂ္ဂဟာဘာဝတော ဝီရိယိန္ဒ္ရိယာဒီနံ သမုဒယောတိ ဗလဝဘာဝပ္ပတ္တဝီရိယိန္ဒ္ရိယာဒိကသ္သ အာဝဇ္ဇနဋ္ဌာနိယာနိ ဟောန္တီတိ တေသံ သမုဒယောတိ ဝုတ္တာ, ပုဗ္ဗေ အဓိမုစ္စနာဒိဝသေန ပဝတ္တသ္သ အာဝဇ္ဇနသ္သ သမုဒယာတိ အတ္ထော။ ပုန ဆန္ဒဝသေနာတိ ကတ္တုကာမတာကုသလစ္ဆန္ဒဝသေန သဒ္ဓာဒီနံ ဥပ္ပာဒေတုကာမတာကာရပ္ပဝတ္တသ္သ ဆန္ဒသ္သ ဝသေန။ မနသိကာရဝသေန အာဝဇ္ဇနသမုဒယာတိ သဒ္ဓိန္ဒ္ရိယာဒိဝသေန ပဝတ္တသ္သ ဒုဗ္ဗလသ္သ တသ္သ နိဗ္ဗတ္တကယောနိသောမနသိကာရဝသေန အာဝဇ္ဇနသ္သ ဥပ္ပတ္တိယာ။ ဧဝမ္ပီတိ ‘‘အဓိမောက္ခဝသေနာ’’တိအာဒိနာ ဝုတ္တာကာရေနပိ။ ဆသု သုတ္တေသူတိ ဒုတိယတော ပဋ္ဌာယ ဆသု သုတ္တေသု။ စတုသစ္စမေဝ ကထိတံ။ အသ္သာဒဂ္ဂဟဏေန ဟိ သမုဒယသစ္စံ, အာဒီနဝဂ္ဂဟဏေန ဒုက္ခသစ္စံ, နိသ္သရဏဂ္ဂဟဏေန နိရောဓမဂ္ဂသစ္စာနိ ဂဟိတာနီတိ။ ပဌမသုတ္တေ ပန ဣန္ဒ္ရိယာနံ သရူပဒသ္သနမေဝာတိ။
Sukkapakkheti ‘‘saddhindriyaṃ pajānantī’’tiādinayappavatte anavajjapakkhe. Adhimokkhavasena āvajjanasamudayāti ‘‘atthi dinna’’ntiādinayappavattapubbabhāgabhūtasaddhādhimokkhavasena āvajjanuppattiyā. Tasmā paṭhamuppannā saddhā eva hettha ‘‘āvajjana’’nti vuttā, na manodvārāvajjanaṃ. Esa nayo sesesupi. Tasmā paṭhamuppannā āvajjanā paggahuppattiṭṭhānānaṃ tikkhānaṃ vīriyindriyādīnaṃ paṭhamuppattiyā āvajjanapariyāyena vuttāti daṭṭhabbaṃ. Dubbalā hi paṭhamuppannā paggahābhāvato vīriyindriyādīnaṃ samudayoti balavabhāvappattavīriyindriyādikassa āvajjanaṭṭhāniyāni hontīti tesaṃ samudayoti vuttā, pubbe adhimuccanādivasena pavattassa āvajjanassa samudayāti attho. Puna chandavasenāti kattukāmatākusalacchandavasena saddhādīnaṃ uppādetukāmatākārappavattassa chandassa vasena. Manasikāravasena āvajjanasamudayāti saddhindriyādivasena pavattassa dubbalassa tassa nibbattakayonisomanasikāravasena āvajjanassa uppattiyā. Evampīti ‘‘adhimokkhavasenā’’tiādinā vuttākārenapi. Chasu suttesūti dutiyato paṭṭhāya chasu suttesu. Catusaccameva kathitaṃ. Assādaggahaṇena hi samudayasaccaṃ, ādīnavaggahaṇena dukkhasaccaṃ, nissaraṇaggahaṇena nirodhamaggasaccāni gahitānīti. Paṭhamasutte pana indriyānaṃ sarūpadassanamevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ဒုတိယသမဏဗ္ရာဟ္မဏသုတ္တံ • 7. Dutiyasamaṇabrāhmaṇasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ဒုတိယသမဏဗ္ရာဟ္မဏသုတ္တဝဏ္ဏနာ • 7. Dutiyasamaṇabrāhmaṇasuttavaṇṇanā
