| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๔. ทุติยสํวาสสุตฺตํ
4. Dutiyasaṃvāsasuttaṃ
๕๔. ‘‘จตฺตาโรเม, ภิกฺขเว, สํวาสาฯ กตเม จตฺตาโร? ฉโว ฉวาย สทฺธิํ สํวสติ, ฉโว เทวิยา สทฺธิํ สํวสติ, เทโว ฉวาย สทฺธิํ สํวสติ, เทโว เทวิยา สทฺธิํ สํวสติฯ
54. ‘‘Cattārome, bhikkhave, saṃvāsā. Katame cattāro? Chavo chavāya saddhiṃ saṃvasati, chavo deviyā saddhiṃ saṃvasati, devo chavāya saddhiṃ saṃvasati, devo deviyā saddhiṃ saṃvasati.
‘‘กถญฺจ , ภิกฺขเว, ฉโว ฉวาย สทฺธิํ สํวสติฯ อิธ, ภิกฺขเว, สามิโก โหติ ปาณาติปาตี อทินฺนาทายี กาเมสุมิจฺฉาจารี มุสาวาที ปิสุณวาโจ ผรุสวาโจ สมฺผปฺปลาปี อภิชฺฌาลุ พฺยาปนฺนจิโตฺต มิจฺฉาทิฎฺฐิโก ทุสฺสีโล ปาปธโมฺม มเจฺฉรมลปริยุฎฺฐิเตน เจตสา อคารํ อชฺฌาวสติ อโกฺกสกปริภาสโก สมณพฺราหฺมณานํ; ภริยาปิสฺส โหติ ปาณาติปาตินี อทินฺนาทายินี กาเมสุมิจฺฉาจารินี มุสาวาทินี ปิสุณวาจา ผรุสวาจา สมฺผปฺปลาปินี อภิชฺฌาลุนี พฺยาปนฺนจิตฺตา มิจฺฉาทิฎฺฐิกา ทุสฺสีลา ปาปธมฺมา มเจฺฉรมลปริยุฎฺฐิเตน เจตสา อคารํ อชฺฌาวสติ อโกฺกสิกปริภาสิกา สมณพฺราหฺมณานํฯ เอวํ โข, ภิกฺขเว, ฉโว ฉวาย สทฺธิํ สํวสติฯ
‘‘Kathañca , bhikkhave, chavo chavāya saddhiṃ saṃvasati. Idha, bhikkhave, sāmiko hoti pāṇātipātī adinnādāyī kāmesumicchācārī musāvādī pisuṇavāco pharusavāco samphappalāpī abhijjhālu byāpannacitto micchādiṭṭhiko dussīlo pāpadhammo maccheramalapariyuṭṭhitena cetasā agāraṃ ajjhāvasati akkosakaparibhāsako samaṇabrāhmaṇānaṃ; bhariyāpissa hoti pāṇātipātinī adinnādāyinī kāmesumicchācārinī musāvādinī pisuṇavācā pharusavācā samphappalāpinī abhijjhālunī byāpannacittā micchādiṭṭhikā dussīlā pāpadhammā maccheramalapariyuṭṭhitena cetasā agāraṃ ajjhāvasati akkosikaparibhāsikā samaṇabrāhmaṇānaṃ. Evaṃ kho, bhikkhave, chavo chavāya saddhiṃ saṃvasati.
‘‘กถญฺจ, ภิกฺขเว, ฉโว เทวิยา สทฺธิํ สํวสติ? อิธ, ภิกฺขเว, สามิโก โหติ ปาณาติปาตี…เป.… มิจฺฉาทิฎฺฐิโก ทุสฺสีโล ปาปธโมฺม มเจฺฉรมลปริยุฎฺฐิเตน เจตสา อคารํ อชฺฌาวสติ อโกฺกสกปริภาสโก สมณพฺราหฺมณานํ; ภริยา ขฺวสฺส โหติ ปาณาติปาตา ปฎิวิรตา อทินฺนาทานา ปฎิวิรตา กาเมสุมิจฺฉาจารา ปฎิวิรตา มุสาวาทา ปฎิวิรตา ปิสุณาย วาจาย ปฎิวิรตา ผรุสาย วาจาย ปฎิวิรตา สมฺผปฺปลาปา ปฎิวิรตา อนภิชฺฌาลุนี อพฺยาปนฺนจิตฺตา สมฺมาทิฎฺฐิกา สีลวตี กลฺยาณธมฺมา วิคตมลมเจฺฉเรน เจตสา อคารํ อชฺฌาวสติ อนโกฺกสิกปริภาสิกา สมณพฺราหฺมณานํฯ เอวํ โข, ภิกฺขเว, ฉโว เทวิยา สทฺธิํ สํวสติฯ
‘‘Kathañca, bhikkhave, chavo deviyā saddhiṃ saṃvasati? Idha, bhikkhave, sāmiko hoti pāṇātipātī…pe… micchādiṭṭhiko dussīlo pāpadhammo maccheramalapariyuṭṭhitena cetasā agāraṃ ajjhāvasati akkosakaparibhāsako samaṇabrāhmaṇānaṃ; bhariyā khvassa hoti pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā pisuṇāya vācāya paṭiviratā pharusāya vācāya paṭiviratā samphappalāpā paṭiviratā anabhijjhālunī abyāpannacittā sammādiṭṭhikā sīlavatī kalyāṇadhammā vigatamalamaccherena cetasā agāraṃ ajjhāvasati anakkosikaparibhāsikā samaṇabrāhmaṇānaṃ. Evaṃ kho, bhikkhave, chavo deviyā saddhiṃ saṃvasati.
‘‘กถญฺจ, ภิกฺขเว, เทโว ฉวาย สทฺธิํ สํวสติ? อิธ, ภิกฺขเว, สามิโก โหติ ปาณาติปาตา ปฎิวิรโต อทินฺนาทานา ปฎิวิรโต กาเมสุมิจฺฉาจารา ปฎิวิรโต มุสาวาทา ปฎิวิรโต ปิสุณาย วาจาย ปฎิวิรโต ผรุสาย วาจาย ปฎิวิรโต สมฺผปฺปลาปา ปฎิวิรโต อนภิชฺฌาลุ อพฺยาปนฺนจิโตฺต สมฺมาทิฎฺฐิโก สีลวา กลฺยาณธโมฺม วิคตมลมเจฺฉเรน เจตสา อคารํ อชฺฌาวสติ อนโกฺกสกปริภาสโก สมณพฺราหฺมณานํ; ภริยา ขฺวสฺส โหติ ปาณาติปาตินี…เป.… มิจฺฉาทิฎฺฐิกา ทุสฺสีลา ปาปธมฺมา มเจฺฉรมลปริยุฎฺฐิเตน เจตสา อคารํ อชฺฌาวสติ อโกฺกสิกปริภาสิกา สมณพฺราหฺมณานํฯ เอวํ โข, ภิกฺขเว, เทโว ฉวาย สทฺธิํ สํวสติฯ
‘‘Kathañca, bhikkhave, devo chavāya saddhiṃ saṃvasati? Idha, bhikkhave, sāmiko hoti pāṇātipātā paṭivirato adinnādānā paṭivirato kāmesumicchācārā paṭivirato musāvādā paṭivirato pisuṇāya vācāya paṭivirato pharusāya vācāya paṭivirato samphappalāpā paṭivirato anabhijjhālu abyāpannacitto sammādiṭṭhiko sīlavā kalyāṇadhammo vigatamalamaccherena cetasā agāraṃ ajjhāvasati anakkosakaparibhāsako samaṇabrāhmaṇānaṃ; bhariyā khvassa hoti pāṇātipātinī…pe… micchādiṭṭhikā dussīlā pāpadhammā maccheramalapariyuṭṭhitena cetasā agāraṃ ajjhāvasati akkosikaparibhāsikā samaṇabrāhmaṇānaṃ. Evaṃ kho, bhikkhave, devo chavāya saddhiṃ saṃvasati.
‘‘กถญฺจ, ภิกฺขเว, เทโว เทวิยา สทฺธิํ สํวสติ? อิธ, ภิกฺขเว, สามิโก โหติ ปาณาติปาตา ปฎิวิรโต…เป.… สมฺมาทิฎฺฐิโก สีลวา กลฺยาณธโมฺม วิคตมลมเจฺฉเรน เจตสา อคารํ อชฺฌาวสติ อนโกฺกสกปริภาสโก สมณพฺราหฺมณานํ; ภริยาปิสฺส โหติ ปาณาติปาตา ปฎิวิรตา…เป.… สมฺมาทิฎฺฐิกา สีลวตี กลฺยาณธมฺมา วิคตมลมเจฺฉเรน เจตสา อคารํ อชฺฌาวสติ อนโกฺกสิกปริภาสิกา สมณพฺราหฺมณานํฯ เอวํ โข, ภิกฺขเว, เทโว เทวิยา สทฺธิํ สํวสติฯ อิเม โข, ภิกฺขเว, จตฺตาโร สํวาสา’’ติฯ
‘‘Kathañca, bhikkhave, devo deviyā saddhiṃ saṃvasati? Idha, bhikkhave, sāmiko hoti pāṇātipātā paṭivirato…pe… sammādiṭṭhiko sīlavā kalyāṇadhammo vigatamalamaccherena cetasā agāraṃ ajjhāvasati anakkosakaparibhāsako samaṇabrāhmaṇānaṃ; bhariyāpissa hoti pāṇātipātā paṭiviratā…pe… sammādiṭṭhikā sīlavatī kalyāṇadhammā vigatamalamaccherena cetasā agāraṃ ajjhāvasati anakkosikaparibhāsikā samaṇabrāhmaṇānaṃ. Evaṃ kho, bhikkhave, devo deviyā saddhiṃ saṃvasati. Ime kho, bhikkhave, cattāro saṃvāsā’’ti.
‘‘อุโภ จ โหนฺติ ทุสฺสีลา, กทริยา ปริภาสกา;
‘‘Ubho ca honti dussīlā, kadariyā paribhāsakā;
เต โหนฺติ ชานิปตโย, ฉวา สํวาสมาคตาฯ
Te honti jānipatayo, chavā saṃvāsamāgatā.
‘‘สามิโก โหติ ทุสฺสีโล, กทริโย ปริภาสโก;
‘‘Sāmiko hoti dussīlo, kadariyo paribhāsako;
ภริยา สีลวตี โหติ, วทญฺญู วีตมจฺฉรา;
Bhariyā sīlavatī hoti, vadaññū vītamaccharā;
สาปิ เทวี สํวสติ, ฉเวน ปตินา สหฯ
Sāpi devī saṃvasati, chavena patinā saha.
‘‘สามิโก สีลวา โหติ, วทญฺญู วีตมจฺฉโร;
‘‘Sāmiko sīlavā hoti, vadaññū vītamaccharo;
ภริยา โหติ ทุสฺสีลา, กทริยา ปริภาสิกา;
Bhariyā hoti dussīlā, kadariyā paribhāsikā;
สาปิ ฉวา สํวสติ, เทเวน ปตินา สหฯ
Sāpi chavā saṃvasati, devena patinā saha.
‘‘อุโภ สทฺธา วทญฺญู จ, สญฺญตา ธมฺมชีวิโน;
‘‘Ubho saddhā vadaññū ca, saññatā dhammajīvino;
เต โหนฺติ ชานิปตโย, อญฺญมญฺญํ ปิยํวทาฯ
Te honti jānipatayo, aññamaññaṃ piyaṃvadā.
‘‘อตฺถาสํ ปจุรา โหนฺติ, ผาสุกํ อุปชายติ;
‘‘Atthāsaṃ pacurā honti, phāsukaṃ upajāyati;
อมิตฺตา ทุมฺมนา โหนฺติ, อุภินฺนํ สมสีลินํฯ
Amittā dummanā honti, ubhinnaṃ samasīlinaṃ.
‘‘อิธ ธมฺมํ จริตฺวาน, สมสีลพฺพตา อุโภ;
‘‘Idha dhammaṃ caritvāna, samasīlabbatā ubho;
นนฺทิโน เทวโลกสฺมิํ, โมทนฺติ กามกามิโน’’ติฯ จตุตฺถํ;
Nandino devalokasmiṃ, modanti kāmakāmino’’ti. catutthaṃ;
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๔. ทุติยสํวาสสุตฺตวณฺณนา • 4. Dutiyasaṃvāsasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๓-๔. ปฐมสํวาสสุตฺตาทิวณฺณนา • 3-4. Paṭhamasaṃvāsasuttādivaṇṇanā
