| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. දුතියසංයොජනසුත්‌තං
4. Dutiyasaṃyojanasuttaṃ
54. සාවත්‌ථියං විහරති …පෙ.… ‘‘සෙය්‍යථාපි, භික්‌ඛවෙ, තෙලඤ්‌ච පටිච්‌ච වට්‌ටිඤ්‌ච පටිච්‌ච තෙලප්‌පදීපො ඣායෙය්‍ය. තත්‍ර පුරිසො කාලෙන කාලං තෙලං ආසිඤ්‌චෙය්‍ය වට්‌ටිං උපසංහරෙය්‍ය. එවඤ්‌හි සො, භික්‌ඛවෙ, තෙලප්‌පදීපො තදාහාරො තදුපාදානො චිරං දීඝමද්‌ධානං ජලෙය්‍ය. එවමෙව ඛො, භික්‌ඛවෙ, සංයොජනියෙසු ධම්‌මෙසු අස්‌සාදානුපස්‌සිනො විහරතො තණ්‌හා පවඩ්‌ඪති. තණ්‌හාපච්‌චයා උපාදානං…පෙ.… එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස සමුදයො හොති’’.
54. Sāvatthiyaṃ viharati …pe… ‘‘seyyathāpi, bhikkhave, telañca paṭicca vaṭṭiñca paṭicca telappadīpo jhāyeyya. Tatra puriso kālena kālaṃ telaṃ āsiñceyya vaṭṭiṃ upasaṃhareyya. Evañhi so, bhikkhave, telappadīpo tadāhāro tadupādāno ciraṃ dīghamaddhānaṃ jaleyya. Evameva kho, bhikkhave, saṃyojaniyesu dhammesu assādānupassino viharato taṇhā pavaḍḍhati. Taṇhāpaccayā upādānaṃ…pe… evametassa kevalassa dukkhakkhandhassa samudayo hoti’’.
‘‘සෙය්‍යථාපි , භික්‌ඛවෙ, තෙලඤ්‌ච පටිච්‌ච වට්‌ටිඤ්‌ච පටිච්‌ච තෙලප්‌පදීපො ඣායෙය්‍ය. තත්‍ර පුරිසො න කාලෙන කාලං තෙලං ආසිඤ්‌චෙය්‍ය න වට්‌ටිං උපසංහරෙය්‍ය . එවඤ්‌හි සො, භික්‌ඛවෙ, තෙලප්‌පදීපො පුරිමස්‌ස ච උපාදානස්‌ස පරියාදානා අඤ්‌ඤස්‌ස ච අනුපහාරා අනාහාරො නිබ්‌බායෙය්‍ය. එවමෙව ඛො, භික්‌ඛවෙ, සංයොජනියෙසු ධම්‌මෙසු ආදීනවානුපස්‌සිනො විහරතො තණ්‌හා නිරුජ්‌ඣති. තණ්‌හානිරොධා උපාදානනිරොධො…පෙ.… එවමෙතස්‌ස කෙවලස්‌ස දුක්‌ඛක්‌ඛන්‌ධස්‌ස නිරොධො හොතී’’ති. චතුත්‌ථං.
‘‘Seyyathāpi , bhikkhave, telañca paṭicca vaṭṭiñca paṭicca telappadīpo jhāyeyya. Tatra puriso na kālena kālaṃ telaṃ āsiñceyya na vaṭṭiṃ upasaṃhareyya . Evañhi so, bhikkhave, telappadīpo purimassa ca upādānassa pariyādānā aññassa ca anupahārā anāhāro nibbāyeyya. Evameva kho, bhikkhave, saṃyojaniyesu dhammesu ādīnavānupassino viharato taṇhā nirujjhati. Taṇhānirodhā upādānanirodho…pe… evametassa kevalassa dukkhakkhandhassa nirodho hotī’’ti. Catutthaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. දුතියසංයොජනසුත්‌තවණ්‌ණනා • 4. Dutiyasaṃyojanasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 3-4. සංයොජනසුත්‌තද්‌වයවණ්‌ණනා • 3-4. Saṃyojanasuttadvayavaṇṇanā
