| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. দুতিযসঙ্গামসুত্তং
5. Dutiyasaṅgāmasuttaṃ
১২৬. 1 অথ খো রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি। অস্সোসি খো রাজা পসেনদি কোসলো – ‘‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’’তি। অথ খো রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি। অথ খো রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং। তস্মিং খো পন সঙ্গামে রাজা পসেনদি কোসলো রাজানং মাগধং অজাতসত্তুং ৰেদেহিপুত্তং পরাজেসি, জীৰগ্গাহঞ্চ নং অগ্গহেসি। অথ খো রঞ্ঞো পসেনদিস্স কোসলস্স এতদহোসি – ‘‘কিঞ্চাপি খো ম্যাযং রাজা মাগধো অজাতসত্তু ৰেদেহিপুত্তো অদুব্ভন্তস্স দুব্ভতি, অথ চ পন মে ভাগিনেয্যো হোতি। যংনূনাহং রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং পরিযাদিযিত্ৰা সব্বং রথকাযং পরিযাদিযিত্ৰা সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জেয্য’’ন্তি 2।
126.3 Atha kho rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadiṃ kosalaṃ abbhuyyāsi yena kāsi. Assosi kho rājā pasenadi kosalo – ‘‘rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsī’’ti. Atha kho rājā pasenadi kosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi. Atha kho rājā ca māgadho ajātasattu vedehiputto rājā ca pasenadi kosalo saṅgāmesuṃ. Tasmiṃ kho pana saṅgāme rājā pasenadi kosalo rājānaṃ māgadhaṃ ajātasattuṃ vedehiputtaṃ parājesi, jīvaggāhañca naṃ aggahesi. Atha kho rañño pasenadissa kosalassa etadahosi – ‘‘kiñcāpi kho myāyaṃ rājā māgadho ajātasattu vedehiputto adubbhantassa dubbhati, atha ca pana me bhāgineyyo hoti. Yaṃnūnāhaṃ rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ pariyādiyitvā sabbaṃ rathakāyaṃ pariyādiyitvā sabbaṃ pattikāyaṃ pariyādiyitvā jīvantameva naṃ osajjeyya’’nti 4.
অথ খো রাজা পসেনদি কোসলো রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং পরিযাদিযিত্ৰা সব্বং রথকাযং পরিযাদিযিত্ৰা সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জি 5।
Atha kho rājā pasenadi kosalo rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ pariyādiyitvā sabbaṃ rathakāyaṃ pariyādiyitvā sabbaṃ pattikāyaṃ pariyādiyitvā jīvantameva naṃ osajji 6.
অথ খো সম্বহুলা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিংসু। সাৰত্থিযং পিণ্ডায চরিত্ৰা পচ্ছাভত্তং পিণ্ডপাতপটিক্কন্তা যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু। একমন্তং নিসিন্না খো তে ভিক্খূ ভগৰন্তং এতদৰোচুং –
Atha kho sambahulā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisiṃsu. Sāvatthiyaṃ piṇḍāya caritvā pacchābhattaṃ piṇḍapātapaṭikkantā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinnā kho te bhikkhū bhagavantaṃ etadavocuṃ –
‘‘ইধ , ভন্তে, রাজা মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা রাজানং পসেনদিং কোসলং অব্ভুয্যাসি যেন কাসি। অস্সোসি খো, ভন্তে, রাজা পসেনদি কোসলো – ‘রাজা কির মাগধো অজাতসত্তু ৰেদেহিপুত্তো চতুরঙ্গিনিং সেনং সন্নয্হিত্ৰা মমং অব্ভুয্যাতো যেন কাসী’তি। অথ খো, ভন্তে, রাজা পসেনদি কোসলো চতুরঙ্গিনিং সেনং সন্নয্হিত্ৰা রাজানং মাগধং অজাতসত্তুং ৰেদেহিপুত্তং পচ্চুয্যাসি যেন কাসি। অথ খো, ভন্তে, রাজা চ মাগধো অজাতসত্তু ৰেদেহিপুত্তো রাজা চ পসেনদি কোসলো সঙ্গামেসুং। তস্মিং খো পন, ভন্তে, সঙ্গামে রাজা পসেনদি কোসলো রাজানং মাগধং অজাতসত্তুং ৰেদেহিপুত্তং পরাজেসি, জীৰগ্গাহঞ্চ নং অগ্গহেসি। অথ খো, ভন্তে, রঞ্ঞো পসেনদিস্স কোসলস্স এতদহোসি – ‘কিঞ্চাপি খো ম্যাযং রাজা মাগধো অজাতসত্তু ৰেদেহিপুত্তো অদুব্ভন্তস্স দুব্ভতি, অথ চ পন মে ভাগিনেয্যো হোতি। যংনূনাহং রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং সব্বং রথকাযং সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জেয্য’’’ন্তি।
‘‘Idha , bhante, rājā māgadho ajātasattu vedehiputto caturaṅginiṃ senaṃ sannayhitvā rājānaṃ pasenadiṃ kosalaṃ abbhuyyāsi yena kāsi. Assosi kho, bhante, rājā pasenadi kosalo – ‘rājā kira māgadho ajātasattu vedehiputto caturaṅginiṃ senaṃ sannayhitvā mamaṃ abbhuyyāto yena kāsī’ti. Atha kho, bhante, rājā pasenadi kosalo caturaṅginiṃ senaṃ sannayhitvā rājānaṃ māgadhaṃ ajātasattuṃ vedehiputtaṃ paccuyyāsi yena kāsi. Atha kho, bhante, rājā ca māgadho ajātasattu vedehiputto rājā ca pasenadi kosalo saṅgāmesuṃ. Tasmiṃ kho pana, bhante, saṅgāme rājā pasenadi kosalo rājānaṃ māgadhaṃ ajātasattuṃ vedehiputtaṃ parājesi, jīvaggāhañca naṃ aggahesi. Atha kho, bhante, rañño pasenadissa kosalassa etadahosi – ‘kiñcāpi kho myāyaṃ rājā māgadho ajātasattu vedehiputto adubbhantassa dubbhati, atha ca pana me bhāgineyyo hoti. Yaṃnūnāhaṃ rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ sabbaṃ rathakāyaṃ sabbaṃ pattikāyaṃ pariyādiyitvā jīvantameva naṃ osajjeyya’’’nti.
‘‘অথ খো, ভন্তে, রাজা পসেনদি কোসলো রঞ্ঞো মাগধস্স অজাতসত্তুনো ৰেদেহিপুত্তস্স সব্বং হত্থিকাযং পরিযাদিযিত্ৰা সব্বং অস্সকাযং পরিযাদিযিত্ৰা সব্বং রথকাযং পরিযাদিযিত্ৰা সব্বং পত্তিকাযং পরিযাদিযিত্ৰা জীৰন্তমেৰ নং ওসজ্জী’’তি। অথ খো ভগৰা এতমত্থং ৰিদিত্ৰা তাযং ৰেলাযং ইমা গাথাযো অভাসি –
‘‘Atha kho, bhante, rājā pasenadi kosalo rañño māgadhassa ajātasattuno vedehiputtassa sabbaṃ hatthikāyaṃ pariyādiyitvā sabbaṃ assakāyaṃ pariyādiyitvā sabbaṃ rathakāyaṃ pariyādiyitvā sabbaṃ pattikāyaṃ pariyādiyitvā jīvantameva naṃ osajjī’’ti. Atha kho bhagavā etamatthaṃ viditvā tāyaṃ velāyaṃ imā gāthāyo abhāsi –
‘‘ৰিলুম্পতেৰ পুরিসো, যাৰস্স উপকপ্পতি।
‘‘Vilumpateva puriso, yāvassa upakappati;
‘‘ঠানঞ্হি মঞ্ঞতি বালো, যাৰ পাপং ন পচ্চতি।
‘‘Ṭhānañhi maññati bālo, yāva pāpaṃ na paccati;
যদা চ পচ্চতি পাপং, অথ দুক্খং নিগচ্ছতি॥
Yadā ca paccati pāpaṃ, atha dukkhaṃ nigacchati.
অক্কোসকো চ অক্কোসং, রোসেতারঞ্চ রোসকো।
Akkosako ca akkosaṃ, rosetārañca rosako;
অথ কম্মৰিৰট্টেন, সো ৰিলুত্তো ৰিলুপ্পতী’’তি॥
Atha kammavivaṭṭena, so vilutto viluppatī’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. দুতিযসঙ্গামসুত্তৰণ্ণনা • 5. Dutiyasaṅgāmasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. দুতিযসঙ্গামসুত্তৰণ্ণনা • 5. Dutiyasaṅgāmasuttavaṇṇanā
