| Library / Tipiṭaka / तिपिटक • Tipiṭaka / परिवारपाळि • Parivārapāḷi |
१२. दुतियसङ्घभेदकवग्गो
12. Dutiyasaṅghabhedakavaggo
४६०. ‘‘कतिहि नु खो, भन्ते, अङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो’’ति? ‘‘पञ्चहुपालि, अङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति , अविनयं विनयोति दीपेति, विनयं अविनयोति दीपेति, अविनिधाय दिट्ठिं कम्मेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
460. ‘‘Katihi nu kho, bhante, aṅgehi samannāgato saṅghabhedako na āpāyiko na nerayiko na kappaṭṭho na atekiccho’’ti? ‘‘Pañcahupāli, aṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti , avinayaṃ vinayoti dīpeti, vinayaṃ avinayoti dīpeti, avinidhāya diṭṭhiṃ kammena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय दिट्ठिं उद्देसेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
‘‘Aparehipi, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya diṭṭhiṃ uddesena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय दिट्ठिं वोहरन्तो। इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
‘‘Aparehipi, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya diṭṭhiṃ voharanto. Imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय दिट्ठिं अनुस्सावनेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
‘‘Aparehipi, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya diṭṭhiṃ anussāvanena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय दिट्ठिं सलाकग्गाहेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
‘‘Aparehipi, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya diṭṭhiṃ salākaggāhena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय खन्तिं कम्मेन…पे॰… अविनिधाय खन्तिं उद्देसेन…पे॰… अविनिधाय खन्तिं वोहरन्तो…पे॰… अविनिधाय खन्तिं अनुस्सावनेन…पे॰… अविनिधाय खन्तिं सलाकग्गाहेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
‘‘Aparehipi, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya khantiṃ kammena…pe… avinidhāya khantiṃ uddesena…pe… avinidhāya khantiṃ voharanto…pe… avinidhāya khantiṃ anussāvanena…pe… avinidhāya khantiṃ salākaggāhena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि , उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय रुचिं कम्मेन…पे॰… अविनिधाय रुचिं उद्देसेन…पे॰… अविनिधाय रुचिं वोहरन्तो…पे॰… अविनिधाय रुचिं अनुस्सावनेन…पे॰… अविनिधाय रुचिं सलाकग्गाहेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो।
‘‘Aparehipi , upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya ruciṃ kammena…pe… avinidhāya ruciṃ uddesena…pe… avinidhāya ruciṃ voharanto…pe… avinidhāya ruciṃ anussāvanena…pe… avinidhāya ruciṃ salākaggāhena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho.
‘‘अपरेहिपि, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो। कतमेहि पञ्चहि? इधुपालि, भिक्खु अधम्मं धम्मोति दीपेति, धम्मं अधम्मोति दीपेति, अविनयं विनयोति दीपेति, विनयं अविनयोति दीपेति, अविनिधाय सञ्ञं कम्मेन…पे॰… अविनिधाय सञ्ञं उद्देसेन…पे॰… अविनिधाय सञ्ञं वोहरन्तो…पे॰… अविनिधाय सञ्ञं अनुस्सावनेन…पे॰… अविनिधाय सञ्ञं सलाकग्गाहेन – इमेहि खो, उपालि, पञ्चहङ्गेहि समन्नागतो सङ्घभेदको न आपायिको न नेरयिको न कप्पट्ठो न अतेकिच्छो’’ति।
‘‘Aparehipi, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, avinidhāya saññaṃ kammena…pe… avinidhāya saññaṃ uddesena…pe… avinidhāya saññaṃ voharanto…pe… avinidhāya saññaṃ anussāvanena…pe… avinidhāya saññaṃ salākaggāhena – imehi kho, upāli, pañcahaṅgehi samannāgato saṅghabhedako na āpāyiko na nerayiko na kappaṭṭho na atekiccho’’ti.
दुतियसङ्घभेदकवग्गो निट्ठितो द्वादसमो।
Dutiyasaṅghabhedakavaggo niṭṭhito dvādasamo.
तस्सुद्दानं –
Tassuddānaṃ –
अविनिधाय दिट्ठिं कम्मेन, उद्देसे वोहरेन च।
Avinidhāya diṭṭhiṃ kammena, uddese voharena ca;
अनुस्सावने सलाकेन, पञ्चेते दिट्ठिनिस्सिता॥
Anussāvane salākena, pañcete diṭṭhinissitā.
खन्तिं रुचिञ्च सञ्ञञ्च, तयो ते पञ्चधा नया॥
Khantiṃ ruciñca saññañca, tayo te pañcadhā nayā.
हेट्ठिमे कण्हपक्खम्हि, समवीसति विधी यथा।
Heṭṭhime kaṇhapakkhamhi, samavīsati vidhī yathā;
तथेव सुक्कपक्खम्हि, समवीसति जानथाति॥
Tatheva sukkapakkhamhi, samavīsati jānathāti.
