| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
১১. দুতিযসঙ্ঘভেদসিক্খাপদৰণ্ণনা
11. Dutiyasaṅghabhedasikkhāpadavaṇṇanā
৪১৭-৮. তেন সমযেন বুদ্ধো ভগৰাতি দুতিযসঙ্ঘভেদসিক্খাপদং। তত্থ অনুৰত্তকাতি তস্স দিট্ঠিখন্তিরুচিগ্গহণেন অনুপটিপজ্জনকা। ৰগ্গং অসামগ্গিপক্খিযৰচনং ৰদন্তীতি ৰগ্গৰাদকা। পদভাজনে পন ‘‘তস্স ৰণ্ণায পক্খায ঠিতা হোন্তী’’তি ৰুত্তং, তস্স সঙ্ঘভেদায পরক্কমন্তস্স ৰণ্ণত্থায চ পক্খৰুড্ঢিঅত্থায চ ঠিতাতি অত্থো। যে হি ৰগ্গৰাদকা, তে নিযমেন ঈদিসা হোন্তি, তস্মা এৰং ৰুত্তং। যস্মা পন তিণ্ণং উদ্ধং কম্মারহা ন হোন্তি, ন হি সঙ্ঘো সঙ্ঘস্স কম্মং করোতি, তস্মা একো ৰা দ্ৰে ৰা তযো ৰাতি ৰুত্তং।
417-8.Tena samayena buddho bhagavāti dutiyasaṅghabhedasikkhāpadaṃ. Tattha anuvattakāti tassa diṭṭhikhantiruciggahaṇena anupaṭipajjanakā. Vaggaṃ asāmaggipakkhiyavacanaṃ vadantīti vaggavādakā. Padabhājane pana ‘‘tassa vaṇṇāya pakkhāya ṭhitā hontī’’ti vuttaṃ, tassa saṅghabhedāya parakkamantassa vaṇṇatthāya ca pakkhavuḍḍhiatthāya ca ṭhitāti attho. Ye hi vaggavādakā, te niyamena īdisā honti, tasmā evaṃ vuttaṃ. Yasmā pana tiṇṇaṃ uddhaṃ kammārahā na honti, na hi saṅgho saṅghassa kammaṃ karoti, tasmā eko vā dve vā tayo vāti vuttaṃ.
জানাতি নোতি অম্হাকং ছন্দাদীনি জানাতি। ভাসতীতি ‘‘এৰং করোমা’’তি অম্হেহি সদ্ধিং ভাসতি। অম্হাকম্পেতং খমতীতি যং সো করোতি, এতং অম্হাকম্পি রুচ্চতি।
Jānātinoti amhākaṃ chandādīni jānāti. Bhāsatīti ‘‘evaṃ karomā’’ti amhehi saddhiṃ bhāsati. Amhākampetaṃ khamatīti yaṃ so karoti, etaṃ amhākampi ruccati.
সমেতাযস্মন্তানং সঙ্ঘেনাতি আযস্মন্তানং চিত্তং সঙ্ঘেন সদ্ধিং সমেতু সমাগচ্ছতু, একীভাৰং যাতূতি ৰুত্তং হোতি। সেসমেত্থ পঠমসিক্খাপদে ৰুত্তনযত্তা উত্তানত্থত্তা চ পাকটমেৰ।
Sametāyasmantānaṃ saṅghenāti āyasmantānaṃ cittaṃ saṅghena saddhiṃ sametu samāgacchatu, ekībhāvaṃ yātūti vuttaṃ hoti. Sesamettha paṭhamasikkhāpade vuttanayattā uttānatthattā ca pākaṭameva.
সমুট্ঠানাদীনিপি পঠমসিক্খাপদসদিসানেৰাতি।
Samuṭṭhānādīnipi paṭhamasikkhāpadasadisānevāti.
দুতিযসঙ্ঘভেদসিক্খাপদৰণ্ণনা নিট্ঠিতা।
Dutiyasaṅghabhedasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১১. ভেদানুৰত্তকসিক্খাপদং • 11. Bhedānuvattakasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ১১. দুতিযসঙ্ঘভেদসিক্খাপদৰণ্ণনা • 11. Dutiyasaṅghabhedasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১১. দুতিযসঙ্ঘভেদসিক্খাপদৰণ্ণনা • 11. Dutiyasaṅghabhedasikkhāpadavaṇṇanā
