| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியஸங்கா⁴தி³ஸேஸஸிக்கா²பத³ங்
2. Dutiyasaṅghādisesasikkhāpadaṃ
682. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன வேஸாலியங் அஞ்ஞதரஸ்ஸ லிச்ச²விஸ்ஸ பஜாபதி அதிசாரினீ ஹோதி. அத² கோ² ஸோ லிச்ச²வி தங் இத்தி²ங் ஏதத³வோச – ‘‘ஸாது⁴ விரமாஹி, அனத்த²ங் கோ² தே கரிஸ்ஸாமீ’’தி. ஏவம்பி ஸா வுச்சமானா நாதி³யி. தேன கோ² பன ஸமயேன வேஸாலியங் லிச்ச²விக³ணோ ஸன்னிபதிதோ ஹோதி கேனசிதே³வ கரணீயேன. அத² கோ² ஸோ லிச்ச²வி தே லிச்ச²வயோ ஏதத³வோச – ‘‘ஏகங் மே, அய்யோ , இத்தி²ங் அனுஜானாதா²’’தி. ‘‘கா நாம ஸா’’தி? ‘‘மய்ஹங் பஜாபதி அதிசரதி, தங் கா⁴தெஸ்ஸாமீ’’தி. ‘‘ஜானாஹீ’’தி. அஸ்ஸோஸி கோ² ஸா இத்தீ² – ‘‘ஸாமிகோ கிர மங் கா⁴தேதுகாமோ’’தி. வரப⁴ண்ட³ங் ஆதா³ய ஸாவத்தி²ங் க³ந்த்வா தித்தி²யே உபஸங்கமித்வா பப்³ப³ஜ்ஜங் யாசி. தித்தி²யா ந இச்சி²ங்ஸு பப்³பா³ஜேதுங். பி⁴க்கு²னியோ உபஸங்கமித்வா பப்³ப³ஜ்ஜங் யாசி. பி⁴க்கு²னியோபி ந இச்சி²ங்ஸு பப்³பா³ஜேதுங். து²ல்லனந்த³ங் பி⁴க்கு²னிங் உபஸங்கமித்வா ப⁴ண்ட³கங் த³ஸ்ஸெத்வா பப்³ப³ஜ்ஜங் யாசி. து²ல்லனந்தா³ பி⁴க்கு²னீ ப⁴ண்ட³கங் க³ஹெத்வா பப்³பா³ஜேஸி.
682. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena vesāliyaṃ aññatarassa licchavissa pajāpati aticārinī hoti. Atha kho so licchavi taṃ itthiṃ etadavoca – ‘‘sādhu viramāhi, anatthaṃ kho te karissāmī’’ti. Evampi sā vuccamānā nādiyi. Tena kho pana samayena vesāliyaṃ licchavigaṇo sannipatito hoti kenacideva karaṇīyena. Atha kho so licchavi te licchavayo etadavoca – ‘‘ekaṃ me, ayyo , itthiṃ anujānāthā’’ti. ‘‘Kā nāma sā’’ti? ‘‘Mayhaṃ pajāpati aticarati, taṃ ghātessāmī’’ti. ‘‘Jānāhī’’ti. Assosi kho sā itthī – ‘‘sāmiko kira maṃ ghātetukāmo’’ti. Varabhaṇḍaṃ ādāya sāvatthiṃ gantvā titthiye upasaṅkamitvā pabbajjaṃ yāci. Titthiyā na icchiṃsu pabbājetuṃ. Bhikkhuniyo upasaṅkamitvā pabbajjaṃ yāci. Bhikkhuniyopi na icchiṃsu pabbājetuṃ. Thullanandaṃ bhikkhuniṃ upasaṅkamitvā bhaṇḍakaṃ dassetvā pabbajjaṃ yāci. Thullanandā bhikkhunī bhaṇḍakaṃ gahetvā pabbājesi.
அத² கோ² ஸோ லிச்ச²வி தங் இத்தி²ங் க³வேஸந்தோ ஸாவத்தி²ங் க³ந்த்வா பி⁴க்கு²னீஸு பப்³ப³ஜிதங் தி³ஸ்வான யேன ராஜா பஸேனதி³ கோஸலோ தேனுபஸங்கமி; உபஸங்கமித்வா ராஜானங் பஸேனதி³ங் கோஸலங் ஏதத³வோச – ‘‘பஜாபதி மே, தே³வ, வரப⁴ண்ட³ங் ஆதா³ய ஸாவத்தி²ங் அனுப்பத்தா. தங் தே³வோ அனுஜானாதூ’’தி. ‘‘தேன ஹி, ப⁴ணே, விசினித்வா ஆசிக்கா²’’தி. ‘‘தி³ட்டா², தே³வ, பி⁴க்கு²னீஸு பப்³ப³ஜிதா’’தி. ‘‘ஸசே, ப⁴ணே, பி⁴க்கு²னீஸு பப்³ப³ஜிதா, ந ஸா லப்³பா⁴ கிஞ்சி காதுங். ஸ்வாக்கா²தோ ப⁴க³வதா த⁴ம்மோ, சரது ப்³ரஹ்மசரியங் ஸம்மா து³க்க²ஸ்ஸ அந்தகிரியாயா’’தி. அத² கோ² ஸோ லிச்ச²வி உஜ்ஜா²யதி கி²ய்யதி விபாசேதி – ‘‘கத²ஞ்ஹி நாம பி⁴க்கு²னியோ சோரிங் பப்³பா³ஜெஸ்ஸந்தீ’’தி! அஸ்ஸோஸுங் கோ² பி⁴க்கு²னியோ தஸ்ஸ லிச்ச²விஸ்ஸ உஜ்ஜா²யந்தஸ்ஸ கி²ய்யந்தஸ்ஸ விபாசெந்தஸ்ஸ. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம அய்யா து²ல்லனந்தா³ சோரிங் பப்³பா³ஜெஸ்ஸதீ’’தி! அத² கோ² தா பி⁴க்கு²னியோ பி⁴க்கூ²னங் ஏதமத்த²ங் ஆரோசேஸுங்…பே॰… ஸச்சங் கிர, பி⁴க்க²வே, து²ல்லனந்தா³ பி⁴க்கு²னீ சோரிங் பப்³பா³ஜேதீதி 1? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, து²ல்லனந்தா³ பி⁴க்கு²னீ சோரிங் பப்³பா³ஜெஸ்ஸதி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
Atha kho so licchavi taṃ itthiṃ gavesanto sāvatthiṃ gantvā bhikkhunīsu pabbajitaṃ disvāna yena rājā pasenadi kosalo tenupasaṅkami; upasaṅkamitvā rājānaṃ pasenadiṃ kosalaṃ etadavoca – ‘‘pajāpati me, deva, varabhaṇḍaṃ ādāya sāvatthiṃ anuppattā. Taṃ devo anujānātū’’ti. ‘‘Tena hi, bhaṇe, vicinitvā ācikkhā’’ti. ‘‘Diṭṭhā, deva, bhikkhunīsu pabbajitā’’ti. ‘‘Sace, bhaṇe, bhikkhunīsu pabbajitā, na sā labbhā kiñci kātuṃ. Svākkhāto bhagavatā dhammo, caratu brahmacariyaṃ sammā dukkhassa antakiriyāyā’’ti. Atha kho so licchavi ujjhāyati khiyyati vipāceti – ‘‘kathañhi nāma bhikkhuniyo coriṃ pabbājessantī’’ti! Assosuṃ kho bhikkhuniyo tassa licchavissa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā coriṃ pabbājessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ…pe… saccaṃ kira, bhikkhave, thullanandā bhikkhunī coriṃ pabbājetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī coriṃ pabbājessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
683. ‘‘யா பன பி⁴க்கு²னீ ஜானங் சோரிங் வஜ்ஜ²ங் விதி³தங் அனபலோகெத்வா ராஜானங் வா ஸங்க⁴ங் வா க³ணங் வா பூக³ங் வா ஸேணிங் வா அஞ்ஞத்ர கப்பா வுட்டா²பெய்ய, அயம்பி பி⁴க்கு²னீ பட²மாபத்திகங் த⁴ம்மங் ஆபன்னா நிஸ்ஸாரணீயங் ஸங்கா⁴தி³ஸேஸ’’ந்தி.
683.‘‘Yāpana bhikkhunī jānaṃ coriṃ vajjhaṃ viditaṃ anapaloketvā rājānaṃ vā saṅghaṃ vā gaṇaṃ vā pūgaṃ vā seṇiṃ vā aññatra kappā vuṭṭhāpeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
684. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
684.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ஜானாதி நாம ஸாமங் வா ஜானாதி அஞ்ஞே வா தஸ்ஸா ஆரோசெந்தி, ஸா வா ஆரோசேதி.
Jānāti nāma sāmaṃ vā jānāti aññe vā tassā ārocenti, sā vā āroceti.
சோரீ நாம யா பஞ்சமாஸகங் வா அதிரேகபஞ்சமாஸகங் வா அக்³க⁴னகங் அதி³ன்னங் தெ²ய்யஸங்கா²தங் ஆதி³யதி, ஏஸா சோரீ நாம.
Corī nāma yā pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, esā corī nāma.
வஜ்ஜா² நாம யங் கத்வா வஜ்ஜ²ப்பத்தா ஹோதி.
Vajjhā nāma yaṃ katvā vajjhappattā hoti.
விதி³தா நாம அஞ்ஞேஹி மனுஸ்ஸேஹி ஞாதா ஹோதி ‘‘வஜ்ஜா² ஏஸா’’தி.
Viditā nāma aññehi manussehi ñātā hoti ‘‘vajjhā esā’’ti.
அனபலோகெத்வாதி அனாபுச்சா².
Anapaloketvāti anāpucchā.
ராஜா நாம யத்த² ராஜா அனுஸாஸதி, ராஜா அபலோகேதப்³போ³.
Rājā nāma yattha rājā anusāsati, rājā apaloketabbo.
ஸங்கோ⁴ நாம பி⁴க்கு²னிஸங்கோ⁴ வுச்சதி, பி⁴க்கு²னிஸங்கோ⁴ அபலோகேதப்³போ³.
Saṅgho nāma bhikkhunisaṅgho vuccati, bhikkhunisaṅgho apaloketabbo.
க³ணோ நாம யத்த² க³ணோ அனுஸாஸதி, க³ணோ அபலோகேதப்³போ³.
Gaṇo nāma yattha gaṇo anusāsati, gaṇo apaloketabbo.
பூகோ³ நாம யத்த² பூகோ³ அனுஸாஸதி, பூகோ³ அபலோகேதப்³போ³.
Pūgo nāma yattha pūgo anusāsati, pūgo apaloketabbo.
ஸேணி நாம யத்த² ஸேணி அனுஸாஸதி, ஸேணி அபலோகேதப்³போ³.
Seṇi nāma yattha seṇi anusāsati, seṇi apaloketabbo.
அஞ்ஞத்ர கப்பாதி ட²பெத்வா கப்பங். கப்பங் நாம த்³வே கப்பானி – தித்தி²யேஸு வா பப்³ப³ஜிதா ஹோதி அஞ்ஞாஸு வா பி⁴க்கு²னீஸு பப்³ப³ஜிதா. அஞ்ஞத்ர கப்பா ‘‘வுட்டா²பெஸ்ஸாமீ’’தி க³ணங் வா ஆசரினிங் வா பத்தங் வா சீவரங் வா பரியேஸதி, ஸீமங் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடங். த்³வீஹி கம்மவாசாஹி து²ல்லச்சயா. கம்மவாசாபரியோஸானே உபஜ்ஜா²யாய ஆபத்தி ஸங்கா⁴தி³ஸேஸஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.
Aññatrakappāti ṭhapetvā kappaṃ. Kappaṃ nāma dve kappāni – titthiyesu vā pabbajitā hoti aññāsu vā bhikkhunīsu pabbajitā. Aññatra kappā ‘‘vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi thullaccayā. Kammavācāpariyosāne upajjhāyāya āpatti saṅghādisesassa. Gaṇassa ca ācariniyā ca āpatti dukkaṭassa.
அயம்பீதி புரிமங் உபாதா³ய வுச்சதி.
Ayampīti purimaṃ upādāya vuccati.
பட²மாபத்திகந்தி ஸஹ வத்து²ஜ்ஜா²சாரா ஆபஜ்ஜதி அஸமனுபா⁴ஸனாய.
Paṭhamāpattikanti saha vatthujjhācārā āpajjati asamanubhāsanāya.
நிஸ்ஸாரணீயந்தி ஸங்க⁴ம்ஹா நிஸ்ஸாரீயதி.
Nissāraṇīyanti saṅghamhā nissārīyati.
ஸங்கா⁴தி³ஸேஸந்தி…பே॰… தேனபி வுச்சதி ஸங்கா⁴தி³ஸேஸோதி.
Saṅghādisesanti…pe… tenapi vuccati saṅghādisesoti.
685. சோரியா சோரிஸஞ்ஞா அஞ்ஞத்ர கப்பா வுட்டா²பேதி, ஆபத்தி ஸங்கா⁴தி³ஸேஸஸ்ஸ. சோரியா வேமதிகா அஞ்ஞத்ர கப்பா வுட்டா²பேதி, ஆபத்தி து³க்கடஸ்ஸ. சோரியா அசோரிஸஞ்ஞா அஞ்ஞத்ர கப்பா வுட்டா²பேதி, அனாபத்தி. அசோரியா சோரிஸஞ்ஞா, ஆபத்தி து³க்கடஸ்ஸ. அசோரியா வேமதிகா, ஆபத்தி து³க்கடஸ்ஸ. அசோரியா அசோரிஸஞ்ஞா, அனாபத்தி.
685. Coriyā corisaññā aññatra kappā vuṭṭhāpeti, āpatti saṅghādisesassa. Coriyā vematikā aññatra kappā vuṭṭhāpeti, āpatti dukkaṭassa. Coriyā acorisaññā aññatra kappā vuṭṭhāpeti, anāpatti. Acoriyā corisaññā, āpatti dukkaṭassa. Acoriyā vematikā, āpatti dukkaṭassa. Acoriyā acorisaññā, anāpatti.
686. அனாபத்தி அஜானந்தீ வுட்டா²பேதி, அபலோகெத்வா வுட்டா²பேதி, கப்பகதங் வுட்டா²பேதி, உம்மத்திகாய, ஆதி³கம்மிகாயாதி.
686. Anāpatti ajānantī vuṭṭhāpeti, apaloketvā vuṭṭhāpeti, kappakataṃ vuṭṭhāpeti, ummattikāya, ādikammikāyāti.
து³தியஸங்கா⁴தி³ஸேஸஸிக்கா²பத³ங் நிட்டி²தங்.
Dutiyasaṅghādisesasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியஸங்கா⁴தி³ஸேஸஸிக்கா²பத³ங் • 2. Dutiyasaṅghādisesasikkhāpadaṃ
