| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
2. து³தியஸங்கா⁴தி³ஸேஸஸிக்கா²பத³ங்
2. Dutiyasaṅghādisesasikkhāpadaṃ
682. து³தியே வரிதப்³ப³ங் இச்சி²தப்³ப³ந்தி வரங், தமேவ ப⁴ண்ட³ந்தி வரப⁴ண்ட³ந்தி த³ஸ்ஸெந்தோ ஆஹ ‘‘மஹக்³க⁴ப⁴ண்ட³’’ந்தி. ‘‘முத்தா’’திஆதி³னா தஸ்ஸ ஸரூபங் த³ஸ்ஸேதி.
682. Dutiye varitabbaṃ icchitabbanti varaṃ, tameva bhaṇḍanti varabhaṇḍanti dassento āha ‘‘mahagghabhaṇḍa’’nti. ‘‘Muttā’’tiādinā tassa sarūpaṃ dasseti.
683. ஆபுப்³போ³ லோகஸத்³தோ³ அபி⁴முக²ங் லோகனத்தோ² ஹோதி, உபுப்³போ³ உத்³த⁴ங் லோகனத்தோ², ஓபுப்³போ³ அதோ⁴ லோகனத்தோ², விபுப்³போ³ இதோ சிதோ ச வீதிஹரணலோகனத்தோ², அபபுப்³போ³ ஆபுச்ச²னத்தோ². இத⁴ பன அபபுப்³ப³த்தா ஆபுச்ச²னத்தோ²தி ஆஹ ‘‘அனாபுச்சி²த்வா’’தி. மல்லக³ண ப⁴டிபுத்த க³ணாதி³கந்திஆதீ³ஸு மல்லக³ணோ நாம நாராயனப⁴த்திகோ க³ணோ. ப⁴டிபுத்தக³ணோ நாம குமாரப⁴த்திகோ க³ணோ. ஆதி³ஸத்³தே³ன அஞ்ஞம்பி கா³மனிக³மே அனுஸாஸிதுங் ஸமத்த²ங் க³ணங் ஸங்க³ண்ஹாதி. அத² வா மல்லக³ணோதி மல்லராஜூனங் க³ணோ. தே ஹி க³ணங் கத்வா குஸினாராயங் ரஜ்ஜங் அனுஸாஸந்தி, தே ஸந்தா⁴ய வுத்தங் ‘‘மல்லக³ணோ’’தி. ப⁴டிபுத்தக³ணோதி லிச்ச²விக³ணோ பரியாயந்தரேன வுத்தோ. லிச்ச²விராஜூனஞ்ஹி புப்³ப³ராஜானோ ப⁴டினாமகஸ்ஸ ஜடிலஸ்ஸ புத்தா ஹொந்தி, தேஸங் வங்ஸே பவத்தா ஏதரஹி லிச்ச²விராஜானோபி ப⁴டிபுத்தாதி வுச்சந்தி. ஜடிலோ பன பா³ராணஸிரஞ்ஞோ புத்தே நதி³ஸோதேன வுய்ஹமானே நதி³தோ உத்³த⁴ரித்வா அத்தனோ அஸ்ஸமே புத்தங் கத்வா ப⁴ரணத்தா போஸனத்தா ப⁴டீதி வுச்சதி, தஸ்ஸ புத்தத்தா லிச்ச²விக³ணோ ப⁴டிபுத்தோதி வுச்சதி. தேபி க³ணங் கத்வா வேஸாலியங் ரஜ்ஜங் அனுஸாஸந்தி, தங் ஸந்தா⁴ய வுத்தங் ‘‘ப⁴டிபுத்தக³ணோ’’தி. த⁴ம்மக³ணோ நாம ஸாஸனத⁴ம்மப⁴த்திகோ க³ணோ. க³ந்தி⁴கஸேணீதி க³ந்த⁴காரானங் ஸமஜாதிகானங் ஸிப்பிகானங் க³ணோ. து³ஸ்ஸிகஸேணீதி து³ஸ்ஸகாரானங் ஸமஜாதிகானங் பேஸகாரானங் க³ணோ. ஆதி³ஸத்³தே³ன தச்ச²கஸேணிரஜகஸேணிஆத³யோ ஸங்க³ய்ஹந்தி. யத்த² யத்தா²தி யஸ்மிங் யஸ்மிங் டா²னே. ஹீதி ஸச்சங். தே ஏவாதி க³ணாத³யோ ஏவ. புன தேதி க³ணாத³யோ. இத³ந்தி ‘‘க³ணங் வா’’திஆதி³வசனங். எத்தா²தி ராஜாதீ³ஸு. ஸங்கா⁴புச்ச²னமேவ பதா⁴னகாரணந்தி ஆஹ ‘‘பி⁴க்கு²னிஸங்கோ⁴ ஆபுச்சி²தப்³போ³வா’’தி. கப்பக³திகந்தி கப்பங் க³ச்ச²தீதி கப்பக³தா, ஸா ஏவ கப்பக³திகா, தங்.
683. Āpubbo lokasaddo abhimukhaṃ lokanattho hoti, upubbo uddhaṃ lokanattho, opubbo adho lokanattho, vipubbo ito cito ca vītiharaṇalokanattho, apapubbo āpucchanattho. Idha pana apapubbattā āpucchanatthoti āha ‘‘anāpucchitvā’’ti. Mallagaṇa bhaṭiputta gaṇādikantiādīsu mallagaṇo nāma nārāyanabhattiko gaṇo. Bhaṭiputtagaṇo nāma kumārabhattiko gaṇo. Ādisaddena aññampi gāmanigame anusāsituṃ samatthaṃ gaṇaṃ saṅgaṇhāti. Atha vā mallagaṇoti mallarājūnaṃ gaṇo. Te hi gaṇaṃ katvā kusinārāyaṃ rajjaṃ anusāsanti, te sandhāya vuttaṃ ‘‘mallagaṇo’’ti. Bhaṭiputtagaṇoti licchavigaṇo pariyāyantarena vutto. Licchavirājūnañhi pubbarājāno bhaṭināmakassa jaṭilassa puttā honti, tesaṃ vaṃse pavattā etarahi licchavirājānopi bhaṭiputtāti vuccanti. Jaṭilo pana bārāṇasirañño putte nadisotena vuyhamāne nadito uddharitvā attano assame puttaṃ katvā bharaṇattā posanattā bhaṭīti vuccati, tassa puttattā licchavigaṇo bhaṭiputtoti vuccati. Tepi gaṇaṃ katvā vesāliyaṃ rajjaṃ anusāsanti, taṃ sandhāya vuttaṃ ‘‘bhaṭiputtagaṇo’’ti. Dhammagaṇo nāma sāsanadhammabhattiko gaṇo. Gandhikaseṇīti gandhakārānaṃ samajātikānaṃ sippikānaṃ gaṇo. Dussikaseṇīti dussakārānaṃ samajātikānaṃ pesakārānaṃ gaṇo. Ādisaddena tacchakaseṇirajakaseṇiādayo saṅgayhanti. Yattha yatthāti yasmiṃ yasmiṃ ṭhāne. Hīti saccaṃ. Te evāti gaṇādayo eva. Puna teti gaṇādayo. Idanti ‘‘gaṇaṃ vā’’tiādivacanaṃ. Etthāti rājādīsu. Saṅghāpucchanameva padhānakāraṇanti āha ‘‘bhikkhunisaṅgho āpucchitabbovā’’ti. Kappagatikanti kappaṃ gacchatīti kappagatā, sā eva kappagatikā, taṃ.
கேனசி கரணீயேன க²ண்ட³ஸீமங் அக³ந்த்வா கேனசி கரணீயேன பி⁴க்கு²னீஸு பக்கந்தாஸூதி யோஜனா. நிஸ்ஸிதகபரிஸாயாதி அந்தேவாஸிகபரிஸாய. வுட்டா²பெந்தியாதி உபஸம்பாதெ³ந்தியாதி. து³தியங்.
Kenaci karaṇīyena khaṇḍasīmaṃ agantvā kenaci karaṇīyena bhikkhunīsu pakkantāsūti yojanā. Nissitakaparisāyāti antevāsikaparisāya. Vuṭṭhāpentiyāti upasampādentiyāti. Dutiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / பி⁴க்கு²னீவிப⁴ங்க³ • Bhikkhunīvibhaṅga / 2. து³தியஸங்கா⁴தி³ஸேஸஸிக்கா²பத³ங் • 2. Dutiyasaṅghādisesasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 2. து³தியஸங்கா⁴தி³ஸேஸஸிக்கா²பத³வண்ணனா • 2. Dutiyasaṅghādisesasikkhāpadavaṇṇanā
