| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๒. ทุติยสงฺฆาทิเสสสิกฺขาปทํ
2. Dutiyasaṅghādisesasikkhāpadaṃ
๖๘๒. ทุติเย วริตพฺพํ อิจฺฉิตพฺพนฺติ วรํ, ตเมว ภณฺฑนฺติ วรภณฺฑนฺติ ทเสฺสโนฺต อาห ‘‘มหคฺฆภณฺฑ’’นฺติฯ ‘‘มุตฺตา’’ติอาทินา ตสฺส สรูปํ ทเสฺสติฯ
682. Dutiye varitabbaṃ icchitabbanti varaṃ, tameva bhaṇḍanti varabhaṇḍanti dassento āha ‘‘mahagghabhaṇḍa’’nti. ‘‘Muttā’’tiādinā tassa sarūpaṃ dasseti.
๖๘๓. อาปุโพฺพ โลกสโทฺท อภิมุขํ โลกนโตฺถ โหติ, อุปุโพฺพ อุทฺธํ โลกนโตฺถ, โอปุโพฺพ อโธ โลกนโตฺถ, วิปุโพฺพ อิโต จิโต จ วีติหรณโลกนโตฺถ, อปปุโพฺพ อาปุจฺฉนโตฺถฯ อิธ ปน อปปุพฺพตฺตา อาปุจฺฉนโตฺถติ อาห ‘‘อนาปุจฺฉิตฺวา’’ติฯ มลฺลคณ ภฎิปุตฺต คณาทิกนฺติอาทีสุ มลฺลคโณ นาม นารายนภตฺติโก คโณฯ ภฎิปุตฺตคโณ นาม กุมารภตฺติโก คโณฯ อาทิสเทฺทน อญฺญมฺปิ คามนิคเม อนุสาสิตุํ สมตฺถํ คณํ สงฺคณฺหาติฯ อถ วา มลฺลคโณติ มลฺลราชูนํ คโณฯ เต หิ คณํ กตฺวา กุสินารายํ รชฺชํ อนุสาสนฺติ, เต สนฺธาย วุตฺตํ ‘‘มลฺลคโณ’’ติฯ ภฎิปุตฺตคโณติ ลิจฺฉวิคโณ ปริยายนฺตเรน วุโตฺตฯ ลิจฺฉวิราชูนญฺหิ ปุพฺพราชาโน ภฎินามกสฺส ชฎิลสฺส ปุตฺตา โหนฺติ, เตสํ วํเส ปวตฺตา เอตรหิ ลิจฺฉวิราชาโนปิ ภฎิปุตฺตาติ วุจฺจนฺติฯ ชฎิโล ปน พาราณสิรโญฺญ ปุเตฺต นทิโสเตน วุยฺหมาเน นทิโต อุทฺธริตฺวา อตฺตโน อสฺสเม ปุตฺตํ กตฺวา ภรณตฺตา โปสนตฺตา ภฎีติ วุจฺจติ, ตสฺส ปุตฺตตฺตา ลิจฺฉวิคโณ ภฎิปุโตฺตติ วุจฺจติฯ เตปิ คณํ กตฺวา เวสาลิยํ รชฺชํ อนุสาสนฺติ, ตํ สนฺธาย วุตฺตํ ‘‘ภฎิปุตฺตคโณ’’ติฯ ธมฺมคโณ นาม สาสนธมฺมภตฺติโก คโณฯ คนฺธิกเสณีติ คนฺธการานํ สมชาติกานํ สิปฺปิกานํ คโณฯ ทุสฺสิกเสณีติ ทุสฺสการานํ สมชาติกานํ เปสการานํ คโณฯ อาทิสเทฺทน ตจฺฉกเสณิรชกเสณิอาทโย สงฺคยฺหนฺติฯ ยตฺถ ยตฺถาติ ยสฺมิํ ยสฺมิํ ฐาเนฯ หีติ สจฺจํฯ เต เอวาติ คณาทโย เอวฯ ปุน เตติ คณาทโยฯ อิทนฺติ ‘‘คณํ วา’’ติอาทิวจนํฯ เอตฺถาติ ราชาทีสุฯ สงฺฆาปุจฺฉนเมว ปธานการณนฺติ อาห ‘‘ภิกฺขุนิสโงฺฆ อาปุจฺฉิตโพฺพวา’’ติฯ กปฺปคติกนฺติ กปฺปํ คจฺฉตีติ กปฺปคตา, สา เอว กปฺปคติกา, ตํฯ
683. Āpubbo lokasaddo abhimukhaṃ lokanattho hoti, upubbo uddhaṃ lokanattho, opubbo adho lokanattho, vipubbo ito cito ca vītiharaṇalokanattho, apapubbo āpucchanattho. Idha pana apapubbattā āpucchanatthoti āha ‘‘anāpucchitvā’’ti. Mallagaṇa bhaṭiputta gaṇādikantiādīsu mallagaṇo nāma nārāyanabhattiko gaṇo. Bhaṭiputtagaṇo nāma kumārabhattiko gaṇo. Ādisaddena aññampi gāmanigame anusāsituṃ samatthaṃ gaṇaṃ saṅgaṇhāti. Atha vā mallagaṇoti mallarājūnaṃ gaṇo. Te hi gaṇaṃ katvā kusinārāyaṃ rajjaṃ anusāsanti, te sandhāya vuttaṃ ‘‘mallagaṇo’’ti. Bhaṭiputtagaṇoti licchavigaṇo pariyāyantarena vutto. Licchavirājūnañhi pubbarājāno bhaṭināmakassa jaṭilassa puttā honti, tesaṃ vaṃse pavattā etarahi licchavirājānopi bhaṭiputtāti vuccanti. Jaṭilo pana bārāṇasirañño putte nadisotena vuyhamāne nadito uddharitvā attano assame puttaṃ katvā bharaṇattā posanattā bhaṭīti vuccati, tassa puttattā licchavigaṇo bhaṭiputtoti vuccati. Tepi gaṇaṃ katvā vesāliyaṃ rajjaṃ anusāsanti, taṃ sandhāya vuttaṃ ‘‘bhaṭiputtagaṇo’’ti. Dhammagaṇo nāma sāsanadhammabhattiko gaṇo. Gandhikaseṇīti gandhakārānaṃ samajātikānaṃ sippikānaṃ gaṇo. Dussikaseṇīti dussakārānaṃ samajātikānaṃ pesakārānaṃ gaṇo. Ādisaddena tacchakaseṇirajakaseṇiādayo saṅgayhanti. Yattha yatthāti yasmiṃ yasmiṃ ṭhāne. Hīti saccaṃ. Te evāti gaṇādayo eva. Puna teti gaṇādayo. Idanti ‘‘gaṇaṃ vā’’tiādivacanaṃ. Etthāti rājādīsu. Saṅghāpucchanameva padhānakāraṇanti āha ‘‘bhikkhunisaṅgho āpucchitabbovā’’ti. Kappagatikanti kappaṃ gacchatīti kappagatā, sā eva kappagatikā, taṃ.
เกนจิ กรณีเยน ขณฺฑสีมํ อคนฺตฺวา เกนจิ กรณีเยน ภิกฺขุนีสุ ปกฺกนฺตาสูติ โยชนาฯ นิสฺสิตกปริสายาติ อเนฺตวาสิกปริสายฯ วุฎฺฐาเปนฺติยาติ อุปสมฺปาเทนฺติยาติฯ ทุติยํฯ
Kenaci karaṇīyena khaṇḍasīmaṃ agantvā kenaci karaṇīyena bhikkhunīsu pakkantāsūti yojanā. Nissitakaparisāyāti antevāsikaparisāya. Vuṭṭhāpentiyāti upasampādentiyāti. Dutiyaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / ภิกฺขุนีวิภงฺค • Bhikkhunīvibhaṅga / ๒. ทุติยสงฺฆาทิเสสสิกฺขาปทํ • 2. Dutiyasaṅghādisesasikkhāpadaṃ
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / ภิกฺขุนีวิภงฺค-อฎฺฐกถา • Bhikkhunīvibhaṅga-aṭṭhakathā / ๒. ทุติยสงฺฆาทิเสสสิกฺขาปทวณฺณนา • 2. Dutiyasaṅghādisesasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๒. ทุติยสงฺฆาทิเสสสิกฺขาปทวณฺณนา • 2. Dutiyasaṅghādisesasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๒. ทุติยสงฺฆาทิเสสสิกฺขาปทวณฺณนา • 2. Dutiyasaṅghādisesasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๒. ทุติยสงฺฆาทิเสสสิกฺขาปทวณฺณนา • 2. Dutiyasaṅghādisesasikkhāpadavaṇṇanā
