| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༢. དུཏིཡསངྒྷཱདིསེསསིཀྑཱཔདཾ
2. Dutiyasaṅghādisesasikkhāpadaṃ
༦༨༢. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཝེསཱལིཡཾ ཨཉྙཏརསྶ ལིཙྪཝིསྶ པཛཱཔཏི ཨཏིཙཱརིནཱི ཧོཏི། ཨཐ ཁོ སོ ལིཙྪཝི ཏཾ ཨིཏྠིཾ ཨེཏདཝོཙ – ‘‘སཱདྷུ ཝིརམཱཧི, ཨནཏྠཾ ཁོ ཏེ ཀརིསྶཱམཱི’’ཏི། ཨེཝམྤི སཱ ཝུཙྩམཱནཱ ནཱདིཡི། ཏེན ཁོ པན སམཡེན ཝེསཱལིཡཾ ལིཙྪཝིགཎོ སནྣིཔཏིཏོ ཧོཏི ཀེནཙིདེཝ ཀརཎཱིཡེན། ཨཐ ཁོ སོ ལིཙྪཝི ཏེ ལིཙྪཝཡོ ཨེཏདཝོཙ – ‘‘ཨེཀཾ མེ, ཨཡྻོ , ཨིཏྠིཾ ཨནུཛཱནཱཐཱ’’ཏི། ‘‘ཀཱ ནཱམ སཱ’’ཏི? ‘‘མཡ྄ཧཾ པཛཱཔཏི ཨཏིཙརཏི, ཏཾ གྷཱཏེསྶཱམཱི’’ཏི། ‘‘ཛཱནཱཧཱི’’ཏི། ཨསྶོསི ཁོ སཱ ཨིཏྠཱི – ‘‘སཱམིཀོ ཀིར མཾ གྷཱཏེཏུཀཱམོ’’ཏི། ཝརབྷཎྜཾ ཨཱདཱཡ སཱཝཏྠིཾ གནྟྭཱ ཏིཏྠིཡེ ཨུཔསངྐམིཏྭཱ པབྦཛྫཾ ཡཱཙི། ཏིཏྠིཡཱ ན ཨིཙྪིཾསུ པབྦཱཛེཏུཾ། བྷིཀྑུནིཡོ ཨུཔསངྐམིཏྭཱ པབྦཛྫཾ ཡཱཙི། བྷིཀྑུནིཡོཔི ན ཨིཙྪིཾསུ པབྦཱཛེཏུཾ། ཐུལླནནྡཾ བྷིཀྑུནིཾ ཨུཔསངྐམིཏྭཱ བྷཎྜཀཾ དསྶེཏྭཱ པབྦཛྫཾ ཡཱཙི། ཐུལླནནྡཱ བྷིཀྑུནཱི བྷཎྜཀཾ གཧེཏྭཱ པབྦཱཛེསི།
682. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena vesāliyaṃ aññatarassa licchavissa pajāpati aticārinī hoti. Atha kho so licchavi taṃ itthiṃ etadavoca – ‘‘sādhu viramāhi, anatthaṃ kho te karissāmī’’ti. Evampi sā vuccamānā nādiyi. Tena kho pana samayena vesāliyaṃ licchavigaṇo sannipatito hoti kenacideva karaṇīyena. Atha kho so licchavi te licchavayo etadavoca – ‘‘ekaṃ me, ayyo , itthiṃ anujānāthā’’ti. ‘‘Kā nāma sā’’ti? ‘‘Mayhaṃ pajāpati aticarati, taṃ ghātessāmī’’ti. ‘‘Jānāhī’’ti. Assosi kho sā itthī – ‘‘sāmiko kira maṃ ghātetukāmo’’ti. Varabhaṇḍaṃ ādāya sāvatthiṃ gantvā titthiye upasaṅkamitvā pabbajjaṃ yāci. Titthiyā na icchiṃsu pabbājetuṃ. Bhikkhuniyo upasaṅkamitvā pabbajjaṃ yāci. Bhikkhuniyopi na icchiṃsu pabbājetuṃ. Thullanandaṃ bhikkhuniṃ upasaṅkamitvā bhaṇḍakaṃ dassetvā pabbajjaṃ yāci. Thullanandā bhikkhunī bhaṇḍakaṃ gahetvā pabbājesi.
ཨཐ ཁོ སོ ལིཙྪཝི ཏཾ ཨིཏྠིཾ གཝེསནྟོ སཱཝཏྠིཾ གནྟྭཱ བྷིཀྑུནཱིསུ པབྦཛིཏཾ དིསྭཱན ཡེན རཱཛཱ པསེནདི ཀོསལོ ཏེནུཔསངྐམི; ཨུཔསངྐམིཏྭཱ རཱཛཱནཾ པསེནདིཾ ཀོསལཾ ཨེཏདཝོཙ – ‘‘པཛཱཔཏི མེ, དེཝ, ཝརབྷཎྜཾ ཨཱདཱཡ སཱཝཏྠིཾ ཨནུཔྤཏྟཱ། ཏཾ དེཝོ ཨནུཛཱནཱཏཱུ’’ཏི། ‘‘ཏེན ཧི, བྷཎེ, ཝིཙིནིཏྭཱ ཨཱཙིཀྑཱ’’ཏི། ‘‘དིཊྛཱ, དེཝ, བྷིཀྑུནཱིསུ པབྦཛིཏཱ’’ཏི། ‘‘སཙེ, བྷཎེ, བྷིཀྑུནཱིསུ པབྦཛིཏཱ, ན སཱ ལབྦྷཱ ཀིཉྩི ཀཱཏུཾ། སྭཱཀྑཱཏོ བྷགཝཏཱ དྷམྨོ, ཙརཏུ བྲཧྨཙརིཡཾ སམྨཱ དུཀྑསྶ ཨནྟཀིརིཡཱཡཱ’’ཏི། ཨཐ ཁོ སོ ལིཙྪཝི ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཀཐཉྷི ནཱམ བྷིཀྑུནིཡོ ཙོརིཾ པབྦཱཛེསྶནྟཱི’’ཏི! ཨསྶོསུཾ ཁོ བྷིཀྑུནིཡོ ཏསྶ ལིཙྪཝིསྶ ཨུཛ྄ཛྷཱཡནྟསྶ ཁིཡྻནྟསྶ ཝིཔཱཙེནྟསྶ། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ ཙོརིཾ པབྦཱཛེསྶཏཱི’’ཏི! ཨཐ ཁོ ཏཱ བྷིཀྑུནིཡོ བྷིཀྑཱུནཾ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི ཙོརིཾ པབྦཱཛེཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི ཙོརིཾ པབྦཱཛེསྶཏི! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
Atha kho so licchavi taṃ itthiṃ gavesanto sāvatthiṃ gantvā bhikkhunīsu pabbajitaṃ disvāna yena rājā pasenadi kosalo tenupasaṅkami; upasaṅkamitvā rājānaṃ pasenadiṃ kosalaṃ etadavoca – ‘‘pajāpati me, deva, varabhaṇḍaṃ ādāya sāvatthiṃ anuppattā. Taṃ devo anujānātū’’ti. ‘‘Tena hi, bhaṇe, vicinitvā ācikkhā’’ti. ‘‘Diṭṭhā, deva, bhikkhunīsu pabbajitā’’ti. ‘‘Sace, bhaṇe, bhikkhunīsu pabbajitā, na sā labbhā kiñci kātuṃ. Svākkhāto bhagavatā dhammo, caratu brahmacariyaṃ sammā dukkhassa antakiriyāyā’’ti. Atha kho so licchavi ujjhāyati khiyyati vipāceti – ‘‘kathañhi nāma bhikkhuniyo coriṃ pabbājessantī’’ti! Assosuṃ kho bhikkhuniyo tassa licchavissa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā coriṃ pabbājessatī’’ti! Atha kho tā bhikkhuniyo bhikkhūnaṃ etamatthaṃ ārocesuṃ…pe… saccaṃ kira, bhikkhave, thullanandā bhikkhunī coriṃ pabbājetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī coriṃ pabbājessati! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༦༨༣. ‘‘ཡཱ པན བྷིཀྑུནཱི ཛཱནཾ ཙོརིཾ ཝཛ྄ཛྷཾ ཝིདིཏཾ ཨནཔལོཀེཏྭཱ རཱཛཱནཾ ཝཱ སངྒྷཾ ཝཱ གཎཾ ཝཱ པཱུགཾ ཝཱ སེཎིཾ ཝཱ ཨཉྙཏྲ ཀཔྤཱ ཝུཊྛཱཔེཡྻ, ཨཡམྤི བྷིཀྑུནཱི པཋམཱཔཏྟིཀཾ དྷམྨཾ ཨཱཔནྣཱ ནིསྶཱརཎཱིཡཾ སངྒྷཱདིསེས’’ནྟི།
683.‘‘Yāpana bhikkhunī jānaṃ coriṃ vajjhaṃ viditaṃ anapaloketvā rājānaṃ vā saṅghaṃ vā gaṇaṃ vā pūgaṃ vā seṇiṃ vā aññatra kappā vuṭṭhāpeyya, ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesa’’nti.
༦༨༤. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
684.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ཛཱནཱཏི ནཱམ སཱམཾ ཝཱ ཛཱནཱཏི ཨཉྙེ ཝཱ ཏསྶཱ ཨཱརོཙེནྟི, སཱ ཝཱ ཨཱརོཙེཏི།
Jānāti nāma sāmaṃ vā jānāti aññe vā tassā ārocenti, sā vā āroceti.
ཙོརཱི ནཱམ ཡཱ པཉྩམཱསཀཾ ཝཱ ཨཏིརེཀཔཉྩམཱསཀཾ ཝཱ ཨགྒྷནཀཾ ཨདིནྣཾ ཐེཡྻསངྑཱཏཾ ཨཱདིཡཏི, ཨེསཱ ཙོརཱི ནཱམ།
Corī nāma yā pañcamāsakaṃ vā atirekapañcamāsakaṃ vā agghanakaṃ adinnaṃ theyyasaṅkhātaṃ ādiyati, esā corī nāma.
ཝཛ྄ཛྷཱ ནཱམ ཡཾ ཀཏྭཱ ཝཛ྄ཛྷཔྤཏྟཱ ཧོཏི།
Vajjhā nāma yaṃ katvā vajjhappattā hoti.
ཝིདིཏཱ ནཱམ ཨཉྙེཧི མནུསྶེཧི ཉཱཏཱ ཧོཏི ‘‘ཝཛ྄ཛྷཱ ཨེསཱ’’ཏི།
Viditā nāma aññehi manussehi ñātā hoti ‘‘vajjhā esā’’ti.
ཨནཔལོཀེཏྭཱཏི ཨནཱཔུཙྪཱ།
Anapaloketvāti anāpucchā.
རཱཛཱ ནཱམ ཡཏྠ རཱཛཱ ཨནུསཱསཏི, རཱཛཱ ཨཔལོཀེཏབྦོ།
Rājā nāma yattha rājā anusāsati, rājā apaloketabbo.
སངྒྷོ ནཱམ བྷིཀྑུནིསངྒྷོ ཝུཙྩཏི, བྷིཀྑུནིསངྒྷོ ཨཔལོཀེཏབྦོ།
Saṅgho nāma bhikkhunisaṅgho vuccati, bhikkhunisaṅgho apaloketabbo.
གཎོ ནཱམ ཡཏྠ གཎོ ཨནུསཱསཏི, གཎོ ཨཔལོཀེཏབྦོ།
Gaṇo nāma yattha gaṇo anusāsati, gaṇo apaloketabbo.
པཱུགོ ནཱམ ཡཏྠ པཱུགོ ཨནུསཱསཏི, པཱུགོ ཨཔལོཀེཏབྦོ།
Pūgo nāma yattha pūgo anusāsati, pūgo apaloketabbo.
སེཎི ནཱམ ཡཏྠ སེཎི ཨནུསཱསཏི, སེཎི ཨཔལོཀེཏབྦོ།
Seṇi nāma yattha seṇi anusāsati, seṇi apaloketabbo.
ཨཉྙཏྲ ཀཔྤཱཏི ཋཔེཏྭཱ ཀཔྤཾ། ཀཔྤཾ ནཱམ དྭེ ཀཔྤཱནི – ཏིཏྠིཡེསུ ཝཱ པབྦཛིཏཱ ཧོཏི ཨཉྙཱསུ ཝཱ བྷིཀྑུནཱིསུ པབྦཛིཏཱ། ཨཉྙཏྲ ཀཔྤཱ ‘‘ཝུཊྛཱཔེསྶཱམཱི’’ཏི གཎཾ ཝཱ ཨཱཙརིནིཾ ཝཱ པཏྟཾ ཝཱ ཙཱིཝརཾ ཝཱ པརིཡེསཏི, སཱིམཾ ཝཱ སམྨནྣཏི, ཨཱཔཏྟི དུཀྐཊསྶ། ཉཏྟིཡཱ དུཀྐཊཾ། དྭཱིཧི ཀམྨཝཱཙཱཧི ཐུལླཙྩཡཱ། ཀམྨཝཱཙཱཔརིཡོསཱནེ ཨུཔཛ྄ཛྷཱཡཱཡ ཨཱཔཏྟི སངྒྷཱདིསེསསྶ། གཎསྶ ཙ ཨཱཙརིནིཡཱ ཙ ཨཱཔཏྟི དུཀྐཊསྶ།
Aññatrakappāti ṭhapetvā kappaṃ. Kappaṃ nāma dve kappāni – titthiyesu vā pabbajitā hoti aññāsu vā bhikkhunīsu pabbajitā. Aññatra kappā ‘‘vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi thullaccayā. Kammavācāpariyosāne upajjhāyāya āpatti saṅghādisesassa. Gaṇassa ca ācariniyā ca āpatti dukkaṭassa.
ཨཡམྤཱིཏི པུརིམཾ ཨུཔཱདཱཡ ཝུཙྩཏི།
Ayampīti purimaṃ upādāya vuccati.
པཋམཱཔཏྟིཀནྟི སཧ ཝཏྠུཛ྄ཛྷཱཙཱརཱ ཨཱཔཛྫཏི ཨསམནུབྷཱསནཱཡ།
Paṭhamāpattikanti saha vatthujjhācārā āpajjati asamanubhāsanāya.
ནིསྶཱརཎཱིཡནྟི སངྒྷམྷཱ ནིསྶཱརཱིཡཏི།
Nissāraṇīyanti saṅghamhā nissārīyati.
སངྒྷཱདིསེསནྟི…པེ॰… ཏེནཔི ཝུཙྩཏི སངྒྷཱདིསེསོཏི།
Saṅghādisesanti…pe… tenapi vuccati saṅghādisesoti.
༦༨༥. ཙོརིཡཱ ཙོརིསཉྙཱ ཨཉྙཏྲ ཀཔྤཱ ཝུཊྛཱཔེཏི, ཨཱཔཏྟི སངྒྷཱདིསེསསྶ། ཙོརིཡཱ ཝེམཏིཀཱ ཨཉྙཏྲ ཀཔྤཱ ཝུཊྛཱཔེཏི, ཨཱཔཏྟི དུཀྐཊསྶ། ཙོརིཡཱ ཨཙོརིསཉྙཱ ཨཉྙཏྲ ཀཔྤཱ ཝུཊྛཱཔེཏི, ཨནཱཔཏྟི། ཨཙོརིཡཱ ཙོརིསཉྙཱ, ཨཱཔཏྟི དུཀྐཊསྶ། ཨཙོརིཡཱ ཝེམཏིཀཱ, ཨཱཔཏྟི དུཀྐཊསྶ། ཨཙོརིཡཱ ཨཙོརིསཉྙཱ, ཨནཱཔཏྟི།
685. Coriyā corisaññā aññatra kappā vuṭṭhāpeti, āpatti saṅghādisesassa. Coriyā vematikā aññatra kappā vuṭṭhāpeti, āpatti dukkaṭassa. Coriyā acorisaññā aññatra kappā vuṭṭhāpeti, anāpatti. Acoriyā corisaññā, āpatti dukkaṭassa. Acoriyā vematikā, āpatti dukkaṭassa. Acoriyā acorisaññā, anāpatti.
༦༨༦. ཨནཱཔཏྟི ཨཛཱནནྟཱི ཝུཊྛཱཔེཏི, ཨཔལོཀེཏྭཱ ཝུཊྛཱཔེཏི, ཀཔྤཀཏཾ ཝུཊྛཱཔེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
686. Anāpatti ajānantī vuṭṭhāpeti, apaloketvā vuṭṭhāpeti, kappakataṃ vuṭṭhāpeti, ummattikāya, ādikammikāyāti.
དུཏིཡསངྒྷཱདིསེསསིཀྑཱཔདཾ ནིཊྛིཏཾ།
Dutiyasaṅghādisesasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༢. དུཏིཡསངྒྷཱདིསེསསིཀྑཱཔདཝཎྞནཱ • 2. Dutiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༢. དུཏིཡསངྒྷཱདིསེསསིཀྑཱཔདཝཎྞནཱ • 2. Dutiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༢. དུཏིཡསངྒྷཱདིསེསསིཀྑཱཔདཝཎྞནཱ • 2. Dutiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༢. དུཏིཡསངྒྷཱདིསེསསིཀྑཱཔདཝཎྞནཱ • 2. Dutiyasaṅghādisesasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༢. དུཏིཡསངྒྷཱདིསེསསིཀྑཱཔདཾ • 2. Dutiyasaṅghādisesasikkhāpadaṃ
