| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
দুতিযসঙ্গীতিকথাৰণ্ণনা
Dutiyasaṅgītikathāvaṇṇanā
‘‘যদা নিব্বাযিংসূ’’তি সম্বন্ধো। জোতযিত্ৰা চ সব্বধীতি তমেৰ সদ্ধম্মং সব্বত্থ পকাসযিত্ৰা। ‘‘জুতিমন্তো’’তি ৰত্তব্বে গাথাবন্ধৰসেন ‘‘জুতীমন্তো’’তি ৰুত্তং, পঞ্ঞাজোতিসম্পন্নাতি অত্থো, তেজৰন্তোতি ৰা, মহানুভাৰাতি ৰুত্তং হোতি। নিব্বাযিংসূতি অনুপাদিসেসায নিব্বানধাতুযা পরিনিব্বাযিংসু। পহীনসব্বকিলেসত্তা নত্থি এতেসং কত্থচি আলযো তণ্হাতি অনালযা, ৰীতরাগাতি ৰুত্তং হোতি।
‘‘Yadā nibbāyiṃsū’’ti sambandho. Jotayitvā ca sabbadhīti tameva saddhammaṃ sabbattha pakāsayitvā. ‘‘Jutimanto’’ti vattabbe gāthābandhavasena ‘‘jutīmanto’’ti vuttaṃ, paññājotisampannāti attho, tejavantoti vā, mahānubhāvāti vuttaṃ hoti. Nibbāyiṃsūti anupādisesāya nibbānadhātuyā parinibbāyiṃsu. Pahīnasabbakilesattā natthi etesaṃ katthaci ālayo taṇhāti anālayā, vītarāgāti vuttaṃ hoti.
ৰস্সসতপরিনিব্বুতে ভগৰতীতি ৰস্সসতং পরিনিব্বুতস্স অস্সাতি ৰস্সসতপরিনিব্বুতো, ভগৰা, তস্মিং পরিনিব্বানতো ৰস্সসতে অতিক্কন্তেতি ৰুত্তং হোতি। ৰেসালিকাতি ৰেসালীনিৰাসিনো। ৰজ্জিপুত্তকাতি ৰজ্জিরট্ঠে ৰেসালিযং কুলানং পুত্তা। কপ্পতি সিঙ্গীলোণকপ্পোতি সিঙ্গেন লোণং পরিহরিত্ৰা পরিহরিত্ৰা অলোণকপিণ্ডপাতেন সদ্ধিং ভুঞ্জিতুং কপ্পতি, ন সন্নিধিং করোতীতি অধিপ্পাযো। কপ্পতি দ্ৰঙ্গুলকপ্পোতি দ্ৰঙ্গুলং অতিক্কন্তায ছাযায ৰিকালে ভোজনং ভুঞ্জিতুং কপ্পতীতি অত্থো। কপ্পতি গামন্তরকপ্পোতি ‘‘গামন্তরং গমিস্সামী’’তি পৰারিতেন অনতিরিত্তভোজনং ভুঞ্জিতুং কপ্পতীতি অত্থো। কপ্পতি আৰাসকপ্পোতি একসীমাযং নানাসেনাসনেসু ৰিসুং ৰিসুং উপোসথাদীনি সঙ্ঘকম্মানি কাতুং ৰট্টতীতি অত্থো। কপ্পতি অনুমতিকপ্পোতি ‘‘অনাগতানং আগতকালে অনুমতিং গহেস্সামী’’তি তেসু অনাগতেসুযেৰ ৰগ্গেন সঙ্ঘেন কম্মং কত্ৰা পচ্ছা অনুমতিং গহেতুং কপ্পতি, ৰগ্গকম্মং ন হোতীতি অধিপ্পাযো। কপ্পতি আচিণ্ণকপ্পোতি আচরিযুপজ্ঝাযেহি আচিণ্ণো কপ্পতীতি অত্থো। সো পন একচ্চো কপ্পতি ধম্মিকো, একচ্চো ন কপ্পতি অধম্মিকোতি ৰেদিতব্বো। কপ্পতি অমথিতকপ্পোতি যং খীরং খীরভাৰং ৰিজহিতং দধিভাৰং অসম্পত্তং, তং ভুত্তাৰিনা পৰারিতেন অনতিরিত্তং ভুঞ্জিতুং কপ্পতীতি অত্থো। কপ্পতি জলোগিং পাতুন্তি এত্থ জলোগীতি তরুণসুরা। যং মজ্জসম্ভারং একতো কতং মজ্জভাৰমসম্পত্তং, তং পাতুং ৰট্টতীতি অধিপ্পাযো। জাতরূপরজতন্তি সরসতো ৰিকারং অনাপজ্জিত্ৰা সব্বদা জাতং রূপমেৰ হোতীতি জাতং রূপমেতস্সাতি জাতরূপং, সুৰণ্ণং। ধৰলসভাৰতায রাজতীতি রজতং, রূপিযং। সুসুনাগপুত্তোতি সুসুনাগস্স পুত্তো।
Vassasataparinibbute bhagavatīti vassasataṃ parinibbutassa assāti vassasataparinibbuto, bhagavā, tasmiṃ parinibbānato vassasate atikkanteti vuttaṃ hoti. Vesālikāti vesālīnivāsino. Vajjiputtakāti vajjiraṭṭhe vesāliyaṃ kulānaṃ puttā. Kappati siṅgīloṇakappoti siṅgena loṇaṃ pariharitvā pariharitvā aloṇakapiṇḍapātena saddhiṃ bhuñjituṃ kappati, na sannidhiṃ karotīti adhippāyo. Kappati dvaṅgulakappoti dvaṅgulaṃ atikkantāya chāyāya vikāle bhojanaṃ bhuñjituṃ kappatīti attho. Kappati gāmantarakappoti ‘‘gāmantaraṃ gamissāmī’’ti pavāritena anatirittabhojanaṃ bhuñjituṃ kappatīti attho. Kappati āvāsakappoti ekasīmāyaṃ nānāsenāsanesu visuṃ visuṃ uposathādīni saṅghakammāni kātuṃ vaṭṭatīti attho. Kappati anumatikappoti ‘‘anāgatānaṃ āgatakāle anumatiṃ gahessāmī’’ti tesu anāgatesuyeva vaggena saṅghena kammaṃ katvā pacchā anumatiṃ gahetuṃ kappati, vaggakammaṃ na hotīti adhippāyo. Kappati āciṇṇakappoti ācariyupajjhāyehi āciṇṇo kappatīti attho. So pana ekacco kappati dhammiko, ekacco na kappati adhammikoti veditabbo. Kappati amathitakappoti yaṃ khīraṃ khīrabhāvaṃ vijahitaṃ dadhibhāvaṃ asampattaṃ, taṃ bhuttāvinā pavāritena anatirittaṃ bhuñjituṃ kappatīti attho. Kappati jalogiṃ pātunti ettha jalogīti taruṇasurā. Yaṃ majjasambhāraṃ ekato kataṃ majjabhāvamasampattaṃ, taṃ pātuṃ vaṭṭatīti adhippāyo. Jātarūparajatanti sarasato vikāraṃ anāpajjitvā sabbadā jātaṃ rūpameva hotīti jātaṃ rūpametassāti jātarūpaṃ, suvaṇṇaṃ. Dhavalasabhāvatāya rājatīti rajataṃ, rūpiyaṃ. Susunāgaputtoti susunāgassa putto.
কাকণ্ডকপুত্তোতি কাকণ্ডকব্রাহ্মণস্স পুত্তো। ৰজ্জীসূতি জনপদৰচনত্তা বহুৰচনং কতং। একোপি হি জনপদো রুল়্হীসদ্দত্তা বহুৰচনেন ৰুচ্চতি। যেন ৰেসালী, তদৰসরীতি যেন দিসাভাগেন ৰেসালী অৰসরিতব্বা, যস্মিং ৰা পদেসে ৰেসালী, তদৰসরি, তং পত্তোতি অত্থো। মহাৰনে কূটাগারসালাযন্তি এত্থ মহাৰনং নাম সযংজাতমরোপিমং সপরিচ্ছেদং মহন্তং ৰনং। কপিলৰত্থুসামন্তা পন মহাৰনং হিমৰন্তেন সহ একাবদ্ধং অপরিচ্ছেদং হুত্ৰা মহাসমুদ্দং আহচ্চ ঠিতং, ইদং তাদিসং ন হোতীতি সপরিচ্ছেদং মহন্তং ৰনন্তি মহাৰনং। কূটাগারসালা পন মহাৰনং নিস্সায কতে আরামে কূটাগারং অন্তো কত্ৰা হংসৰট্টকচ্ছন্নেন হংসমণ্ডলাকারেন কতা।
Kākaṇḍakaputtoti kākaṇḍakabrāhmaṇassa putto. Vajjīsūti janapadavacanattā bahuvacanaṃ kataṃ. Ekopi hi janapado ruḷhīsaddattā bahuvacanena vuccati. Yena vesālī, tadavasarīti yena disābhāgena vesālī avasaritabbā, yasmiṃ vā padese vesālī, tadavasari, taṃ pattoti attho. Mahāvane kūṭāgārasālāyanti ettha mahāvanaṃ nāma sayaṃjātamaropimaṃ saparicchedaṃ mahantaṃ vanaṃ. Kapilavatthusāmantā pana mahāvanaṃ himavantena saha ekābaddhaṃ aparicchedaṃ hutvā mahāsamuddaṃ āhacca ṭhitaṃ, idaṃ tādisaṃ na hotīti saparicchedaṃ mahantaṃ vananti mahāvanaṃ. Kūṭāgārasālā pana mahāvanaṃ nissāya kate ārāme kūṭāgāraṃ anto katvā haṃsavaṭṭakacchannena haṃsamaṇḍalākārena katā.
তদহুপোসথেতি এত্থ তদহূতি তস্মিং অহনি, তস্মিং দিৰসেতি অত্থো। উপৰসন্তি এত্থাতি উপোসথো, উপৰসিতব্বদিৰসো। উপৰসন্তীতি চ সীলেন ৰা সব্বসো আহারস্স চ অভুঞ্জনসঙ্খাতেন অনসনেন ৰা খীরপানমধুপানাদিমত্তেন ৰা উপেতা হুত্ৰা ৰসন্তীতি অত্থো। সো পনেস দিৰসো অট্ঠমীচাতুদ্দসীপন্নরসীভেদেন তিৰিধো। কত্থচি পন পাতিমোক্খেপি সীলেপি উপৰাসেপি পঞ্ঞত্তিযম্পি উপোসথসদ্দো আগতো। তথা হেস ‘‘আযামাৰুসো কপ্পিন, উপোসথং গমিস্সামা’’তিআদীসু পাতিমোক্খুদ্দেসে আগতো। ‘‘এৰং অট্ঠঙ্গসমন্নাগতো খো ৰিসাখে উপোসথো উপৰুত্থো’’তিআদীসু (অ॰ নি॰ ৮.৪৩) সীলে। ‘‘সুদ্ধস্স ৰে সদা ফেগ্গু, সুদ্ধস্সুপোসথো সদা’’তিআদীসু (ম॰ নি॰ ১.৭৯) উপৰাসে। ‘‘উপোসথো নাম নাগরাজা’’তিআদীসু (দী॰ নি॰ ২.২৪৬; ম॰ নি॰ ৩.২৫৮) পঞ্ঞত্তিযঞ্চ আগতো। তত্থ উপেচ্চ ৰসিতব্বতো উপোসথো পাতিমোক্খুদ্দেসো। উপেতেন সমন্নাগতেন হুত্ৰা ৰসিতব্বতো সন্তানে ৰাসেতব্বতো উপোসথো সীলং। অসনাদিসংযমাদিং ৰা উপেচ্চ ৰসন্তীতি উপোসথো উপৰাসো। তথারূপে হত্থিঅস্সৰিসেসে উপোসথোতি সমঞ্ঞামত্ততো উপোসথো পঞ্ঞত্তি। ইধ পন ‘‘ন, ভিক্খৰে, তদহুপোসথে সভিক্খুকা আৰাসা’’তিআদীসু (মহাৰ॰ ১৮১) ৰিয উপোসথদিৰসো অধিপ্পেতো, তস্মা তদহুপোসথেতি তস্মিং উপোসথদিৰসেতি অত্থো। কংসপাতিন্তি সুৰণ্ণপাতিং। কহাপণম্পীতিআদীসু কহাপণস্স সমভাগো অড্ঢো। পাদো চতুত্থভাগো। মাসকোযেৰ মাসকরূপং। সব্বং তাৰ ৰত্তব্বন্তি ইমিনা সত্তসতিকক্খন্ধকে (চূল়ৰ॰ ৪৪৬ আদযো) আগতা সব্বাপি পাল়ি ইধ আনেত্ৰা ৰত্তব্বাতি দস্সেতি। সা কুতো ৰত্তব্বাতি আহ ‘‘যাৰ ইমায পন ৰিনযসঙ্গীতিযা’’তিআদি। সঙ্গাযিতসদিসমেৰ সঙ্গাযিংসূতি সম্বন্ধো।
Tadahuposatheti ettha tadahūti tasmiṃ ahani, tasmiṃ divaseti attho. Upavasanti etthāti uposatho, upavasitabbadivaso. Upavasantīti ca sīlena vā sabbaso āhārassa ca abhuñjanasaṅkhātena anasanena vā khīrapānamadhupānādimattena vā upetā hutvā vasantīti attho. So panesa divaso aṭṭhamīcātuddasīpannarasībhedena tividho. Katthaci pana pātimokkhepi sīlepi upavāsepi paññattiyampi uposathasaddo āgato. Tathā hesa ‘‘āyāmāvuso kappina, uposathaṃ gamissāmā’’tiādīsu pātimokkhuddese āgato. ‘‘Evaṃ aṭṭhaṅgasamannāgato kho visākhe uposatho upavuttho’’tiādīsu (a. ni. 8.43) sīle. ‘‘Suddhassa ve sadā pheggu, suddhassuposatho sadā’’tiādīsu (ma. ni. 1.79) upavāse. ‘‘Uposatho nāma nāgarājā’’tiādīsu (dī. ni. 2.246; ma. ni. 3.258) paññattiyañca āgato. Tattha upecca vasitabbato uposatho pātimokkhuddeso. Upetena samannāgatena hutvā vasitabbato santāne vāsetabbato uposatho sīlaṃ. Asanādisaṃyamādiṃ vā upecca vasantīti uposatho upavāso. Tathārūpe hatthiassavisese uposathoti samaññāmattato uposatho paññatti. Idha pana ‘‘na, bhikkhave, tadahuposathe sabhikkhukā āvāsā’’tiādīsu (mahāva. 181) viya uposathadivaso adhippeto, tasmā tadahuposatheti tasmiṃ uposathadivaseti attho. Kaṃsapātinti suvaṇṇapātiṃ. Kahāpaṇampītiādīsu kahāpaṇassa samabhāgo aḍḍho. Pādo catutthabhāgo. Māsakoyeva māsakarūpaṃ. Sabbaṃ tāva vattabbanti iminā sattasatikakkhandhake (cūḷava. 446 ādayo) āgatā sabbāpi pāḷi idha ānetvā vattabbāti dasseti. Sā kuto vattabbāti āha ‘‘yāva imāya pana vinayasaṅgītiyā’’tiādi. Saṅgāyitasadisameva saṅgāyiṃsūti sambandho.
পুব্বে কতং উপাদাযাতি পুব্বে কতং পঠমসঙ্গীতিমুপাদায। সা পনাযং সঙ্গীতীতি সম্বন্ধো। তেসূতি তেসু সঙ্গীতিকারকেসু থেরেসু। ৰিস্সুতাতি গণপামোক্খতায ৰিস্সুতা সব্বত্থ পাকটা। তস্মিঞ্হি সন্নিপাতে অট্ঠেৰ গণপামোক্খা মহাথেরা অহেসুং, তেসু চ ৰাসভগামী সুমনোতি দ্ৰে থেরা অনুরুদ্ধত্থেরস্স সদ্ধিৰিহারিকা, অৰসেসা ছ আনন্দত্থেরস্স। এতে পন সব্বেপি অট্ঠ মহাথেরা ভগৰন্তং দিট্ঠপুব্বা। ইদানি তে থেরে সরূপতো দস্সেন্তো আহ ‘‘সব্বকামী চা’’তিআদি। সাণসম্ভূতোতি সাণদেসৰাসী সম্ভূতত্থেরো । দুতিযো সঙ্গহোতি সম্বন্ধো। পন্নভারাতি পতিতক্খন্ধভারা। ‘‘ভারা হৰে পঞ্চক্খন্ধা’’তি (সং॰ নি॰ ৩.২২) হি ৰুত্তং। কতকিচ্চাতি চতূসু সচ্চেসু চতূহি মগ্গেহি কত্তব্বস্স পরিঞ্ঞাপহানসঅছকিরিযাভাৰনাসঙ্খাতস্স সোল়সৰিধস্সপি কিচ্চস্স পরিনিট্ঠিতত্তা কতকিচ্চা।
Pubbe kataṃ upādāyāti pubbe kataṃ paṭhamasaṅgītimupādāya. Sā panāyaṃ saṅgītīti sambandho. Tesūti tesu saṅgītikārakesu theresu. Vissutāti gaṇapāmokkhatāya vissutā sabbattha pākaṭā. Tasmiñhi sannipāte aṭṭheva gaṇapāmokkhā mahātherā ahesuṃ, tesu ca vāsabhagāmī sumanoti dve therā anuruddhattherassa saddhivihārikā, avasesā cha ānandattherassa. Ete pana sabbepi aṭṭha mahātherā bhagavantaṃ diṭṭhapubbā. Idāni te there sarūpato dassento āha ‘‘sabbakāmī cā’’tiādi. Sāṇasambhūtoti sāṇadesavāsī sambhūtatthero . Dutiyo saṅgahoti sambandho. Pannabhārāti patitakkhandhabhārā. ‘‘Bhārā have pañcakkhandhā’’ti (saṃ. ni. 3.22) hi vuttaṃ. Katakiccāti catūsu saccesu catūhi maggehi kattabbassa pariññāpahānasaachakiriyābhāvanāsaṅkhātassa soḷasavidhassapi kiccassa pariniṭṭhitattā katakiccā.
অব্বুদন্তি উপদ্দৰং ৰদন্তি চোরকম্মম্পি ভগৰতো ৰচনং থেনেত্ৰা অত্তনো ৰচনস্স দীপনতো । গণ্ঠিপদে পন ‘‘অব্বুদং গণ্ডো’’তি ৰুত্তং। ইমন্তি ৰক্খমাননিদস্সনং। সন্দিস্সমানা মুখা সম্মুখা। উপরিব্রহ্মলোকূপপত্তিযা ভাৰিতমগ্গন্তি উপরিব্রহ্মলোকে উপপত্তিযা উপ্পাদিতজ্ঝানং। ঝানঞ্হি তত্রূপপত্তিযা উপাযভাৰতো ইধ ‘‘মগ্গো’’তি ৰুত্তং। উপাযো হি ‘‘মগ্গো’’তি ৰুচ্চতি। ৰচনত্থো পনেত্থ – তং তং উপপত্তিং মগ্গতি গৰেসতি জনেতি নিপ্ফাদেতীতি মগ্গোতি এৰং ৰেদিতব্বো। অত্থতো চাযং মগ্গো নাম চেতনাপি হোতি চেতনাসম্পযুত্তধম্মাপি তদুভযম্পি। ‘‘নিরযঞ্চাহং, সারিপুত্ত, জানামি নিরযগামিঞ্চ মগ্গ’’ন্তি (ম॰ নি॰ ১.১৫৩) হি এত্থ চেতনা মগ্গো নাম।
Abbudanti upaddavaṃ vadanti corakammampi bhagavato vacanaṃ thenetvā attano vacanassa dīpanato . Gaṇṭhipade pana ‘‘abbudaṃ gaṇḍo’’ti vuttaṃ. Imanti vakkhamānanidassanaṃ. Sandissamānā mukhā sammukhā. Uparibrahmalokūpapattiyā bhāvitamagganti uparibrahmaloke upapattiyā uppāditajjhānaṃ. Jhānañhi tatrūpapattiyā upāyabhāvato idha ‘‘maggo’’ti vuttaṃ. Upāyo hi ‘‘maggo’’ti vuccati. Vacanattho panettha – taṃ taṃ upapattiṃ maggati gavesati janeti nipphādetīti maggoti evaṃ veditabbo. Atthato cāyaṃ maggo nāma cetanāpi hoti cetanāsampayuttadhammāpi tadubhayampi. ‘‘Nirayañcāhaṃ, sāriputta, jānāmi nirayagāmiñca magga’’nti (ma. ni. 1.153) hi ettha cetanā maggo nāma.
‘‘সদ্ধা হিরিযং কুসলঞ্চ দানং,
‘‘Saddhā hiriyaṃ kusalañca dānaṃ,
ধম্মা এতে সপ্পুরিসানুযাতা।
Dhammā ete sappurisānuyātā;
এতঞ্হি মগ্গং দিৰিযং ৰদন্তি,
Etañhi maggaṃ diviyaṃ vadanti,
এতেন হি গচ্ছতি দেৰলোক’’ন্তি॥ (অ॰ নি॰ ৮.৩২; কথা॰ ৪৭৯) –
Etena hi gacchati devaloka’’nti. (a. ni. 8.32; kathā. 479) –
এত্থ চেতনাসম্পযুত্তধম্মা মগ্গো নাম। ‘‘অযং ভিক্খৰে মগ্গো অযং পটিপদা’’তি সঙ্খারূপপত্তিসুত্তাদীসু (ম॰ নি॰ ৩.১৬১) চেতনাপি চেতনাসম্পযুত্তধম্মাপি মগ্গো নাম। ইমস্মিং ঠানে ঝানস্স অধিপ্পেতত্তা চেতনাসম্পযুত্তধম্মা গহেতব্বা।
Ettha cetanāsampayuttadhammā maggo nāma. ‘‘Ayaṃ bhikkhave maggo ayaṃ paṭipadā’’ti saṅkhārūpapattisuttādīsu (ma. ni. 3.161) cetanāpi cetanāsampayuttadhammāpi maggo nāma. Imasmiṃ ṭhāne jhānassa adhippetattā cetanāsampayuttadhammā gahetabbā.
মোগ্গলিব্রাহ্মণস্সাতি লোকসম্মতস্স অপুত্তকস্স মোগ্গলিনামব্রাহ্মণস্স। ননু চ কথমেতং নাম ৰুত্তং ‘‘মোগ্গলিব্রাহ্মণস্স গেহে পটিসন্ধিং গহেস্সতী’’তি। কিং উপরূপপত্তিযা পটিলদ্ধসমাপত্তীনম্পি কামাৰচরে উপ্পত্তি হোতীতি? হোতি। সা চ কতাধিকারানং মহাপুঞ্ঞানং চেতোপণিধিৰসেন হোতি, ন সব্বেসন্তি দট্ঠব্বং। অথ মহগ্গতস্স গরুককম্মস্স ৰিপাকং পটিবাহিত্ৰা পরিত্তকম্মং কথমত্তনো ৰিপাকস্স ওকাসং করোতীতি? এত্থ চ তাৰ তীসুপি গণ্ঠিপদেসু ইদং ৰুত্তং ‘‘নিকন্তিবলেনেৰ ঝানা পরিহাযতি, ততো পরিহীনজ্ঝানা নিব্বত্তন্তী’’তি। কেচি পন ‘‘অনীৰরণাৰত্থায নিকন্তিযা ঝানস্স পরিহানি ৰীমংসিত্ৰা গহেতব্বা’’তি ৰত্ৰা এৰমেত্থ কারণং ৰদন্তি ‘‘সতিপি মহগ্গতকম্মুনো ৰিপাকপটিবাহনসমত্থস্স পরিত্তকম্মস্সপি অভাৰে ‘ইজ্ঝতি, ভিক্খৰে, সীলৰতো চেতোপণিধি ৰিসুদ্ধত্তা’তি (দী॰ নি॰ ৩.৩৩৭; অ॰ নি॰ ৮.৩৫; সং॰ নি॰ ৪.৩৫২) ৰচনতো কামভৰে চেতোপণিধি মহগ্গতকম্মস্স ৰিপাকং পটিবাহিত্ৰা পরিত্তকম্মুনো ৰিপাকস্স ওকাসং করোতী’’তি।
Moggalibrāhmaṇassāti lokasammatassa aputtakassa moggalināmabrāhmaṇassa. Nanu ca kathametaṃ nāma vuttaṃ ‘‘moggalibrāhmaṇassa gehe paṭisandhiṃ gahessatī’’ti. Kiṃ uparūpapattiyā paṭiladdhasamāpattīnampi kāmāvacare uppatti hotīti? Hoti. Sā ca katādhikārānaṃ mahāpuññānaṃ cetopaṇidhivasena hoti, na sabbesanti daṭṭhabbaṃ. Atha mahaggatassa garukakammassa vipākaṃ paṭibāhitvā parittakammaṃ kathamattano vipākassa okāsaṃ karotīti? Ettha ca tāva tīsupi gaṇṭhipadesu idaṃ vuttaṃ ‘‘nikantibaleneva jhānā parihāyati, tato parihīnajjhānā nibbattantī’’ti. Keci pana ‘‘anīvaraṇāvatthāya nikantiyā jhānassa parihāni vīmaṃsitvā gahetabbā’’ti vatvā evamettha kāraṇaṃ vadanti ‘‘satipi mahaggatakammuno vipākapaṭibāhanasamatthassa parittakammassapi abhāve ‘ijjhati, bhikkhave, sīlavato cetopaṇidhi visuddhattā’ti (dī. ni. 3.337; a. ni. 8.35; saṃ. ni. 4.352) vacanato kāmabhave cetopaṇidhi mahaggatakammassa vipākaṃ paṭibāhitvā parittakammuno vipākassa okāsaṃ karotī’’ti.
সাধু সপ্পুরিসাতি এত্থ সাধূতি আযাচনত্থে নিপাতো, তং যাচামাতি অত্থো। হট্ঠপহট্ঠোতি চিত্তপীণনৰসেন পুনপ্পুনং সন্তুট্ঠো। উদগ্গুদগ্গোতি সরীরৰিকারুপ্পাদনপীতিৰসেন উদগ্গুদগ্গো। পীতিমা হি পুগ্গলো কাযচিত্তানং উগ্গতত্তা অব্ভুগ্গতত্তা ‘‘উদগ্গো’’তি ৰুচ্চতি। সাধূতি পটিস্সুণিত্ৰাতি ‘‘সাধূ’’তি পটিৰচনং দত্ৰা। তীরেত্ৰাতি নিট্ঠপেত্ৰা। পুন পচ্চাগমিংসূতি পুন আগমিংসু। তেন খো পন সমযেনাতি যস্মিং সমযে দুতিযসঙ্গীতিং অকংসু, তস্মিং সমযেতি অত্থো। নৰকাতি ৰুত্তমেৰত্থং ৰিভাৰেতুং ‘‘দহরভিক্খূ’’তি ৰুত্তং। তং অধিকরণং ন সম্পাপুণিংসূতি তং ৰজ্জিপুত্তকেহি উপ্পাদিতং অধিকরণং ৰিনিচ্ছিনিতুং ন সম্পাপুণিংসু নাগমিংসু। নো অহুৰত্থাতি সম্বন্ধো। ইদং দণ্ডকম্মন্তি ইদানি ৰত্তব্বং সন্ধায ৰুত্তং। যাৰতাযুকং ঠত্ৰা পরিনিব্বুতাতি সম্বন্ধো, যাৰ অত্তনো অত্তনো আযুপরিমাণং, তাৰ ঠত্ৰা পরিনিব্বুতাতি অত্থো।
Sādhusappurisāti ettha sādhūti āyācanatthe nipāto, taṃ yācāmāti attho. Haṭṭhapahaṭṭhoti cittapīṇanavasena punappunaṃ santuṭṭho. Udaggudaggoti sarīravikāruppādanapītivasena udaggudaggo. Pītimā hi puggalo kāyacittānaṃ uggatattā abbhuggatattā ‘‘udaggo’’ti vuccati. Sādhūti paṭissuṇitvāti ‘‘sādhū’’ti paṭivacanaṃ datvā. Tīretvāti niṭṭhapetvā. Puna paccāgamiṃsūti puna āgamiṃsu. Tena kho pana samayenāti yasmiṃ samaye dutiyasaṅgītiṃ akaṃsu, tasmiṃ samayeti attho. Navakāti vuttamevatthaṃ vibhāvetuṃ ‘‘daharabhikkhū’’ti vuttaṃ. Taṃ adhikaraṇaṃ na sampāpuṇiṃsūti taṃ vajjiputtakehi uppāditaṃ adhikaraṇaṃ vinicchinituṃ na sampāpuṇiṃsu nāgamiṃsu. No ahuvatthāti sambandho. Idaṃ daṇḍakammanti idāni vattabbaṃ sandhāya vuttaṃ. Yāvatāyukaṃ ṭhatvā parinibbutāti sambandho, yāva attano attano āyuparimāṇaṃ, tāva ṭhatvā parinibbutāti attho.
কিং পন কত্ৰা তে থেরা পরিনিব্বুতাতি আহ ‘‘দুতিযং সঙ্গহং কত্ৰা’’তিআদি। অনাগতেপি সদ্ধম্মৰুড্ঢিযা হেতুং কত্ৰা পরিনিব্বুতাতি সম্বন্ধো। ইদানি ‘‘তেপি নাম এৰং মহানুভাৰা থেরা অনিচ্চতায ৰসং গতা, কিমঙ্গং পন অঞ্ঞে’’তি সংৰেজেত্ৰা ওৰদন্তো আহ ‘‘খীণাসৰা’’তিআদি। অনিচ্চতাৰসন্তি অনিচ্চতাৰসত্তং, অনিচ্চতাযত্তভাৰং অনিচ্চতাধীনভাৰন্তি ৰুত্তং হোতি। জম্মিং লামকং দুরভিসম্ভৰং অনভিভৰনীযং অতিক্কমিতুং অসক্কুণেয্যং অনিচ্চতং এৰং ঞত্ৰাতি সম্বন্ধো। কেচি পন ‘‘দুরভিসম্ভৰ’’ন্তি এত্থ ‘‘পাপুণিতুং অসক্কুণেয্য’’ন্তি ইমমত্থং গহেত্ৰা ‘‘যং দুরভিসম্ভৰং নিচ্চং অমতং পদং, তং পত্তুং ৰাযমে ধীরো’’তি সম্বন্ধং ৰদন্তি। সব্বাকারেনাতি সব্বপ্পকারেন ৰত্তব্বং কিঞ্চিপি অসেসেত্ৰা দুতিযসঙ্গীতি সংৰণ্ণিতাতি অধিপ্পাযো।
Kiṃ pana katvā te therā parinibbutāti āha ‘‘dutiyaṃ saṅgahaṃ katvā’’tiādi. Anāgatepi saddhammavuḍḍhiyā hetuṃ katvā parinibbutāti sambandho. Idāni ‘‘tepi nāma evaṃ mahānubhāvā therā aniccatāya vasaṃ gatā, kimaṅgaṃ pana aññe’’ti saṃvejetvā ovadanto āha ‘‘khīṇāsavā’’tiādi. Aniccatāvasanti aniccatāvasattaṃ, aniccatāyattabhāvaṃ aniccatādhīnabhāvanti vuttaṃ hoti. Jammiṃ lāmakaṃ durabhisambhavaṃ anabhibhavanīyaṃ atikkamituṃ asakkuṇeyyaṃ aniccataṃ evaṃ ñatvāti sambandho. Keci pana ‘‘durabhisambhava’’nti ettha ‘‘pāpuṇituṃ asakkuṇeyya’’nti imamatthaṃ gahetvā ‘‘yaṃ durabhisambhavaṃ niccaṃ amataṃ padaṃ, taṃ pattuṃ vāyame dhīro’’ti sambandhaṃ vadanti. Sabbākārenāti sabbappakārena vattabbaṃ kiñcipi asesetvā dutiyasaṅgīti saṃvaṇṇitāti adhippāyo.
ইতি সমন্তপাসাদিকায ৰিনযট্ঠকথায সারত্থদীপনিযং
Iti samantapāsādikāya vinayaṭṭhakathāya sāratthadīpaniyaṃ
দুতিযসঙ্গীতিকথাৰণ্ণনা সমত্তা।
Dutiyasaṅgītikathāvaṇṇanā samattā.
