| Library / Tipiṭaka / ਤਿਪਿਟਕ • Tipiṭaka / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā |
ਦੁਤਿਯਸਙ੍ਗੀਤਿਕਥਾવਣ੍ਣਨਾ
Dutiyasaṅgītikathāvaṇṇanā
ਏવਂ ਪਠਮਮਹਾਸਙ੍ਗੀਤਿਂ ਦਸ੍ਸੇਤ੍વਾ ਯਦਤ੍ਥਂ ਸਾ ਇਧ ਦਸ੍ਸਿਤਾ, ਤਂ ਨਿਗਮਨવਸੇਨ ਦਸ੍ਸੇਨ੍ਤੋ ਇਮਿਸ੍ਸਾਤਿਆਦਿਮਾਹ। ਤਤ੍ਰਾਯਂ ਆਚਰਿਯਪਰਮ੍ਪਰਾਤਿ ਤਸ੍ਮਿਂ ਜਮ੍ਬੁਦੀਪੇ ਅਯਂ ਆਚਰਿਯਾਨਂ ਪવੇਣੀ ਪਟਿਪਾਟਿ। વਿਜਿਤਾવਿਨੋਤਿ વਿਜਿਤਸਬ੍ਬਕਿਲੇਸਪਟਿਪਕ੍ਖਤ੍ਤਾ વਿਜਿਤવਨ੍ਤੋ। ਜਮ੍ਬੁਸਿਰਿવ੍ਹਯੇਤਿ ਜਮ੍ਬੁਸਦਿਸੋ ਸਿਰਿਮਨ੍ਤੋ ਅવ੍ਹਯੋ ਨਾਮਂ ਯਸ੍ਸ ਦੀਪਸ੍ਸ, ਤਸ੍ਮਿਂ ਜਮ੍ਬੁਦੀਪੇਤਿ વੁਤ੍ਤਂ ਹੋਤਿ। ਮਹਨ੍ਤੇਨ ਹਿ ਜਮ੍ਬੁਰੁਕ੍ਖੇਨ ਅਭਿਲਕ੍ਖਿਤਤ੍ਤਾ ਦੀਪੋਪਿ ‘‘ਜਮ੍ਬੂ’’ਤਿ વੁਚ੍ਚਤਿ। ਅਚ੍ਛਿਜ੍ਜਮਾਨਂ ਅવਿਨਸ੍ਸਮਾਨਂ ਕਤ੍વਾ। વਿਨਯવਂਸਨ੍ਤਿਆਦੀਹਿ ਤੀਹਿ વਿਨਯਪਾਲ਼ਿਯੇવ ਕਥਿਤਾ ਪਰਿਯਾਯવਚਨਤ੍ਤਾ ਤੇਸਂ। ਪਕਤਞ੍ਞੁਤਨ੍ਤਿ વੇਯ੍ਯਤ੍ਤਿਯਂ, ਪਟੁਭਾવਨ੍ਤਿ વੁਤ੍ਤਂ ਹੋਤਿ। ਧੁਰਗ੍ਗਾਹੋਤਿ ਪਧਾਨਗ੍ਗਾਹੀ, ਸਬ੍ਬੇਸਂ ਪਾਮੋਕ੍ਖੋ ਹੁਤ੍વਾ ਗਣ੍ਹੀਤਿ વੁਤ੍ਤਂ ਹੋਤਿ। ਭਿਕ੍ਖੂਨਂ ਸਮੁਦਾਯੋ ਸਮੂਹੋ ਭਿਕ੍ਖੁਸਮੁਦਾਯੋ।
Evaṃ paṭhamamahāsaṅgītiṃ dassetvā yadatthaṃ sā idha dassitā, taṃ nigamanavasena dassento imissātiādimāha. Tatrāyaṃ ācariyaparamparāti tasmiṃ jambudīpe ayaṃ ācariyānaṃ paveṇī paṭipāṭi. Vijitāvinoti vijitasabbakilesapaṭipakkhattā vijitavanto. Jambusirivhayeti jambusadiso sirimanto avhayo nāmaṃ yassa dīpassa, tasmiṃ jambudīpeti vuttaṃ hoti. Mahantena hi jamburukkhena abhilakkhitattā dīpopi ‘‘jambū’’ti vuccati. Acchijjamānaṃ avinassamānaṃ katvā. Vinayavaṃsantiādīhi tīhi vinayapāḷiyeva kathitā pariyāyavacanattā tesaṃ. Pakataññutanti veyyattiyaṃ, paṭubhāvanti vuttaṃ hoti. Dhuraggāhoti padhānaggāhī, sabbesaṃ pāmokkho hutvā gaṇhīti vuttaṃ hoti. Bhikkhūnaṃ samudāyo samūho bhikkhusamudāyo.
ਯਦਾਤਿ ਨਿਬ੍ਬਾਯਿਂਸੂਤਿ ਸਮ੍ਬਨ੍ਧੋ। ਜੋਤਯਿਤ੍વਾ ਚ ਸਬ੍ਬਧੀਤਿ ਤਮੇવ ਸਦ੍ਧਮ੍ਮਂ ਸਬ੍ਬਤ੍ਥ ਪਕਾਸਯਿਤ੍વਾ। ਜੁਤਿਮਨ੍ਤੋਤਿ ਪਞ੍ਞਾਜੁਤਿਯਾ ਯੁਤ੍ਤਾ, ਤੇਜવਨ੍ਤੋ વਾ, ਮਹਾਨੁਭਾવਾਤਿ ਅਤ੍ਥੋ। ਨਿਬ੍ਬਾਯਿਂਸੂਤਿ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਨਿਬ੍ਬਾਯਿਂਸੁ। ਅਨਾਲਯਾਤਿ ਅਸਙ੍ਗਾ।
Yadāti nibbāyiṃsūti sambandho. Jotayitvā ca sabbadhīti tameva saddhammaṃ sabbattha pakāsayitvā. Jutimantoti paññājutiyā yuttā, tejavanto vā, mahānubhāvāti attho. Nibbāyiṃsūti anupādisesāya nibbānadhātuyā nibbāyiṃsu. Anālayāti asaṅgā.
ਅਥਾਤਿ ਪਚ੍ਛਾ, ਯਦਾ ਪਰਿਨਿਬ੍ਬਾਯਿਂਸੁ, ਤਤੋ ਪਰਨ੍ਤਿ ਅਤ੍ਥੋ। ਕਪ੍ਪਤਿ ਸਿਙ੍ਗੀਲੋਣਕਪ੍ਪੋਤਿ ਏਤ੍ਥ ਕਪ੍ਪ-ਸਦ੍ਦੋ વਿਕਪ੍ਪਤ੍ਥੋ, ਤੇਨ ਸਿਙ੍ਗੀਲੋਣવਿਕਪ੍ਪੋਪਿ ਕਪ੍ਪਤਿ। ਇਦਮ੍ਪਿ ਪਕ੍ਖਨ੍ਤਰਂ ਕਪ੍ਪਤੀਤਿ ਅਤ੍ਥੋ, ਏવਂ ਸਬ੍ਬਤ੍ਥ। ਤਤ੍ਥ ਸਿਙ੍ਗੇਨ ਲੋਣਂ ਪਰਿਹਰਿਤ੍વਾ ਅਲੋਣਕਪਿਣ੍ਡਪਾਤੇਨ ਸਦ੍ਧਿਂ ਭੁਞ੍ਜਿਤੁਂ ਕਪ੍ਪਤਿ , ਸਨ੍ਨਿਧਿਂ ਨ ਕਰੋਤੀਤਿ ਅਧਿਪ੍ਪਾਯੋ। ਕਪ੍ਪਤਿ ਦ੍વਙ੍ਗੁਲਕਪ੍ਪੋਤਿ ਦ੍વਙ੍ਗੁਲਂ ਅਤਿਕ੍ਕਨ੍ਤਾਯ ਛਾਯਾਯ વਿਕਾਲੇ ਭੋਜਨਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ। ਕਪ੍ਪਤਿ ਗਾਮਨ੍ਤਰਕਪ੍ਪੋਤਿ ‘‘ਗਾਮਨ੍ਤਰਂ ਗਮਿਸ੍ਸਾਮੀ’’ਤਿ ਪવਾਰਿਤੇਨ ਅਨਤਿਰਿਤ੍ਤਭੋਜਨਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ। ਕਪ੍ਪਤਿ ਆવਾਸਕਪ੍ਪੋਤਿ ਏਕਸੀਮਾਯ ਨਾਨਾਸੇਨਾਸਨੇਸੁ વਿਸੁਂ વਿਸੁਂ ਉਪੋਸਥਾਦੀਨਿ ਸਙ੍ਘਕਮ੍ਮਾਨਿ ਕਾਤੁਂ વਟ੍ਟਤੀਤਿ ਅਤ੍ਥੋ। ਕਪ੍ਪਤਿ ਅਨੁਮਤਿਕਪ੍ਪੋਤਿ ‘‘ਅਨਾਗਤਾਨਂ ਆਗਤਕਾਲੇ ਅਨੁਮਤਿਂ ਗਹੇਸ੍ਸਾਮਾ’’ਤਿ ਤੇਸੁ ਅਨਾਗਤੇਸੁਯੇવ વਗ੍ਗੇਨ ਸਙ੍ਘੇਨ ਕਮ੍ਮਂ ਕਤ੍વਾ ਪਚ੍ਛਾ ਅਨੁਮਤਿਂ ਗਹੇਤੁਂ ਕਪ੍ਪਤਿ, વਗ੍ਗਕਮ੍ਮਂ ਨ ਹੋਤੀਤਿ ਅਧਿਪ੍ਪਾਯੋ। ਕਪ੍ਪਤਿ ਆਚਿਣ੍ਣਕਪ੍ਪੋਤਿ ਆਚਰਿਯੁਪਜ੍ਝਾਯੇਹਿ ਆਚਿਣ੍ਣੋ ਕਪ੍ਪਤੀਤਿ ਅਤ੍ਥੋ। ਸੋ ਪਨ ਏਕਚ੍ਚੋ ਕਪ੍ਪਤਿ ਧਮ੍ਮਿਕੋ, ਏਕਚ੍ਚੋ ਨ ਕਪ੍ਪਤਿ ਅਧਮ੍ਮਿਕੋਤਿ વੇਦਿਤਬ੍ਬੋ। ਕਪ੍ਪਤਿ ਅਮਥਿਤਕਪ੍ਪੋਤਿ ਯਂ ਖੀਰਂ ਖੀਰਭਾવਂ વਿਜਹਿਤਂ ਦਧਿਭਾવਂ ਅਸਮ੍ਪਤ੍ਤਂ, ਤਂ ਭੁਤ੍ਤਾવਿਨਾ ਪવਾਰਿਤੇਨ ਅਨਤਿਰਿਤ੍ਤਂ ਭੁਞ੍ਜਿਤੁਂ ਕਪ੍ਪਤੀਤਿ ਅਤ੍ਥੋ। ਕਪ੍ਪਤਿ ਜਲ਼ੋਗਿਂ ਪਾਤੁਨ੍ਤਿ ਏਤ੍ਥ ਜਲ਼ੋਗੀਤਿ ਤਰੁਣਸੁਰਾ, ਯਂ ਮਜ੍ਜਸਮ੍ਭਾਰਂ ਏਕਤੋ ਕਤਂ ਮਜ੍ਜਭਾવਮਸਮ੍ਪਤ੍ਤਂ, ਤਂ ਪਾਤੁਂ વਟ੍ਟਤੀਤਿ ਅਧਿਪ੍ਪਾਯੋ। ਜਾਤਰੂਪਰਜਤਨ੍ਤਿ ਏਤ੍ਥ ਸਰਸਤੋ વਿਕਾਰਂ ਅਨਾਪਜ੍ਜਿਤ੍વਾ ਸਬ੍ਬਦਾ ਜਾਤਰੂਪਮੇવ ਹੋਤੀਤਿ ਜਾਤਂ ਰੂਪਂ ਏਤਸ੍ਸਾਤਿ ਜਾਤਰੂਪਂ, ਸੁવਣ੍ਣਂ। ਧવਲਸਭਾવਤਾਯ ਰਾਜਤੀਤਿ ਰਜਤਂ, ਰੂਪਿਯਂ। ਸੁਸੁਨਾਗਪੁਤ੍ਤੋਤਿ ਸੁਸੁਨਾਗਸ੍ਸ ਪੁਤ੍ਤੋ। ਕਾਕਣ੍ਡਕਪੁਤ੍ਤੋਤਿ ਕਾਕਣ੍ਡਕਸ੍ਸ ਬ੍ਰਾਹ੍ਮਣਸ੍ਸ ਪੁਤ੍ਤੋ। વਜ੍ਜੀਸੂਤਿ ਜਨਪਦਨਾਮਤ੍ਤਾ ਬਹੁવਚਨਂ ਕਤਂ।
Athāti pacchā, yadā parinibbāyiṃsu, tato paranti attho. Kappati siṅgīloṇakappoti ettha kappa-saddo vikappattho, tena siṅgīloṇavikappopi kappati. Idampi pakkhantaraṃ kappatīti attho, evaṃ sabbattha. Tattha siṅgena loṇaṃ pariharitvā aloṇakapiṇḍapātena saddhiṃ bhuñjituṃ kappati , sannidhiṃ na karotīti adhippāyo. Kappati dvaṅgulakappoti dvaṅgulaṃ atikkantāya chāyāya vikāle bhojanaṃ bhuñjituṃ kappatīti attho. Kappati gāmantarakappoti ‘‘gāmantaraṃ gamissāmī’’ti pavāritena anatirittabhojanaṃ bhuñjituṃ kappatīti attho. Kappati āvāsakappoti ekasīmāya nānāsenāsanesu visuṃ visuṃ uposathādīni saṅghakammāni kātuṃ vaṭṭatīti attho. Kappati anumatikappoti ‘‘anāgatānaṃ āgatakāle anumatiṃ gahessāmā’’ti tesu anāgatesuyeva vaggena saṅghena kammaṃ katvā pacchā anumatiṃ gahetuṃ kappati, vaggakammaṃ na hotīti adhippāyo. Kappati āciṇṇakappoti ācariyupajjhāyehi āciṇṇo kappatīti attho. So pana ekacco kappati dhammiko, ekacco na kappati adhammikoti veditabbo. Kappati amathitakappoti yaṃ khīraṃ khīrabhāvaṃ vijahitaṃ dadhibhāvaṃ asampattaṃ, taṃ bhuttāvinā pavāritena anatirittaṃ bhuñjituṃ kappatīti attho. Kappati jaḷogiṃ pātunti ettha jaḷogīti taruṇasurā, yaṃ majjasambhāraṃ ekato kataṃ majjabhāvamasampattaṃ, taṃ pātuṃ vaṭṭatīti adhippāyo. Jātarūparajatanti ettha sarasato vikāraṃ anāpajjitvā sabbadā jātarūpameva hotīti jātaṃ rūpaṃ etassāti jātarūpaṃ, suvaṇṇaṃ. Dhavalasabhāvatāya rājatīti rajataṃ, rūpiyaṃ. Susunāgaputtoti susunāgassa putto. Kākaṇḍakaputtoti kākaṇḍakassa brāhmaṇassa putto. Vajjīsūti janapadanāmattā bahuvacanaṃ kataṃ.
ਤਦਹੁਪੋਸਥੇਤਿ ਏਤ੍ਥ ਤਦਹੂਤਿ ਤਸ੍ਮਿਂ ਅਹਨਿ। ਉਪવਸਨ੍ਤਿ ਏਤ੍ਥਾਤਿ ਉਪੋਸਥੋ, ਉਪવਸਨ੍ਤੀਤਿ ਚ ਸੀਲਸਮਾਦਾਨੇਨ વਾ ਅਨਸਨਾਦਿਨਾ વਾ ਉਪੇਤਾ ਹੁਤ੍વਾ વਸਨ੍ਤੀਤਿ ਅਤ੍ਥੋ। ਕਂਸਪਾਤਿਨ੍ਤਿ ਸੁવਣ੍ਣਪਾਤਿਂ। ਮਾਸਕਰੂਪਨ੍ਤਿ ਮਾਸਕੋ ਏવ। ਸਬ੍ਬਂ ਤਾવ વਤ੍ਤਬ੍ਬਨ੍ਤਿ ਇਮਿਨਾ ਸਤ੍ਤਸਤਿਕਕ੍ਖਨ੍ਧਕੇ (ਚੂਲ਼વ॰ ੪੪੬ ਆਦਯੋ) ਆਗਤਾ ਸਬ੍ਬਾਪਿ ਪਾਲ਼ਿ ਇਧ ਆਨੇਤ੍વਾ વਤ੍ਤਬ੍ਬਾਤਿ ਦਸ੍ਸੇਤਿ। ਸਙ੍ਗਾਯਿਤਸਦਿਸਮੇવ ਸਙ੍ਗਾਯਿਂਸੂਤਿ ਸਮ੍ਬਨ੍ਧੋ।
Tadahuposatheti ettha tadahūti tasmiṃ ahani. Upavasanti etthāti uposatho, upavasantīti ca sīlasamādānena vā anasanādinā vā upetā hutvā vasantīti attho. Kaṃsapātinti suvaṇṇapātiṃ. Māsakarūpanti māsako eva. Sabbaṃ tāva vattabbanti iminā sattasatikakkhandhake (cūḷava. 446 ādayo) āgatā sabbāpi pāḷi idha ānetvā vattabbāti dasseti. Saṅgāyitasadisameva saṅgāyiṃsūti sambandho.
ਸਾ ਪਨਾਯਂ ਸਙ੍ਗੀਤੀਤਿ ਸਮ੍ਬਨ੍ਧੋ। ਤੇਸੂਤਿ ਤੇਸੁ ਸਙ੍ਗੀਤਿਕਾਰਕੇਸੁ ਥੇਰੇਸੁ। વਿਸ੍ਸੁਤਾ ਏਤੇ ਸਦ੍ਧਿવਿਹਾਰਿਕਾ ਞੇਯ੍ਯਾਤਿ ਸਮ੍ਬਨ੍ਧੋ। ਸਾਣਸਮ੍ਭੂਤੋਤਿ ਸਾਣਦੇਸવਾਸੀ ਸਮ੍ਭੂਤਤ੍ਥੇਰੋ। ਦੁਤਿਯੋ ਸਙ੍ਗਹੋਤਿ ਸਮ੍ਬਨ੍ਧਿਤਬ੍ਬਂ। ਪਨ੍ਨਭਾਰਾਤਿ ਪਤਿਤਕ੍ਖਨ੍ਧਭਾਰਾ।
Sā panāyaṃ saṅgītīti sambandho. Tesūti tesu saṅgītikārakesu theresu. Vissutā ete saddhivihārikā ñeyyāti sambandho. Sāṇasambhūtoti sāṇadesavāsī sambhūtatthero. Dutiyo saṅgahoti sambandhitabbaṃ. Pannabhārāti patitakkhandhabhārā.
ਅਬ੍ਬੁਦਨ੍ਤਿ ਉਪਦ੍ਦવਂ વਦਨ੍ਤਿ। ‘‘ਭਗવਤੋ વਚਨਂ ਥੇਨੇਤ੍વਾ ਅਤ੍ਤਨੋ વਚਨਸ੍ਸ ਦੀਪਨਤੋ ਅਬ੍ਬੁਦਨ੍ਤਿ ਚੋਰਕਮ੍ਮ’’ਨ੍ਤਿ ਏਕੇ। ਇਦਨ੍ਤਿ વਕ੍ਖਮਾਨਨਿਦਸ੍ਸਨਂ। ਸਨ੍ਦਿਸ੍ਸਮਾਨਾ ਮੁਖਾ ਸਮ੍ਮੁਖਾ। ਭਾવਿਤਮਗ੍ਗਨ੍ਤਿ ਉਪ੍ਪਾਦਿਤਜ੍ਝਾਨਂ। ਸਾਧੁ ਸਪ੍ਪੁਰਿਸਾਤਿ ਏਤ੍ਥ ਸਾਧੂਤਿ ਆਯਾਚਨਤ੍ਥੇ ਨਿਪਾਤੋ, ਤਂ ਯਾਚਾਮੀਤਿ ਅਤ੍ਥੋ। ਹਟ੍ਠਪਹਟ੍ਠੋਤਿ ਪੁਨਪ੍ਪੁਨਂ ਸਨ੍ਤੁਟ੍ਠੋ। ਉਦਗ੍ਗੁਦਗ੍ਗੋਤਿ ਸਰੀਰવਿਕਾਰੁਪ੍ਪਾਦਨਪੀਤਿવਸੇਨ ਉਦਗ੍ਗੁਦਗ੍ਗੋ, ਪੀਤਿਮਾ ਹਿ ਪੁਗ੍ਗਲੋ ਕਾਯਚਿਤ੍ਤਾਨਂ ਉਗ੍ਗਤਤ੍ਤਾ ‘‘ਉਦਗ੍ਗੁਦਗ੍ਗੋ’’ਤਿ વੁਚ੍ਚਤਿ।
Abbudanti upaddavaṃ vadanti. ‘‘Bhagavato vacanaṃ thenetvā attano vacanassa dīpanato abbudanti corakamma’’nti eke. Idanti vakkhamānanidassanaṃ. Sandissamānā mukhā sammukhā. Bhāvitamagganti uppāditajjhānaṃ. Sādhu sappurisāti ettha sādhūti āyācanatthe nipāto, taṃ yācāmīti attho. Haṭṭhapahaṭṭhoti punappunaṃ santuṭṭho. Udaggudaggoti sarīravikāruppādanapītivasena udaggudaggo, pītimā hi puggalo kāyacittānaṃ uggatattā ‘‘udaggudaggo’’ti vuccati.
ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਦੁਤਿਯਂ ਸਙ੍ਗੀਤਿਂ ਅਕਰਿਂਸੁ, ਤਸ੍ਮਿਂ ਸਮਯੇਤਿ ਅਤ੍ਥੋ। ਤਂ ਅਧਿਕਰਣਂ ਨ ਸਮ੍ਪਾਪੁਣਿਂਸੂਤਿ ਤਂ વਜ੍ਜਿਪੁਤ੍ਤਕੇਹਿ ਉਪ੍ਪਾਦਿਤਂ ਅਧਿਕਰਣਂ વਿਨਿਚ੍ਛਿਨਿਤੁਂ ਨ ਸਮ੍ਪਾਪੁਣਿਂਸੁ ਨਾਗਮਿਂਸੁ। ਨੋ ਅਹੁવਤ੍ਥਾਤਿ ਸਮ੍ਬਨ੍ਧੋ। ਯਾવਤਾਯੁਕਂ ਠਤ੍વਾ ਪਰਿਨਿਬ੍ਬੁਤਾਤਿ ਸਮ੍ਬਨ੍ਧੋ। ਕਿਂ ਪਨ ਕਤ੍વਾ ਥੇਰਾ ਪਰਿਨਿਬ੍ਬੁਤਾਤਿ? ਆਹ ਦੁਤਿਯਂ ਸਙ੍ਗਹਂ ਕਤ੍વਾਤਿਆਦਿ। ਅਨਿਚ੍ਚਤਾવਸਨ੍ਤਿ ਅਨਿਚ੍ਚਤਾਧੀਨਤਂ। ਜਮ੍ਮਿਨ੍ਤਿ ਲਾਮਕਂ। ਦੁਰਭਿਸਮ੍ਭવਂ ਅਨਭਿਭવਨੀਯਂ ਅਤਿਕ੍ਕਮਿਤੁਂ ਅਸਕ੍ਕੁਣੇਯ੍ਯਂ ਅਨਿਚ੍ਚਤਂ ਏવਂ ਞਤ੍વਾਤਿ ਸਮ੍ਬਨ੍ਧੋ।
Tena kho pana samayenāti yasmiṃ samaye dutiyaṃ saṅgītiṃ akariṃsu, tasmiṃ samayeti attho. Taṃ adhikaraṇaṃ na sampāpuṇiṃsūti taṃ vajjiputtakehi uppāditaṃ adhikaraṇaṃ vinicchinituṃ na sampāpuṇiṃsu nāgamiṃsu. No ahuvatthāti sambandho. Yāvatāyukaṃ ṭhatvā parinibbutāti sambandho. Kiṃ pana katvā therā parinibbutāti? Āha dutiyaṃ saṅgahaṃ katvātiādi. Aniccatāvasanti aniccatādhīnataṃ. Jamminti lāmakaṃ. Durabhisambhavaṃ anabhibhavanīyaṃ atikkamituṃ asakkuṇeyyaṃ aniccataṃ evaṃ ñatvāti sambandho.
ਦੁਤਿਯਸਙ੍ਗੀਤਿਕਥਾવਣ੍ਣਨਾਨਯੋ ਨਿਟ੍ਠਿਤੋ।
Dutiyasaṅgītikathāvaṇṇanānayo niṭṭhito.
