| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๖. ทุติยสญฺญาสุตฺตวณฺณนา
6. Dutiyasaññāsuttavaṇṇanā
๔๙. ฉเฎฺฐ นฺหารุวิเลขนนฺติ จมฺมํ ลิขนฺตานํ จมฺมํ ลิขิตฺวา ฉฑฺฑิตกสฎํฯ ‘‘เอโสหมสฺมี’’ติอาทินา อหํกรณํ อหงฺกาโรฯ ‘‘เอตํ มมา’’ติ มมํกรณํ มมงฺกาโรฯ เตนาห ‘‘อหงฺการทิฎฺฐิโต’’ติอาทิฯ ติโสฺส วิธาติ เสยฺยสทิสหีนวเสน ตโย มานาฯ ‘‘เอกวิเธน รูปสงฺคโห’’ติอาทีสุ (ธ. ส. ๕๘๔) โกฎฺฐาโส ‘‘วิธา’’ติ วุโตฺตฯ ‘‘กถํวิธํ สีลวนฺตํ วทนฺติ, กถํวิธํ ปญฺญวนฺตํ วทนฺตี’’ติอาทีสุ (สํ. นิ. ๑.๙๕) ปกาโรฯ ‘‘ติโสฺส อิมา, ภิกฺขเว, วิธาฯ กตมา ติโสฺส? เสโยฺยหมสฺมีติ วิธา’’ติ (วิภ. ๙๒๐) เอตฺถ มาโน ‘‘วิธา’’ติ วุโตฺตฯ อิธาปิ มาโนว อธิเปฺปโตฯ มาโน หิ วิทหนโต หีนาทิวเสน ติวิธาฯ เตนากาเรน ทหนโต อุปทหนโต ‘‘วิธา’’ติ วุจฺจติฯ
49. Chaṭṭhe nhāruvilekhananti cammaṃ likhantānaṃ cammaṃ likhitvā chaḍḍitakasaṭaṃ. ‘‘Esohamasmī’’tiādinā ahaṃkaraṇaṃ ahaṅkāro. ‘‘Etaṃ mamā’’ti mamaṃkaraṇaṃ mamaṅkāro. Tenāha ‘‘ahaṅkāradiṭṭhito’’tiādi. Tisso vidhāti seyyasadisahīnavasena tayo mānā. ‘‘Ekavidhena rūpasaṅgaho’’tiādīsu (dha. sa. 584) koṭṭhāso ‘‘vidhā’’ti vutto. ‘‘Kathaṃvidhaṃ sīlavantaṃ vadanti, kathaṃvidhaṃ paññavantaṃ vadantī’’tiādīsu (saṃ. ni. 1.95) pakāro. ‘‘Tisso imā, bhikkhave, vidhā. Katamā tisso? Seyyohamasmīti vidhā’’ti (vibha. 920) ettha māno ‘‘vidhā’’ti vutto. Idhāpi mānova adhippeto. Māno hi vidahanato hīnādivasena tividhā. Tenākārena dahanato upadahanato ‘‘vidhā’’ti vuccati.
ทุติยสญฺญาสุตฺตวณฺณนา นิฎฺฐิตาฯ
Dutiyasaññāsuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๖. ทุติยสญฺญาสุตฺตํ • 6. Dutiyasaññāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๕-๖. สญฺญาสุตฺตทฺวยวณฺณนา • 5-6. Saññāsuttadvayavaṇṇanā
