| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. து³தியஸாரிபுத்தஸுத்தங்
5. Dutiyasāriputtasuttaṃ
1001. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² ஆயஸ்மந்தங் ஸாரிபுத்தங் ப⁴க³வா ஏதத³வோச – ‘‘‘ஸோதாபத்தியங்க³ங், ஸோதாபத்தியங்க³’ந்தி ஹித³ங், ஸாரிபுத்த, வுச்சதி. கதமங் நு கோ² ஸாரிபுத்த, ஸோதாபத்தியங்க³’’ந்தி? ‘‘ஸப்புரிஸஸங்ஸேவோ ஹி, ப⁴ந்தே, ஸோதாபத்தியங்க³ங், ஸத்³த⁴ம்மஸ்ஸவனங் ஸோதாபத்தியங்க³ங், யோனிஸோமனஸிகாரோ ஸோதாபத்தியங்க³ங், த⁴ம்மானுத⁴ம்மப்படிபத்தி ஸோதாபத்தியங்க³’’ந்தி. ‘‘ஸாது⁴ ஸாது⁴, ஸாரிபுத்த! ஸப்புரிஸஸங்ஸேவோ ஹி, ஸாரிபுத்த, ஸோதாபத்தியங்க³ங், ஸத்³த⁴ம்மஸ்ஸவனங் ஸோதாபத்தியங்க³ங், யோனிஸோமனஸிகாரோ ஸோதாபத்தியங்க³ங், த⁴ம்மானுத⁴ம்மப்படிபத்தி ஸோதாபத்தியங்க³ங்’’.
1001. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ sāriputtaṃ bhagavā etadavoca – ‘‘‘sotāpattiyaṅgaṃ, sotāpattiyaṅga’nti hidaṃ, sāriputta, vuccati. Katamaṃ nu kho sāriputta, sotāpattiyaṅga’’nti? ‘‘Sappurisasaṃsevo hi, bhante, sotāpattiyaṅgaṃ, saddhammassavanaṃ sotāpattiyaṅgaṃ, yonisomanasikāro sotāpattiyaṅgaṃ, dhammānudhammappaṭipatti sotāpattiyaṅga’’nti. ‘‘Sādhu sādhu, sāriputta! Sappurisasaṃsevo hi, sāriputta, sotāpattiyaṅgaṃ, saddhammassavanaṃ sotāpattiyaṅgaṃ, yonisomanasikāro sotāpattiyaṅgaṃ, dhammānudhammappaṭipatti sotāpattiyaṅgaṃ’’.
‘‘‘ஸோதோ, ஸோதோ’தி ஹித³ங், ஸாரிபுத்த, வுச்சதி. கதமோ நு கோ², ஸாரிபுத்த, ஸோதோ’’தி? ‘‘அயமேவ ஹி, ப⁴ந்தே, அரியோ அட்ட²ங்கி³கோ மக்³கோ³ ஸோதோ, ஸெய்யதி²த³ங் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதீ⁴’’தி. ‘‘ஸாது⁴ ஸாது⁴, ஸாரிபுத்த! அயமேவ ஹி, ஸாரிபுத்த, அரியோ அட்ட²ங்கி³கோ மக்³கோ³ ஸோதோ, ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴’’.
‘‘‘Soto, soto’ti hidaṃ, sāriputta, vuccati. Katamo nu kho, sāriputta, soto’’ti? ‘‘Ayameva hi, bhante, ariyo aṭṭhaṅgiko maggo soto, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhī’’ti. ‘‘Sādhu sādhu, sāriputta! Ayameva hi, sāriputta, ariyo aṭṭhaṅgiko maggo soto, seyyathidaṃ – sammādiṭṭhi…pe… sammāsamādhi’’.
‘‘‘ஸோதாபன்னோ , ஸோதாபன்னோ’தி ஹித³ங், ஸாரிபுத்த, வுச்சதி. கதமோ நு கோ², ஸாரிபுத்த, ஸோதாபன்னோ’’தி ? ‘‘யோ ஹி, ப⁴ந்தே, இமினா அரியேன அட்ட²ங்கி³கேன மக்³கே³ன ஸமன்னாக³தோ அயங் வுச்சதி ஸோதாபன்னோ, ஸ்வாயங் ஆயஸ்மா ஏவங்னாமோ ஏவங்கொ³த்தோ’’தி. ‘‘ஸாது⁴ ஸாது⁴, ஸாரிபுத்த! யோ ஹி, ஸாரிபுத்த, இமினா அரியேன அட்ட²ங்கி³கேன மக்³கே³ன ஸமன்னாக³தோ அயங் வுச்சதி ஸோதாபன்னோ, ஸ்வாயங் ஆயஸ்மா ஏவங்னாமோ ஏவங்கொ³த்தோ’’தி. பஞ்சமங்.
‘‘‘Sotāpanno , sotāpanno’ti hidaṃ, sāriputta, vuccati. Katamo nu kho, sāriputta, sotāpanno’’ti ? ‘‘Yo hi, bhante, iminā ariyena aṭṭhaṅgikena maggena samannāgato ayaṃ vuccati sotāpanno, svāyaṃ āyasmā evaṃnāmo evaṃgotto’’ti. ‘‘Sādhu sādhu, sāriputta! Yo hi, sāriputta, iminā ariyena aṭṭhaṅgikena maggena samannāgato ayaṃ vuccati sotāpanno, svāyaṃ āyasmā evaṃnāmo evaṃgotto’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 4-5. பட²மஸாரிபுத்தஸுத்தாதி³வண்ணனா • 4-5. Paṭhamasāriputtasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4-5. பட²மஸாரிபுத்தஸுத்தாதி³வண்ணனா • 4-5. Paṭhamasāriputtasuttādivaṇṇanā
