| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༥. དུཏིཡསཱརིཔུཏྟསུཏྟཾ
5. Dutiyasāriputtasuttaṃ
༡༠༠༡. ཨཐ ཁོ ཨཱཡསྨཱ སཱརིཔུཏྟོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ སཱརིཔུཏྟཾ བྷགཝཱ ཨེཏདཝོཙ – ‘‘‘སོཏཱཔཏྟིཡངྒཾ, སོཏཱཔཏྟིཡངྒ’ནྟི ཧིདཾ, སཱརིཔུཏྟ, ཝུཙྩཏི། ཀཏམཾ ནུ ཁོ སཱརིཔུཏྟ, སོཏཱཔཏྟིཡངྒ’’ནྟི? ‘‘སཔྤུརིསསཾསེཝོ ཧི, བྷནྟེ, སོཏཱཔཏྟིཡངྒཾ, སདྡྷམྨསྶཝནཾ སོཏཱཔཏྟིཡངྒཾ, ཡོནིསོམནསིཀཱརོ སོཏཱཔཏྟིཡངྒཾ, དྷམྨཱནུདྷམྨཔྤཊིཔཏྟི སོཏཱཔཏྟིཡངྒ’’ནྟི། ‘‘སཱདྷུ སཱདྷུ, སཱརིཔུཏྟ! སཔྤུརིསསཾསེཝོ ཧི, སཱརིཔུཏྟ, སོཏཱཔཏྟིཡངྒཾ, སདྡྷམྨསྶཝནཾ སོཏཱཔཏྟིཡངྒཾ, ཡོནིསོམནསིཀཱརོ སོཏཱཔཏྟིཡངྒཾ, དྷམྨཱནུདྷམྨཔྤཊིཔཏྟི སོཏཱཔཏྟིཡངྒཾ’’།
1001. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ sāriputtaṃ bhagavā etadavoca – ‘‘‘sotāpattiyaṅgaṃ, sotāpattiyaṅga’nti hidaṃ, sāriputta, vuccati. Katamaṃ nu kho sāriputta, sotāpattiyaṅga’’nti? ‘‘Sappurisasaṃsevo hi, bhante, sotāpattiyaṅgaṃ, saddhammassavanaṃ sotāpattiyaṅgaṃ, yonisomanasikāro sotāpattiyaṅgaṃ, dhammānudhammappaṭipatti sotāpattiyaṅga’’nti. ‘‘Sādhu sādhu, sāriputta! Sappurisasaṃsevo hi, sāriputta, sotāpattiyaṅgaṃ, saddhammassavanaṃ sotāpattiyaṅgaṃ, yonisomanasikāro sotāpattiyaṅgaṃ, dhammānudhammappaṭipatti sotāpattiyaṅgaṃ’’.
‘‘‘སོཏོ, སོཏོ’ཏི ཧིདཾ, སཱརིཔུཏྟ, ཝུཙྩཏི། ཀཏམོ ནུ ཁོ, སཱརིཔུཏྟ, སོཏོ’’ཏི? ‘‘ཨཡམེཝ ཧི, བྷནྟེ, ཨརིཡོ ཨཊྛངྒིཀོ མགྒོ སོཏོ, སེཡྻཐིདཾ – སམྨཱདིཊྛི, སམྨཱསངྐཔྤོ, སམྨཱཝཱཙཱ, སམྨཱཀམྨནྟོ, སམྨཱཨཱཛཱིཝོ, སམྨཱཝཱཡཱམོ, སམྨཱསཏི, སམྨཱསམཱདྷཱི’’ཏི། ‘‘སཱདྷུ སཱདྷུ, སཱརིཔུཏྟ! ཨཡམེཝ ཧི, སཱརིཔུཏྟ, ཨརིཡོ ཨཊྛངྒིཀོ མགྒོ སོཏོ, སེཡྻཐིདཾ – སམྨཱདིཊྛི…པེ॰… སམྨཱསམཱདྷི’’།
‘‘‘Soto, soto’ti hidaṃ, sāriputta, vuccati. Katamo nu kho, sāriputta, soto’’ti? ‘‘Ayameva hi, bhante, ariyo aṭṭhaṅgiko maggo soto, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhī’’ti. ‘‘Sādhu sādhu, sāriputta! Ayameva hi, sāriputta, ariyo aṭṭhaṅgiko maggo soto, seyyathidaṃ – sammādiṭṭhi…pe… sammāsamādhi’’.
‘‘‘སོཏཱཔནྣོ , སོཏཱཔནྣོ’ཏི ཧིདཾ, སཱརིཔུཏྟ, ཝུཙྩཏི། ཀཏམོ ནུ ཁོ, སཱརིཔུཏྟ, སོཏཱཔནྣོ’’ཏི ? ‘‘ཡོ ཧི, བྷནྟེ, ཨིམིནཱ ཨརིཡེན ཨཊྛངྒིཀེན མགྒེན སམནྣཱགཏོ ཨཡཾ ཝུཙྩཏི སོཏཱཔནྣོ, སྭཱཡཾ ཨཱཡསྨཱ ཨེཝཾནཱམོ ཨེཝཾགོཏྟོ’’ཏི། ‘‘སཱདྷུ སཱདྷུ, སཱརིཔུཏྟ! ཡོ ཧི, སཱརིཔུཏྟ, ཨིམིནཱ ཨརིཡེན ཨཊྛངྒིཀེན མགྒེན སམནྣཱགཏོ ཨཡཾ ཝུཙྩཏི སོཏཱཔནྣོ, སྭཱཡཾ ཨཱཡསྨཱ ཨེཝཾནཱམོ ཨེཝཾགོཏྟོ’’ཏི། པཉྩམཾ།
‘‘‘Sotāpanno , sotāpanno’ti hidaṃ, sāriputta, vuccati. Katamo nu kho, sāriputta, sotāpanno’’ti ? ‘‘Yo hi, bhante, iminā ariyena aṭṭhaṅgikena maggena samannāgato ayaṃ vuccati sotāpanno, svāyaṃ āyasmā evaṃnāmo evaṃgotto’’ti. ‘‘Sādhu sādhu, sāriputta! Yo hi, sāriputta, iminā ariyena aṭṭhaṅgikena maggena samannāgato ayaṃ vuccati sotāpanno, svāyaṃ āyasmā evaṃnāmo evaṃgotto’’ti. Pañcamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༤-༥. པཋམསཱརིཔུཏྟསུཏྟཱདིཝཎྞནཱ • 4-5. Paṭhamasāriputtasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༤-༥. པཋམསཱརིཔུཏྟསུཏྟཱདིཝཎྞནཱ • 4-5. Paṭhamasāriputtasuttādivaṇṇanā
