| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
४-६. दुतियसत्तकसुत्तादिवण्णना
4-6. Dutiyasattakasuttādivaṇṇanā
२४-२६. चतुत्थे करोन्तोयेवाति यथावुत्तं तिरच्छानकथं कथेन्तोयेव। अतिरच्छानकथाभावेपि तस्स तत्थ तप्परभावदस्सनत्थं अवधारणवचनं। परियन्तकारीति सपरियन्तं कत्वा वत्ता। ‘‘परियन्तवतिं वाचं भासिता’’ति (दी॰ नि॰ १.९, १९४) हि वुत्तं। अप्पभस्सोवाति परिमितकथोयेव एकन्तेन कथेतब्बस्सेव कथनतो। समापत्तिसमापज्जनं अरियो तुण्हीभावो। निद्दायतियेवाति निद्दोक्कमने अनादीनवदस्सी निद्दायतियेव, इरियापथपरिवत्तनादिना न नं विनोदेति। एवं संसट्ठोवाति वुत्तनयेन गणसङ्गणिकाय संसट्ठो एव विहरति। दुस्सीला पापिच्छा नामाति सयं निस्सीला असन्तगुणसम्भावनिच्छाय समन्नागतत्ता पापा लामका इच्छा एतेसन्ति पापिच्छा। पापपुग्गलेहि मित्तिकरणतो पापमित्ता। तेहि सदा सहपवत्तनेन पापसहाया। तत्थ निन्नतादिना तदधिमुत्तताय पापसम्पवङ्का। पञ्चमादीनि उत्तानत्थानियेव।
24-26. Catutthe karontoyevāti yathāvuttaṃ tiracchānakathaṃ kathentoyeva. Atiracchānakathābhāvepi tassa tattha tapparabhāvadassanatthaṃ avadhāraṇavacanaṃ. Pariyantakārīti sapariyantaṃ katvā vattā. ‘‘Pariyantavatiṃ vācaṃ bhāsitā’’ti (dī. ni. 1.9, 194) hi vuttaṃ. Appabhassovāti parimitakathoyeva ekantena kathetabbasseva kathanato. Samāpattisamāpajjanaṃ ariyo tuṇhībhāvo. Niddāyatiyevāti niddokkamane anādīnavadassī niddāyatiyeva, iriyāpathaparivattanādinā na naṃ vinodeti. Evaṃ saṃsaṭṭhovāti vuttanayena gaṇasaṅgaṇikāya saṃsaṭṭho eva viharati. Dussīlā pāpicchā nāmāti sayaṃ nissīlā asantaguṇasambhāvanicchāya samannāgatattā pāpā lāmakā icchā etesanti pāpicchā. Pāpapuggalehi mittikaraṇato pāpamittā. Tehi sadā sahapavattanena pāpasahāyā. Tattha ninnatādinā tadadhimuttatāya pāpasampavaṅkā. Pañcamādīni uttānatthāniyeva.
दुतियसत्तकसुत्तादिवण्णना निट्ठिता।
Dutiyasattakasuttādivaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
४. दुतियसत्तकसुत्तं • 4. Dutiyasattakasuttaṃ
५. ततियसत्तकसुत्तं • 5. Tatiyasattakasuttaṃ
६. बोज्झङ्गसुत्तं • 6. Bojjhaṅgasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / ४. दुतियसत्तकसुत्तवण्णना • 4. Dutiyasattakasuttavaṇṇanā
