| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༤. དུཏིཡསཏྟཀསུཏྟཾ
4. Dutiyasattakasuttaṃ
༢༤. 1 ‘‘སཏྟ ཝོ, བྷིཀྑཝེ, ཨཔརིཧཱནིཡེ དྷམྨེ དེསེསྶཱམི། ཏཾ སུཎཱཐ, སཱདྷུཀཾ མནསི ཀརོཐ…པེ॰… ཀཏམེ ཙ, བྷིཀྑཝེ, སཏྟ ཨཔརིཧཱནིཡཱ དྷམྨཱ?
24.2 ‘‘Satta vo, bhikkhave, aparihāniye dhamme desessāmi. Taṃ suṇātha, sādhukaṃ manasi karotha…pe… katame ca, bhikkhave, satta aparihāniyā dhammā?
ཡཱཝཀཱིཝཉྩ, བྷིཀྑཝེ, བྷིཀྑཱུ ན ཀམྨཱརཱམཱ བྷཝིསྶནྟི, ན ཀམྨརཏཱ, ན ཀམྨཱརཱམཏཾ ཨནུཡུཏྟཱ; ཝུདྡྷིཡེཝ, བྷིཀྑཝེ, བྷིཀྑཱུནཾ པཱཊིཀངྑཱ, ནོ པརིཧཱནི།
Yāvakīvañca, bhikkhave, bhikkhū na kammārāmā bhavissanti, na kammaratā, na kammārāmataṃ anuyuttā; vuddhiyeva, bhikkhave, bhikkhūnaṃ pāṭikaṅkhā, no parihāni.
‘‘ཡཱཝཀཱིཝཉྩ, བྷིཀྑཝེ, བྷིཀྑཱུ ན བྷསྶཱརཱམཱ བྷཝིསྶནྟི…པེ॰… ན ནིདྡཱརཱམཱ བྷཝིསྶནྟི… ན སངྒཎིཀཱརཱམཱ བྷཝིསྶནྟི… ན པཱཔིཙྪཱ བྷཝིསྶནྟི ན པཱཔིཀཱནཾ ཨིཙྪཱནཾ ཝསཾ གཏཱ… ན པཱཔམིཏྟཱ བྷཝིསྶནྟི ན པཱཔསཧཱཡཱ ན པཱཔསམྤཝངྐཱ… ན ཨོརམཏྟཀེན ཝིསེསཱདྷིགམེན ཨནྟརཱཝོསཱནཾ ཨཱཔཛྫིསྶནྟི; ཝུདྡྷིཡེཝ, བྷིཀྑཝེ, བྷིཀྑཱུནཾ པཱཊིཀངྑཱ, ནོ པརིཧཱནི།
‘‘Yāvakīvañca, bhikkhave, bhikkhū na bhassārāmā bhavissanti…pe… na niddārāmā bhavissanti… na saṅgaṇikārāmā bhavissanti… na pāpicchā bhavissanti na pāpikānaṃ icchānaṃ vasaṃ gatā… na pāpamittā bhavissanti na pāpasahāyā na pāpasampavaṅkā… na oramattakena visesādhigamena antarāvosānaṃ āpajjissanti; vuddhiyeva, bhikkhave, bhikkhūnaṃ pāṭikaṅkhā, no parihāni.
‘‘ཡཱཝཀཱིཝཉྩ, བྷིཀྑཝེ, ཨིམེ སཏྟ ཨཔརིཧཱནིཡཱ དྷམྨཱ བྷིཀྑཱུསུ ཋསྶནྟི, ཨིམེསུ ཙ སཏྟསུ ཨཔརིཧཱནིཡེསུ དྷམྨེསུ བྷིཀྑཱུ སནྡིསྶིསྶནྟི; ཝུདྡྷིཡེཝ, བྷིཀྑཝེ, བྷིཀྑཱུནཾ པཱཊིཀངྑཱ, ནོ པརིཧཱནཱི’’ཏི། ཙཏུཏྠཾ།
‘‘Yāvakīvañca, bhikkhave, ime satta aparihāniyā dhammā bhikkhūsu ṭhassanti, imesu ca sattasu aparihāniyesu dhammesu bhikkhū sandississanti; vuddhiyeva, bhikkhave, bhikkhūnaṃ pāṭikaṅkhā, no parihānī’’ti. Catutthaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. དུཏིཡསཏྟཀསུཏྟཝཎྞནཱ • 4. Dutiyasattakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤-༦. དུཏིཡསཏྟཀསུཏྟཱདིཝཎྞནཱ • 4-6. Dutiyasattakasuttādivaṇṇanā
