| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
4. து³தியஸத்தகஸுத்தவண்ணனா
4. Dutiyasattakasuttavaṇṇanā
24. சதுத்தே² ந கம்மாராமாதி யே தி³வஸங் சீவரகம்ம-காயப³ந்த⁴னபரிஸ்ஸாவன-த⁴ம்மகரண-ஸம்மஜ்ஜனி-பாத³கட²லிகாதீ³னேவ கரொந்தி, தே ஸந்தா⁴யேஸ படிக்கே²போ. யோ பன தேஸங் கரணவேலாய ஏவங் ஏதானி கரோதி, உத்³தே³ஸவேலாய உத்³தே³ஸங் க³ண்ஹாதி, ஸஜ்ஜா²யவேலாய ஸஜ்ஜா²யதி, சேதியங்க³ணவத்தவேலாய சேதியங்க³ணவத்தங் கரோதி, மனஸிகாரவேலாய மனஸிகாரங் கரோதி, ந ஸோ கம்மாராமோ நாம.
24. Catutthe na kammārāmāti ye divasaṃ cīvarakamma-kāyabandhanaparissāvana-dhammakaraṇa-sammajjani-pādakaṭhalikādīneva karonti, te sandhāyesa paṭikkhepo. Yo pana tesaṃ karaṇavelāya evaṃ etāni karoti, uddesavelāya uddesaṃ gaṇhāti, sajjhāyavelāya sajjhāyati, cetiyaṅgaṇavattavelāya cetiyaṅgaṇavattaṃ karoti, manasikāravelāya manasikāraṃ karoti, na so kammārāmo nāma.
யோ இத்தி²வண்ணபுரிஸவண்ணாதி³வஸேன ஆலாபஸல்லாபங் கரொந்தோயேவ ரத்திந்தி³வங் வீதினாமேதி, ஏவரூபே ப⁴ஸ்ஸே பரியந்தகாரீ ந ஹோதி, அயங் ப⁴ஸ்ஸாராமோ நாம. யோ பன ரத்திந்தி³வங் த⁴ம்மங் கதே²தி, பஞ்ஹங் விஸ்ஸஜ்ஜேதி, அயங் அப்பப⁴ஸ்ஸோவ ப⁴ஸ்ஸே பரியந்தகாரீயேவ. கஸ்மா? ‘‘ஸன்னிபதிதானங் வோ, பி⁴க்க²வே, த்³வயங் கரணீயங் த⁴ம்மீ வா கதா² அரியோ வா துண்ஹீபா⁴வோ’’தி (ம॰ நி॰ 1.273) வுத்தத்தா.
Yo itthivaṇṇapurisavaṇṇādivasena ālāpasallāpaṃ karontoyeva rattindivaṃ vītināmeti, evarūpe bhasse pariyantakārī na hoti, ayaṃ bhassārāmo nāma. Yo pana rattindivaṃ dhammaṃ katheti, pañhaṃ vissajjeti, ayaṃ appabhassova bhasse pariyantakārīyeva. Kasmā? ‘‘Sannipatitānaṃ vo, bhikkhave, dvayaṃ karaṇīyaṃ dhammī vā kathā ariyo vā tuṇhībhāvo’’ti (ma. ni. 1.273) vuttattā.
யோ டி²தோபி க³ச்ச²ந்தோபி நிஸின்னோபி தி²னமித்³தா⁴பி⁴பூ⁴தோ நித்³தா³யதியேவ, அயங் நித்³தா³ராமோ நாம. யஸ்ஸ பன கரஜகாயகே³லஞ்ஞேன சித்தங் ப⁴வங்க³ங் ஓதரதி, நாயங் நித்³தா³ராமோ. தேனேவாஹ – ‘‘அபி⁴ஜானாமஹங், அக்³கி³வெஸ்ஸன , கி³ம்ஹானங் பச்சி²மே மாஸே பச்சா²ப⁴த்தங் பிண்ட³பாதப்படிக்கந்தோ சதுக்³கு³ணங் ஸங்கா⁴டிங் பஞ்ஞபெத்வா த³க்கி²ணேன பஸ்ஸேன ஸதோ ஸம்பஜானோ நித்³த³ங் ஓக்கமிதா’’தி (ம॰ நி॰ 1.387).
Yo ṭhitopi gacchantopi nisinnopi thinamiddhābhibhūto niddāyatiyeva, ayaṃ niddārāmo nāma. Yassa pana karajakāyagelaññena cittaṃ bhavaṅgaṃ otarati, nāyaṃ niddārāmo. Tenevāha – ‘‘abhijānāmahaṃ, aggivessana , gimhānaṃ pacchime māse pacchābhattaṃ piṇḍapātappaṭikkanto catugguṇaṃ saṅghāṭiṃ paññapetvā dakkhiṇena passena sato sampajāno niddaṃ okkamitā’’ti (ma. ni. 1.387).
யோ ‘‘ஏகஸ்ஸ து³தியோ, த்³வின்னங் ததியோ, திண்ணங் சதுத்தோ²’’தி ஏவங் ஸங்ஸட்டோ²வ விஹரதி, ஏககோ அஸ்ஸாத³ங் ந லப⁴தி, அயங் ஸங்க³ணிகாராமோ. யோ பன சதூஸு இரியாபதே²ஸு ஏககோவ அஸ்ஸாத³ங் லப⁴தி, நாயங் ஸங்க³ணிகாராமோ.
Yo ‘‘ekassa dutiyo, dvinnaṃ tatiyo, tiṇṇaṃ catuttho’’ti evaṃ saṃsaṭṭhova viharati, ekako assādaṃ na labhati, ayaṃ saṅgaṇikārāmo. Yo pana catūsu iriyāpathesu ekakova assādaṃ labhati, nāyaṃ saṅgaṇikārāmo.
அஸந்தஸம்பா⁴வனிச்சா²ய ஸமன்னாக³தா து³ஸ்ஸீலா பாபிச்சா² நாம. யேஸங் பாபகா மித்தா சதூஸு இரியாபதே²ஸு ஸஹ அயனதோ பாபஸஹாயா, யே ச தன்னின்னதப்போணதப்பப்³பா⁴ரதாய பாபேஸு ஸம்பவங்கா, தே பாபமித்தா பாபஸஹாயா பாபஸம்பவங்கா நாம.
Asantasambhāvanicchāya samannāgatā dussīlā pāpicchā nāma. Yesaṃ pāpakā mittā catūsu iriyāpathesu saha ayanato pāpasahāyā, ye ca tanninnatappoṇatappabbhāratāya pāpesu sampavaṅkā, te pāpamittā pāpasahāyā pāpasampavaṅkā nāma.
ஓரமத்தகேனாதி அவரமத்தகேன அப்பமத்தகேன. அந்தராதி அரஹத்தங் அப்பத்வாவ எத்த²ந்தரே. வோஸானந்தி பரினிட்டி²தபா⁴வங் ‘‘அலமெத்தாவதா’’தி ஓஸக்கனங். இத³ங் வுத்தங் ஹோதி – யாவ ஸீலபாரிஸுத்³தி⁴ஜ்ஜா²னவிபஸ்ஸனா ஸோதாபன்னபா⁴வாதீ³னங் அஞ்ஞதரமத்தகேன வோஸானங் நாபஜ்ஜிஸ்ஸந்தி, தாவ வுத்³தி⁴யேவ பி⁴க்கூ²னங் பாடிகங்கா², நோ பரிஹானீதி.
Oramattakenāti avaramattakena appamattakena. Antarāti arahattaṃ appatvāva etthantare. Vosānanti pariniṭṭhitabhāvaṃ ‘‘alamettāvatā’’ti osakkanaṃ. Idaṃ vuttaṃ hoti – yāva sīlapārisuddhijjhānavipassanā sotāpannabhāvādīnaṃ aññataramattakena vosānaṃ nāpajjissanti, tāva vuddhiyeva bhikkhūnaṃ pāṭikaṅkhā, no parihānīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. து³தியஸத்தகஸுத்தங் • 4. Dutiyasattakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 4-6. து³தியஸத்தகஸுத்தாதி³வண்ணனா • 4-6. Dutiyasattakasuttādivaṇṇanā
