| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. දුතියසත්‌තකසුත්‌තවණ්‌ණනා
4. Dutiyasattakasuttavaṇṇanā
24. චතුත්‌ථෙ න කම්‌මාරාමාති යෙ දිවසං චීවරකම්‌ම-කායබන්‌ධනපරිස්‌සාවන-ධම්‌මකරණ-සම්‌මජ්‌ජනි-පාදකඨලිකාදීනෙව කරොන්‌ති, තෙ සන්‌ධායෙස පටික්‌ඛෙපො. යො පන තෙසං කරණවෙලාය එවං එතානි කරොති, උද්‌දෙසවෙලාය උද්‌දෙසං ගණ්‌හාති, සජ්‌ඣායවෙලාය සජ්‌ඣායති, චෙතියඞ්‌ගණවත්‌තවෙලාය චෙතියඞ්‌ගණවත්‌තං කරොති, මනසිකාරවෙලාය මනසිකාරං කරොති, න සො කම්‌මාරාමො නාම.
24. Catutthe na kammārāmāti ye divasaṃ cīvarakamma-kāyabandhanaparissāvana-dhammakaraṇa-sammajjani-pādakaṭhalikādīneva karonti, te sandhāyesa paṭikkhepo. Yo pana tesaṃ karaṇavelāya evaṃ etāni karoti, uddesavelāya uddesaṃ gaṇhāti, sajjhāyavelāya sajjhāyati, cetiyaṅgaṇavattavelāya cetiyaṅgaṇavattaṃ karoti, manasikāravelāya manasikāraṃ karoti, na so kammārāmo nāma.
යො ඉත්‌ථිවණ්‌ණපුරිසවණ්‌ණාදිවසෙන ආලාපසල්‌ලාපං කරොන්‌තොයෙව රත්‌තින්‌දිවං වීතිනාමෙති, එවරූපෙ භස්‌සෙ පරියන්‌තකාරී න හොති, අයං භස්‌සාරාමො නාම. යො පන රත්‌තින්‌දිවං ධම්‌මං කථෙති, පඤ්‌හං විස්‌සජ්‌ජෙති, අයං අප්‌පභස්‌සොව භස්‌සෙ පරියන්‌තකාරීයෙව. කස්‌මා? ‘‘සන්‌නිපතිතානං වො, භික්‌ඛවෙ, ද්‌වයං කරණීයං ධම්‌මී වා කථා අරියො වා තුණ්‌හීභාවො’’ති (ම. නි. 1.273) වුත්‌තත්‌තා.
Yo itthivaṇṇapurisavaṇṇādivasena ālāpasallāpaṃ karontoyeva rattindivaṃ vītināmeti, evarūpe bhasse pariyantakārī na hoti, ayaṃ bhassārāmo nāma. Yo pana rattindivaṃ dhammaṃ katheti, pañhaṃ vissajjeti, ayaṃ appabhassova bhasse pariyantakārīyeva. Kasmā? ‘‘Sannipatitānaṃ vo, bhikkhave, dvayaṃ karaṇīyaṃ dhammī vā kathā ariyo vā tuṇhībhāvo’’ti (ma. ni. 1.273) vuttattā.
යො ඨිතොපි ගච්‌ඡන්‌තොපි නිසින්‌නොපි ථිනමිද්‌ධාභිභූතො නිද්‌දායතියෙව, අයං නිද්‌දාරාමො නාම. යස්‌ස පන කරජකායගෙලඤ්‌ඤෙන චිත්‌තං භවඞ්‌ගං ඔතරති, නායං නිද්‌දාරාමො. තෙනෙවාහ – ‘‘අභිජානාමහං, අග්‌ගිවෙස්‌සන , ගිම්‌හානං පච්‌ඡිමෙ මාසෙ පච්‌ඡාභත්‌තං පිණ්‌ඩපාතප්‌පටික්‌කන්‌තො චතුග්‌ගුණං සඞ්‌ඝාටිං පඤ්‌ඤපෙත්‌වා දක්‌ඛිණෙන පස්‌සෙන සතො සම්‌පජානො නිද්‌දං ඔක්‌කමිතා’’ති (ම. නි. 1.387).
Yo ṭhitopi gacchantopi nisinnopi thinamiddhābhibhūto niddāyatiyeva, ayaṃ niddārāmo nāma. Yassa pana karajakāyagelaññena cittaṃ bhavaṅgaṃ otarati, nāyaṃ niddārāmo. Tenevāha – ‘‘abhijānāmahaṃ, aggivessana , gimhānaṃ pacchime māse pacchābhattaṃ piṇḍapātappaṭikkanto catugguṇaṃ saṅghāṭiṃ paññapetvā dakkhiṇena passena sato sampajāno niddaṃ okkamitā’’ti (ma. ni. 1.387).
යො ‘‘එකස්‌ස දුතියො, ද්‌වින්‌නං තතියො, තිණ්‌ණං චතුත්‌ථො’’ති එවං සංසට්‌ඨොව විහරති, එකකො අස්‌සාදං න ලභති, අයං සඞ්‌ගණිකාරාමො. යො පන චතූසු ඉරියාපථෙසු එකකොව අස්‌සාදං ලභති, නායං සඞ්‌ගණිකාරාමො.
Yo ‘‘ekassa dutiyo, dvinnaṃ tatiyo, tiṇṇaṃ catuttho’’ti evaṃ saṃsaṭṭhova viharati, ekako assādaṃ na labhati, ayaṃ saṅgaṇikārāmo. Yo pana catūsu iriyāpathesu ekakova assādaṃ labhati, nāyaṃ saṅgaṇikārāmo.
අසන්‌තසම්‌භාවනිච්‌ඡාය සමන්‌නාගතා දුස්‌සීලා පාපිච්‌ඡා නාම. යෙසං පාපකා මිත්‌තා චතූසු ඉරියාපථෙසු සහ අයනතො පාපසහායා, යෙ ච තන්‌නින්‌නතප්‌පොණතප්‌පබ්‌භාරතාය පාපෙසු සම්‌පවඞ්‌කා, තෙ පාපමිත්‌තා පාපසහායා පාපසම්‌පවඞ්‌කා නාම.
Asantasambhāvanicchāya samannāgatā dussīlā pāpicchā nāma. Yesaṃ pāpakā mittā catūsu iriyāpathesu saha ayanato pāpasahāyā, ye ca tanninnatappoṇatappabbhāratāya pāpesu sampavaṅkā, te pāpamittā pāpasahāyā pāpasampavaṅkā nāma.
ඔරමත්‌තකෙනාති අවරමත්‌තකෙන අප්‌පමත්‌තකෙන. අන්‌තරාති අරහත්‌තං අප්‌පත්‌වාව එත්‌ථන්‌තරෙ. වොසානන්‌ති පරිනිට්‌ඨිතභාවං ‘‘අලමෙත්‌තාවතා’’ති ඔසක්‌කනං. ඉදං වුත්‌තං හොති – යාව සීලපාරිසුද්‌ධිජ්‌ඣානවිපස්‌සනා සොතාපන්‌නභාවාදීනං අඤ්‌ඤතරමත්‌තකෙන වොසානං නාපජ්‌ජිස්‌සන්‌ති, තාව වුද්‌ධියෙව භික්‌ඛූනං පාටිකඞ්‌ඛා, නො පරිහානීති.
Oramattakenāti avaramattakena appamattakena. Antarāti arahattaṃ appatvāva etthantare. Vosānanti pariniṭṭhitabhāvaṃ ‘‘alamettāvatā’’ti osakkanaṃ. Idaṃ vuttaṃ hoti – yāva sīlapārisuddhijjhānavipassanā sotāpannabhāvādīnaṃ aññataramattakena vosānaṃ nāpajjissanti, tāva vuddhiyeva bhikkhūnaṃ pāṭikaṅkhā, no parihānīti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 4. දුතියසත්‌තකසුත්‌තං • 4. Dutiyasattakasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-6. දුතියසත්‌තකසුත්‌තාදිවණ්‌ණනා • 4-6. Dutiyasattakasuttādivaṇṇanā
