| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৭. দুতিযসেখসুত্তং
7. Dutiyasekhasuttaṃ
১৭. ৰুত্তঞ্হেতং ভগৰতা, ৰুত্তমরহতাতি মে সুতং –
17. Vuttañhetaṃ bhagavatā, vuttamarahatāti me sutaṃ –
‘‘সেখস্স, ভিক্খৰে, ভিক্খুনো অপ্পত্তমানসস্স অনুত্তরং যোগক্খেমং পত্থযমানস্স ৰিহরতো বাহিরং অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং বহূপকারং যথযিদং, ভিক্খৰে, কল্যাণমিত্ততা। কল্যাণমিত্তো, ভিক্খৰে, ভিক্খু অকুসলং পজহতি, কুসলং ভাৰেতী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Sekhassa, bhikkhave, bhikkhuno appattamānasassa anuttaraṃ yogakkhemaṃ patthayamānassa viharato bāhiraṃ aṅganti karitvā nāññaṃ ekaṅgampi samanupassāmi yaṃ evaṃ bahūpakāraṃ yathayidaṃ, bhikkhave, kalyāṇamittatā. Kalyāṇamitto, bhikkhave, bhikkhu akusalaṃ pajahati, kusalaṃ bhāvetī’’ti. Etamatthaṃ bhagavā avoca. Tatthetaṃ iti vuccati –
‘‘কল্যাণমিত্তো যো ভিক্খু, সপ্পতিস্সো সগারৰো।
‘‘Kalyāṇamitto yo bhikkhu, sappatisso sagāravo;
করং মিত্তানং ৰচনং, সম্পজানো পতিস্সতো।
Karaṃ mittānaṃ vacanaṃ, sampajāno patissato;
পাপুণে অনুপুব্বেন, সব্বসংযোজনক্খয’’ন্তি॥
Pāpuṇe anupubbena, sabbasaṃyojanakkhaya’’nti.
অযম্পি অত্থো ৰুত্তো ভগৰতা, ইতি মে সুতন্তি। সত্তমং।
Ayampi attho vutto bhagavatā, iti me sutanti. Sattamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৭. দুতিযসেখসুত্তৰণ্ণনা • 7. Dutiyasekhasuttavaṇṇanā
