| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
10. து³தியஸேக²ஸுத்தவண்ணனா
10. Dutiyasekhasuttavaṇṇanā
90. த³ஸமே அதிபாதோவாதி ஸப்³ப³ரத்திங் நித்³தா³யித்வா ப³லவபச்சூஸே கோடிஸம்முஞ்ஜனியா தோ²கங் ஸம்மஜ்ஜித்வா முக²ங் தோ⁴வித்வா யாகு³பி⁴க்க²த்தா²ய பாதோவ பவிஸதி. தங் அதிக்கமித்வாதி கி³ஹிஸங்ஸக்³க³வஸேன காலங் வீதினாமெந்தோ மஜ்ஜ²ன்ஹிகஸமயங் அதிக்கமித்வா பக்கமதி. பாதோயேவ ஹி கா³மங் பவிஸித்வா யாகு³ங் ஆதா³ய ஆஸனஸாலங் க³ந்த்வா பிவித்வா ஏகஸ்மிங் டா²னே நிபன்னோ நித்³தா³யித்வா மனுஸ்ஸானங் போ⁴ஜனவேலாய ‘‘பணீதபி⁴க்க²ங் லபி⁴ஸ்ஸாமீ’’தி உபகட்டே² மஜ்ஜ²ன்ஹிகே உட்டா²ய த⁴ம்மகரணேன உத³கங் க³ஹெத்வா அக்கீ²னி புஞ்சி²த்வா பிண்டா³ய சரித்வா யாவத³த்த²ங் பு⁴ஞ்ஜித்வா கி³ஹிஸங்ஸட்டோ² காலங் வீதினாமெத்வா மஜ்ஜ²ன்ஹே வீதிவத்தே படிக்கமதி.
90. Dasame atipātovāti sabbarattiṃ niddāyitvā balavapaccūse koṭisammuñjaniyā thokaṃ sammajjitvā mukhaṃ dhovitvā yāgubhikkhatthāya pātova pavisati. Taṃ atikkamitvāti gihisaṃsaggavasena kālaṃ vītināmento majjhanhikasamayaṃ atikkamitvā pakkamati. Pātoyeva hi gāmaṃ pavisitvā yāguṃ ādāya āsanasālaṃ gantvā pivitvā ekasmiṃ ṭhāne nipanno niddāyitvā manussānaṃ bhojanavelāya ‘‘paṇītabhikkhaṃ labhissāmī’’ti upakaṭṭhe majjhanhike uṭṭhāya dhammakaraṇena udakaṃ gahetvā akkhīni puñchitvā piṇḍāya caritvā yāvadatthaṃ bhuñjitvā gihisaṃsaṭṭho kālaṃ vītināmetvā majjhanhe vītivatte paṭikkamati.
அப்பிச்ச²கதா²தி, ‘‘ஆவுஸோ, அத்ரிச்ச²தா பாபிச்ச²தாதி இமே த⁴ம்மா பஹாதப்³பா³’’தி தேஸு ஆதீ³னவங் த³ஸ்ஸெத்வா ‘‘ஏவரூபங் அப்பிச்ச²தங் ஸமாதா³ய வத்திதப்³ப³’’ந்திஆதி³னயப்பவத்தா கதா². தீஹி விவேகேஹீதி காயவிவேகோ, சித்தவிவேகோ, உபதி⁴விவேகோதி இமேஹி தீஹி விவேகேஹி. தத்த² ஏகோ க³ச்ச²தி, ஏகோ திட்ட²தி, ஏகோ நிஸீத³தி, ஏகோ ஸெய்யங் கப்பேதி, ஏகோ கா³மங் பிண்டா³ய பவிஸதி, ஏகோ படிக்கமதி, ஏகோ சங்கமங் அதி⁴ட்டா²தி, ஏகோ சரதி, ஏகோ விஹரதீதி அயங் காயவிவேகோ நாம. அட்ட² ஸமாபத்தியோ பன சித்தவிவேகோ நாம. நிப்³பா³னங் உபதி⁴விவேகோ நாம. வுத்தம்பி ஹேதங் – ‘‘காயவிவேகோ ச விவேகட்ட²காயானங் நெக்க²ம்மாபி⁴ரதானங், சித்தவிவேகோ ச பரிஸுத்³த⁴சித்தானங் பரமவோதா³னப்பத்தானங், உபதி⁴விவேகோ ச நிருபதீ⁴னங் புக்³க³லானங் விஸங்கா²ரக³தான’’ந்தி (மஹானி॰ 57). து³வித⁴ங் வீரியந்தி காயிகங், சேதஸிகஞ்ச வீரியங். ஸீலந்தி சதுபாரிஸுத்³தி⁴ஸீலங். ஸமாதி⁴ந்தி விபஸ்ஸனாபாத³கா அட்ட² ஸமாபத்தியோ. விமுத்திகதா²தி வா அரியப²லங் ஆரப்³ப⁴ பவத்தா கதா². ஸேஸங் உத்தானமேவ.
Appicchakathāti, ‘‘āvuso, atricchatā pāpicchatāti ime dhammā pahātabbā’’ti tesu ādīnavaṃ dassetvā ‘‘evarūpaṃ appicchataṃ samādāya vattitabba’’ntiādinayappavattā kathā. Tīhi vivekehīti kāyaviveko, cittaviveko, upadhivivekoti imehi tīhi vivekehi. Tattha eko gacchati, eko tiṭṭhati, eko nisīdati, eko seyyaṃ kappeti, eko gāmaṃ piṇḍāya pavisati, eko paṭikkamati, eko caṅkamaṃ adhiṭṭhāti, eko carati, eko viharatīti ayaṃ kāyaviveko nāma. Aṭṭha samāpattiyo pana cittaviveko nāma. Nibbānaṃ upadhiviveko nāma. Vuttampi hetaṃ – ‘‘kāyaviveko ca vivekaṭṭhakāyānaṃ nekkhammābhiratānaṃ, cittaviveko ca parisuddhacittānaṃ paramavodānappattānaṃ, upadhiviveko ca nirupadhīnaṃ puggalānaṃ visaṅkhāragatāna’’nti (mahāni. 57). Duvidhaṃ vīriyanti kāyikaṃ, cetasikañca vīriyaṃ. Sīlanti catupārisuddhisīlaṃ. Samādhinti vipassanāpādakā aṭṭha samāpattiyo. Vimuttikathāti vā ariyaphalaṃ ārabbha pavattā kathā. Sesaṃ uttānameva.
து³தியஸேக²ஸுத்தவண்ணனா நிட்டி²தா.
Dutiyasekhasuttavaṇṇanā niṭṭhitā.
தே²ரவக்³க³வண்ணனா நிட்டி²தா.
Theravaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. து³தியஸேக²ஸுத்தங் • 10. Dutiyasekhasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 10. து³தியஸேக²ஸுத்தவண்ணனா • 10. Dutiyasekhasuttavaṇṇanā
