| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༡༠. དུཏིཡསེཁསུཏྟཝཎྞནཱ
10. Dutiyasekhasuttavaṇṇanā
༩༠. དསམེ ཨཏིཔཱཏོཝཱཏི སབྦརཏྟིཾ ནིདྡཱཡིཏྭཱ བལཝཔཙྩཱུསེ ཀོཊིསམྨུཉྫནིཡཱ ཐོཀཾ སམྨཛྫིཏྭཱ མུཁཾ དྷོཝིཏྭཱ ཡཱགུབྷིཀྑཏྠཱཡ པཱཏོཝ པཝིསཏི། ཏཾ ཨཏིཀྐམིཏྭཱཏི གིཧིསཾསགྒཝསེན ཀཱལཾ ཝཱིཏིནཱམེནྟོ མཛ྄ཛྷནྷིཀསམཡཾ ཨཏིཀྐམིཏྭཱ པཀྐམཏི། པཱཏོཡེཝ ཧི གཱམཾ པཝིསིཏྭཱ ཡཱགུཾ ཨཱདཱཡ ཨཱསནསཱལཾ གནྟྭཱ པིཝིཏྭཱ ཨེཀསྨིཾ ཋཱནེ ནིཔནྣོ ནིདྡཱཡིཏྭཱ མནུསྶཱནཾ བྷོཛནཝེལཱཡ ‘‘པཎཱིཏབྷིཀྑཾ ལབྷིསྶཱམཱི’’ཏི ཨུཔཀཊྛེ མཛ྄ཛྷནྷིཀེ ཨུཊྛཱཡ དྷམྨཀརཎེན ཨུདཀཾ གཧེཏྭཱ ཨཀྑཱིནི པུཉྪིཏྭཱ པིཎྜཱཡ ཙརིཏྭཱ ཡཱཝདཏྠཾ བྷུཉྫིཏྭཱ གིཧིསཾསཊྛོ ཀཱལཾ ཝཱིཏིནཱམེཏྭཱ མཛ྄ཛྷནྷེ ཝཱིཏིཝཏྟེ པཊིཀྐམཏི།
90. Dasame atipātovāti sabbarattiṃ niddāyitvā balavapaccūse koṭisammuñjaniyā thokaṃ sammajjitvā mukhaṃ dhovitvā yāgubhikkhatthāya pātova pavisati. Taṃ atikkamitvāti gihisaṃsaggavasena kālaṃ vītināmento majjhanhikasamayaṃ atikkamitvā pakkamati. Pātoyeva hi gāmaṃ pavisitvā yāguṃ ādāya āsanasālaṃ gantvā pivitvā ekasmiṃ ṭhāne nipanno niddāyitvā manussānaṃ bhojanavelāya ‘‘paṇītabhikkhaṃ labhissāmī’’ti upakaṭṭhe majjhanhike uṭṭhāya dhammakaraṇena udakaṃ gahetvā akkhīni puñchitvā piṇḍāya caritvā yāvadatthaṃ bhuñjitvā gihisaṃsaṭṭho kālaṃ vītināmetvā majjhanhe vītivatte paṭikkamati.
ཨཔྤིཙྪཀཐཱཏི, ‘‘ཨཱཝུསོ, ཨཏྲིཙྪཏཱ པཱཔིཙྪཏཱཏི ཨིམེ དྷམྨཱ པཧཱཏབྦཱ’’ཏི ཏེསུ ཨཱདཱིནཝཾ དསྶེཏྭཱ ‘‘ཨེཝརཱུཔཾ ཨཔྤིཙྪཏཾ སམཱདཱཡ ཝཏྟིཏབྦ’’ནྟིཨཱདིནཡཔྤཝཏྟཱ ཀཐཱ། ཏཱིཧི ཝིཝེཀེཧཱིཏི ཀཱཡཝིཝེཀོ, ཙིཏྟཝིཝེཀོ, ཨུཔདྷིཝིཝེཀོཏི ཨིམེཧི ཏཱིཧི ཝིཝེཀེཧི། ཏཏྠ ཨེཀོ གཙྪཏི, ཨེཀོ ཏིཊྛཏི, ཨེཀོ ནིསཱིདཏི, ཨེཀོ སེཡྻཾ ཀཔྤེཏི, ཨེཀོ གཱམཾ པིཎྜཱཡ པཝིསཏི, ཨེཀོ པཊིཀྐམཏི, ཨེཀོ ཙངྐམཾ ཨདྷིཊྛཱཏི, ཨེཀོ ཙརཏི, ཨེཀོ ཝིཧརཏཱིཏི ཨཡཾ ཀཱཡཝིཝེཀོ ནཱམ། ཨཊྛ སམཱཔཏྟིཡོ པན ཙིཏྟཝིཝེཀོ ནཱམ། ནིབྦཱནཾ ཨུཔདྷིཝིཝེཀོ ནཱམ། ཝུཏྟམྤི ཧེཏཾ – ‘‘ཀཱཡཝིཝེཀོ ཙ ཝིཝེཀཊྛཀཱཡཱནཾ ནེཀྑམྨཱབྷིརཏཱནཾ, ཙིཏྟཝིཝེཀོ ཙ པརིསུདྡྷཙིཏྟཱནཾ པརམཝོདཱནཔྤཏྟཱནཾ, ཨུཔདྷིཝིཝེཀོ ཙ ནིརུཔདྷཱིནཾ པུགྒལཱནཾ ཝིསངྑཱརགཏཱན’’ནྟི (མཧཱནི॰ ༥༧)། དུཝིདྷཾ ཝཱིརིཡནྟི ཀཱཡིཀཾ, ཙེཏསིཀཉྩ ཝཱིརིཡཾ། སཱིལནྟི ཙཏུཔཱརིསུདྡྷིསཱིལཾ། སམཱདྷིནྟི ཝིཔསྶནཱཔཱདཀཱ ཨཊྛ སམཱཔཏྟིཡོ། ཝིམུཏྟིཀཐཱཏི ཝཱ ཨརིཡཕལཾ ཨཱརབྦྷ པཝཏྟཱ ཀཐཱ། སེསཾ ཨུཏྟཱནམེཝ།
Appicchakathāti, ‘‘āvuso, atricchatā pāpicchatāti ime dhammā pahātabbā’’ti tesu ādīnavaṃ dassetvā ‘‘evarūpaṃ appicchataṃ samādāya vattitabba’’ntiādinayappavattā kathā. Tīhi vivekehīti kāyaviveko, cittaviveko, upadhivivekoti imehi tīhi vivekehi. Tattha eko gacchati, eko tiṭṭhati, eko nisīdati, eko seyyaṃ kappeti, eko gāmaṃ piṇḍāya pavisati, eko paṭikkamati, eko caṅkamaṃ adhiṭṭhāti, eko carati, eko viharatīti ayaṃ kāyaviveko nāma. Aṭṭha samāpattiyo pana cittaviveko nāma. Nibbānaṃ upadhiviveko nāma. Vuttampi hetaṃ – ‘‘kāyaviveko ca vivekaṭṭhakāyānaṃ nekkhammābhiratānaṃ, cittaviveko ca parisuddhacittānaṃ paramavodānappattānaṃ, upadhiviveko ca nirupadhīnaṃ puggalānaṃ visaṅkhāragatāna’’nti (mahāni. 57). Duvidhaṃ vīriyanti kāyikaṃ, cetasikañca vīriyaṃ. Sīlanti catupārisuddhisīlaṃ. Samādhinti vipassanāpādakā aṭṭha samāpattiyo. Vimuttikathāti vā ariyaphalaṃ ārabbha pavattā kathā. Sesaṃ uttānameva.
དུཏིཡསེཁསུཏྟཝཎྞནཱ ནིཊྛིཏཱ།
Dutiyasekhasuttavaṇṇanā niṭṭhitā.
ཐེརཝགྒཝཎྞནཱ ནིཊྛིཏཱ།
Theravaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༠. དུཏིཡསེཁསུཏྟཾ • 10. Dutiyasekhasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༠. དུཏིཡསེཁསུཏྟཝཎྞནཱ • 10. Dutiyasekhasuttavaṇṇanā
