| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
5. து³தியஸேனாஸனஸிக்கா²பத³ங்
5. Dutiyasenāsanasikkhāpadaṃ
116. பஞ்சமே மஞ்சகபி⁴ஸீதி மஞ்சே அத்த²ரிதப்³போ³ மஞ்சகோ, ஸோயேவ பி⁴ஸீதி மஞ்சகபி⁴ஸி. ஏவங் பீட²கபி⁴ஸிபி. பாவாரோ கோஜவோதி த்³வேயேவ பச்சத்த²ரணந்தி வுத்தாதி ஆஹ ‘‘பாவாரோ’’திஆதி³. வுத்தந்தி அட்ட²கதா²ஸு வுத்தங். து³தியாதிக்கமேதி து³தியபாதா³திக்கமே. ஸேனாஸனதோதி ஸசே ஏகங் ஸேனாஸனங் ஹோதி, ததோ. அத² ப³ஹூனி ஸேனாஸனானி ஹொந்தி, ஸப்³ப³பச்சி²மஸேனாஸனதோ. ஏகோ லெட்³டு³பாதோ ஸேனாஸனஸ்ஸ உபசாரோ ஹோதி, ஏகோ பரிக்கே²பாரஹோதி ஆஹ ‘‘த்³வே லெட்³டு³பாதா’’தி.
116. Pañcame mañcakabhisīti mañce attharitabbo mañcako, soyeva bhisīti mañcakabhisi. Evaṃ pīṭhakabhisipi. Pāvāro kojavoti dveyeva paccattharaṇanti vuttāti āha ‘‘pāvāro’’tiādi. Vuttanti aṭṭhakathāsu vuttaṃ. Dutiyātikkameti dutiyapādātikkame. Senāsanatoti sace ekaṃ senāsanaṃ hoti, tato. Atha bahūni senāsanāni honti, sabbapacchimasenāsanato. Eko leḍḍupāto senāsanassa upacāro hoti, eko parikkhepārahoti āha ‘‘dve leḍḍupātā’’ti.
ஸசே பி⁴க்கு², ஸாமணேரோ, ஆராமிகோ சாதி தயோ ஹொந்தி, பி⁴க்கு²ங் அனாபுச்சி²த்வா ஸாமணேரோ வா ஆராமிகோ வா ந ஆபுச்சி²தப்³போ³. அத² ஸாமணேரோ, ஆராமிகோ சாதி த்³வே ஹொந்தி, ஸாமணேரங் அனாபுச்சி²த்வா ஆராமிகோவ ந ஆபுச்சி²தப்³போ³தி த³ஸ்ஸெந்தோ ஆஹ ‘‘பி⁴க்கு²ம்ஹி ஸதீ’’திஆதி³. தீஸுபி அஸந்தேஸு ஆபுச்சி²தப்³ப³விதி⁴ங் த³ஸ்ஸேதுங் வுத்தங் ‘‘தஸ்மிம்பி அஸதீ’’திஆதி³. யேனாதி உபாஸகேன, ‘‘காரிதோ’’தி பதே³ கத்தா. தஸ்ஸாதி விஹாரஸாமிகஸ்ஸ. தஸ்மிம்பி அஸதி க³ந்தப்³ப³ந்தி யோஜனா. பாஸாணேஸூதி பாஸாணப²லகேஸு. ஸசே உஸ்ஸஹதீதி ஸசே ஸக்கோதி. உஸ்ஸஹந்தேன பி⁴க்கு²னா ட²பேதப்³ப³ந்தி யோஜனா. தேபீதி உபாஸகாபி, ந ஸம்படிச்ச²ந்தீதி ஸம்ப³ந்தோ⁴. தத்தா²தி தா³ருப⁴ண்டா³தீ³ஸு.
Sace bhikkhu, sāmaṇero, ārāmiko cāti tayo honti, bhikkhuṃ anāpucchitvā sāmaṇero vā ārāmiko vā na āpucchitabbo. Atha sāmaṇero, ārāmiko cāti dve honti, sāmaṇeraṃ anāpucchitvā ārāmikova na āpucchitabboti dassento āha ‘‘bhikkhumhi satī’’tiādi. Tīsupi asantesu āpucchitabbavidhiṃ dassetuṃ vuttaṃ ‘‘tasmimpi asatī’’tiādi. Yenāti upāsakena, ‘‘kārito’’ti pade kattā. Tassāti vihārasāmikassa. Tasmimpi asati gantabbanti yojanā. Pāsāṇesūti pāsāṇaphalakesu. Sace ussahatīti sace sakkoti. Ussahantena bhikkhunā ṭhapetabbanti yojanā. Tepīti upāsakāpi, na sampaṭicchantīti sambandho. Tatthāti dārubhaṇḍādīsu.
பரிச்சே²தா³காரேன வேணீயதி தி³ஸ்ஸதீதி பரிவேணங். ‘‘அத² கோ²’’தி பத³ங் ‘‘வேதி³தப்³ப³’’ந்தி பதே³ அருசிலக்க²ணங். ‘‘ஆஸன்னே’’தி இமினா உபசாரஸத்³த³ஸ்ஸ உபட்டா²னத்த²அஞ்ஞரோபனத்தே² நிவத்தேதி. யஸ்மா வம்மிகராஸியேவ ஹோதி, தஸ்மாதி யோஜனா. உபசினந்தீதி உபசிகா, தாஹி நிமித்தபூ⁴தாஹி பலுஜ்ஜதி நஸ்ஸதீதி அத்தோ². ஸேனாஸனந்தி விஹாரங். கா²யிதுந்தி கா²தி³துங், அயமேவ வா பாடோ². தந்தி மஞ்சபீட²ங். மஞ்சபீட²ங் விஹாரே அபஞ்ஞபெத்வா விஹாரூபசாரே பஞ்ஞாபனஸ்ஸ விஸேஸப²லங் த³ஸ்ஸேதுங் ஆஹ ‘‘விஹாரூபசாரே பனா’’திஆதி³. விஹாரூபசாரே பஞ்ஞபிதந்தி ஸம்ப³ந்தோ⁴.
Paricchedākārena veṇīyati dissatīti pariveṇaṃ. ‘‘Atha kho’’ti padaṃ ‘‘veditabba’’nti pade arucilakkhaṇaṃ. ‘‘Āsanne’’ti iminā upacārasaddassa upaṭṭhānatthaaññaropanatthe nivatteti. Yasmā vammikarāsiyeva hoti, tasmāti yojanā. Upacinantīti upacikā, tāhi nimittabhūtāhi palujjati nassatīti attho. Senāsananti vihāraṃ. Khāyitunti khādituṃ, ayameva vā pāṭho. Tanti mañcapīṭhaṃ. Mañcapīṭhaṃ vihāre apaññapetvā vihārūpacāre paññāpanassa visesaphalaṃ dassetuṃ āha ‘‘vihārūpacāre panā’’tiādi. Vihārūpacāre paññapitanti sambandho.
118. ‘‘க³ச்ச²ந்தேனா’’தி பத³ங் ‘‘க³ந்தப்³ப³’’ந்தி பதே³ கத்தா. ததே²வாதி யதா² புரிமபி⁴க்கு² கரோதி, ததே²வ. வஸந்தேன பி⁴க்கு²னா படிஸாமேதப்³ப³ந்தி யோஜனா. ரத்திட்டா²னந்தி ரத்திங் வஸனட்டா²னங்.
118. ‘‘Gacchantenā’’ti padaṃ ‘‘gantabba’’nti pade kattā. Tathevāti yathā purimabhikkhu karoti, tatheva. Vasantena bhikkhunā paṭisāmetabbanti yojanā. Rattiṭṭhānanti rattiṃ vasanaṭṭhānaṃ.
யா தீ³க⁴ஸாலா வா யா பண்ணஸாலா வா உபசிகானங் உட்டா²னட்டா²னங் ஹோதி, ததோதி யோஜனா. தஸ்மிந்தி தீ³க⁴ஸாலாதி³கே. ஹீதி ஸச்சங் , யஸ்மா வா, ஸந்திட்ட²ந்தீதி ஸம்ப³ந்தோ⁴. ஸிலுச்சயோதி பப்³ப³தோ, தஸ்மிங் லேணங் ஸிலுச்சயலேணங், பப்³ப³தகு³ஹாதி அத்தோ². உபசிகாஸங்காதி உபசிகானங் உட்டா²னட்டா²னந்தி ஆஸங்கா. ததோதி பாஸாணபிட்டி²யங் வா பாஸாணத²ம்பே⁴ஸு வா கதஸேனாஸனாதி³தோ. ஆக³ந்துகோ யோ பி⁴க்கு² அனுவத்தந்தோ வஸதீதி ஸம்ப³ந்தோ⁴. ஸோதி ஆக³ந்துகோ பி⁴க்கு². புன ஸோதி ஆக³ந்துகோ பி⁴க்கு²யேவ. ததோதி க³ஹெத்வா இஸ்ஸரியேன வஸனதோ. உபோ⁴பீதி ஆவாஸிகோபி ஆக³ந்துகோபி த்³வே பி⁴க்கூ². தேஸூதி த்³வீஸு தீஸு. பச்சி²மஸ்ஸாதி ஸப்³ப³பச்சி²மஸ்ஸ. ஆபோ⁴கே³னாதி ஆபோ⁴க³மத்தேன முத்தி நத்தி², ஆபுச்சி²தப்³ப³மேவாதி அதி⁴ப்பாயோ. அஞ்ஞதோதி அஞ்ஞாவாஸதோ. அஞ்ஞத்ராதி அஞ்ஞஸ்மிங் ஆவாஸே. தத்தே²வாதி ஆனீதாவாஸேயேவ. தேனாதி வுட்³ட⁴தரேன, ‘‘ஸம்படிச்சி²தே’’தி பதே³ கத்தா. ஸம்படிச்சி²தேதி வுட்³ட⁴தரேன ஸம்படிச்சி²தேபி இதரஸ்ஸ க³ந்துங் வட்டதி ஆபுச்சி²தத்தாதி வத³ந்தி. நட்ட²ங் வாதி நட்டே² வா ஸேனாஸனே ஸதி கீ³வா ந ஹோதீதி யோஜனா. அஞ்ஞஸ்ஸாதி அவிஸ்ஸாஸிகபுக்³க³லஸ்ஸ. நட்டா²னீதி நட்டே²ஸு மஞ்சபீடே²ஸு ஸந்தேஸு.
Yā dīghasālā vā yā paṇṇasālā vā upacikānaṃ uṭṭhānaṭṭhānaṃ hoti, tatoti yojanā. Tasminti dīghasālādike. Hīti saccaṃ , yasmā vā, santiṭṭhantīti sambandho. Siluccayoti pabbato, tasmiṃ leṇaṃ siluccayaleṇaṃ, pabbataguhāti attho. Upacikāsaṅkāti upacikānaṃ uṭṭhānaṭṭhānanti āsaṅkā. Tatoti pāsāṇapiṭṭhiyaṃ vā pāsāṇathambhesu vā katasenāsanādito. Āgantuko yo bhikkhu anuvattanto vasatīti sambandho. Soti āgantuko bhikkhu. Puna soti āgantuko bhikkhuyeva. Tatoti gahetvā issariyena vasanato. Ubhopīti āvāsikopi āgantukopi dve bhikkhū. Tesūti dvīsu tīsu. Pacchimassāti sabbapacchimassa. Ābhogenāti ābhogamattena mutti natthi, āpucchitabbamevāti adhippāyo. Aññatoti aññāvāsato. Aññatrāti aññasmiṃ āvāse. Tatthevāti ānītāvāseyeva. Tenāti vuḍḍhatarena, ‘‘sampaṭicchite’’ti pade kattā. Sampaṭicchiteti vuḍḍhatarena sampaṭicchitepi itarassa gantuṃ vaṭṭati āpucchitattāti vadanti. Naṭṭhaṃ vāti naṭṭhe vā senāsane sati gīvā na hotīti yojanā. Aññassāti avissāsikapuggalassa. Naṭṭhānīti naṭṭhesu mañcapīṭhesu santesu.
வுட்³ட⁴தரோ பி⁴க்கு² ச இஸ்ஸரியோ ச யக்கோ² ச ஸீஹோ ச வாளமிகோ³ ச கண்ஹஸப்போ ச வுட்³ட⁴…பே॰… கண்ஹஸப்பா, தே ஆத³யோ யேஸங் தேதி வுட்³ட⁴…பே॰… கண்ஹஸப்பாத³யோ, தேஸு. ஆதி³ஸத்³தே³ன பேதாத³யோ ஸங்க³ண்ஹாதி. யத்தா²தி யஸ்மிங் டா²னே. அஸ்ஸாதி பி⁴க்கு²னோ. ‘‘பலிபு³த்³தோ⁴’’தி பத³ஸ்ஸ அத்த²ங் த³ஸ்ஸேதுங் வுத்தங் ‘‘உபத்³து³தோ’’தி. பஞ்சமங்.
Vuḍḍhataro bhikkhu ca issariyo ca yakkho ca sīho ca vāḷamigo ca kaṇhasappo ca vuḍḍha…pe… kaṇhasappā, te ādayo yesaṃ teti vuḍḍha…pe… kaṇhasappādayo, tesu. Ādisaddena petādayo saṅgaṇhāti. Yatthāti yasmiṃ ṭhāne. Assāti bhikkhuno. ‘‘Palibuddho’’ti padassa atthaṃ dassetuṃ vuttaṃ ‘‘upadduto’’ti. Pañcamaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. பூ⁴தகா³மவக்³கோ³ • 2. Bhūtagāmavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. து³தியஸேனாஸனஸிக்கா²பத³வண்ணனா • 5. Dutiyasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. து³தியஸேனாஸனஸிக்கா²பத³வண்ணனா • 5. Dutiyasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 5. து³தியஸேனாஸனஸிக்கா²பத³வண்ணனா • 5. Dutiyasenāsanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. து³தியஸேனாஸனஸிக்கா²பத³வண்ணனா • 5. Dutiyasenāsanasikkhāpadavaṇṇanā
