| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༥. དུཏིཡསེནཱསནསིཀྑཱཔདཝཎྞནཱ
5. Dutiyasenāsanasikkhāpadavaṇṇanā
ཡཾ ཀིཉྩི ཙམྨནྟི ཀཔྤིཡཱཀཔྤིཡཾ ཡཾ ཀིཉྩི ཙམྨཾ། ནནུ ‘‘ན, བྷིཀྑཝེ, མཧཱཙམྨཱནི དྷཱརེཏབྦཱནི སཱིཧཙམྨཾ བྱགྒྷཙམྨཾ དཱིཔིཙམྨཾ, ཡོ དྷཱརེཡྻ, ཨཱཔཏྟི དུཀྐཊསྶཱ’’ཏི (མཧཱཝ॰ ༢༥༥) ཁནྡྷཀེ སཱིཧཙམྨཱདཱིནཾ པཊིཀྑེཔོ ཀཏོཏི ཨཱཧ ‘‘སཱིཧཙམྨཱདཱིནཉྷཱི’’ཏིཨཱདི། པརིཧརཎེཡེཝ པཊིཀྑེཔོཏི ཨཏྟནོ སནྟཀཾ ཀཏྭཱ ཏཾ ཏཾ ཝིཧཱརཾ ཧརིཏྭཱ མཉྩཔཱིཋཱདཱིསུ ཨཏྠརིཏྭཱ པརིབྷོགེཡེཝ པཊིཀྑེཔོ, སེནཱསནསནྟཀཾ ཀཏྭཱ བྷཱུམཏྠརཎཝསེན པན པརིབྷོགེ ནེཝཏྠི དོསོ། ཏེནཱཧ ‘‘སེནཱསནཔརིབྷོགེ པན ཨཀཔྤིཡཙམྨཾ ནཱམ ནཏྠཱི’’ཏི། པཱཝཱརེནྟི སཉྪཱདེནྟི སརཱིརཾ ཨེཏེནཱཏི པཱཝཱརོ། ཀོཛཝོཏི ཨུདྡལོམིཨེཀནྟལོམིཨཱདིཀོཛཝཏྠརཎཾ། སེསནྟི བྷིསི ནིསཱིདནཾ ཏིཎསནྠཱརོ པཎྞསནྠཱརོཏི ཨཝསིཊྛཾ སེནཱསནཾ། ཏཏྠ བྷིསཱིཏི མཉྩཀབྷིསི ཝཱ པཱིཋཀབྷིསི ཝཱ། ནིསཱིདནནྟི སདསཾ ཝེདིཏབྦཾ། ཏིཎསནྠཱརོཏི ཡེསཾ ཀེསཉྩི ཏིཎཱནཾ སནྠཱརོ། ཨེས ནཡོ པཎྞསནྠཱརེ། ཨེཏྠ ཙ བྷིསི ཧེཊྛཱ ཝུཏྟཏྟཱ པཱཀཊཱ། ནིསཱིདནཾ ནིསཱིདནསིཀྑཱཔདེནེཝ (པཱཙི॰ ༥༣༡ ཨཱདཡོ) པཱཀཊཾ། ཏིཎསནྠཱརཔཎྞསནྠཱརཱནི པན ལོཀཔསིདྡྷཱནིཡེཝ། ཏེནེཝཱཧ ‘‘པཱཀཊམེཝཱ’’ཏི།
Yaṃkiñci cammanti kappiyākappiyaṃ yaṃ kiñci cammaṃ. Nanu ‘‘na, bhikkhave, mahācammāni dhāretabbāni sīhacammaṃ byagghacammaṃ dīpicammaṃ, yo dhāreyya, āpatti dukkaṭassā’’ti (mahāva. 255) khandhake sīhacammādīnaṃ paṭikkhepo katoti āha ‘‘sīhacammādīnañhī’’tiādi. Pariharaṇeyeva paṭikkhepoti attano santakaṃ katvā taṃ taṃ vihāraṃ haritvā mañcapīṭhādīsu attharitvā paribhogeyeva paṭikkhepo, senāsanasantakaṃ katvā bhūmattharaṇavasena pana paribhoge nevatthi doso. Tenāha ‘‘senāsanaparibhoge pana akappiyacammaṃ nāma natthī’’ti. Pāvārenti sañchādenti sarīraṃ etenāti pāvāro. Kojavoti uddalomiekantalomiādikojavattharaṇaṃ. Sesanti bhisi nisīdanaṃ tiṇasanthāro paṇṇasanthāroti avasiṭṭhaṃ senāsanaṃ. Tattha bhisīti mañcakabhisi vā pīṭhakabhisi vā. Nisīdananti sadasaṃ veditabbaṃ. Tiṇasanthāroti yesaṃ kesañci tiṇānaṃ santhāro. Esa nayo paṇṇasanthāre. Ettha ca bhisi heṭṭhā vuttattā pākaṭā. Nisīdanaṃ nisīdanasikkhāpadeneva (pāci. 531 ādayo) pākaṭaṃ. Tiṇasanthārapaṇṇasanthārāni pana lokapasiddhāniyeva. Tenevāha ‘‘pākaṭamevā’’ti.
ནེཝ ཨུདྡྷརེཡྻ, ན ཨུདྡྷརཱཔེཡྻཱཏི ཨཏྟནཱ ཝཱ ཨུདྡྷརིཏྭཱ པཏིརཱུཔེ ཋཱནེ ན ཋཔེཡྻ, པརེན ཝཱ ཏཐཱ ན ཀཱརེཡྻ། ཏེནཱཧ ‘‘ཡཐཱ ཋཔིཏ’’ནྟིཨཱདི། ཏཾ ཋཔེནྟེན ཙ ‘‘ཙཏཱུསུ པཱསཱཎེསཱུ’’ཏིཨཱདིནཱ (པཱཙི॰ ཨཊྛ॰ ༡༡༦) པུབྦེ ཝུཏྟནཡེནེཝ ཨནྟོགེཧེ ཨནོཝསྶཀེ ནིཀྑིཔིཏབྦཾ། སཙེ པན སེནཱསནཾ ཨོཝསྶཏི, ཚདནཏྠཉྩ ཏིཎཾ ཝཱ ཨིཊྛཀཱ ཝཱ ཨཱནཱིཏཱ ཧོནྟི། སཙེ ཨུསྶཧཏི, ཚཱདེཏབྦཾ། ནོ ཙེ སཀྐོཏི, ཡོ ཨོཀཱསོ ཨནོཝསྶཀོ, ཏཏྠ ནིཀྑིཔིཏབྦཾ། སཙེ སབྦམྤི ཨོཝསྶཏི, ཨུསྶཧནྟེན ཨནྟོགཱམེ ཨུཔཱསཀཱནཾ གྷརེ ཋཔེཏབྦཾ། སཙེ ཏེཔི ‘‘སངྒྷིཀཾ ནཱམ, བྷནྟེ, བྷཱརིཡཾ, ཨགྒིདཱཧཱདཱིནཾ བྷཱཡཱམཱ’’ཏི ན སམྤཊིཙྪནྟི, ཨཛ྄ཛྷོཀཱསེ པཱསཱཎཱནཾ ཨུཔརི མཉྩཾ ཋཔེཏྭཱ སེསཾ པུབྦེ ཝུཏྟནཡེནེཝ ནིཀྑིཔིཏྭཱ ཏིཎེཧི ཙ པཎྞེཧི ཙ པཊིཙྪཱདེཏབྦཾ། ཡཉྷི ཏཏྠ ཨངྒམཏྟམྤི ཨཝསིསྶཏི, ཏཾ ཨཉྙེསཾ ཏཏྠ ཨཱགཏཱནཾ བྷིཀྑཱུནཾ ཨུཔཀཱརཾ བྷཝིསྶཏཱིཏི། ཨུཔཙཱརནྟི སབྦཔཙྪིམསེནཱསནཏོ དྭེ ལེཌྜུཔཱཏཱ།
Neva uddhareyya, na uddharāpeyyāti attanā vā uddharitvā patirūpe ṭhāne na ṭhapeyya, parena vā tathā na kāreyya. Tenāha ‘‘yathā ṭhapita’’ntiādi. Taṃ ṭhapentena ca ‘‘catūsu pāsāṇesū’’tiādinā (pāci. aṭṭha. 116) pubbe vuttanayeneva antogehe anovassake nikkhipitabbaṃ. Sace pana senāsanaṃ ovassati, chadanatthañca tiṇaṃ vā iṭṭhakā vā ānītā honti. Sace ussahati, chādetabbaṃ. No ce sakkoti, yo okāso anovassako, tattha nikkhipitabbaṃ. Sace sabbampi ovassati, ussahantena antogāme upāsakānaṃ ghare ṭhapetabbaṃ. Sace tepi ‘‘saṅghikaṃ nāma, bhante, bhāriyaṃ, aggidāhādīnaṃ bhāyāmā’’ti na sampaṭicchanti, ajjhokāse pāsāṇānaṃ upari mañcaṃ ṭhapetvā sesaṃ pubbe vuttanayeneva nikkhipitvā tiṇehi ca paṇṇehi ca paṭicchādetabbaṃ. Yañhi tattha aṅgamattampi avasissati, taṃ aññesaṃ tattha āgatānaṃ bhikkhūnaṃ upakāraṃ bhavissatīti. Upacāranti sabbapacchimasenāsanato dve leḍḍupātā.
ཨཡམེཏྠ ཨཱཔུཙྪིཏབྦཱནཱཔུཙྪིཏབྦཝིནིཙྪཡོ – (པཱཙི॰ ཨཊྛ॰ ༡༡༨) ཡཱ ཏཱཝ བྷཱུམིཡཾ དཱིགྷསཱལཱ ཝཱ པཎྞསཱལཱ ཝཱ ཧོཏི, ཡཾ ཝཱ རུཀྑཏྠམྦྷེསུ ཀཏགེཧཾ ཨུཔཙིཀཱནཾ ཨུཊྛཱནཊྛཱནཾ ཧོཏི, ཏཏོ པཀྐམནྟེན ཨཱཔུཙྪིཏྭཱཝ པཀྐམིཏབྦཾ། ཏསྨིཉྷི ཀཏིཔཡཱནི དིཝསཱནི ཨཛགྒིཡམཱནེ ཝམྨིཀཱཝ སནྟིཊྛནྟི། ཡཾ པན པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ སིལུཙྩཡལེཎཾ ཝཱ སུདྷཱལིཏྟསེནཱསནཾ ཝཱ, ཡཏྠ ཨུཔཙིཀཱསངྐཱ ནཏྠི, ཏཏོ པཀྐམནྟསྶ ཨཱཔུཙྪིཏྭཱཔི ཨནཱཔུཙྪིཏྭཱཔི གནྟུཾ ཝཊྚཏི། ཏེནཱཧ ‘‘ཡཏྠ པནཱ’’ཏིཨཱདི། སཙེ ཏཱདིསེཔི སེནཱསནེ ཨེཀེན པསྶེན ཨུཔཙིཀཱ ཨཱརོཧནྟི, ཨཱཔུཙྪིཏྭཱཝ གནྟབྦཾ། ཨཱཔུཙྪནཾ པན ཝཏྟནྟི ཨཱཔུཙྪནཾ གམིཀཝཏྟཾ། ཨིདཉྩ ཨིཏིཀཏྟབྦཏཱདསྶནཏྠཾ ཝུཏྟཾ, ན པན ཝཏྟབྷེདདུཀྐཊནྟི (སཱརཏྠ॰ ཊཱི॰ པཱཙིཏྟིཡ ༣.༡༡༨) དསྶནཏྠཾ། ཀེཙི པན ‘‘དུཀྐཊནྟི དསྶནཏྠ’’ནྟི ཝདནྟི, ཏཾ ན ཡུཛྫཏི ཝཏྟཀྑནྡྷཀཊྛཀཐཱཡ ‘‘ཡཾ པཱསཱཎཔིཊྛིཡཾ ཝཱ པཱསཱཎཏྠམྦྷེསུ ཝཱ ཀཏསེནཱསནཾ, ཡཏྠ ཨུཔཙིཀཱནཱརོཧནྟི, ཏཾ ཨནཱཔུཙྪནྟསྶཱཔི ཨནཱཔཏྟཱི’’ཏི (ཙཱུལ༹ཝ॰ ཨཊྛ॰ ༣༦༠) ཝུཏྟཏྟཱ། ཨཱཔུཙྪནྟེན པན བྷིཀྑུམྷི (པཱཙི॰ ཨཊྛ॰ ༡༡༦) སཏི བྷིཀྑུ ཨཱཔུཙྪིཏབྦོ, ཏསྨིཾ ཨསཏི སཱམཎེརོ, ཏསྨིཾ ཨསཏི ཨཱརཱམིཀོ, ཏསྨིམྤི ཨསཏི ཡེན ཝིཧཱརོ ཀཱརཱཔིཏོ, སོ ཝིཧཱརསཱམིཀོ, ཏསྶ ཝཱ ཀུལེ ཡོ ཀོཙི ཨཱཔུཙྪིཏབྦོ།
Ayamettha āpucchitabbānāpucchitabbavinicchayo – (pāci. aṭṭha. 118) yā tāva bhūmiyaṃ dīghasālā vā paṇṇasālā vā hoti, yaṃ vā rukkhatthambhesu katagehaṃ upacikānaṃ uṭṭhānaṭṭhānaṃ hoti, tato pakkamantena āpucchitvāva pakkamitabbaṃ. Tasmiñhi katipayāni divasāni ajaggiyamāne vammikāva santiṭṭhanti. Yaṃ pana pāsāṇapiṭṭhiyaṃ vā pāsāṇatthambhesu vā katasenāsanaṃ siluccayaleṇaṃ vā sudhālittasenāsanaṃ vā, yattha upacikāsaṅkā natthi, tato pakkamantassa āpucchitvāpi anāpucchitvāpi gantuṃ vaṭṭati. Tenāha ‘‘yattha panā’’tiādi. Sace tādisepi senāsane ekena passena upacikā ārohanti, āpucchitvāva gantabbaṃ. Āpucchanaṃ pana vattanti āpucchanaṃ gamikavattaṃ. Idañca itikattabbatādassanatthaṃ vuttaṃ, na pana vattabhedadukkaṭanti (sārattha. ṭī. pācittiya 3.118) dassanatthaṃ. Keci pana ‘‘dukkaṭanti dassanattha’’nti vadanti, taṃ na yujjati vattakkhandhakaṭṭhakathāya ‘‘yaṃ pāsāṇapiṭṭhiyaṃ vā pāsāṇatthambhesu vā katasenāsanaṃ, yattha upacikānārohanti, taṃ anāpucchantassāpi anāpattī’’ti (cūḷava. aṭṭha. 360) vuttattā. Āpucchantena pana bhikkhumhi (pāci. aṭṭha. 116) sati bhikkhu āpucchitabbo, tasmiṃ asati sāmaṇero, tasmiṃ asati ārāmiko, tasmimpi asati yena vihāro kārāpito, so vihārasāmiko, tassa vā kule yo koci āpucchitabbo.
‘‘ཨུཔཙཱརེ’’ཏི ཨེཏསྶེཝ ཝིཝརཎཾ ‘‘བཧི ཨཱསནྣེ’’ཏི, ཝིཧཱརསྶ བཧི ཨཱསནྣཊྛཱནེཏི ཨཏྠོ། ཨུཔཊྛཱནསཱལཱཡ ཝཱཏི བྷོཛནསཱལཱཡཾ ཝཱ། དུཀྐཊམེཝཱཏི ཝུཏྟཔྤཀཱརཉྷི དསཝིདྷཾ སེཡྻཾ ཨནྟོགབྦྷཱདིམྷི གུཏྟཊྛཱནེ པཉྙཔེཏྭཱ གཙྪནྟསྶ ཡསྨཱ སེཡྻཱཔི སེནཱསནམྤི ཨུཔཙིཀཱཧི པལུཛྫཏི, ཝམྨིཀརཱསིཡེཝ ཧོཏི, ཏསྨཱ པཱཙིཏྟིཡཾ ཝུཏྟཾ། བཧི པན ཨུཔཊྛཱནསཱལཱདཱིསུ པཉྙཔེཏྭཱ གཙྪནྟསྶ སེཡྻཱམཏྟམེཝ ནསྶེཡྻ ཋཱནསྶ ཨགུཏྟཏཱཡ, ན སེནཱསནཾ, ཏསྨཱ ཨེཏྠ དུཀྐཊཾ ཝུཏྟཾ། མཉྩཔཱིཋཾ པན ཡསྨཱ ན སཀྐཱ སཧསཱ ཨུཔཙིཀཱཧི ཁཱཡིཏུཾ, ཏསྨཱ ཏཾ ཝིཧཱརེཔི སནྠརིཏྭཱ གཙྪནྟསྶ དུཀྐཊཾ ཝུཏྟཾ། ཝིཧཱརཱུཔཙཱརེ པན ཏཾ ཝིཧཱརཙཱརིཀཾ ཨཱཧིཎྜནྟཱ དིསྭཱཝ པཊིསཱམེནྟི།
‘‘Upacāre’’ti etasseva vivaraṇaṃ ‘‘bahi āsanne’’ti, vihārassa bahi āsannaṭṭhāneti attho. Upaṭṭhānasālāya vāti bhojanasālāyaṃ vā. Dukkaṭamevāti vuttappakārañhi dasavidhaṃ seyyaṃ antogabbhādimhi guttaṭṭhāne paññapetvā gacchantassa yasmā seyyāpi senāsanampi upacikāhi palujjati, vammikarāsiyeva hoti, tasmā pācittiyaṃ vuttaṃ. Bahi pana upaṭṭhānasālādīsu paññapetvā gacchantassa seyyāmattameva nasseyya ṭhānassa aguttatāya, na senāsanaṃ, tasmā ettha dukkaṭaṃ vuttaṃ. Mañcapīṭhaṃ pana yasmā na sakkā sahasā upacikāhi khāyituṃ, tasmā taṃ vihārepi santharitvā gacchantassa dukkaṭaṃ vuttaṃ. Vihārūpacāre pana taṃ vihāracārikaṃ āhiṇḍantā disvāva paṭisāmenti.
ཨུདྡྷརཎཱནི ཀཏྭཱཏི ཨེཏྠ ཨུདྡྷརིཏྭཱ གཙྪནྟེན མཉྩཔཱིཋཀཝཱནཾ སབྦཾ ཨཔནེཏྭཱ (པཱཙི॰ ཨཊྛ॰ ༡༡༨) སཾཧརིཏྭཱ ཙཱིཝརཝཾསེ ལགྒེཏྭཱ གནྟབྦཾ། པཙྪཱ ཨཱགནྟྭཱ ཝསནཀབྷིཀྑུནཱཔི པུན མཉྩཔཱིཋཾ ཝཱ པཉྙཔེཏྭཱ སཡིཏྭཱ གཙྪནྟེན ཏཐེཝ ཀཱཏབྦཾ། ཨནྟོཀུཊྚཏོ སེཡྻཾ བཧིཀུཊྚེ པཉྙཔེཏྭཱ ཝསནྟེན གམནཀཱལེ པུན གཧིཏཊྛཱནེཡེཝ པཊིསཱམེཏབྦཾ། ཨུཔརིཔཱསཱདཏོ ཨོརོཔེཏྭཱ ཧེཊྛཱཔཱསཱདེ ཝསནྟསྶཱཔི ཨེསེཝ ནཡོ། རཏྟིཊྛཱནདིཝཱཊྛཱནེསུ མཉྩཔཱིཋཾ པཉྙཔེཏྭཱཔི གམནཀཱལེ པུན གཧིཏཊྛཱནེཡེཝ ཋཔེཏབྦཾ། ཨུདྡྷརཱཔེཏྭཱ གམནེཔི ཨེསེཝ ནཡོ། ཨཱཔུཙྪིཏྭཱ གཙྪནྟེན པན ‘‘བྷིཀྑུམྷི སཏི བྷིཀྑུ ཨཱཔུཙྪིཏབྦོ’’ཏིཨཱདིནཱ (པཱཙི॰ ཨཊྛ॰ ༡༡༦) ཧེཊྛཱ ཝུཏྟནཡེནེཝ ཨཱཔུཙྪིཏྭཱ གནྟབྦཾ།
Uddharaṇāni katvāti ettha uddharitvā gacchantena mañcapīṭhakavānaṃ sabbaṃ apanetvā (pāci. aṭṭha. 118) saṃharitvā cīvaravaṃse laggetvā gantabbaṃ. Pacchā āgantvā vasanakabhikkhunāpi puna mañcapīṭhaṃ vā paññapetvā sayitvā gacchantena tatheva kātabbaṃ. Antokuṭṭato seyyaṃ bahikuṭṭe paññapetvā vasantena gamanakāle puna gahitaṭṭhāneyeva paṭisāmetabbaṃ. Uparipāsādato oropetvā heṭṭhāpāsāde vasantassāpi eseva nayo. Rattiṭṭhānadivāṭṭhānesu mañcapīṭhaṃ paññapetvāpi gamanakāle puna gahitaṭṭhāneyeva ṭhapetabbaṃ. Uddharāpetvā gamanepi eseva nayo. Āpucchitvā gacchantena pana ‘‘bhikkhumhi sati bhikkhu āpucchitabbo’’tiādinā (pāci. aṭṭha. 116) heṭṭhā vuttanayeneva āpucchitvā gantabbaṃ.
དུཏིཡསེནཱསནསིཀྑཱཔདཝཎྞནཱ ནིཊྛིཏཱ།
Dutiyasenāsanasikkhāpadavaṇṇanā niṭṭhitā.
