| Library / Tipiṭaka / ਤਿਪਿਟਕ • Tipiṭaka / ਕਙ੍ਖਾવਿਤਰਣੀ-ਅਭਿਨવ-ਟੀਕਾ • Kaṅkhāvitaraṇī-abhinava-ṭīkā |
੫. ਦੁਤਿਯਸੇਨਾਸਨਸਿਕ੍ਖਾਪਦવਣ੍ਣਨਾ
5. Dutiyasenāsanasikkhāpadavaṇṇanā
ਯਂ ਕਿਞ੍ਚਿ ਚਮ੍ਮਨ੍ਤਿ ਕਪ੍ਪਿਯਾਕਪ੍ਪਿਯਂ ਯਂ ਕਿਞ੍ਚਿ ਚਮ੍ਮਂ। ਨਨੁ ‘‘ਨ, ਭਿਕ੍ਖવੇ, ਮਹਾਚਮ੍ਮਾਨਿ ਧਾਰੇਤਬ੍ਬਾਨਿ ਸੀਹਚਮ੍ਮਂ ਬ੍ਯਗ੍ਘਚਮ੍ਮਂ ਦੀਪਿਚਮ੍ਮਂ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾવ॰ ੨੫੫) ਖਨ੍ਧਕੇ ਸੀਹਚਮ੍ਮਾਦੀਨਂ ਪਟਿਕ੍ਖੇਪੋ ਕਤੋਤਿ ਆਹ ‘‘ਸੀਹਚਮ੍ਮਾਦੀਨਞ੍ਹੀ’’ਤਿਆਦਿ। ਪਰਿਹਰਣੇਯੇવ ਪਟਿਕ੍ਖੇਪੋਤਿ ਅਤ੍ਤਨੋ ਸਨ੍ਤਕਂ ਕਤ੍વਾ ਤਂ ਤਂ વਿਹਾਰਂ ਹਰਿਤ੍વਾ ਮਞ੍ਚਪੀਠਾਦੀਸੁ ਅਤ੍ਥਰਿਤ੍વਾ ਪਰਿਭੋਗੇਯੇવ ਪਟਿਕ੍ਖੇਪੋ, ਸੇਨਾਸਨਸਨ੍ਤਕਂ ਕਤ੍વਾ ਭੂਮਤ੍ਥਰਣવਸੇਨ ਪਨ ਪਰਿਭੋਗੇ ਨੇવਤ੍ਥਿ ਦੋਸੋ। ਤੇਨਾਹ ‘‘ਸੇਨਾਸਨਪਰਿਭੋਗੇ ਪਨ ਅਕਪ੍ਪਿਯਚਮ੍ਮਂ ਨਾਮ ਨਤ੍ਥੀ’’ਤਿ। ਪਾવਾਰੇਨ੍ਤਿ ਸਞ੍ਛਾਦੇਨ੍ਤਿ ਸਰੀਰਂ ਏਤੇਨਾਤਿ ਪਾવਾਰੋ। ਕੋਜવੋਤਿ ਉਦ੍ਦਲੋਮਿਏਕਨ੍ਤਲੋਮਿਆਦਿਕੋਜવਤ੍ਥਰਣਂ। ਸੇਸਨ੍ਤਿ ਭਿਸਿ ਨਿਸੀਦਨਂ ਤਿਣਸਨ੍ਥਾਰੋ ਪਣ੍ਣਸਨ੍ਥਾਰੋਤਿ ਅવਸਿਟ੍ਠਂ ਸੇਨਾਸਨਂ। ਤਤ੍ਥ ਭਿਸੀਤਿ ਮਞ੍ਚਕਭਿਸਿ વਾ ਪੀਠਕਭਿਸਿ વਾ। ਨਿਸੀਦਨਨ੍ਤਿ ਸਦਸਂ વੇਦਿਤਬ੍ਬਂ। ਤਿਣਸਨ੍ਥਾਰੋਤਿ ਯੇਸਂ ਕੇਸਞ੍ਚਿ ਤਿਣਾਨਂ ਸਨ੍ਥਾਰੋ। ਏਸ ਨਯੋ ਪਣ੍ਣਸਨ੍ਥਾਰੇ। ਏਤ੍ਥ ਚ ਭਿਸਿ ਹੇਟ੍ਠਾ વੁਤ੍ਤਤ੍ਤਾ ਪਾਕਟਾ। ਨਿਸੀਦਨਂ ਨਿਸੀਦਨਸਿਕ੍ਖਾਪਦੇਨੇવ (ਪਾਚਿ॰ ੫੩੧ ਆਦਯੋ) ਪਾਕਟਂ। ਤਿਣਸਨ੍ਥਾਰਪਣ੍ਣਸਨ੍ਥਾਰਾਨਿ ਪਨ ਲੋਕਪਸਿਦ੍ਧਾਨਿਯੇવ। ਤੇਨੇવਾਹ ‘‘ਪਾਕਟਮੇવਾ’’ਤਿ।
Yaṃkiñci cammanti kappiyākappiyaṃ yaṃ kiñci cammaṃ. Nanu ‘‘na, bhikkhave, mahācammāni dhāretabbāni sīhacammaṃ byagghacammaṃ dīpicammaṃ, yo dhāreyya, āpatti dukkaṭassā’’ti (mahāva. 255) khandhake sīhacammādīnaṃ paṭikkhepo katoti āha ‘‘sīhacammādīnañhī’’tiādi. Pariharaṇeyeva paṭikkhepoti attano santakaṃ katvā taṃ taṃ vihāraṃ haritvā mañcapīṭhādīsu attharitvā paribhogeyeva paṭikkhepo, senāsanasantakaṃ katvā bhūmattharaṇavasena pana paribhoge nevatthi doso. Tenāha ‘‘senāsanaparibhoge pana akappiyacammaṃ nāma natthī’’ti. Pāvārenti sañchādenti sarīraṃ etenāti pāvāro. Kojavoti uddalomiekantalomiādikojavattharaṇaṃ. Sesanti bhisi nisīdanaṃ tiṇasanthāro paṇṇasanthāroti avasiṭṭhaṃ senāsanaṃ. Tattha bhisīti mañcakabhisi vā pīṭhakabhisi vā. Nisīdananti sadasaṃ veditabbaṃ. Tiṇasanthāroti yesaṃ kesañci tiṇānaṃ santhāro. Esa nayo paṇṇasanthāre. Ettha ca bhisi heṭṭhā vuttattā pākaṭā. Nisīdanaṃ nisīdanasikkhāpadeneva (pāci. 531 ādayo) pākaṭaṃ. Tiṇasanthārapaṇṇasanthārāni pana lokapasiddhāniyeva. Tenevāha ‘‘pākaṭamevā’’ti.
ਨੇવ ਉਦ੍ਧਰੇਯ੍ਯ, ਨ ਉਦ੍ਧਰਾਪੇਯ੍ਯਾਤਿ ਅਤ੍ਤਨਾ વਾ ਉਦ੍ਧਰਿਤ੍વਾ ਪਤਿਰੂਪੇ ਠਾਨੇ ਨ ਠਪੇਯ੍ਯ, ਪਰੇਨ વਾ ਤਥਾ ਨ ਕਾਰੇਯ੍ਯ। ਤੇਨਾਹ ‘‘ਯਥਾ ਠਪਿਤ’’ਨ੍ਤਿਆਦਿ। ਤਂ ਠਪੇਨ੍ਤੇਨ ਚ ‘‘ਚਤੂਸੁ ਪਾਸਾਣੇਸੂ’’ਤਿਆਦਿਨਾ (ਪਾਚਿ॰ ਅਟ੍ਠ॰ ੧੧੬) ਪੁਬ੍ਬੇ વੁਤ੍ਤਨਯੇਨੇવ ਅਨ੍ਤੋਗੇਹੇ ਅਨੋવਸ੍ਸਕੇ ਨਿਕ੍ਖਿਪਿਤਬ੍ਬਂ। ਸਚੇ ਪਨ ਸੇਨਾਸਨਂ ਓવਸ੍ਸਤਿ, ਛਦਨਤ੍ਥਞ੍ਚ ਤਿਣਂ વਾ ਇਟ੍ਠਕਾ વਾ ਆਨੀਤਾ ਹੋਨ੍ਤਿ। ਸਚੇ ਉਸ੍ਸਹਤਿ, ਛਾਦੇਤਬ੍ਬਂ। ਨੋ ਚੇ ਸਕ੍ਕੋਤਿ, ਯੋ ਓਕਾਸੋ ਅਨੋવਸ੍ਸਕੋ, ਤਤ੍ਥ ਨਿਕ੍ਖਿਪਿਤਬ੍ਬਂ। ਸਚੇ ਸਬ੍ਬਮ੍ਪਿ ਓવਸ੍ਸਤਿ, ਉਸ੍ਸਹਨ੍ਤੇਨ ਅਨ੍ਤੋਗਾਮੇ ਉਪਾਸਕਾਨਂ ਘਰੇ ਠਪੇਤਬ੍ਬਂ। ਸਚੇ ਤੇਪਿ ‘‘ਸਙ੍ਘਿਕਂ ਨਾਮ, ਭਨ੍ਤੇ, ਭਾਰਿਯਂ, ਅਗ੍ਗਿਦਾਹਾਦੀਨਂ ਭਾਯਾਮਾ’’ਤਿ ਨ ਸਮ੍ਪਟਿਚ੍ਛਨ੍ਤਿ, ਅਜ੍ਝੋਕਾਸੇ ਪਾਸਾਣਾਨਂ ਉਪਰਿ ਮਞ੍ਚਂ ਠਪੇਤ੍વਾ ਸੇਸਂ ਪੁਬ੍ਬੇ વੁਤ੍ਤਨਯੇਨੇવ ਨਿਕ੍ਖਿਪਿਤ੍વਾ ਤਿਣੇਹਿ ਚ ਪਣ੍ਣੇਹਿ ਚ ਪਟਿਚ੍ਛਾਦੇਤਬ੍ਬਂ। ਯਞ੍ਹਿ ਤਤ੍ਥ ਅਙ੍ਗਮਤ੍ਤਮ੍ਪਿ ਅવਸਿਸ੍ਸਤਿ, ਤਂ ਅਞ੍ਞੇਸਂ ਤਤ੍ਥ ਆਗਤਾਨਂ ਭਿਕ੍ਖੂਨਂ ਉਪਕਾਰਂ ਭવਿਸ੍ਸਤੀਤਿ। ਉਪਚਾਰਨ੍ਤਿ ਸਬ੍ਬਪਚ੍ਛਿਮਸੇਨਾਸਨਤੋ ਦ੍વੇ ਲੇਡ੍ਡੁਪਾਤਾ।
Neva uddhareyya, na uddharāpeyyāti attanā vā uddharitvā patirūpe ṭhāne na ṭhapeyya, parena vā tathā na kāreyya. Tenāha ‘‘yathā ṭhapita’’ntiādi. Taṃ ṭhapentena ca ‘‘catūsu pāsāṇesū’’tiādinā (pāci. aṭṭha. 116) pubbe vuttanayeneva antogehe anovassake nikkhipitabbaṃ. Sace pana senāsanaṃ ovassati, chadanatthañca tiṇaṃ vā iṭṭhakā vā ānītā honti. Sace ussahati, chādetabbaṃ. No ce sakkoti, yo okāso anovassako, tattha nikkhipitabbaṃ. Sace sabbampi ovassati, ussahantena antogāme upāsakānaṃ ghare ṭhapetabbaṃ. Sace tepi ‘‘saṅghikaṃ nāma, bhante, bhāriyaṃ, aggidāhādīnaṃ bhāyāmā’’ti na sampaṭicchanti, ajjhokāse pāsāṇānaṃ upari mañcaṃ ṭhapetvā sesaṃ pubbe vuttanayeneva nikkhipitvā tiṇehi ca paṇṇehi ca paṭicchādetabbaṃ. Yañhi tattha aṅgamattampi avasissati, taṃ aññesaṃ tattha āgatānaṃ bhikkhūnaṃ upakāraṃ bhavissatīti. Upacāranti sabbapacchimasenāsanato dve leḍḍupātā.
ਅਯਮੇਤ੍ਥ ਆਪੁਚ੍ਛਿਤਬ੍ਬਾਨਾਪੁਚ੍ਛਿਤਬ੍ਬવਿਨਿਚ੍ਛਯੋ – (ਪਾਚਿ॰ ਅਟ੍ਠ॰ ੧੧੮) ਯਾ ਤਾવ ਭੂਮਿਯਂ ਦੀਘਸਾਲਾ વਾ ਪਣ੍ਣਸਾਲਾ વਾ ਹੋਤਿ, ਯਂ વਾ ਰੁਕ੍ਖਤ੍ਥਮ੍ਭੇਸੁ ਕਤਗੇਹਂ ਉਪਚਿਕਾਨਂ ਉਟ੍ਠਾਨਟ੍ਠਾਨਂ ਹੋਤਿ, ਤਤੋ ਪਕ੍ਕਮਨ੍ਤੇਨ ਆਪੁਚ੍ਛਿਤ੍વਾવ ਪਕ੍ਕਮਿਤਬ੍ਬਂ। ਤਸ੍ਮਿਞ੍ਹਿ ਕਤਿਪਯਾਨਿ ਦਿવਸਾਨਿ ਅਜਗ੍ਗਿਯਮਾਨੇ વਮ੍ਮਿਕਾવ ਸਨ੍ਤਿਟ੍ਠਨ੍ਤਿ। ਯਂ ਪਨ ਪਾਸਾਣਪਿਟ੍ਠਿਯਂ વਾ ਪਾਸਾਣਤ੍ਥਮ੍ਭੇਸੁ વਾ ਕਤਸੇਨਾਸਨਂ ਸਿਲੁਚ੍ਚਯਲੇਣਂ વਾ ਸੁਧਾਲਿਤ੍ਤਸੇਨਾਸਨਂ વਾ, ਯਤ੍ਥ ਉਪਚਿਕਾਸਙ੍ਕਾ ਨਤ੍ਥਿ, ਤਤੋ ਪਕ੍ਕਮਨ੍ਤਸ੍ਸ ਆਪੁਚ੍ਛਿਤ੍વਾਪਿ ਅਨਾਪੁਚ੍ਛਿਤ੍વਾਪਿ ਗਨ੍ਤੁਂ વਟ੍ਟਤਿ। ਤੇਨਾਹ ‘‘ਯਤ੍ਥ ਪਨਾ’’ਤਿਆਦਿ। ਸਚੇ ਤਾਦਿਸੇਪਿ ਸੇਨਾਸਨੇ ਏਕੇਨ ਪਸ੍ਸੇਨ ਉਪਚਿਕਾ ਆਰੋਹਨ੍ਤਿ, ਆਪੁਚ੍ਛਿਤ੍વਾવ ਗਨ੍ਤਬ੍ਬਂ। ਆਪੁਚ੍ਛਨਂ ਪਨ વਤ੍ਤਨ੍ਤਿ ਆਪੁਚ੍ਛਨਂ ਗਮਿਕવਤ੍ਤਂ। ਇਦਞ੍ਚ ਇਤਿਕਤ੍ਤਬ੍ਬਤਾਦਸ੍ਸਨਤ੍ਥਂ વੁਤ੍ਤਂ, ਨ ਪਨ વਤ੍ਤਭੇਦਦੁਕ੍ਕਟਨ੍ਤਿ (ਸਾਰਤ੍ਥ॰ ਟੀ॰ ਪਾਚਿਤ੍ਤਿਯ ੩.੧੧੮) ਦਸ੍ਸਨਤ੍ਥਂ। ਕੇਚਿ ਪਨ ‘‘ਦੁਕ੍ਕਟਨ੍ਤਿ ਦਸ੍ਸਨਤ੍ਥ’’ਨ੍ਤਿ વਦਨ੍ਤਿ, ਤਂ ਨ ਯੁਜ੍ਜਤਿ વਤ੍ਤਕ੍ਖਨ੍ਧਕਟ੍ਠਕਥਾਯ ‘‘ਯਂ ਪਾਸਾਣਪਿਟ੍ਠਿਯਂ વਾ ਪਾਸਾਣਤ੍ਥਮ੍ਭੇਸੁ વਾ ਕਤਸੇਨਾਸਨਂ, ਯਤ੍ਥ ਉਪਚਿਕਾਨਾਰੋਹਨ੍ਤਿ, ਤਂ ਅਨਾਪੁਚ੍ਛਨ੍ਤਸ੍ਸਾਪਿ ਅਨਾਪਤ੍ਤੀ’’ਤਿ (ਚੂਲ਼વ॰ ਅਟ੍ਠ॰ ੩੬੦) વੁਤ੍ਤਤ੍ਤਾ। ਆਪੁਚ੍ਛਨ੍ਤੇਨ ਪਨ ਭਿਕ੍ਖੁਮ੍ਹਿ (ਪਾਚਿ॰ ਅਟ੍ਠ॰ ੧੧੬) ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ, ਤਸ੍ਮਿਂ ਅਸਤਿ ਸਾਮਣੇਰੋ, ਤਸ੍ਮਿਂ ਅਸਤਿ ਆਰਾਮਿਕੋ, ਤਸ੍ਮਿਮ੍ਪਿ ਅਸਤਿ ਯੇਨ વਿਹਾਰੋ ਕਾਰਾਪਿਤੋ, ਸੋ વਿਹਾਰਸਾਮਿਕੋ, ਤਸ੍ਸ વਾ ਕੁਲੇ ਯੋ ਕੋਚਿ ਆਪੁਚ੍ਛਿਤਬ੍ਬੋ।
Ayamettha āpucchitabbānāpucchitabbavinicchayo – (pāci. aṭṭha. 118) yā tāva bhūmiyaṃ dīghasālā vā paṇṇasālā vā hoti, yaṃ vā rukkhatthambhesu katagehaṃ upacikānaṃ uṭṭhānaṭṭhānaṃ hoti, tato pakkamantena āpucchitvāva pakkamitabbaṃ. Tasmiñhi katipayāni divasāni ajaggiyamāne vammikāva santiṭṭhanti. Yaṃ pana pāsāṇapiṭṭhiyaṃ vā pāsāṇatthambhesu vā katasenāsanaṃ siluccayaleṇaṃ vā sudhālittasenāsanaṃ vā, yattha upacikāsaṅkā natthi, tato pakkamantassa āpucchitvāpi anāpucchitvāpi gantuṃ vaṭṭati. Tenāha ‘‘yattha panā’’tiādi. Sace tādisepi senāsane ekena passena upacikā ārohanti, āpucchitvāva gantabbaṃ. Āpucchanaṃ pana vattanti āpucchanaṃ gamikavattaṃ. Idañca itikattabbatādassanatthaṃ vuttaṃ, na pana vattabhedadukkaṭanti (sārattha. ṭī. pācittiya 3.118) dassanatthaṃ. Keci pana ‘‘dukkaṭanti dassanattha’’nti vadanti, taṃ na yujjati vattakkhandhakaṭṭhakathāya ‘‘yaṃ pāsāṇapiṭṭhiyaṃ vā pāsāṇatthambhesu vā katasenāsanaṃ, yattha upacikānārohanti, taṃ anāpucchantassāpi anāpattī’’ti (cūḷava. aṭṭha. 360) vuttattā. Āpucchantena pana bhikkhumhi (pāci. aṭṭha. 116) sati bhikkhu āpucchitabbo, tasmiṃ asati sāmaṇero, tasmiṃ asati ārāmiko, tasmimpi asati yena vihāro kārāpito, so vihārasāmiko, tassa vā kule yo koci āpucchitabbo.
‘‘ਉਪਚਾਰੇ’’ਤਿ ਏਤਸ੍ਸੇવ વਿવਰਣਂ ‘‘ਬਹਿ ਆਸਨ੍ਨੇ’’ਤਿ, વਿਹਾਰਸ੍ਸ ਬਹਿ ਆਸਨ੍ਨਟ੍ਠਾਨੇਤਿ ਅਤ੍ਥੋ। ਉਪਟ੍ਠਾਨਸਾਲਾਯ વਾਤਿ ਭੋਜਨਸਾਲਾਯਂ વਾ। ਦੁਕ੍ਕਟਮੇવਾਤਿ વੁਤ੍ਤਪ੍ਪਕਾਰਞ੍ਹਿ ਦਸવਿਧਂ ਸੇਯ੍ਯਂ ਅਨ੍ਤੋਗਬ੍ਭਾਦਿਮ੍ਹਿ ਗੁਤ੍ਤਟ੍ਠਾਨੇ ਪਞ੍ਞਪੇਤ੍વਾ ਗਚ੍ਛਨ੍ਤਸ੍ਸ ਯਸ੍ਮਾ ਸੇਯ੍ਯਾਪਿ ਸੇਨਾਸਨਮ੍ਪਿ ਉਪਚਿਕਾਹਿ ਪਲੁਜ੍ਜਤਿ, વਮ੍ਮਿਕਰਾਸਿਯੇવ ਹੋਤਿ, ਤਸ੍ਮਾ ਪਾਚਿਤ੍ਤਿਯਂ વੁਤ੍ਤਂ। ਬਹਿ ਪਨ ਉਪਟ੍ਠਾਨਸਾਲਾਦੀਸੁ ਪਞ੍ਞਪੇਤ੍વਾ ਗਚ੍ਛਨ੍ਤਸ੍ਸ ਸੇਯ੍ਯਾਮਤ੍ਤਮੇવ ਨਸ੍ਸੇਯ੍ਯ ਠਾਨਸ੍ਸ ਅਗੁਤ੍ਤਤਾਯ, ਨ ਸੇਨਾਸਨਂ, ਤਸ੍ਮਾ ਏਤ੍ਥ ਦੁਕ੍ਕਟਂ વੁਤ੍ਤਂ। ਮਞ੍ਚਪੀਠਂ ਪਨ ਯਸ੍ਮਾ ਨ ਸਕ੍ਕਾ ਸਹਸਾ ਉਪਚਿਕਾਹਿ ਖਾਯਿਤੁਂ, ਤਸ੍ਮਾ ਤਂ વਿਹਾਰੇਪਿ ਸਨ੍ਥਰਿਤ੍વਾ ਗਚ੍ਛਨ੍ਤਸ੍ਸ ਦੁਕ੍ਕਟਂ વੁਤ੍ਤਂ। વਿਹਾਰੂਪਚਾਰੇ ਪਨ ਤਂ વਿਹਾਰਚਾਰਿਕਂ ਆਹਿਣ੍ਡਨ੍ਤਾ ਦਿਸ੍વਾવ ਪਟਿਸਾਮੇਨ੍ਤਿ।
‘‘Upacāre’’ti etasseva vivaraṇaṃ ‘‘bahi āsanne’’ti, vihārassa bahi āsannaṭṭhāneti attho. Upaṭṭhānasālāya vāti bhojanasālāyaṃ vā. Dukkaṭamevāti vuttappakārañhi dasavidhaṃ seyyaṃ antogabbhādimhi guttaṭṭhāne paññapetvā gacchantassa yasmā seyyāpi senāsanampi upacikāhi palujjati, vammikarāsiyeva hoti, tasmā pācittiyaṃ vuttaṃ. Bahi pana upaṭṭhānasālādīsu paññapetvā gacchantassa seyyāmattameva nasseyya ṭhānassa aguttatāya, na senāsanaṃ, tasmā ettha dukkaṭaṃ vuttaṃ. Mañcapīṭhaṃ pana yasmā na sakkā sahasā upacikāhi khāyituṃ, tasmā taṃ vihārepi santharitvā gacchantassa dukkaṭaṃ vuttaṃ. Vihārūpacāre pana taṃ vihāracārikaṃ āhiṇḍantā disvāva paṭisāmenti.
ਉਦ੍ਧਰਣਾਨਿ ਕਤ੍વਾਤਿ ਏਤ੍ਥ ਉਦ੍ਧਰਿਤ੍વਾ ਗਚ੍ਛਨ੍ਤੇਨ ਮਞ੍ਚਪੀਠਕવਾਨਂ ਸਬ੍ਬਂ ਅਪਨੇਤ੍વਾ (ਪਾਚਿ॰ ਅਟ੍ਠ॰ ੧੧੮) ਸਂਹਰਿਤ੍વਾ ਚੀવਰવਂਸੇ ਲਗ੍ਗੇਤ੍વਾ ਗਨ੍ਤਬ੍ਬਂ। ਪਚ੍ਛਾ ਆਗਨ੍ਤ੍વਾ વਸਨਕਭਿਕ੍ਖੁਨਾਪਿ ਪੁਨ ਮਞ੍ਚਪੀਠਂ વਾ ਪਞ੍ਞਪੇਤ੍વਾ ਸਯਿਤ੍વਾ ਗਚ੍ਛਨ੍ਤੇਨ ਤਥੇવ ਕਾਤਬ੍ਬਂ। ਅਨ੍ਤੋਕੁਟ੍ਟਤੋ ਸੇਯ੍ਯਂ ਬਹਿਕੁਟ੍ਟੇ ਪਞ੍ਞਪੇਤ੍વਾ વਸਨ੍ਤੇਨ ਗਮਨਕਾਲੇ ਪੁਨ ਗਹਿਤਟ੍ਠਾਨੇਯੇવ ਪਟਿਸਾਮੇਤਬ੍ਬਂ। ਉਪਰਿਪਾਸਾਦਤੋ ਓਰੋਪੇਤ੍વਾ ਹੇਟ੍ਠਾਪਾਸਾਦੇ વਸਨ੍ਤਸ੍ਸਾਪਿ ਏਸੇવ ਨਯੋ। ਰਤ੍ਤਿਟ੍ਠਾਨਦਿવਾਟ੍ਠਾਨੇਸੁ ਮਞ੍ਚਪੀਠਂ ਪਞ੍ਞਪੇਤ੍વਾਪਿ ਗਮਨਕਾਲੇ ਪੁਨ ਗਹਿਤਟ੍ਠਾਨੇਯੇવ ਠਪੇਤਬ੍ਬਂ। ਉਦ੍ਧਰਾਪੇਤ੍વਾ ਗਮਨੇਪਿ ਏਸੇવ ਨਯੋ। ਆਪੁਚ੍ਛਿਤ੍વਾ ਗਚ੍ਛਨ੍ਤੇਨ ਪਨ ‘‘ਭਿਕ੍ਖੁਮ੍ਹਿ ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ’’ਤਿਆਦਿਨਾ (ਪਾਚਿ॰ ਅਟ੍ਠ॰ ੧੧੬) ਹੇਟ੍ਠਾ વੁਤ੍ਤਨਯੇਨੇવ ਆਪੁਚ੍ਛਿਤ੍વਾ ਗਨ੍ਤਬ੍ਬਂ।
Uddharaṇāni katvāti ettha uddharitvā gacchantena mañcapīṭhakavānaṃ sabbaṃ apanetvā (pāci. aṭṭha. 118) saṃharitvā cīvaravaṃse laggetvā gantabbaṃ. Pacchā āgantvā vasanakabhikkhunāpi puna mañcapīṭhaṃ vā paññapetvā sayitvā gacchantena tatheva kātabbaṃ. Antokuṭṭato seyyaṃ bahikuṭṭe paññapetvā vasantena gamanakāle puna gahitaṭṭhāneyeva paṭisāmetabbaṃ. Uparipāsādato oropetvā heṭṭhāpāsāde vasantassāpi eseva nayo. Rattiṭṭhānadivāṭṭhānesu mañcapīṭhaṃ paññapetvāpi gamanakāle puna gahitaṭṭhāneyeva ṭhapetabbaṃ. Uddharāpetvā gamanepi eseva nayo. Āpucchitvā gacchantena pana ‘‘bhikkhumhi sati bhikkhu āpucchitabbo’’tiādinā (pāci. aṭṭha. 116) heṭṭhā vuttanayeneva āpucchitvā gantabbaṃ.
ਦੁਤਿਯਸੇਨਾਸਨਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Dutiyasenāsanasikkhāpadavaṇṇanā niṭṭhitā.
