| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியஸிக்கா²பத³ங்
2. Dutiyasikkhāpadaṃ
936. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ த்³வே ஏகத்த²ரணபாவுரணா துவட்டெந்தி. மனுஸ்ஸா விஹாரசாரிகங் ஆஹிண்ட³ந்தா பஸ்ஸித்வா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ த்³வே ஏகத்த²ரணபாவுரணா துவட்டெஸ்ஸந்தி, ஸெய்யதா²பி கி³ஹினியோ காமபோ⁴கி³னியோ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ த்³வே ஏகத்த²ரணபாவுரணா துவட்டெஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ த்³வே ஏகத்த²ரணபாவுரணா துவட்டெந்தீதி? ‘‘ஸச்சங் , ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ த்³வே ஏகத்த²ரணபாவுரணா துவட்டெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
936. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo dve ekattharaṇapāvuraṇā tuvaṭṭenti. Manussā vihāracārikaṃ āhiṇḍantā passitvā ujjhāyanti khiyyanti vipācenti – ‘‘kathañhi nāma bhikkhuniyo dve ekattharaṇapāvuraṇā tuvaṭṭessanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo dve ekattharaṇapāvuraṇā tuvaṭṭessantī’’ti…pe… saccaṃ kira, bhikkhave, bhikkhuniyo dve ekattharaṇapāvuraṇā tuvaṭṭentīti? ‘‘Saccaṃ , bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo dve ekattharaṇapāvuraṇā tuvaṭṭessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
937. ‘‘யா பன பி⁴க்கு²னியோ த்³வே ஏகத்த²ரணபாவுரணா துவட்டெய்யுங், பாசித்திய’’ந்தி.
937.‘‘Yā pana bhikkhuniyo dve ekattharaṇapāvuraṇā tuvaṭṭeyyuṃ, pācittiya’’nti.
938. யா பனாதி யா யாதி³ஸா…பே॰… பி⁴க்கு²னியோதி உபஸம்பன்னாயோ வுச்சந்தி.
938.Yā panāti yā yādisā…pe… bhikkhuniyoti upasampannāyo vuccanti.
த்³வே ஏகத்த²ரணபாவுரணா துவட்டெய்யுந்தி தஞ்ஞேவ அத்த²ரித்வா தஞ்ஞேவ பாருபந்தி, ஆபத்தி பாசித்தியஸ்ஸ.
Dve ekattharaṇapāvuraṇā tuvaṭṭeyyunti taññeva attharitvā taññeva pārupanti, āpatti pācittiyassa.
939. ஏகத்த²ரணபாவுரணே ஏகத்த²ரணபாவுரணஸஞ்ஞா துவட்டெந்தி, ஆபத்தி பாசித்தியஸ்ஸ. ஏகத்த²ரணபாவுரணே வேமதிகா துவட்டெந்தி, ஆபத்தி பாசித்தியஸ்ஸ. ஏகத்த²ரணபாவுரணே நானத்த²ரணபாவுரணஸஞ்ஞா துவட்டெந்தி, ஆபத்தி பாசித்தியஸ்ஸ.
939. Ekattharaṇapāvuraṇe ekattharaṇapāvuraṇasaññā tuvaṭṭenti, āpatti pācittiyassa. Ekattharaṇapāvuraṇe vematikā tuvaṭṭenti, āpatti pācittiyassa. Ekattharaṇapāvuraṇe nānattharaṇapāvuraṇasaññā tuvaṭṭenti, āpatti pācittiyassa.
940. அனாபத்தி வவத்தா²னங் த³ஸ்ஸெத்வா நிபஜ்ஜந்தி, உம்மத்திகானங், ஆதி³கம்மிகானந்தி.
940. Anāpatti vavatthānaṃ dassetvā nipajjanti, ummattikānaṃ, ādikammikānanti.
து³தியஸிக்கா²பத³ங் நிட்டி²தங்.
Dutiyasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியஸிக்கா²பத³ங் • 2. Dutiyasikkhāpadaṃ
