| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியஸிக்கா²பத³ங்
2. Dutiyasikkhāpadaṃ
1028. தேன ஸமயேன பு³த்³தோ⁴ ப⁴க³வா வேஸாலியங் விஹரதி மஹாவனே கூடாகா³ரஸாலாயங். தேன கோ² பன ஸமயேன ஆயஸ்மதோ உபாலிஸ்ஸ உபஜ்ஜா²யோ ஆயஸ்மா கப்பிதகோ ஸுஸானே விஹரதி. தேன கோ² பன ஸமயேன ச²ப்³ப³க்³கி³யானங் பி⁴க்கு²னீனங் மஹத்தரா 1 பி⁴க்கு²னீ காலங்கதா ஹோதி. ச²ப்³ப³க்³கி³யா பி⁴க்கு²னியோ தங் பி⁴க்கு²னிங் நீஹரித்வா ஆயஸ்மதோ கப்பிதகஸ்ஸ விஹாரஸ்ஸ அவிதூ³ரே ஜா²பெத்வா தூ²பங் கத்வா க³ந்த்வா தஸ்மிங் தூ²பே ரோத³ந்தி. அத² கோ² ஆயஸ்மா கப்பிதகோ தேன ஸத்³தே³ன உப்³பா³ள்ஹோ தங் தூ²பங் பி⁴ந்தி³த்வா பகிரேஸி. ச²ப்³ப³க்³கி³யா பி⁴க்கு²னியோ – ‘‘இமினா கப்பிதகேன அம்ஹாகங் அய்யாய தூ²போ பி⁴ன்னோ, ஹந்த³ நங் கா⁴தேமா’’தி, மந்தேஸுங் . அஞ்ஞதரா பி⁴க்கு²னீ ஆயஸ்மதோ உபாலிஸ்ஸ ஏதமத்த²ங் ஆரோசேஸி. ஆயஸ்மா உபாலி ஆயஸ்மதோ கப்பிதகஸ்ஸ ஏதமத்த²ங் ஆரோசேஸி. அத² கோ² ஆயஸ்மா கப்பிதகோ விஹாரா நிக்க²மித்வா நிலீனோ அச்சி². அத² கோ² ச²ப்³ப³க்³கி³யா பி⁴க்கு²னியோ யேனாயஸ்மதோ கப்பிதகஸ்ஸ விஹாரோ தேனுபஸங்கமிங்ஸு ; உபஸங்கமித்வா ஆயஸ்மதோ கப்பிதகஸ்ஸ விஹாரங் பாஸாணேஹி ச லெட்³டூ³ஹி ச ஒத்த²ராபெத்வா, ‘‘மதோ கப்பிதகோ’’தி பக்கமிங்ஸு.
1028. Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena āyasmato upālissa upajjhāyo āyasmā kappitako susāne viharati. Tena kho pana samayena chabbaggiyānaṃ bhikkhunīnaṃ mahattarā 2 bhikkhunī kālaṅkatā hoti. Chabbaggiyā bhikkhuniyo taṃ bhikkhuniṃ nīharitvā āyasmato kappitakassa vihārassa avidūre jhāpetvā thūpaṃ katvā gantvā tasmiṃ thūpe rodanti. Atha kho āyasmā kappitako tena saddena ubbāḷho taṃ thūpaṃ bhinditvā pakiresi. Chabbaggiyā bhikkhuniyo – ‘‘iminā kappitakena amhākaṃ ayyāya thūpo bhinno, handa naṃ ghātemā’’ti, mantesuṃ . Aññatarā bhikkhunī āyasmato upālissa etamatthaṃ ārocesi. Āyasmā upāli āyasmato kappitakassa etamatthaṃ ārocesi. Atha kho āyasmā kappitako vihārā nikkhamitvā nilīno acchi. Atha kho chabbaggiyā bhikkhuniyo yenāyasmato kappitakassa vihāro tenupasaṅkamiṃsu ; upasaṅkamitvā āyasmato kappitakassa vihāraṃ pāsāṇehi ca leḍḍūhi ca ottharāpetvā, ‘‘mato kappitako’’ti pakkamiṃsu.
அத² கோ² ஆயஸ்மா கப்பிதகோ தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய வேஸாலிங் பிண்டா³ய பாவிஸி. அத்³த³ஸங்ஸு கோ² ச²ப்³ப³க்³கி³யா பி⁴க்கு²னியோ ஆயஸ்மந்தங் கப்பிதகங் பிண்டா³ய சரந்தங். தி³ஸ்வான ஏவமாஹங்ஸு – ‘‘அயங் கப்பிதகோ ஜீவதி, கோ நு கோ² அம்ஹாகங் மந்தங் ஸங்ஹரீ’’தி? அஸ்ஸோஸுங் கோ² ச²ப்³ப³க்³கி³யா பி⁴க்கு²னியோ – ‘‘அய்யேன கிர உபாலினா அம்ஹாகங் மந்தோ ஸங்ஹடோ’’தி. தா ஆயஸ்மந்தங் உபாலிங் அக்கோஸிங்ஸு – ‘‘கத²ஞ்ஹி நாம அயங் காஸாவடோ மலமஜ்ஜனோ நிஹீனஜச்சோ அம்ஹாகங் மந்தங் ஸங்ஹரிஸ்ஸதீ’’தி! யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ அய்யங் உபாலிங் அக்கோஸிஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கு²னியோ உபாலிங் அக்கோஸந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ உபாலிங் அக்கோஸிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே , பி⁴க்கு²னியோ இமங் ஸிக்கா²பத³ங் உத்³தி³ஸந்து –
Atha kho āyasmā kappitako tassā rattiyā accayena pubbaṇhasamayaṃ nivāsetvā pattacīvaramādāya vesāliṃ piṇḍāya pāvisi. Addasaṃsu kho chabbaggiyā bhikkhuniyo āyasmantaṃ kappitakaṃ piṇḍāya carantaṃ. Disvāna evamāhaṃsu – ‘‘ayaṃ kappitako jīvati, ko nu kho amhākaṃ mantaṃ saṃharī’’ti? Assosuṃ kho chabbaggiyā bhikkhuniyo – ‘‘ayyena kira upālinā amhākaṃ manto saṃhaṭo’’ti. Tā āyasmantaṃ upāliṃ akkosiṃsu – ‘‘kathañhi nāma ayaṃ kāsāvaṭo malamajjano nihīnajacco amhākaṃ mantaṃ saṃharissatī’’ti! Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo ayyaṃ upāliṃ akkosissantī’’ti…pe… saccaṃ kira, bhikkhave, chabbaggiyā bhikkhuniyo upāliṃ akkosantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo upāliṃ akkosissanti! Netaṃ, bhikkhave, appasannānaṃ vā pasādāya…pe… evañca pana, bhikkhave , bhikkhuniyo imaṃ sikkhāpadaṃ uddisantu –
1029. ‘‘யா பன பி⁴க்கு²னீ பி⁴க்கு²ங் அக்கோஸெய்ய வா பரிபா⁴ஸெய்ய வா, பாசித்திய’’ந்தி.
1029.‘‘Yā pana bhikkhunī bhikkhuṃ akkoseyya vā paribhāseyya vā, pācittiya’’nti.
1030. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1030.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பி⁴க்கு²ந்தி உபஸம்பன்னங். அக்கோஸெய்ய வாதி த³ஸஹி வா அக்கோஸவத்தூ²ஹி அக்கோஸதி ஏதேஸங் வா அஞ்ஞதரேன, ஆபத்தி பாசித்தியஸ்ஸ.
Bhikkhunti upasampannaṃ. Akkoseyya vāti dasahi vā akkosavatthūhi akkosati etesaṃ vā aññatarena, āpatti pācittiyassa.
பரிபா⁴ஸெய்ய வாதி ப⁴யங் உபத³ங்ஸேதி, ஆபத்தி பாசித்தியஸ்ஸ.
Paribhāseyya vāti bhayaṃ upadaṃseti, āpatti pācittiyassa.
1031. உபஸம்பன்னே உபஸம்பன்னஸஞ்ஞா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸ. உபஸம்பன்னே வேமதிகா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸ. உபஸம்பன்னே அனுபஸம்பன்னஸஞ்ஞா அக்கோஸதி வா பரிபா⁴ஸதி வா, ஆபத்தி பாசித்தியஸ்ஸ.
1031. Upasampanne upasampannasaññā akkosati vā paribhāsati vā, āpatti pācittiyassa. Upasampanne vematikā akkosati vā paribhāsati vā, āpatti pācittiyassa. Upasampanne anupasampannasaññā akkosati vā paribhāsati vā, āpatti pācittiyassa.
அனுபஸம்பன்னங் அக்கோஸதி வா பரிபா⁴ஸதி வா, ஆபத்தி து³க்கடஸ்ஸ. அனுபஸம்பன்னே உபஸம்பன்னஸஞ்ஞா, ஆபத்தி து³க்கடஸ்ஸ. அனுபஸம்பன்னே வேமதிகா, ஆபத்தி து³க்கடஸ்ஸ. அனுபஸம்பன்னே அனுபஸம்பன்னஸஞ்ஞா, ஆபத்தி து³க்கடஸ்ஸ.
Anupasampannaṃ akkosati vā paribhāsati vā, āpatti dukkaṭassa. Anupasampanne upasampannasaññā, āpatti dukkaṭassa. Anupasampanne vematikā, āpatti dukkaṭassa. Anupasampanne anupasampannasaññā, āpatti dukkaṭassa.
1032. அனாபத்தி அத்த²புரெக்கா²ராய, த⁴ம்மபுரெக்கா²ராய, அனுஸாஸனிபுரெக்கா²ராய, உம்மத்திகாய, ஆதி³கம்மிகாயாதி.
1032. Anāpatti atthapurekkhārāya, dhammapurekkhārāya, anusāsanipurekkhārāya, ummattikāya, ādikammikāyāti.
து³தியஸிக்கா²பத³ங் நிட்டி²தங்.
Dutiyasikkhāpadaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 1. பட²மாதி³ஸிக்கா²பத³வண்ணனா • 1. Paṭhamādisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியஸிக்கா²பத³ங் • 2. Dutiyasikkhāpadaṃ
