| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியஸிக்கா²பத³ங்
2. Dutiyasikkhāpadaṃ
1124. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பி⁴க்கு²னியோ பரிபுண்ணவீஸதிவஸ்ஸங் குமாரிபூ⁴தங் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ங் வுட்டா²பெந்தி. தா பா³லா ஹொந்தி அப்³யத்தா; ந ஜானந்தி கப்பியங் வா அகப்பியங் வா. யா தா பி⁴க்கு²னியோ அப்பிச்சா²…பே॰… தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ பரிபுண்ணவீஸதிவஸ்ஸங் குமாரிபூ⁴தங் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ங் வுட்டா²பெஸ்ஸந்தீ’’தி…பே॰… ஸச்சங் கிர, பி⁴க்க²வே, பி⁴க்கு²னியோ பரிபுண்ணவீஸதிவஸ்ஸங் குமாரிபூ⁴தங் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ங் வுட்டா²பெந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, பி⁴க்கு²னியோ பரிபுண்ணவீஸதிவஸ்ஸங் குமாரிபூ⁴தங் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ங் வுட்டா²பெஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… விக³ரஹித்வா…பே॰… த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, அட்டா²ரஸவஸ்ஸாய குமாரிபூ⁴தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிங் தா³துங். ஏவஞ்ச பன பி⁴க்க²வே தா³தப்³பா³. தாய அட்டா²ரஸவஸ்ஸாய குமாரிபூ⁴தாய ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா பி⁴க்கு²னீனங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ – அஹங், அய்யே , இத்த²ன்னாமா இத்த²ன்னாமாய அய்யாய அட்டா²ரஸவஸ்ஸா குமாரிபூ⁴தா ஸங்க⁴ங் த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிங் யாசாமீ’’தி. து³தியம்பி யாசிதப்³பா³. ததியம்பி யாசிதப்³பா³. ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –
1124. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhuniyo paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpenti. Tā bālā honti abyattā; na jānanti kappiyaṃ vā akappiyaṃ vā. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpessantī’’ti…pe… saccaṃ kira, bhikkhave, bhikkhuniyo paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpessanti! Netaṃ, bhikkhave, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘anujānāmi, bhikkhave, aṭṭhārasavassāya kumāribhūtāya dve vassāni chasu dhammesu sikkhāsammutiṃ dātuṃ. Evañca pana bhikkhave dātabbā. Tāya aṭṭhārasavassāya kumāribhūtāya saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhunīnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo – ahaṃ, ayye , itthannāmā itthannāmāya ayyāya aṭṭhārasavassā kumāribhūtā saṅghaṃ dve vassāni chasu dhammesu sikkhāsammutiṃ yācāmī’’ti. Dutiyampi yācitabbā. Tatiyampi yācitabbā. Byattāya bhikkhuniyā paṭibalāya saṅgho ñāpetabbo –
1125. ‘‘ஸுணாது மே, அய்யே, ஸங்கோ⁴. அயங் இத்த²ன்னாமா இத்த²ன்னாமாய அய்யாய அட்டா²ரஸவஸ்ஸா குமாரிபூ⁴தா ஸங்க⁴ங் த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமாய அட்டா²ரஸவஸ்ஸாய குமாரிபூ⁴தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிங் த³தெ³ய்ய. ஏஸா ஞத்தி.
1125. ‘‘Suṇātu me, ayye, saṅgho. Ayaṃ itthannāmā itthannāmāya ayyāya aṭṭhārasavassā kumāribhūtā saṅghaṃ dve vassāni chasu dhammesu sikkhāsammutiṃ yācati. Yadi saṅghassa pattakallaṃ, saṅgho itthannāmāya aṭṭhārasavassāya kumāribhūtāya dve vassāni chasu dhammesu sikkhāsammutiṃ dadeyya. Esā ñatti.
‘‘ஸுணாது மே, அய்யே, ஸங்கோ⁴. அயங் இத்த²ன்னாமா இத்த²ன்னாமாய அய்யாய அட்டா²ரஸவஸ்ஸா குமாரிபூ⁴தா ஸங்க⁴ங் த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிங் யாசதி. ஸங்கோ⁴ இத்த²ன்னாமாய அட்டா²ரஸவஸ்ஸாய குமாரிபூ⁴தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதிங் தே³தி. யஸ்ஸா அய்யாய க²மதி இத்த²ன்னாமாய அட்டா²ரஸவஸ்ஸாய குமாரிபூ⁴தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதியா தா³னங், ஸா துண்ஹஸ்ஸ; யஸ்ஸா நக்க²மதி, ஸா பா⁴ஸெய்ய.
‘‘Suṇātu me, ayye, saṅgho. Ayaṃ itthannāmā itthannāmāya ayyāya aṭṭhārasavassā kumāribhūtā saṅghaṃ dve vassāni chasu dhammesu sikkhāsammutiṃ yācati. Saṅgho itthannāmāya aṭṭhārasavassāya kumāribhūtāya dve vassāni chasu dhammesu sikkhāsammutiṃ deti. Yassā ayyāya khamati itthannāmāya aṭṭhārasavassāya kumāribhūtāya dve vassāni chasu dhammesu sikkhāsammutiyā dānaṃ, sā tuṇhassa; yassā nakkhamati, sā bhāseyya.
‘‘தி³ன்னா ஸங்கே⁴ன இத்த²ன்னாமாய அட்டா²ரஸவஸ்ஸாய குமாரிபூ⁴தாய த்³வே வஸ்ஸானி ச²ஸு த⁴ம்மேஸு ஸிக்கா²ஸம்முதி. க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Dinnā saṅghena itthannāmāya aṭṭhārasavassāya kumāribhūtāya dve vassāni chasu dhammesu sikkhāsammuti. Khamati saṅghassa, tasmā tuṇhī, evametaṃ dhārayāmī’’ti.
ஸா அட்டா²ரஸவஸ்ஸா குமாரிபூ⁴தா ஏவங் வதே³ஹீதி வத்தப்³பா³ – ‘‘பாணாதிபாதா வேரமணிங் த்³வே வஸ்ஸானி அவீதிக்கம்ம ஸமாதா³னங் ஸமாதி³யாமி…பே॰… விகாலபோ⁴ஜனா வேரமணிங் த்³வே வஸ்ஸானி அவீதிக்கம்ம ஸமாதா³னங் ஸமாதி³யாமீ’’தி.
Sā aṭṭhārasavassā kumāribhūtā evaṃ vadehīti vattabbā – ‘‘pāṇātipātā veramaṇiṃ dve vassāni avītikkamma samādānaṃ samādiyāmi…pe… vikālabhojanā veramaṇiṃ dve vassāni avītikkamma samādānaṃ samādiyāmī’’ti.
அத² கோ² ப⁴க³வா தா பி⁴க்கு²னியோ அனேகபரியாயேன விக³ரஹித்வா து³ப்³ப⁴ரதாய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
Atha kho bhagavā tā bhikkhuniyo anekapariyāyena vigarahitvā dubbharatāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
1126. ‘‘யா பன பி⁴க்கு²னீ பரிபுண்ணவீஸதிவஸ்ஸங் குமாரிபூ⁴தங் த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ங் வுட்டா²பெய்ய, பாசித்திய’’ந்தி.
1126.‘‘Yā pana bhikkhunī paripuṇṇavīsativassaṃ kumāribhūtaṃ dve vassāni chasu dhammesu asikkhitasikkhaṃ vuṭṭhāpeyya, pācittiya’’nti.
1127. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1127.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
பரிபுண்ணவீஸதிவஸ்ஸா நாம பத்தவீஸதிவஸ்ஸா. குமாரிபூ⁴தா நாம ஸாமணேரீ வுச்சதி. த்³வே வஸ்ஸானீதி த்³வே ஸங்வச்ச²ரானி. அஸிக்கி²தஸிக்கா² நாம ஸிக்கா² வா ந தி³ன்னா ஹோதி, தி³ன்னா வா ஸிக்கா² குபிதா. வுட்டா²பெய்யாதி உபஸம்பாதெ³ய்ய.
Paripuṇṇavīsativassā nāma pattavīsativassā. Kumāribhūtā nāma sāmaṇerī vuccati. Dve vassānīti dve saṃvaccharāni. Asikkhitasikkhā nāma sikkhā vā na dinnā hoti, dinnā vā sikkhā kupitā. Vuṭṭhāpeyyāti upasampādeyya.
‘‘வுட்டா²பெஸ்ஸாமீ’’தி க³ணங் வா ஆசரினிங் வா பத்தங் வா சீவரங் வா பரியேஸதி, ஸீமங் வா ஸம்மன்னதி, ஆபத்தி து³க்கடஸ்ஸ. ஞத்தியா து³க்கடங். த்³வீஹி கம்மவாசாஹி து³க்கடா. கம்மவாசாபரியோஸானே உபஜ்ஜா²யாய ஆபத்தி பாசித்தியஸ்ஸ. க³ணஸ்ஸ ச ஆசரினியா ச ஆபத்தி து³க்கடஸ்ஸ.
‘‘Vuṭṭhāpessāmī’’ti gaṇaṃ vā ācariniṃ vā pattaṃ vā cīvaraṃ vā pariyesati, sīmaṃ vā sammannati, āpatti dukkaṭassa. Ñattiyā dukkaṭaṃ. Dvīhi kammavācāhi dukkaṭā. Kammavācāpariyosāne upajjhāyāya āpatti pācittiyassa. Gaṇassa ca ācariniyā ca āpatti dukkaṭassa.
1128. த⁴ம்மகம்மே த⁴ம்மகம்மஸஞ்ஞா வுட்டா²பேதி, ஆபத்தி பாசித்தியஸ்ஸ . த⁴ம்மகம்மே வேமதிகா வுட்டா²பேதி, ஆபத்தி பாசித்தியஸ்ஸ. த⁴ம்மகம்மே அத⁴ம்மகம்மஸஞ்ஞா வுட்டா²பேதி, ஆபத்தி பாசித்தியஸ்ஸ.
1128. Dhammakamme dhammakammasaññā vuṭṭhāpeti, āpatti pācittiyassa . Dhammakamme vematikā vuṭṭhāpeti, āpatti pācittiyassa. Dhammakamme adhammakammasaññā vuṭṭhāpeti, āpatti pācittiyassa.
அத⁴ம்மகம்மே த⁴ம்மகம்மஸஞ்ஞா, ஆபத்தி து³க்கடஸ்ஸ. அத⁴ம்மகம்மே வேமதிகா, ஆபத்தி து³க்கடஸ்ஸ. அத⁴ம்மகம்மே அத⁴ம்மகம்மஸஞ்ஞா, ஆபத்தி து³க்கடஸ்ஸ.
Adhammakamme dhammakammasaññā, āpatti dukkaṭassa. Adhammakamme vematikā, āpatti dukkaṭassa. Adhammakamme adhammakammasaññā, āpatti dukkaṭassa.
1129. அனாபத்தி பரிபுண்ணவீஸதிவஸ்ஸங் குமாரிபூ⁴தங் த்³வே வஸ்ஸானி ச²ஸு த⁴ம்மேஸு ஸிக்கி²தஸிக்க²ங் வுட்டா²பேதி, உம்மத்திகாய, ஆதி³கம்மிகாயாதி.
1129. Anāpatti paripuṇṇavīsativassaṃ kumāribhūtaṃ dve vassāni chasu dhammesu sikkhitasikkhaṃ vuṭṭhāpeti, ummattikāya, ādikammikāyāti.
து³தியஸிக்கா²பத³ங் நிட்டி²தங்.
Dutiyasikkhāpadaṃ niṭṭhitaṃ.
Related texts:
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 2. து³தியாதி³ஸிக்கா²பத³வண்ணனா • 2. Dutiyādisikkhāpadavaṇṇanā
