| Library / Tipiṭaka / திபிடக • Tipiṭaka / பி⁴க்கு²னீவிப⁴ங்க³ • Bhikkhunīvibhaṅga |
2. து³தியஸிக்கா²பத³ங்
2. Dutiyasikkhāpadaṃ
1184. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ச²ப்³ப³க்³கி³யா பி⁴க்கு²னியோ யானேன யாயந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பி⁴க்கு²னியோ யானேன யாயிஸ்ஸந்தி, ஸெய்யதா²பி கி³ஹினியோ காமபோ⁴கி³னியோ’’தி! அஸ்ஸோஸுங் கோ² பி⁴க்கு²னியோ தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். யா தா பி⁴க்கு²னியோ அப்பிச்சா²…பே॰ … தா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ச²ப்³ப³க்³கி³யா பி⁴க்கு²னியோ யானேன யாயிஸ்ஸந்தீ’’தி…பே॰… ஸச்சங் கிர, பி⁴க்க²வே, ச²ப்³ப³க்³கி³யா பி⁴க்கு²னியோ யானேன யாயந்தீதி? ‘‘ஸச்சங், ப⁴க³வா’’தி. விக³ரஹி பு³த்³தோ⁴ ப⁴க³வா…பே॰… கத²ஞ்ஹி நாம, பி⁴க்க²வே, ச²ப்³ப³க்³கி³யா பி⁴க்கு²னியோ யானேன யாயிஸ்ஸந்தி! நேதங், பி⁴க்க²வே, அப்பஸன்னானங் வா பஸாதா³ய…பே॰… ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1184. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo yānena yāyanti. Manussā ujjhāyanti khiyyanti vipācenti – ‘‘kathañhi nāma bhikkhuniyo yānena yāyissanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe. … tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo yānena yāyissantī’’ti…pe… saccaṃ kira, bhikkhave, chabbaggiyā bhikkhuniyo yānena yāyantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo yānena yāyissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘யா பன பி⁴க்கு²னீ யானேன யாயெய்ய, பாசித்திய’’ந்தி.
‘‘Yāpana bhikkhunī yānena yāyeyya, pācittiya’’nti.
ஏவஞ்சித³ங் ப⁴க³வதா பி⁴க்கு²னீனங் ஸிக்கா²பத³ங் பஞ்ஞத்தங் ஹோதி.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1185. தேன கோ² பன ஸமயேன அஞ்ஞதரா பி⁴க்கு²னீ கி³லானா ஹோதி, ந ஸக்கோதி பத³ஸா க³ந்துங்…பே॰… ப⁴க³வதோ ஏதமத்த²ங் ஆரோசேஸுங்…பே॰… அனுஜானாமி, பி⁴க்க²வே, கி³லானாய பி⁴க்கு²னியா யானங். ஏவஞ்ச பன, பி⁴க்க²வே, பி⁴க்கு²னியோ இமங் ஸிக்கா²பத³ங் உத்³தி³ஸந்து –
1185. Tena kho pana samayena aññatarā bhikkhunī gilānā hoti, na sakkoti padasā gantuṃ…pe… bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā yānaṃ. Evañca pana, bhikkhave, bhikkhuniyo imaṃ sikkhāpadaṃ uddisantu –
1186. ‘‘யா பன பி⁴க்கு²னீ அகி³லானா யானேன யாயெய்ய, பாசித்திய’’ந்தி.
1186.‘‘Yāpana bhikkhunī agilānā yānena yāyeyya, pācittiya’’nti.
1187. யா பனாதி யா யாதி³ஸா…பே॰… பி⁴க்கு²னீதி…பே॰… அயங் இமஸ்மிங் அத்தே² அதி⁴ப்பேதா பி⁴க்கு²னீதி.
1187.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
அகி³லானா நாம ஸக்கோதி பத³ஸா க³ந்துங்.
Agilānā nāma sakkoti padasā gantuṃ.
கி³லானா நாம ந ஸக்கோதி பத³ஸா க³ந்துங்.
Gilānā nāma na sakkoti padasā gantuṃ.
யானங் நாம வய்ஹங் ரதோ² ஸகடங் ஸந்த³மானிகா ஸிவிகா பாடங்கீ.
Yānaṃ nāma vayhaṃ ratho sakaṭaṃ sandamānikā sivikā pāṭaṅkī.
யாயெய்யாதி ஸகிம்பி யானேன யாயதி, ஆபத்தி பாசித்தியஸ்ஸ.
Yāyeyyāti sakimpi yānena yāyati, āpatti pācittiyassa.
1188. அகி³லானா அகி³லானஸஞ்ஞா யானேன யாயதி, ஆபத்தி பாசித்தியஸ்ஸ. அகி³லானா வேமதிகா யானேன யாயதி, ஆபத்தி பாசித்தியஸ்ஸ . அகி³லானா கி³லானஸஞ்ஞா யானேன யாயதி, ஆபத்தி பாசித்தியஸ்ஸ.
1188. Agilānā agilānasaññā yānena yāyati, āpatti pācittiyassa. Agilānā vematikā yānena yāyati, āpatti pācittiyassa . Agilānā gilānasaññā yānena yāyati, āpatti pācittiyassa.
கி³லானா அகி³லானஸஞ்ஞா, ஆபத்தி து³க்கடஸ்ஸ. கி³லானா வேமதிகா, ஆபத்தி து³க்கடஸ்ஸ. கி³லானா கி³லானஸஞ்ஞா, அனாபத்தி.
Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā, anāpatti.
1189. அனாபத்தி கி³லானாய, ஆபதா³ஸு, உம்மத்திகாய, ஆதி³கம்மிகாயாதி.
1189. Anāpatti gilānāya, āpadāsu, ummattikāya, ādikammikāyāti.
து³தியஸிக்கா²பத³ங் நிட்டி²தங்.
Dutiyasikkhāpadaṃ niṭṭhitaṃ.
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / பி⁴க்கு²னீவிப⁴ங்க³-அட்ட²கதா² • Bhikkhunīvibhaṅga-aṭṭhakathā / 2. து³தியஸிக்கா²பத³வண்ணனா • 2. Dutiyasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 2. து³தியஸிக்கா²பத³ங் • 2. Dutiyasikkhāpadaṃ
