| Library / Tipiṭaka / д̇ибидага • Tipiṭaka / бхигкунийвибхан̇г̇а • Bhikkhunīvibhaṅga |
2. д̣̇уд̇ияасигкаабад̣̇ам̣
2. Dutiyasikkhāpadaṃ
1028. д̇зна самаязна б̣уд̣̇д̇хо бхаг̇аваа взсаалияам̣ вихарад̇и махааванз гуудааг̇аарасаалааяам̣. д̇зна ко бана самаязна ааяасмад̇о убаалисса убаж̇жхааяо ааяасмаа габбид̇аго сусаанз вихарад̇и. д̇зна ко бана самаязна чаб̣б̣аг̇г̇ияаанам̣ бхигкунийнам̣ махад̇д̇араа 1 бхигкуний гаалан̇гад̇аа ход̇и. чаб̣б̣аг̇г̇ияаа бхигкунияо д̇ам̣ бхигкуним̣ нийхарид̇ваа ааяасмад̇о габбид̇агасса вихаарасса авид̣̇уурз жхаабзд̇ваа т̇уубам̣ гад̇ваа г̇анд̇ваа д̇асмим̣ т̇уубз род̣̇анд̇и. ат̇а ко ааяасмаа габбид̇аго д̇зна сад̣̇д̣̇зна уб̣б̣аал̣хо д̇ам̣ т̇уубам̣ бхинд̣̇ид̇ваа багирзси. чаб̣б̣аг̇г̇ияаа бхигкунияо – ‘‘иминаа габбид̇агзна амхаагам̣ аяяааяа т̇уубо бхинно, ханд̣̇а нам̣ гхаад̇змаа’’д̇и, манд̇зсум̣ . ан̃н̃ад̇араа бхигкуний ааяасмад̇о убаалисса зд̇амад̇т̇ам̣ аарожзси. ааяасмаа убаали ааяасмад̇о габбид̇агасса зд̇амад̇т̇ам̣ аарожзси. ат̇а ко ааяасмаа габбид̇аго вихаараа нигкамид̇ваа нилийно ажчи. ат̇а ко чаб̣б̣аг̇г̇ияаа бхигкунияо язнааяасмад̇о габбид̇агасса вихааро д̇знубасан̇гамим̣су ; убасан̇гамид̇ваа ааяасмад̇о габбид̇агасса вихаарам̣ баасаан̣зхи жа лзд̣д̣уухи жа од̇т̇араабзд̇ваа, ‘‘мад̇о габбид̇аго’’д̇и баггамим̣су.
1028. Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena āyasmato upālissa upajjhāyo āyasmā kappitako susāne viharati. Tena kho pana samayena chabbaggiyānaṃ bhikkhunīnaṃ mahattarā 2 bhikkhunī kālaṅkatā hoti. Chabbaggiyā bhikkhuniyo taṃ bhikkhuniṃ nīharitvā āyasmato kappitakassa vihārassa avidūre jhāpetvā thūpaṃ katvā gantvā tasmiṃ thūpe rodanti. Atha kho āyasmā kappitako tena saddena ubbāḷho taṃ thūpaṃ bhinditvā pakiresi. Chabbaggiyā bhikkhuniyo – ‘‘iminā kappitakena amhākaṃ ayyāya thūpo bhinno, handa naṃ ghātemā’’ti, mantesuṃ . Aññatarā bhikkhunī āyasmato upālissa etamatthaṃ ārocesi. Āyasmā upāli āyasmato kappitakassa etamatthaṃ ārocesi. Atha kho āyasmā kappitako vihārā nikkhamitvā nilīno acchi. Atha kho chabbaggiyā bhikkhuniyo yenāyasmato kappitakassa vihāro tenupasaṅkamiṃsu ; upasaṅkamitvā āyasmato kappitakassa vihāraṃ pāsāṇehi ca leḍḍūhi ca ottharāpetvā, ‘‘mato kappitako’’ti pakkamiṃsu.
ат̇а ко ааяасмаа габбид̇аго д̇ассаа рад̇д̇ияаа ажжаязна буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа взсаалим̣ бин̣д̣ааяа баависи. ад̣̇д̣̇асам̣су ко чаб̣б̣аг̇г̇ияаа бхигкунияо ааяасманд̇ам̣ габбид̇агам̣ бин̣д̣ааяа жаранд̇ам̣. д̣̇исваана звамаахам̣су – ‘‘аяам̣ габбид̇аго ж̇ийвад̇и, го ну ко амхаагам̣ манд̇ам̣ сам̣харий’’д̇и? ассосум̣ ко чаб̣б̣аг̇г̇ияаа бхигкунияо – ‘‘аяязна гира убаалинаа амхаагам̣ манд̇о сам̣хадо’’д̇и. д̇аа ааяасманд̇ам̣ убаалим̣ аггосим̣су – ‘‘гат̇ан̃хи наама аяам̣ гаасаавадо маламаж̇ж̇ано нихийнаж̇ажжо амхаагам̣ манд̇ам̣ сам̣хариссад̇ий’’д̇и! яаа д̇аа бхигкунияо аббижчаа…бз… д̇аа уж̇жхааяанд̇и кияяанд̇и вибаажзнд̇и – ‘‘гат̇ан̃хи наама чаб̣б̣аг̇г̇ияаа бхигкунияо аяяам̣ убаалим̣ аггосиссанд̇ий’’д̇и…бз… сажжам̣ гира, бхигкавз, чаб̣б̣аг̇г̇ияаа бхигкунияо убаалим̣ аггосанд̇ийд̇и? ‘‘сажжам̣, бхаг̇аваа’’д̇и. виг̇арахи б̣уд̣̇д̇хо бхаг̇аваа…бз… гат̇ан̃хи наама, бхигкавз, чаб̣б̣аг̇г̇ияаа бхигкунияо убаалим̣ аггосиссанд̇и! нзд̇ам̣, бхигкавз, аббасаннаанам̣ ваа басаад̣̇ааяа…бз… зван̃жа бана, бхигкавз , бхигкунияо имам̣ сигкаабад̣̇ам̣ уд̣̇д̣̇исанд̇у –
Atha kho āyasmā kappitako tassā rattiyā accayena pubbaṇhasamayaṃ nivāsetvā pattacīvaramādāya vesāliṃ piṇḍāya pāvisi. Addasaṃsu kho chabbaggiyā bhikkhuniyo āyasmantaṃ kappitakaṃ piṇḍāya carantaṃ. Disvāna evamāhaṃsu – ‘‘ayaṃ kappitako jīvati, ko nu kho amhākaṃ mantaṃ saṃharī’’ti? Assosuṃ kho chabbaggiyā bhikkhuniyo – ‘‘ayyena kira upālinā amhākaṃ manto saṃhaṭo’’ti. Tā āyasmantaṃ upāliṃ akkosiṃsu – ‘‘kathañhi nāma ayaṃ kāsāvaṭo malamajjano nihīnajacco amhākaṃ mantaṃ saṃharissatī’’ti! Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo ayyaṃ upāliṃ akkosissantī’’ti…pe… saccaṃ kira, bhikkhave, chabbaggiyā bhikkhuniyo upāliṃ akkosantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo upāliṃ akkosissanti! Netaṃ, bhikkhave, appasannānaṃ vā pasādāya…pe… evañca pana, bhikkhave , bhikkhuniyo imaṃ sikkhāpadaṃ uddisantu –
1029. ‘‘яаа бана бхигкуний бхигкум̣ аггосзяяа ваа барибхаасзяяа ваа, баажид̇д̇ияа’’нд̇и.
1029.‘‘Yā pana bhikkhunī bhikkhuṃ akkoseyya vā paribhāseyya vā, pācittiya’’nti.
1030. яаа банаад̇и яаа яаад̣̇исаа…бз… бхигкунийд̇и…бз… аяам̣ имасмим̣ ад̇т̇з ад̇хиббзд̇аа бхигкунийд̇и.
1030.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
бхигкунд̇и убасамбаннам̣. аггосзяяа ваад̇и д̣̇асахи ваа аггосавад̇т̇уухи аггосад̇и зд̇зсам̣ ваа ан̃н̃ад̇арзна, аабад̇д̇и баажид̇д̇ияасса.
Bhikkhunti upasampannaṃ. Akkoseyya vāti dasahi vā akkosavatthūhi akkosati etesaṃ vā aññatarena, āpatti pācittiyassa.
барибхаасзяяа ваад̇и бхаяам̣ убад̣̇ам̣сзд̇и, аабад̇д̇и баажид̇д̇ияасса.
Paribhāseyya vāti bhayaṃ upadaṃseti, āpatti pācittiyassa.
1031. убасамбаннз убасамбаннасан̃н̃аа аггосад̇и ваа барибхаасад̇и ваа, аабад̇д̇и баажид̇д̇ияасса. убасамбаннз взмад̇игаа аггосад̇и ваа барибхаасад̇и ваа, аабад̇д̇и баажид̇д̇ияасса. убасамбаннз анубасамбаннасан̃н̃аа аггосад̇и ваа барибхаасад̇и ваа, аабад̇д̇и баажид̇д̇ияасса.
1031. Upasampanne upasampannasaññā akkosati vā paribhāsati vā, āpatti pācittiyassa. Upasampanne vematikā akkosati vā paribhāsati vā, āpatti pācittiyassa. Upasampanne anupasampannasaññā akkosati vā paribhāsati vā, āpatti pācittiyassa.
анубасамбаннам̣ аггосад̇и ваа барибхаасад̇и ваа, аабад̇д̇и д̣̇уггадасса. анубасамбаннз убасамбаннасан̃н̃аа, аабад̇д̇и д̣̇уггадасса. анубасамбаннз взмад̇игаа, аабад̇д̇и д̣̇уггадасса. анубасамбаннз анубасамбаннасан̃н̃аа, аабад̇д̇и д̣̇уггадасса.
Anupasampannaṃ akkosati vā paribhāsati vā, āpatti dukkaṭassa. Anupasampanne upasampannasaññā, āpatti dukkaṭassa. Anupasampanne vematikā, āpatti dukkaṭassa. Anupasampanne anupasampannasaññā, āpatti dukkaṭassa.
1032. анаабад̇д̇и ад̇т̇абурзгкаарааяа, д̇хаммабурзгкаарааяа, анусаасанибурзгкаарааяа, уммад̇д̇игааяа, аад̣̇игаммигааяаад̇и.
1032. Anāpatti atthapurekkhārāya, dhammapurekkhārāya, anusāsanipurekkhārāya, ummattikāya, ādikammikāyāti.
д̣̇уд̇ияасигкаабад̣̇ам̣ нидтид̇ам̣.
Dutiyasikkhāpadaṃ niṭṭhitaṃ.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / бхигкунийвибхан̇г̇а-адтагат̇аа • Bhikkhunīvibhaṅga-aṭṭhakathā / 2. д̣̇уд̇ияасигкаабад̣̇аван̣н̣анаа • 2. Dutiyasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 2. д̣̇уд̇ияасигкаабад̣̇аван̣н̣анаа • 2. Dutiyasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 1. батамаад̣̇исигкаабад̣̇аван̣н̣анаа • 1. Paṭhamādisikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 2. д̣̇уд̇ияасигкаабад̣̇ам̣ • 2. Dutiyasikkhāpadaṃ
