| Library / Tipiṭaka / ತಿಪಿಟಕ • Tipiṭaka / ಭಿಕ್ಖುನೀವಿಭಙ್ಗ • Bhikkhunīvibhaṅga |
೨. ದುತಿಯಸಿಕ್ಖಾಪದಂ
2. Dutiyasikkhāpadaṃ
೧೦೨೮. ತೇನ ಸಮಯೇನ ಬುದ್ಧೋ ಭಗವಾ ವೇಸಾಲಿಯಂ ವಿಹರತಿ ಮಹಾವನೇ ಕೂಟಾಗಾರಸಾಲಾಯಂ। ತೇನ ಖೋ ಪನ ಸಮಯೇನ ಆಯಸ್ಮತೋ ಉಪಾಲಿಸ್ಸ ಉಪಜ್ಝಾಯೋ ಆಯಸ್ಮಾ ಕಪ್ಪಿತಕೋ ಸುಸಾನೇ ವಿಹರತಿ। ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾನಂ ಭಿಕ್ಖುನೀನಂ ಮಹತ್ತರಾ 1 ಭಿಕ್ಖುನೀ ಕಾಲಙ್ಕತಾ ಹೋತಿ। ಛಬ್ಬಗ್ಗಿಯಾ ಭಿಕ್ಖುನಿಯೋ ತಂ ಭಿಕ್ಖುನಿಂ ನೀಹರಿತ್ವಾ ಆಯಸ್ಮತೋ ಕಪ್ಪಿತಕಸ್ಸ ವಿಹಾರಸ್ಸ ಅವಿದೂರೇ ಝಾಪೇತ್ವಾ ಥೂಪಂ ಕತ್ವಾ ಗನ್ತ್ವಾ ತಸ್ಮಿಂ ಥೂಪೇ ರೋದನ್ತಿ। ಅಥ ಖೋ ಆಯಸ್ಮಾ ಕಪ್ಪಿತಕೋ ತೇನ ಸದ್ದೇನ ಉಬ್ಬಾಳ್ಹೋ ತಂ ಥೂಪಂ ಭಿನ್ದಿತ್ವಾ ಪಕಿರೇಸಿ। ಛಬ್ಬಗ್ಗಿಯಾ ಭಿಕ್ಖುನಿಯೋ – ‘‘ಇಮಿನಾ ಕಪ್ಪಿತಕೇನ ಅಮ್ಹಾಕಂ ಅಯ್ಯಾಯ ಥೂಪೋ ಭಿನ್ನೋ, ಹನ್ದ ನಂ ಘಾತೇಮಾ’’ತಿ, ಮನ್ತೇಸುಂ । ಅಞ್ಞತರಾ ಭಿಕ್ಖುನೀ ಆಯಸ್ಮತೋ ಉಪಾಲಿಸ್ಸ ಏತಮತ್ಥಂ ಆರೋಚೇಸಿ। ಆಯಸ್ಮಾ ಉಪಾಲಿ ಆಯಸ್ಮತೋ ಕಪ್ಪಿತಕಸ್ಸ ಏತಮತ್ಥಂ ಆರೋಚೇಸಿ। ಅಥ ಖೋ ಆಯಸ್ಮಾ ಕಪ್ಪಿತಕೋ ವಿಹಾರಾ ನಿಕ್ಖಮಿತ್ವಾ ನಿಲೀನೋ ಅಚ್ಛಿ। ಅಥ ಖೋ ಛಬ್ಬಗ್ಗಿಯಾ ಭಿಕ್ಖುನಿಯೋ ಯೇನಾಯಸ್ಮತೋ ಕಪ್ಪಿತಕಸ್ಸ ವಿಹಾರೋ ತೇನುಪಸಙ್ಕಮಿಂಸು ; ಉಪಸಙ್ಕಮಿತ್ವಾ ಆಯಸ್ಮತೋ ಕಪ್ಪಿತಕಸ್ಸ ವಿಹಾರಂ ಪಾಸಾಣೇಹಿ ಚ ಲೇಡ್ಡೂಹಿ ಚ ಓತ್ಥರಾಪೇತ್ವಾ, ‘‘ಮತೋ ಕಪ್ಪಿತಕೋ’’ತಿ ಪಕ್ಕಮಿಂಸು।
1028. Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena āyasmato upālissa upajjhāyo āyasmā kappitako susāne viharati. Tena kho pana samayena chabbaggiyānaṃ bhikkhunīnaṃ mahattarā 2 bhikkhunī kālaṅkatā hoti. Chabbaggiyā bhikkhuniyo taṃ bhikkhuniṃ nīharitvā āyasmato kappitakassa vihārassa avidūre jhāpetvā thūpaṃ katvā gantvā tasmiṃ thūpe rodanti. Atha kho āyasmā kappitako tena saddena ubbāḷho taṃ thūpaṃ bhinditvā pakiresi. Chabbaggiyā bhikkhuniyo – ‘‘iminā kappitakena amhākaṃ ayyāya thūpo bhinno, handa naṃ ghātemā’’ti, mantesuṃ . Aññatarā bhikkhunī āyasmato upālissa etamatthaṃ ārocesi. Āyasmā upāli āyasmato kappitakassa etamatthaṃ ārocesi. Atha kho āyasmā kappitako vihārā nikkhamitvā nilīno acchi. Atha kho chabbaggiyā bhikkhuniyo yenāyasmato kappitakassa vihāro tenupasaṅkamiṃsu ; upasaṅkamitvā āyasmato kappitakassa vihāraṃ pāsāṇehi ca leḍḍūhi ca ottharāpetvā, ‘‘mato kappitako’’ti pakkamiṃsu.
ಅಥ ಖೋ ಆಯಸ್ಮಾ ಕಪ್ಪಿತಕೋ ತಸ್ಸಾ ರತ್ತಿಯಾ ಅಚ್ಚಯೇನ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ವೇಸಾಲಿಂ ಪಿಣ್ಡಾಯ ಪಾವಿಸಿ। ಅದ್ದಸಂಸು ಖೋ ಛಬ್ಬಗ್ಗಿಯಾ ಭಿಕ್ಖುನಿಯೋ ಆಯಸ್ಮನ್ತಂ ಕಪ್ಪಿತಕಂ ಪಿಣ್ಡಾಯ ಚರನ್ತಂ। ದಿಸ್ವಾನ ಏವಮಾಹಂಸು – ‘‘ಅಯಂ ಕಪ್ಪಿತಕೋ ಜೀವತಿ, ಕೋ ನು ಖೋ ಅಮ್ಹಾಕಂ ಮನ್ತಂ ಸಂಹರೀ’’ತಿ? ಅಸ್ಸೋಸುಂ ಖೋ ಛಬ್ಬಗ್ಗಿಯಾ ಭಿಕ್ಖುನಿಯೋ – ‘‘ಅಯ್ಯೇನ ಕಿರ ಉಪಾಲಿನಾ ಅಮ್ಹಾಕಂ ಮನ್ತೋ ಸಂಹಟೋ’’ತಿ। ತಾ ಆಯಸ್ಮನ್ತಂ ಉಪಾಲಿಂ ಅಕ್ಕೋಸಿಂಸು – ‘‘ಕಥಞ್ಹಿ ನಾಮ ಅಯಂ ಕಾಸಾವಟೋ ಮಲಮಜ್ಜನೋ ನಿಹೀನಜಚ್ಚೋ ಅಮ್ಹಾಕಂ ಮನ್ತಂ ಸಂಹರಿಸ್ಸತೀ’’ತಿ! ಯಾ ತಾ ಭಿಕ್ಖುನಿಯೋ ಅಪ್ಪಿಚ್ಛಾ…ಪೇ॰… ತಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖುನಿಯೋ ಅಯ್ಯಂ ಉಪಾಲಿಂ ಅಕ್ಕೋಸಿಸ್ಸನ್ತೀ’’ತಿ…ಪೇ॰… ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಉಪಾಲಿಂ ಅಕ್ಕೋಸನ್ತೀತಿ? ‘‘ಸಚ್ಚಂ, ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ…ಪೇ॰… ಕಥಞ್ಹಿ ನಾಮ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖುನಿಯೋ ಉಪಾಲಿಂ ಅಕ್ಕೋಸಿಸ್ಸನ್ತಿ! ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ॰… ಏವಞ್ಚ ಪನ, ಭಿಕ್ಖವೇ , ಭಿಕ್ಖುನಿಯೋ ಇಮಂ ಸಿಕ್ಖಾಪದಂ ಉದ್ದಿಸನ್ತು –
Atha kho āyasmā kappitako tassā rattiyā accayena pubbaṇhasamayaṃ nivāsetvā pattacīvaramādāya vesāliṃ piṇḍāya pāvisi. Addasaṃsu kho chabbaggiyā bhikkhuniyo āyasmantaṃ kappitakaṃ piṇḍāya carantaṃ. Disvāna evamāhaṃsu – ‘‘ayaṃ kappitako jīvati, ko nu kho amhākaṃ mantaṃ saṃharī’’ti? Assosuṃ kho chabbaggiyā bhikkhuniyo – ‘‘ayyena kira upālinā amhākaṃ manto saṃhaṭo’’ti. Tā āyasmantaṃ upāliṃ akkosiṃsu – ‘‘kathañhi nāma ayaṃ kāsāvaṭo malamajjano nihīnajacco amhākaṃ mantaṃ saṃharissatī’’ti! Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo ayyaṃ upāliṃ akkosissantī’’ti…pe… saccaṃ kira, bhikkhave, chabbaggiyā bhikkhuniyo upāliṃ akkosantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo upāliṃ akkosissanti! Netaṃ, bhikkhave, appasannānaṃ vā pasādāya…pe… evañca pana, bhikkhave , bhikkhuniyo imaṃ sikkhāpadaṃ uddisantu –
೧೦೨೯. ‘‘ಯಾ ಪನ ಭಿಕ್ಖುನೀ ಭಿಕ್ಖುಂ ಅಕ್ಕೋಸೇಯ್ಯ ವಾ ಪರಿಭಾಸೇಯ್ಯ ವಾ, ಪಾಚಿತ್ತಿಯ’’ನ್ತಿ।
1029.‘‘Yā pana bhikkhunī bhikkhuṃ akkoseyya vā paribhāseyya vā, pācittiya’’nti.
೧೦೩೦. ಯಾ ಪನಾತಿ ಯಾ ಯಾದಿಸಾ…ಪೇ॰… ಭಿಕ್ಖುನೀತಿ…ಪೇ॰… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತಾ ಭಿಕ್ಖುನೀತಿ।
1030.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ಭಿಕ್ಖುನ್ತಿ ಉಪಸಮ್ಪನ್ನಂ। ಅಕ್ಕೋಸೇಯ್ಯ ವಾತಿ ದಸಹಿ ವಾ ಅಕ್ಕೋಸವತ್ಥೂಹಿ ಅಕ್ಕೋಸತಿ ಏತೇಸಂ ವಾ ಅಞ್ಞತರೇನ, ಆಪತ್ತಿ ಪಾಚಿತ್ತಿಯಸ್ಸ।
Bhikkhunti upasampannaṃ. Akkoseyya vāti dasahi vā akkosavatthūhi akkosati etesaṃ vā aññatarena, āpatti pācittiyassa.
ಪರಿಭಾಸೇಯ್ಯ ವಾತಿ ಭಯಂ ಉಪದಂಸೇತಿ, ಆಪತ್ತಿ ಪಾಚಿತ್ತಿಯಸ್ಸ।
Paribhāseyya vāti bhayaṃ upadaṃseti, āpatti pācittiyassa.
೧೦೩೧. ಉಪಸಮ್ಪನ್ನೇ ಉಪಸಮ್ಪನ್ನಸಞ್ಞಾ ಅಕ್ಕೋಸತಿ ವಾ ಪರಿಭಾಸತಿ ವಾ, ಆಪತ್ತಿ ಪಾಚಿತ್ತಿಯಸ್ಸ। ಉಪಸಮ್ಪನ್ನೇ ವೇಮತಿಕಾ ಅಕ್ಕೋಸತಿ ವಾ ಪರಿಭಾಸತಿ ವಾ, ಆಪತ್ತಿ ಪಾಚಿತ್ತಿಯಸ್ಸ। ಉಪಸಮ್ಪನ್ನೇ ಅನುಪಸಮ್ಪನ್ನಸಞ್ಞಾ ಅಕ್ಕೋಸತಿ ವಾ ಪರಿಭಾಸತಿ ವಾ, ಆಪತ್ತಿ ಪಾಚಿತ್ತಿಯಸ್ಸ।
1031. Upasampanne upasampannasaññā akkosati vā paribhāsati vā, āpatti pācittiyassa. Upasampanne vematikā akkosati vā paribhāsati vā, āpatti pācittiyassa. Upasampanne anupasampannasaññā akkosati vā paribhāsati vā, āpatti pācittiyassa.
ಅನುಪಸಮ್ಪನ್ನಂ ಅಕ್ಕೋಸತಿ ವಾ ಪರಿಭಾಸತಿ ವಾ, ಆಪತ್ತಿ ದುಕ್ಕಟಸ್ಸ। ಅನುಪಸಮ್ಪನ್ನೇ ಉಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ। ಅನುಪಸಮ್ಪನ್ನೇ ವೇಮತಿಕಾ, ಆಪತ್ತಿ ದುಕ್ಕಟಸ್ಸ। ಅನುಪಸಮ್ಪನ್ನೇ ಅನುಪಸಮ್ಪನ್ನಸಞ್ಞಾ, ಆಪತ್ತಿ ದುಕ್ಕಟಸ್ಸ।
Anupasampannaṃ akkosati vā paribhāsati vā, āpatti dukkaṭassa. Anupasampanne upasampannasaññā, āpatti dukkaṭassa. Anupasampanne vematikā, āpatti dukkaṭassa. Anupasampanne anupasampannasaññā, āpatti dukkaṭassa.
೧೦೩೨. ಅನಾಪತ್ತಿ ಅತ್ಥಪುರೇಕ್ಖಾರಾಯ, ಧಮ್ಮಪುರೇಕ್ಖಾರಾಯ, ಅನುಸಾಸನಿಪುರೇಕ್ಖಾರಾಯ, ಉಮ್ಮತ್ತಿಕಾಯ, ಆದಿಕಮ್ಮಿಕಾಯಾತಿ।
1032. Anāpatti atthapurekkhārāya, dhammapurekkhārāya, anusāsanipurekkhārāya, ummattikāya, ādikammikāyāti.
ದುತಿಯಸಿಕ್ಖಾಪದಂ ನಿಟ್ಠಿತಂ।
Dutiyasikkhāpadaṃ niṭṭhitaṃ.
Footnotes:
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಭಿಕ್ಖುನೀವಿಭಙ್ಗ-ಅಟ್ಠಕಥಾ • Bhikkhunīvibhaṅga-aṭṭhakathā / ೨. ದುತಿಯಸಿಕ್ಖಾಪದವಣ್ಣನಾ • 2. Dutiyasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ೨. ದುತಿಯಸಿಕ್ಖಾಪದವಣ್ಣನಾ • 2. Dutiyasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೧. ಪಠಮಾದಿಸಿಕ್ಖಾಪದವಣ್ಣನಾ • 1. Paṭhamādisikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨. ದುತಿಯಸಿಕ್ಖಾಪದಂ • 2. Dutiyasikkhāpadaṃ
