| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
2. දුතියසික්‌ඛාපදං
2. Dutiyasikkhāpadaṃ
887. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන භගවතා භික්‌ඛුනීනං 1 උදකසාටිකා අනුඤ්‌ඤාතා හොති . ඡබ්‌බග්‌ගියා භික්‌ඛුනියො – ‘‘භගවතා උදකසාටිකා අනුඤ්‌ඤාතා’’ති අප්‌පමාණිකායො උදකසාටිකායො ධාරෙසුං 2. පුරතොපි පච්‌ඡතොපි ආකඩ්‌ඪන්‌තා ආහිණ්‌ඩන්‌ති. යා තා භික්‌ඛුනියො අප්‌පිච්‌ඡා…පෙ.… තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො අප්‌පමාණිකායො උදකසාටිකායො ධාරෙස්‌සන්‌තී’’ති…පෙ.… සච්‌චං කිර, භික්‌ඛවෙ, ඡබ්‌බග්‌ගියා භික්‌ඛුනියො අප්‌පමාණිකායො උදකසාටිකායො ධාරෙන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො අප්‌පමාණිකායො උදකසාටිකායො ධාරෙස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
887. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhagavatā bhikkhunīnaṃ 3 udakasāṭikā anuññātā hoti . Chabbaggiyā bhikkhuniyo – ‘‘bhagavatā udakasāṭikā anuññātā’’ti appamāṇikāyo udakasāṭikāyo dhāresuṃ 4. Puratopi pacchatopi ākaḍḍhantā āhiṇḍanti. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo appamāṇikāyo udakasāṭikāyo dhāressantī’’ti…pe… saccaṃ kira, bhikkhave, chabbaggiyā bhikkhuniyo appamāṇikāyo udakasāṭikāyo dhārentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo appamāṇikāyo udakasāṭikāyo dhāressanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
888. ‘‘උදකසාටිකං පන භික්‌ඛුනියා කාරයමානාය පමාණිකා කාරෙතබ්‌බා. තත්‍රිදං පමාණං – දීඝසො චතස්‌සො විදත්‌ථියො, සුගතවිදත්‌ථියා; තිරියං ද්‌වෙ විදත්‌ථියො. තං අතික්‌කාමෙන්‌තියා ඡෙදනකං පාචිත්‌තිය’’න්‌ති.
888.‘‘Udakasāṭikaṃ pana bhikkhuniyā kārayamānāya pamāṇikā kāretabbā. Tatridaṃ pamāṇaṃ – dīghaso catasso vidatthiyo, sugatavidatthiyā; tiriyaṃ dve vidatthiyo. Taṃ atikkāmentiyā chedanakaṃ pācittiya’’nti.
කාරයමානායාති කරොන්‌තියා වා කාරාපෙන්‌තියා වා.
Kārayamānāyāti karontiyā vā kārāpentiyā vā.
පමාණිකා කාරෙතබ්‌බා. තත්‍රිදං පමාණං – දීඝසො චතස්‌සො විදත්‌ථියො, සුගතවිදත්‌ථියා; තිරියං ද්‌වෙ විදත්‌ථියො. තං අතික්‌කාමෙත්‌වා කරොති වා කාරාපෙති වා, පයොගෙ දුක්‌කටං. පටිලාභෙන ඡින්‌දිත්‌වා පාචිත්‌තියං දෙසෙතබ්‌බං.
Pamāṇikā kāretabbā. Tatridaṃ pamāṇaṃ – dīghaso catasso vidatthiyo, sugatavidatthiyā; tiriyaṃ dve vidatthiyo. Taṃ atikkāmetvā karoti vā kārāpeti vā, payoge dukkaṭaṃ. Paṭilābhena chinditvā pācittiyaṃ desetabbaṃ.
890. අත්‌තනා විප්‌පකතං අත්‌තනා පරියොසාපෙති, ආපත්‌ති පාචිත්‌තියස්‌ස . අත්‌තනා විප්‌පකතං පරෙහි පරියොසාපෙති, ආපත්‌ති පාචිත්‌තියස්‌ස. පරෙහි විප්‌පකතං අත්‌තනා පරියොසාපෙති, ආපත්‌ති පාචිත්‌තියස්‌ස. පරෙහි විප්‌පකතං පරෙහි පරියොසාපෙති, ආපත්‌ති පාචිත්‌තියස්‌ස.
890. Attanā vippakataṃ attanā pariyosāpeti, āpatti pācittiyassa . Attanā vippakataṃ parehi pariyosāpeti, āpatti pācittiyassa. Parehi vippakataṃ attanā pariyosāpeti, āpatti pācittiyassa. Parehi vippakataṃ parehi pariyosāpeti, āpatti pācittiyassa.
අඤ්‌ඤස්‌සත්‌ථාය කරොති වා කාරාපෙති වා, ආපත්‌ති දුක්‌කටස්‌ස. අඤ්‌ඤෙන කතං පටිලභිත්‌වා පරිභුඤ්‌ජති, ආපත්‌ති දුක්‌කටස්‌ස.
Aññassatthāya karoti vā kārāpeti vā, āpatti dukkaṭassa. Aññena kataṃ paṭilabhitvā paribhuñjati, āpatti dukkaṭassa.
891. අනාපත්‌ති පමාණිකං කරොති, ඌනකං කරොති, අඤ්‌ඤෙන කතං පමාණාතික්‌කන්‌තං පටිලභිත්‌වා ඡින්‌දිත්‌වා පරිභුඤ්‌ජති, විතානං වා භූමත්‌ථරණං වා සාණිපාකාරං වා භිසිං වා බිබ්‌බොහනං වා කරොති, උම්‌මත්‌තිකාය, ආදිකම්‌මිකායාති.
891. Anāpatti pamāṇikaṃ karoti, ūnakaṃ karoti, aññena kataṃ pamāṇātikkantaṃ paṭilabhitvā chinditvā paribhuñjati, vitānaṃ vā bhūmattharaṇaṃ vā sāṇipākāraṃ vā bhisiṃ vā bibbohanaṃ vā karoti, ummattikāya, ādikammikāyāti.
දුතියසික්‌ඛාපදං නිට්‌ඨිතං.
Dutiyasikkhāpadaṃ niṭṭhitaṃ.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 2. දුතියසික්‌ඛාපදවණ්‌ණනා • 2. Dutiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 3. නග්‌ගවග්‌ගවණ්‌ණනා • 3. Naggavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 1. පඨමාදිසික්‌ඛාපදවණ්‌ණනා • 1. Paṭhamādisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. දුතියසික්‌ඛාපදං • 2. Dutiyasikkhāpadaṃ
