| Library / Tipiṭaka / තිපිටක • Tipiṭaka / භික්‌ඛුනීවිභඞ්‌ග • Bhikkhunīvibhaṅga |
2. දුතියසික්‌ඛාපදං
2. Dutiyasikkhāpadaṃ
1184. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන ඡබ්‌බග්‌ගියා භික්‌ඛුනියො යානෙන යායන්‌ති. මනුස්‌සා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම භික්‌ඛුනියො යානෙන යායිස්‌සන්‌ති, සෙය්‍යථාපි ගිහිනියො කාමභොගිනියො’’ති! අස්‌සොසුං ඛො භික්‌ඛුනියො තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යා තා භික්‌ඛුනියො අප්‌පිච්‌ඡා…පෙ. … තා උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛුනියො යානෙන යායිස්‌සන්‌තී’’ති…පෙ.… සච්‌චං කිර, භික්‌ඛවෙ, ඡබ්‌බග්‌ගියා භික්‌ඛුනියො යානෙන යායන්‌තීති? ‘‘සච්‌චං, භගවා’’ති. විගරහි බුද්‌ධො භගවා…පෙ.… කථඤ්‌හි නාම, භික්‌ඛවෙ, ඡබ්‌බග්‌ගියා භික්‌ඛුනියො යානෙන යායිස්‌සන්‌ති! නෙතං, භික්‌ඛවෙ, අප්‌පසන්‌නානං වා පසාදාය…පෙ.… එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1184. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhuniyo yānena yāyanti. Manussā ujjhāyanti khiyyanti vipācenti – ‘‘kathañhi nāma bhikkhuniyo yānena yāyissanti, seyyathāpi gihiniyo kāmabhoginiyo’’ti! Assosuṃ kho bhikkhuniyo tesaṃ manussānaṃ ujjhāyantānaṃ khiyyantānaṃ vipācentānaṃ. Yā tā bhikkhuniyo appicchā…pe. … tā ujjhāyanti khiyyanti vipācenti – ‘‘kathañhi nāma chabbaggiyā bhikkhuniyo yānena yāyissantī’’ti…pe… saccaṃ kira, bhikkhave, chabbaggiyā bhikkhuniyo yānena yāyantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, chabbaggiyā bhikkhuniyo yānena yāyissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
‘‘යා පන භික්‌ඛුනී යානෙන යායෙය්‍ය, පාචිත්‌තිය’’න්‌ති.
‘‘Yāpana bhikkhunī yānena yāyeyya, pācittiya’’nti.
එවඤ්‌චිදං භගවතා භික්‌ඛුනීනං සික්‌ඛාපදං පඤ්‌ඤත්‌තං හොති.
Evañcidaṃ bhagavatā bhikkhunīnaṃ sikkhāpadaṃ paññattaṃ hoti.
1185. තෙන ඛො පන සමයෙන අඤ්‌ඤතරා භික්‌ඛුනී ගිලානා හොති, න සක්‌කොති පදසා ගන්‌තුං…පෙ.… භගවතො එතමත්‌ථං ආරොචෙසුං…පෙ.… අනුජානාමි, භික්‌ඛවෙ, ගිලානාය භික්‌ඛුනියා යානං. එවඤ්‌ච පන, භික්‌ඛවෙ, භික්‌ඛුනියො ඉමං සික්‌ඛාපදං උද්‌දිසන්‌තු –
1185. Tena kho pana samayena aññatarā bhikkhunī gilānā hoti, na sakkoti padasā gantuṃ…pe… bhagavato etamatthaṃ ārocesuṃ…pe… anujānāmi, bhikkhave, gilānāya bhikkhuniyā yānaṃ. Evañca pana, bhikkhave, bhikkhuniyo imaṃ sikkhāpadaṃ uddisantu –
1186. ‘‘යා පන භික්‌ඛුනී අගිලානා යානෙන යායෙය්‍ය, පාචිත්‌තිය’’න්‌ති.
1186.‘‘Yāpana bhikkhunī agilānā yānena yāyeyya, pācittiya’’nti.
1187. යා පනාති යා යාදිසා…පෙ.… භික්‌ඛුනීති…පෙ.… අයං ඉමස්‌මිං අත්‌ථෙ අධිප්‌පෙතා භික්‌ඛුනීති.
1187.Yāpanāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
අගිලානා නාම සක්‌කොති පදසා ගන්‌තුං.
Agilānā nāma sakkoti padasā gantuṃ.
ගිලානා නාම න සක්‌කොති පදසා ගන්‌තුං.
Gilānā nāma na sakkoti padasā gantuṃ.
යානං නාම වය්‌හං රථො සකටං සන්‌දමානිකා සිවිකා පාටඞ්‌කී.
Yānaṃ nāma vayhaṃ ratho sakaṭaṃ sandamānikā sivikā pāṭaṅkī.
යායෙය්‍යාති සකිම්‌පි යානෙන යායති, ආපත්‌ති පාචිත්‌තියස්‌ස.
Yāyeyyāti sakimpi yānena yāyati, āpatti pācittiyassa.
1188. අගිලානා අගිලානසඤ්‌ඤා යානෙන යායති, ආපත්‌ති පාචිත්‌තියස්‌ස. අගිලානා වෙමතිකා යානෙන යායති, ආපත්‌ති පාචිත්‌තියස්‌ස . අගිලානා ගිලානසඤ්‌ඤා යානෙන යායති, ආපත්‌ති පාචිත්‌තියස්‌ස.
1188. Agilānā agilānasaññā yānena yāyati, āpatti pācittiyassa. Agilānā vematikā yānena yāyati, āpatti pācittiyassa . Agilānā gilānasaññā yānena yāyati, āpatti pācittiyassa.
ගිලානා අගිලානසඤ්‌ඤා, ආපත්‌ති දුක්‌කටස්‌ස. ගිලානා වෙමතිකා, ආපත්‌ති දුක්‌කටස්‌ස. ගිලානා ගිලානසඤ්‌ඤා, අනාපත්‌ති.
Gilānā agilānasaññā, āpatti dukkaṭassa. Gilānā vematikā, āpatti dukkaṭassa. Gilānā gilānasaññā, anāpatti.
1189. අනාපත්‌ති ගිලානාය, ආපදාසු, උම්‌මත්‌තිකාය, ආදිකම්‌මිකායාති.
1189. Anāpatti gilānāya, āpadāsu, ummattikāya, ādikammikāyāti.
දුතියසික්‌ඛාපදං නිට්‌ඨිතං.
Dutiyasikkhāpadaṃ niṭṭhitaṃ.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / භික්‌ඛුනීවිභඞ්‌ග-අට්‌ඨකථා • Bhikkhunīvibhaṅga-aṭṭhakathā / 2. දුතියසික්‌ඛාපදවණ්‌ණනා • 2. Dutiyasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 2. දුතියසික්‌ඛාපදං • 2. Dutiyasikkhāpadaṃ
