| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
২. দুতিযসিক্খাপদৰণ্ণনা
2. Dutiyasikkhāpadavaṇṇanā
১০৩০. ভিক্খুনী চে ভিক্খুং অক্কোসতি, ইমিনা সিক্খাপদেন পাচিত্তিযং। ভিক্খুনিং চে অক্কোসতি, ওমসৰাদেন আপজ্জতি। ওমসৰাদে সম্মুখাৰ রুহতি, ইধ পন পরম্মুখাপি।
1030. Bhikkhunī ce bhikkhuṃ akkosati, iminā sikkhāpadena pācittiyaṃ. Bhikkhuniṃ ce akkosati, omasavādena āpajjati. Omasavāde sammukhāva ruhati, idha pana parammukhāpi.
তত্রাযং ৰিচারণা – ভিক্খুৰিভঙ্গে ওসমৰাদসিক্খাপদে ভিক্খুনী অনুপসম্পন্নট্ঠানে তিট্ঠতীতি কত্ৰা ভিক্খুনিৰিভঙ্গেপি ওমসৰাদসিক্খাপদে ভিক্খু ভিক্খুনিযা অনুপসম্পন্নট্ঠানে তিট্ঠতীতি সিদ্ধং। ইধ চ অনুপসম্পন্নস্স অক্কোসনে দুক্কটং ৰুত্তং, ভিক্খুস্স উপসম্পন্নস্স অক্কোসনে পাচিত্তিযং ৰুত্তং, তস্মা ইমানি দ্ৰে সিক্খাপদানি ভিক্খুম্হি সংসন্দিযমানানি অঞ্ঞমঞ্ঞং ন সমেন্তি। যথা সমেন্তি, তথা জানিতব্বং। তত্থ পোরাণগণ্ঠিপদে ৰুত্তনযেন ভিক্খুনীনং ওমসৰাদসিক্খাপদে অনুপসম্পন্নোতি ন গহেতব্বো, ইদমেত্থ যুত্তং। পরিভাসেয্যাতি অঞ্ঞত্র অক্কোসৰত্থূহি। তেসু হি অঞ্ঞতরস্মিং সতি ওমসৰাদপাচিত্তিযমেৰাতি একে, তং ন যুত্তং । ওমসৰাদে পাল়িমুত্তকঅক্কোসে হি দুক্কটং হোতীতি। দুক্কটোকাসে ইদং পাচিত্তিযং তেহি নিদ্দিট্ঠং হোতি, তস্মা ‘‘বালা এতা’’তি পাল়িযং ইধ আগতপদানংযেৰ ৰসেন পরিভাসনং ৰেদিতব্বং।
Tatrāyaṃ vicāraṇā – bhikkhuvibhaṅge osamavādasikkhāpade bhikkhunī anupasampannaṭṭhāne tiṭṭhatīti katvā bhikkhunivibhaṅgepi omasavādasikkhāpade bhikkhu bhikkhuniyā anupasampannaṭṭhāne tiṭṭhatīti siddhaṃ. Idha ca anupasampannassa akkosane dukkaṭaṃ vuttaṃ, bhikkhussa upasampannassa akkosane pācittiyaṃ vuttaṃ, tasmā imāni dve sikkhāpadāni bhikkhumhi saṃsandiyamānāni aññamaññaṃ na samenti. Yathā samenti, tathā jānitabbaṃ. Tattha porāṇagaṇṭhipade vuttanayena bhikkhunīnaṃ omasavādasikkhāpade anupasampannoti na gahetabbo, idamettha yuttaṃ. Paribhāseyyāti aññatra akkosavatthūhi. Tesu hi aññatarasmiṃ sati omasavādapācittiyamevāti eke, taṃ na yuttaṃ . Omasavāde pāḷimuttakaakkose hi dukkaṭaṃ hotīti. Dukkaṭokāse idaṃ pācittiyaṃ tehi niddiṭṭhaṃ hoti, tasmā ‘‘bālā etā’’ti pāḷiyaṃ idha āgatapadānaṃyeva vasena paribhāsanaṃ veditabbaṃ.
দুতিযসিক্খাপদৰণ্ণনা নিট্ঠিতা।
Dutiyasikkhāpadavaṇṇanā niṭṭhitā.
১০৩৩. ততিযসিক্খাপদং উত্তানত্থমেৰ।
1033. Tatiyasikkhāpadaṃ uttānatthameva.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / ভিক্খুনীৰিভঙ্গ • Bhikkhunīvibhaṅga
২. দুতিযসিক্খাপদং • 2. Dutiyasikkhāpadaṃ
৩. ততিযসিক্খাপদং • 3. Tatiyasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১. পঠমাদিসিক্খাপদৰণ্ণনা • 1. Paṭhamādisikkhāpadavaṇṇanā
