| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. து³தியஸிக்கா²ஸுத்தவண்ணனா
7. Dutiyasikkhāsuttavaṇṇanā
88. ஸத்தமே கோலங்கோலோதி குலா குலங் க³மனகோ. குலந்தி செத்த² ப⁴வோ அதி⁴ப்பேதோ, தஸ்மா ‘‘த்³வே வா தீணி வா குலானீ’’தி எத்த²பி த்³வே வா தயோ வா ப⁴வேதி அத்தோ² வேதி³தப்³போ³. அயஞ்ஹி த்³வே வா ப⁴வே ஸந்தா⁴வதி தயோ வா, உத்தமகோடியா ச² வா. தஸ்மா த்³வே வா தீணி வா சத்தாரி வா பஞ்ச வா ச² வாதி ஏவமெத்த² விகப்போ த³ட்ட²ப்³போ³. ஏகபீ³ஜீதி ஏகஸ்ஸேவ ப⁴வஸ்ஸ பீ³ஜங் ஏதஸ்ஸ அத்தீ²தி ஏகபீ³ஜீ. உத்³த⁴ங்ஸோதோதிஆதீ³ஸு அத்தி² உத்³த⁴ங்ஸோதோ அகனிட்ட²கா³மீ, அத்தி² உத்³த⁴ங்ஸோதோ ந அகனிட்ட²கா³மீ, அத்தி² ந உத்³த⁴ங்ஸோதோ அகனிட்ட²கா³மீ, அத்தி² ந உத்³த⁴ங்ஸோதோ ந அகனிட்ட²கா³மீ. தத்த² யோ இத⁴ அனாகா³மிப²லங் பத்வா அவிஹாதீ³ஸு நிப்³ப³த்தோ தத்த² யாவதாயுகங் ட²த்வா உபரூபரி நிப்³ப³த்தித்வா அகனிட்ட²ங் பாபுணாதி, அயங் உத்³த⁴ங்ஸோதோ அகனிட்ட²கா³மீ நாம. யோ பன அவிஹாதீ³ஸு நிப்³ப³த்தோ தத்தே²வ அபரினிப்³பா³யித்வா அகனிட்ட²ம்பி அப்பத்வா உபரிமப்³ரஹ்மலோகே பரினிப்³பா³யதி, அயங் உத்³த⁴ங்ஸோதோ ந அகனிட்ட²கா³மீ நாம. யோ இதோ சவித்வா அகனிட்டே²யேவ நிப்³ப³த்ததி, அயங் ந உத்³த⁴ங்ஸோதோ அகனிட்ட²கா³மீ நாம. யோ பன அவிஹாதீ³ஸு சதூஸு அஞ்ஞதரஸ்மிங் நிப்³ப³த்தித்வா தத்தே²வ பரினிப்³பா³யதி, அயங் ந உத்³த⁴ங்ஸோதோ ந அகனிட்ட²கா³மீ நாம.
88. Sattame kolaṃkoloti kulā kulaṃ gamanako. Kulanti cettha bhavo adhippeto, tasmā ‘‘dve vā tīṇi vā kulānī’’ti etthapi dve vā tayo vā bhaveti attho veditabbo. Ayañhi dve vā bhave sandhāvati tayo vā, uttamakoṭiyā cha vā. Tasmā dve vā tīṇi vā cattāri vā pañca vā cha vāti evamettha vikappo daṭṭhabbo. Ekabījīti ekasseva bhavassa bījaṃ etassa atthīti ekabījī. Uddhaṃsototiādīsu atthi uddhaṃsoto akaniṭṭhagāmī, atthi uddhaṃsoto na akaniṭṭhagāmī, atthi na uddhaṃsoto akaniṭṭhagāmī, atthi na uddhaṃsoto na akaniṭṭhagāmī. Tattha yo idha anāgāmiphalaṃ patvā avihādīsu nibbatto tattha yāvatāyukaṃ ṭhatvā uparūpari nibbattitvā akaniṭṭhaṃ pāpuṇāti, ayaṃ uddhaṃsoto akaniṭṭhagāmī nāma. Yo pana avihādīsu nibbatto tattheva aparinibbāyitvā akaniṭṭhampi appatvā uparimabrahmaloke parinibbāyati, ayaṃ uddhaṃsoto na akaniṭṭhagāmī nāma. Yo ito cavitvā akaniṭṭheyeva nibbattati, ayaṃ na uddhaṃsoto akaniṭṭhagāmī nāma. Yo pana avihādīsu catūsu aññatarasmiṃ nibbattitvā tattheva parinibbāyati, ayaṃ na uddhaṃsoto na akaniṭṭhagāmī nāma.
யத்த² கத்த²சி உப்பன்னோ பன ஸஸங்கா²ரேன ஸப்பயோகே³ன அரஹத்தங் பத்தோ ஸஸங்கா²ரபரினிப்³பா³யீ நாம. அஸங்கா²ரேன அப்பயோகே³ன பத்தோ அஸங்கா²ரபரினிப்³பா³யீ நாம. யோ பன கப்பஸஹஸ்ஸாயுகேஸு அவிஹேஸு நிப்³ப³த்தித்வா பஞ்சமங் கப்பஸதங் அதிக்கமித்வா அரஹத்தங் பத்தோ, அயங் உபஹச்சபரினிப்³பா³யீ நாம. அதப்பாதீ³ஸுபி ஏஸேவ நயோ. அந்தராபரினிப்³பா³யீதி யோ ஆயுவேமஜ்ஜ²ங் அனதிக்கமித்வா பரினிப்³பா³யதி, ஸோ திவிதோ⁴ ஹோதி. கப்பஸஹஸ்ஸாயுகேஸு தாவ அவிஹேஸு நிப்³ப³த்தித்வா ஏகோ நிப்³ப³த்ததி³வஸேயேவ அரஹத்தங் பாபுணாதி. நோ சே நிப்³ப³த்ததி³வஸே பாபுணாதி, பட²மஸ்ஸ பன கப்பஸதஸ்ஸ மத்த²கே பாபுணாதி, அயங் பட²மோ அந்தராபரினிப்³பா³யீ. அபரோ ஏவங் அஸக்கொந்தோ த்³வின்னங் கப்பஸதானங் மத்த²கே பாபுணாதி, அயங் து³தியோ. அபரோ ஏவம்பி அஸக்கொந்தோ சதுன்னங் கப்பஸதானங் மத்த²கே பாபுணாதி, அயங் ததியோ அந்தராபரினிப்³பா³யீ. ஸேஸங் வுத்தனயமேவ.
Yattha katthaci uppanno pana sasaṅkhārena sappayogena arahattaṃ patto sasaṅkhāraparinibbāyī nāma. Asaṅkhārena appayogena patto asaṅkhāraparinibbāyī nāma. Yo pana kappasahassāyukesu avihesu nibbattitvā pañcamaṃ kappasataṃ atikkamitvā arahattaṃ patto, ayaṃ upahaccaparinibbāyī nāma. Atappādīsupi eseva nayo. Antarāparinibbāyīti yo āyuvemajjhaṃ anatikkamitvā parinibbāyati, so tividho hoti. Kappasahassāyukesu tāva avihesu nibbattitvā eko nibbattadivaseyeva arahattaṃ pāpuṇāti. No ce nibbattadivase pāpuṇāti, paṭhamassa pana kappasatassa matthake pāpuṇāti, ayaṃ paṭhamo antarāparinibbāyī. Aparo evaṃ asakkonto dvinnaṃ kappasatānaṃ matthake pāpuṇāti, ayaṃ dutiyo. Aparo evampi asakkonto catunnaṃ kappasatānaṃ matthake pāpuṇāti, ayaṃ tatiyo antarāparinibbāyī. Sesaṃ vuttanayameva.
இமஸ்மிங் பன டா²னே ட²த்வா சதுவீஸதி ஸோதாபன்னா, த்³வாத³ஸ ஸகதா³கா³மினோ, அட்ட²சத்தாலீஸ அனாகா³மினோ, த்³வாத³ஸ ச அரஹந்தோ கதே²தப்³பா³. இமஸ்மிங் ஹி ஸாஸனே ஸத்³தா⁴து⁴ரங் பஞ்ஞாது⁴ரந்தி த்³வே து⁴ரானி, து³க்க²படிபதா³த³ந்தா⁴பி⁴ஞ்ஞாத³யோ சதஸ்ஸோ படிபதா³. தத்தே²கோ ஸத்³தா⁴து⁴ரேன அபி⁴னிவிஸித்வா ஸோதாபத்திப²லங் பத்வா ஏகமேவ ப⁴வங் நிப்³ப³த்தித்வா து³க்க²ஸ்ஸந்தங் கரோதி, அயமேகோ ஏகபீ³ஜீ. ஸோ படிபதா³வஸேன சதுப்³பி³தோ⁴ ஹோதி. யதா² சேஸ, ஏவங் பஞ்ஞாது⁴ரேன அபி⁴னிவிட்டோ²பீதி அட்ட² ஏகபீ³ஜினோ. ததா² கோலங்கோலா ஸத்தக்க²த்துபரமா சாதி இமே சதுவீஸதி ஸோதாபன்னா நாம. தீஸு பன விமொக்கே²ஸு ஸுஞ்ஞதவிமொக்கே²ன ஸகதா³கா³மிபூ⁴மிங் பத்தா சதுன்னங் படிபதா³னங் வஸேன சத்தாரோ ஸகதா³கா³மினோ, ததா² அனிமித்தவிமொக்கே²ன பத்தா சத்தாரோ, அப்பணிஹிதவிமொக்கே²ன பத்தா சத்தாரோதி இமே த்³வாத³ஸ ஸகதா³கா³மினோ. அவிஹேஸு பன தயோ அந்தராபரினிப்³பா³யினோ, ஏகோ உபஹச்சபரினிப்³பா³யீ, ஏகோ உத்³த⁴ங்ஸோதோ அகனிட்ட²கா³மீதி பஞ்ச அனாகா³மினோ, தே அஸங்கா²ரபரினிப்³பா³யினோ பஞ்ச, ஸஸங்கா²ரபரினிப்³பா³யினோ பஞ்சாதி த³ஸ ஹொந்தி, ததா² அதப்பாதீ³ஸு. அகனிட்டே²ஸு பன உத்³த⁴ங்ஸோதோ நத்தி² , தஸ்மா தத்த² சத்தாரோ ஸஸங்கா²ரபரினிப்³பா³யீ, சத்தாரோ அஸங்கா²ரபரினிப்³பா³யீதி அட்ட², இமே அட்ட²சத்தாலீஸ அனாகா³மினோ. யதா² பன ஸகதா³கா³மினோ, ததே²வ அரஹந்தோபி த்³வாத³ஸ வேதி³தப்³பா³. இதா⁴பி திஸ்ஸோ ஸிக்கா² மிஸ்ஸிகாவ கதி²தா.
Imasmiṃ pana ṭhāne ṭhatvā catuvīsati sotāpannā, dvādasa sakadāgāmino, aṭṭhacattālīsa anāgāmino, dvādasa ca arahanto kathetabbā. Imasmiṃ hi sāsane saddhādhuraṃ paññādhuranti dve dhurāni, dukkhapaṭipadādandhābhiññādayo catasso paṭipadā. Tattheko saddhādhurena abhinivisitvā sotāpattiphalaṃ patvā ekameva bhavaṃ nibbattitvā dukkhassantaṃ karoti, ayameko ekabījī. So paṭipadāvasena catubbidho hoti. Yathā cesa, evaṃ paññādhurena abhiniviṭṭhopīti aṭṭha ekabījino. Tathā kolaṃkolā sattakkhattuparamā cāti ime catuvīsati sotāpannā nāma. Tīsu pana vimokkhesu suññatavimokkhena sakadāgāmibhūmiṃ pattā catunnaṃ paṭipadānaṃ vasena cattāro sakadāgāmino, tathā animittavimokkhena pattā cattāro, appaṇihitavimokkhena pattā cattāroti ime dvādasa sakadāgāmino. Avihesu pana tayo antarāparinibbāyino, eko upahaccaparinibbāyī, eko uddhaṃsoto akaniṭṭhagāmīti pañca anāgāmino, te asaṅkhāraparinibbāyino pañca, sasaṅkhāraparinibbāyino pañcāti dasa honti, tathā atappādīsu. Akaniṭṭhesu pana uddhaṃsoto natthi , tasmā tattha cattāro sasaṅkhāraparinibbāyī, cattāro asaṅkhāraparinibbāyīti aṭṭha, ime aṭṭhacattālīsa anāgāmino. Yathā pana sakadāgāmino, tatheva arahantopi dvādasa veditabbā. Idhāpi tisso sikkhā missikāva kathitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. து³தியஸிக்கா²ஸுத்தங் • 7. Dutiyasikkhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7-10. து³தியஸிக்கா²ஸுத்தாதி³வண்ணனா • 7-10. Dutiyasikkhāsuttādivaṇṇanā
