| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
१०. दुतियसिक्खत्तयसुत्तं
10. Dutiyasikkhattayasuttaṃ
९१. ‘‘तिस्सो इमा, भिक्खवे, सिक्खा। कतमा तिस्सो? अधिसीलसिक्खा, अधिचित्तसिक्खा, अधिपञ्ञासिक्खा।
91. ‘‘Tisso imā, bhikkhave, sikkhā. Katamā tisso? Adhisīlasikkhā, adhicittasikkhā, adhipaññāsikkhā.
‘‘कतमा च, भिक्खवे, अधिसीलसिक्खा? इध, भिक्खवे, भिक्खु सीलवा होति…पे॰… समादाय सिक्खति सिक्खापदेसु। अयं वुच्चति, भिक्खवे, अधिसीलसिक्खा।
‘‘Katamā ca, bhikkhave, adhisīlasikkhā? Idha, bhikkhave, bhikkhu sīlavā hoti…pe… samādāya sikkhati sikkhāpadesu. Ayaṃ vuccati, bhikkhave, adhisīlasikkhā.
‘‘कतमा च, भिक्खवे, अधिचित्तसिक्खा? इध, भिक्खवे, भिक्खु विविच्चेव कामेहि…पे॰… चतुत्थं झानं उपसम्पज्ज विहरति। अयं वुच्चति, भिक्खवे, अधिचित्तसिक्खा।
‘‘Katamā ca, bhikkhave, adhicittasikkhā? Idha, bhikkhave, bhikkhu vivicceva kāmehi…pe… catutthaṃ jhānaṃ upasampajja viharati. Ayaṃ vuccati, bhikkhave, adhicittasikkhā.
‘‘कतमा च, भिक्खवे, अधिपञ्ञासिक्खा? इध, भिक्खवे, भिक्खु आसवानं खया अनासवं चेतोविमुत्तिं पञ्ञाविमुत्तिं दिट्ठेव धम्मे सयं अभिञ्ञा सच्छिकत्वा उपसम्पज्ज विहरति। अयं वुच्चति, भिक्खवे, अधिपञ्ञा सिक्खा। इमा खो, भिक्खवे, तिस्सो सिक्खा’’ति।
‘‘Katamā ca, bhikkhave, adhipaññāsikkhā? Idha, bhikkhave, bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati. Ayaṃ vuccati, bhikkhave, adhipaññā sikkhā. Imā kho, bhikkhave, tisso sikkhā’’ti.
‘‘अधिसीलं अधिचित्तं, अधिपञ्ञञ्च वीरियवा।
‘‘Adhisīlaṃ adhicittaṃ, adhipaññañca vīriyavā;
‘‘यथा पुरे तथा पच्छा, यथा पच्छा तथा पुरे।
‘‘Yathā pure tathā pacchā, yathā pacchā tathā pure;
यथा अधो तथा उद्धं, यथा उद्धं तथा अधो॥
Yathā adho tathā uddhaṃ, yathā uddhaṃ tathā adho.
‘‘यथा दिवा तथा रत्तिं, यथा रत्तिं तथा दिवा।
‘‘Yathā divā tathā rattiṃ, yathā rattiṃ tathā divā;
अभिभुय्य दिसा सब्बा, अप्पमाणसमाधिना॥
Abhibhuyya disā sabbā, appamāṇasamādhinā.
तमाहु लोके सम्बुद्धं, धीरं पटिपदन्तगुं॥
Tamāhu loke sambuddhaṃ, dhīraṃ paṭipadantaguṃ.
‘‘विञ्ञाणस्स निरोधेन, तण्हाक्खयविमुत्तिनो।
‘‘Viññāṇassa nirodhena, taṇhākkhayavimuttino;
पज्जोतस्सेव निब्बानं, विमोक्खो होति चेतसो’’ति॥ दसमं।
Pajjotasseva nibbānaṃ, vimokkho hoti cetaso’’ti. dasamaṃ;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / १०. दुतियसिक्खत्तयसुत्तवण्णना • 10. Dutiyasikkhattayasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / ७-१०. दुतियसिक्खासुत्तादिवण्णना • 7-10. Dutiyasikkhāsuttādivaṇṇanā
